ཉི་ཧོང་དང་རྒྱ་ནག་གི་མགོ་ཁྲིད་ཐུག་རྒྱུ་རེད།

ཁ་སང་ཉི་ཧོང་གཞུང་གིས་ཧིན་དྷུ་ནི་ཤི་ཡའི་རྒྱལ་སར་སྲིད་བློན་ཤིང་ཛོ་ཨ་བྷེ་དང་ཞི་ཅིན་ཕིན་ཐུག་སྟེ་རྒྱལ་ཁབ་གཉིས་ཀྱི་ཐབས་ཇུས་འབྲེལ་ལམ་གོང་འཕེལ་གཏོང་ཐབས་སྐོར་ལ་གྲོས་མོལ་གནང་རྒྱུ་ཡིན་སྐོར་བརྗོད་འདུག

ཁ་སང་ཉི་ཧོང་གི་གཞུང་འབྲེལ་བརྙན་འཕྲིན་བརྒྱུད་ལམ་(NHK) ཞེས་པའི་ཐོག
་གནས་ཚུལ་ཐོན་པ་ལྟར་ན། དེ་རིང་དང་སང་ཉིན་ཉིན་གཉིས་རིང་ཧིན་དྷུ་ནི་ཤི་ཡའི་རྒྱལ་ས་ཇཱ་ཀཱར་ཌར་ (Jakarta) དཔལ་འབྱོར་ཡར་རྒྱས་འགྲོ་བཞིན་པའི་ཨེ་ཤ་ཡ་དང་ཨ་ཧྥི་རི་ཁའི་རྒྱལ་ཁབ་ ༨༠ ཡི་མགོ་ཁྲིད་ལྷན་ཚོགས་དང་བསྟུན་ཏེ། ཉི་ཧོང་གི་སྲིད་བློན་ཤིང་ཛོ་ཨ་བྷེ་ཡིས་རྒྱ་ནག་གི་སྲིད་འཛིན་ཞི་ཅིན་ཕིན་ལ་ཐུག་སྟེ། རྒྱལ་ཁབ་གཉིས་བར་གྱི་ཐབས་ཇུས་འབྲེལ་ལམ་གོང་མཐོར་གཏོང་ཐབས་སྐོར་ལ་གྲོས་མོལ་གནང་རྒྱུ་ཡིན་སྐོར་བཀོད་འདུག

འདིའི་ཐད་ཉི་ཧོང་གཞུང་གི་སྤྱི་ཁྱབ་དྲུང་ཆེ་སུ་གྷ་(Yasuhide Suga)ཡིས་རྒྱལ་སྤྱིའི་བརྒྱུད་ལམ་ཁག་ཏུ་ “ད་ཐེངས་ཧིན་དྷུ་ནི་ཤི་ཡའི་རྒྱལ་སར་སྲིད་བློན་ཤིང་ཛོ་ཨ་བྷེ་དང་རྒྱ་ནག་གི་སྲིད་འཛིན་ཞི་ཅིན་ཕིན་རྣམ་གཉིས་ཐུག་རྒྱུ་ཡིན་ཡང་། ད་ལྟ་ག་དུས་ཐུག་མིན་དང་གནད་དོན་གང་གི་ཐོག་གྲོས་མོལ་བྱ་རྒྱུ་ཡིན་མིན་ཐག་གཅོད་ གང་ཡང་བྱས་མེད།”ཅེས་དང་། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པས། “བཙན་འཛུལ་བྱེད་མཁན་རྒྱལ་ཁབ་ཀྱིས་ལོ་རྒྱུས་ལ་ཕྱི་མིག་བལྟས་ཏེ། ད་ལྟ་རྒྱལ་ཁབ་གཉིས་བར་འཕྲད་བཞིན་པའི་དཀའ་རྙོག་སེལ་ནས་ཨེ་ཤ་ཡ་དང་རྒྱལ་སྤྱིའི་རྒྱལ་ཁབ་ཁག་གིས་ཡིད་ཆེས་ཐོབ་པ་ཡིན་ན། མ་འོངས་པར་ཕྱོགས་གཉིས་ཀྱི་འབྲེལ་ལམ་འཕེལ་རྒྱས་ཡོང་རྒྱུར་ཕན་ཐོགས་ཆེན་པོ་ཡོད།”ཅེས་བརྗོད་འདུག

དེ་རིང་ཉི་ཧོང་གི་རྒྱལ་སྤྱིའི་གནད་དོན་ཆེད་མཁས་པ་ཁཱེ་མོ་ཤི་ཀེ་མེ་ཡིས་ཉི་ཧོང་དུས་བབ་ཐོག རྒྱ་ནག་དང་ཉི་ཧོང་ནི་ནི་སྟོབས་ཆེན་རྒྱལ་ཁབ་ཡིན་པ་མ་ཟད་ཁྱིམ་མཚེས་ཀྱང་ཡིན་སྟབས། ད་ཐེངས་རྒྱལ་ཁབ་གཉིས་པོའི་མགོ་ཁྲིད་ཀྱིས་ཐུན་མོང་གི་ཁེ་ཕན་ལ་བསམ་ཤེས་བྱས་ནས་འབྲེལ་ལམ་བསྐྱར་གསོ་ཐུབ་པ་བྱས་ཏེ། གཅིག་ཕན་གཅིག་གྲོགས་བྱེད་དགོས་པ་ལས་ཁྱོད་ཤི་ང་གསོན་གྱི་འཐབ་རྩོད་བྱས་ན་ཕན་ཐོགས་གང་ཡང་ཡོད་མ་རེད་ཅེས་བརྗོད་འདུག

ཐེངས་འདིའི་ཧིན་དྷུ་ནི་ཤི་ཡའི་ལྷན་ཚོགས་འདི་ནི་ ༡༩༥༥ ལོར་ཨེ་ཤ་ཡ་དང་ཨ་ཧྥི་རི་ཀའི་རྒྱལ་ཁབ་བར་བྷན་ཏུང་ལྷན་ཚོགས་ (Bandung Conference)ཞེས་པ་བསྐོངས་ནས་ལོ་ ༦༠ འཁོར་བའི་དུས་དྲན་ཉིན་དང་བསྟུན་ནས་ཚོགས་བཞིན་ཡོད་པ་མ་ཟད། སྐབས་དེར་ཤིང་ཛོ་ཨ་བྷེ་ཡིས་ཉི་ཧོང་གཞུང་གིས་ཨེ་ཤ་ཡ་དང་ཨ་ཧྥི་རི་ཀའི་བརྟན་ལྷིང་སྲུང་སྐྱོབ་ཆེད་ལེགས་སྐྱེས་འབུལ་ཕྱོགས་དང་། འཛམ་གླིང་དམག་ཆེན་གཉིས་པའི་སྐབས་ཀྱི་གནད་དོན་སྐོར་ལ་གཏམ་བཤད་དང་། ཞི་ཅིན་ཕིན་གྱིས་རྒྱལ་སྤྱིའི་ཡར་ཐོན་དང་ཡར་རྒྱས་འགྲོ་བཞིན་རྒྱལ་ཁབ་བར་གྱི་དཔལ་འབྱོར་འཕེལ་རིམ་དང་། རྒྱ་ནག་གཞུང་གིས་གྲོས་འཆར་བཏོན་པའི་དར་གོས་ལམ་བུ་དང་འཛུགས་སྐྲུན་དངུལ་ཁང་གསར་འཛུགས་ཐད་ཨེ་ཤ་ཡ་དང་ཨ་ཧྥི་རི་ཁའི་རྒྱལ་ཁབ་ཁག་གིས་ནུས་པ་འདོན་སྤེལ་བྱེད་ཕྱོགས་སྐོར་ལ་གཏམ་བཤད་བྱ་རྒྱུ་ཡིན་འདུག

གསར་འགོད་པ། དོན་གྲུབ།

དུས་བབ་དྲ་ནས་