ང་ཚོ་གླེན་པའི་ཆོས་དང་རྨོངས་དད་ཆོས་ལུཊ་ཀྱི་རྗེས་སུ་འགྲོ་བཞིན་འདུག

དུས་རབས་ཉེར་གཅིག་ནང་ང་ཚོར་ཆོས་ལ་ཐེ་ཚོམ་བྱེད་མཁན་གྱི་ཚན་རིག་པའི་ཡིད་འཕྲོག་པའི་ཆོས་ཤིག་ཡོད་བཞིན་དུ། ང་ཚོ་གླེན་པའི་ཆོས་དང་རྨོངས་དད་ཆོས་ལུགས་ཀྱི་རྗེས་སུ་འགྲོ་བཞིན་འདུག དེ་ནི་ནོར་འཁྲུལ་ཆེན་པོ་ཞིག་དང་། རང་གིས་རང་ཉིད་བསླུ་བཞིན་ཡོིད་པ་མ་ཟད། བསྟན་པའི་ཞབས་འདྲེན་ཡང་ཆགས་ཀྱི་ཡོད། ཅེས་༧གོང་ས་མཆོག་གིས་གསུངས་ཡོད།

ངྷ་ས་ནང་ཆོས་གོ་སྒྲིག་ཚོགས་ཆུང་གིས་ལོ་ལྟར་འཆར་ཅན་གྱིས་གོ་སྒྲིག་ཞུ་བཞིན་ཡོད་པ་ལྟར། དེ་རིང་ཕྱི་ཚེས་ ༣ ཉིན་གྱི་སྔ་དྲོའི་ཆུ་ཚོད་ ༡༡ ཐོག་ངྷ་སྟེང་བོད་ཁྱིམ་སློབ་གྲྭའི་ཚོགས་ཁང་དུ། འཛིན་རིམ་བཅུ་བ་ཡན་གྱི་བོད་ཁྱིམ་སློབ་ཕྲུག་གཙོས་པའི་འཛམ་གླིང་ཕྱོགས་མཐའ་ནས་ཕེབས་པའི་བོད་རིགས་ན་གཞོན་སྟོང་ཕྲག་བརྒལ་བར། དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་༼འཇིག་རྟེན་ལས་འདས་པའི་བསྟོད་པ་༽དང་། རྗེ་ཙོང་ཁ་པ་ཆེན་པོས་མཛད་པའི་༼ རྟེན་འབྲེལ་བསྟོད་པ ༽གཉིས་བཀའ་ཁྲིད་གནང་མགོ་བཙུགས་ཡོད་པ་རེད།

སྐབས་དེར་ལས་རིམ་གོ་སྒྲིག་པ་བོད་མི་མང་སྤྱི་འཐུས་ཟླ་བ་ཚེ་རིང་ལགས་ཀྱིས་ངོ་སྤྲོད་གནང་དོན། འདི་ལོར་ཨ་རི་དང་ཁེ་ན་ཌ། བལ་ཡུལ། འབྲུག ཡུ་རོབ་སོགས་རྒྱལ་ཁབ་ཁག་ ༧ དང་། ལྷག་པར་དུ་རྒྱ་གར་མངའ་སྡེ་ ༢༨ ཀྱི་མཐོ་སློབ་ཁག་ ༧༨ ནས་སློབ་གཉེར་བ་ཁྱོན་ ༣༠༤༨ ཙམ་ཆེད་ཕེབས་གནང་ཡོད། དེ་དག་ཁྲོད་མཐོ་སློབ་ཁག་ནས་སློབ་མ་ ༧༥༠ ཙམ་བཅས་ལོ་སྔོན་མ་དང་བསྡུར་ན་སློབ་ཕྲུག་ ༢༠༠ ཙམ་ཇེ་མང་དུ་ཕྱིན་ཡོད། འདི་ནི་༧གོང་ས་མཆོག་གིས་ངྷ་སྟེང་བོད་ཁྱིམ་དུ་ནང་ཆོས་ངོ་སྤྲོད་གནང་བ་ཐེངས་ ༥ པ་དེ་ཆགས་ཡོད། ཅེས་བརྗོད་བྱུང་།  

ཐོག་མར་༧གོང་ས་མཆོག་གིས་ནང་ཆོས་ངོ་སྤྲོད་དང་འབྲེལ་ནས་གསུངས་དོན། རིགས་ལམ་སློབ་དགོས་དོན་ནི་སློབ་སྦྱོང་གང་བྱས་པ་ཤེས་རྟོགས་ཡོང་རྒྱུ་ཙམ་མིན་པར་དཔྱད་པ་གཏོང་སྟངས་ཤིག་བསླབ་ཀྱི་ཡོད། དཔེ་ཆའི་ནང་དོན་ཚན་བསྒྲིགས་ཏེ་རྟགས་གསལ་གཏོང་སྟངས་གསུང་གི་ཡོད་དུས། དེང་དུས་སློབ་ཚན་ནང་ང་ཚོས་དཔེ་ཆའི་དཔྱད་པ་གཏོང་སྟངས་ཀྱི་རིག་ལམ་ཞིག་བསྟན་ཡོད་པ་དེའི་ཐོག་དཔྱད་པ་གཏོང་ཐུབ་ན་ཧ་ཅང་ཕན་ཐོགས་ཡོད། ང་ཚོས་ཚན་རིག་པ་དང་བགྲོ་གླེང་བྱས་ཏེ་མི་ལོ་ ༣༠ ལྷག་ཕྱིན་ཡོད་ལ། གདན་སར་ཚན་རིག་ལ་དོ་སྣང་ཡོད་པའི་གྲྭ་བ་ཚོས་ཀྱང་ཚན་རིག་སློབ་སྦྱོང་བྱས་ཏེ་ལོ་ཤས་ཕྱིན་ཡོད། ཚན་རིག་དགེ་རྒན་ཚོ་ཚུར་ཡོང་སྐབས་བོད་ཀྱི་གྲྭ་བ་ཚོས་ཨང་རྩིས་སོགས་ཤེས་ཀྱི་མེད་ཀྱང་། དོན་དག་འགྲེལ་བཤད་རྒྱག་སྐབས་དེར་ལམ་སང་དཔྱད་པ་བྱས་ཏེ། དྲི་བ་འདོན་པ་དང་འགྲེལ་བཤད་དེར་གོ་རྟོགས་ཟབ་མོ་ཡོང་གི་ཡོད་སྟབས། དགེ་རྒན་ཚོས་བོད་ཀྱི་གྲྭ་བ་ཚོ་གཞན་དང་མི་འདྲ་བ་ཞིག་འདུག་ཟེར་ནས་ཧ་ཅང་དགའ་བོ་བྱེད་ཀྱི་ཡོད། སློབ་ཚན་གང་ཞིག་ཡིན་ནའང་སེམས་བྱུང་གི་ཐོག་ངེས་པ་རྙེད་པ་ཞིག་ཡོང་བར་དཔྱད་པ་གཏོང་རྒྱུ་ཤིན་ཏུ་གལ་ཆེན་པོ་རེད། ཅེས་གསུངས་སོང་།

༧གོང་ས་མཆོག་གིས་མུ་མཐུད་དུ་དེང་སང་སེམས་ཀྱི་བདེ་སྡུག་ལ་དོ་སྣང་བྱེད་མཁན་མང་དུ་འགྲོ་བཞིན་པའི་ཐད་ལ། དུས་རབས་ཉི་ཤུ་པའི་དུས་མཇུག་ནས།མི་ཚོས་སོ་སོའི་ཉམས་མྱོང་ཐོག་ཕྱིའི་དངོས་པོ་ཡར་རྒྱས་ཅི་ཙམ་ཕྱིན་ཡང་། སེམས་ཀྱི་སྡུག་བསྔལ་སེལ་ཐུབ་ཀྱི་མེད་པ་ར་འཕྲོད་བྱུང་ཡོད། སེམས་མ་སྐྱིད་པའི་གནས་སྐབས་སུ་རྒྱུ་དངོས་པོའི་འགྲོ་སོང་བཏང་སྟེ་བཟོ་ཐུབ་ཀྱི་མེད་ལ། སྨན་ཀྱི་ལག་རྩལ་མཁས་ཅན་ཞིག་གིས་སྨན་སྤྲད་དེ་སེམས་ཀྱི་དངངས་སྐྲག་དང་ཁེར་རྐྱང་གི་གདུང་ཚོར་མེད་པ་བཟོ་ཐུབ་ཀྱི་མེད། དེ་བཞིན། གློག་ཀླད་དང་འཕྲུལ་ཆས་རིགས་སྔར་ལས་འཁྲུག་ཆ་དོད་པོ་ཡོད་ཀྱང་། རྣམ་རྟོག་གི་ཐོག་ནས་ཡོང་བའི་མིའི་སེམས་ཀྱི་སྡུག་བསྔལ་དེ་སེལ་ཐབས་ཡོད་པ་མ་རེད། དངོས་པོ་ཡར་རྒྱས་ཁོ་ནར་བསམ་བློ་གཏོང་མཁན་གྱི་མི་དེ་ཚོས། བདེ་སྐྱིད་ཟེར་བ་དེ་གཙོ་བོ་དབང་པོ་ལྔའི་ཤེས་པ་ལས་བྱུང་བའི་ཚོར་བ་དེ་དག་ལ་བསམ་བློ་གཏོང་བཞིན་ཡོད། ང་ཚོས་དངོས་པོའི་མཐུན་རྐྱེན་ཆ་ཚང་འཛོམས་ཡོད་མཁན་གྱི་མི་ཚོར་སེམས་སྡུག་བསྔལ་གྱིས་མནར་ཡོད་པ་མང་པོ་མཐོང་ཐུབ་ཀྱི་ཡོད་ལ། དེའི་ཉམས་མྱོང་ཐོག་ཕྱིའི་དངོས་པོ་ཡར་རྒྱས་གཅིག་པུས་སེམས་ལ་ཞི་བདེ་བསླེབ་ཐུབ་ཀྱི་མེད་པ་ཤེས་ཀྱི་འདུག ཅེས་གསུངས་བྱུང་། 

ཡང་ཁོང་གིས་བོད་པ་ཚོས་ཆོས་བྱེད་ཕྱོགས་ཐད་ཀྱི་སྐྱོན་གནས་སྐོར་ལ་གསུངས་དོན། གསང་སྔགས་ཀྱི་རྟོག་པའི་གལ་གནད་རང་བཞིན་སྐོར་ལ། བོད་ཀྱི་བཤད་གྲྭ་ཁག་གིས་ལོ་ངོ་སྟོང་ཕྲག་རིང་བཤད་སྒྲུབ་གཉིས་འཛིན་ཐུབ་ཡོད་པ་ལས། དེ་མིན། བོད་ཀྱི་དགོན་པ་སྟོང་ཕྲག་མང་པོས་ཞབས་རིམ་ཙམ་བསྒྲུབ་རྒྱུ་དང་། ཁྲོམ་གཞུང་དུ་འབག་གྱོན་ཏེ་འཆམ་འཁྲབ་རྒྱུ་དང་གཏོར་མ་ཆེན་པོ་བཟོས་ཏེ་གཡུག་རྒྱུ། དེ་བཞིན་མང་ཚོགས་ཀྱི་མདུན་སར་སྣུམ་ཚ་པོའི་ནང་ཨ་རག་བླུགས་ཏེ་སྒྲ་སྒྲོག་རྒྱུ་མ་གཏོགས། ཏིང་ངེ་འཛིན་དང་བྱང་ཆུབ་སེམས། ལྷ་ཡི་རྣལ་འབྱོར། སྟོང་ཉིད་ལྟ་བ་སོགས་ལ་དོ་སྣང་གང་ཡང་མེད་ལ། ཆོས་སྐྱོང་དང་ཡི་དམ་ཟེར་མཁན་མཆེ་བ་གཙིགས་ཤིང་། ཁྲག་འཐུང་སྡོད་མཁན་དེ་ཚོ་སྒང་ལ་གསོལ་ཏེ་བསྡད་ཡོད་པ་རེད། དུས་རབས་ཉེར་གཅིག་ནང་ང་ཚོར་ཆོས་ལ་ཐེ་ཚོམ་བྱེད་མཁན་གྱི་ཚན་རིག་པའི་ཡིད་འཕྲོག་པའི་ཆོས་ཤིག་ཡོད་བཞིན་དུ། ང་ཚོ་གླེན་པའི་ཆོས་དང་རྨོངས་དད་ཆོས་ལུགས་ཀྱི་རྗེས་སུ་འགྲོ་བཞིན་འདུག དེ་ནི་ནོར་འཁྲུལ་ཆེན་པོ་ཞིག་དང་། རང་གིས་རང་ཉིད་བསླུ་བཞིན་ཡོིད་པ་མ་ཟད། བསྟན་པའི་ཞབས་འདྲེན་ཡང་ཆགས་ཀྱི་ཡོད། ཆོས་བསྒྲུབ་དང་མ་བསྒྲུབ་སོ་སོས་འདོད་པ་ཡིན་ཡང་། སྔོན་ལ་དད་པ་བྱེད་སའི་ཆོས་དེ་ཅི་འདྲ་ཡིན་མིན་ཐོག་སློབ་སྦྱོང་བྱ་རྒྱུ་ཤིན་ཏུ་གལ་ཆེན་རེད། ཅེས་དང་།

༧གོང་ས་མཆོག་གིས་མུ་མཐུད་དོན། ངོས་ནས་ཕྱི་རྒྱལ་དང་རྒྱ་གར་གང་ཡིན་ཡང་། སངས་རྒྱས་ཀྱི་ཆོས་འགྲེལ་བཤད་རྒྱག་རྒྱུ་གཙོ་བོར་འཛིན་རྒྱུ་ལས་དབང་བསྐུར་རྒྱུ་དང་བྱིན་རླབས་ཞུ་རྒྱུ་གཙོ་བོར་བརྩི་ཡི་མེད། དཔེར་ན། དུས་འཁོར་དབང་ཆེན་ཡོད་པ་རེད་ལབ་ན་མི་མང་པོ་ཞིག་ཡོང་གི་རེད། མི་མང་པོ་ཡོང་བའི་སྐབས་དང་བསྟུན་གཙོ་བོ་སྔོན་འགྲོའི་ཆོས་ལ་ནང་ཆོས་ངོ་སྤྲོད་བྱ་རྒྱུ་གཙོ་བོར་བརྩི་བཞིན་ཡོད། ནང་ཆོས་ངོ་སྤྲོད་ལབ་ན་མི་མང་པོ་ཡོང་གི་མ་རེད། དུས་འཁོར་དབང་ཆེན་འདུག་ལབ་ན་མི་མང་པོ་ཡོང་གི་ཡོད་སྟབས། ངས་སྐབས་དེ་དང་བསྟུན་ནང་ཆོས་འགྲེལ་བཤད་རྒྱག་གི་ཡོད། ཅེས་གསུངས།  

མཐའ་མར་༧གོང་ས་མཆོག་གིས་ཆོས་ཉམས་ལེན་བྱེད་སྟངས་ཐད་ལ། སྤྱིར་ང་ཚོས་ཆོས་བསྒྲུབ་རྒྱུ་ཡིན་ཟེར་སྐབས། སྐྱིད་སྡུག་ཡག་ཙམ་ཡོད་ན་འདི་མཆོད་ཁང་ཡིན་ཟེར་ནས་ཁང་མིག་ཅིག་བཞག་ཡོད་ཅིང་། དེའི་ནང་སྐུ་གསུང་ཐུགས་རྟེན་སོགས་བསྒྲིགས་ཡོད་པ་རེད། དེ་ཚོ་ཡག་པོ་དེ་ཙམ་ཡོད་པ་མ་རེད། ཕྱོགས་གཅིག་ནས་སྐུ་གསུང་ཐུགས་རྟེན་དེ་ཚོར་རིན་གོང་ཆེ་ཆུང་ལ་བལྟས་ཏེ་རྒྱུ་ཅ་ལག་གི་འདུ་ཤེས་བཟུང་བ་དང་། ཕྱོགས་གཞན་ཞིག་ནས། མཆོད་ཁང་ནང་དུ་ཆོས་བསྒྲུབས་པ་དང་མཆོད་ཁང་ཕྱི་ལོགས་སུ་ཐོན་རྗེས། རྒྱག་རེས་རྒྱག་ཐུབ་སར་རྒྱག་རེས་བརྒྱབ། མགོ་སྐོར་གཏོང་ཐུབ་སར་མགོ་སྐོར་བཏང་ན་སྙིང་པོ་ག་རེ་ཡོད་པ་རེད། ཆོས་ཟེར་བ་དེ་མགོ་སྐོར་གཏོང་རྒྱུའི་ཉེན་ཁ་བསླེབ་སྐབས་མགོ་སྐོར་མི་གཏོང་བ་དང་། རྒྱག་རེས་རྒྱག་རྒྱུའི་ཉེན་ཁ་བསླེབ་སྐབས་རྒྱག་རེས་མི་རྒྱག་པ།བསམ་ནག་བྱ་རྒྱའི་གོ་སྐབས་ཡོང་སྐབས་བསམ་ནག་མི་བྱེད་པ་དེ་འདྲ་ཞིག་རེད། དེ་མིན། ཕར་ཕྱོགས་དེར་ཆོས་བྱེད་ཀྱི་ཡོད་ཟེར་ནས་མིག་གཉིས་བཙུམས་ཏེ་སྔག་འདྲ་བགྲངས། འདོན་པ་འདྲ་འདོན་པ་དང་། དངོས་སུ་མི་ཚེ་བསྐྱལ་སྐབས་ཆག་སྡང་གིས་དབང་དུ་སོང་ན། དེ་ཆོས་ཆགས་ཀྱི་ཡོད་པ་མ་རེད། ཅེས་གསུངས་བྱུང་།