གྲྭ་ཚེ་དབང་ནོར་བུའི་སྐུ་ཕུང་དགོན་པར་ཞུཊ་འབུལ་ཞུས་འདུག།

འདོན་སྤེལ། ༢༠༡༡/༠༨/༡༨ དུས་བབ་དྲ་བ་ནས།

ཁ་སང་རྒྱ་དམག་གི་དམ་དྲག་ཆེན་པོའི་འོག་གྲྭ་ཚེ་དབང་ནོར་བུའི་སྐུ་ཕུང་རྟའུ་ཉ་མཚོ་དགོན་དུ་བཞུགས་འབུལ་ཞུས་ཡོད་འདུག སྐབས་དེར་ས་གནས་བོད་རིགས་མང་ཚོགས་ཆིག་ཁྲི་ ༡༠༠༠༠ ལྷག་འདུ་འཛོམས་ཀྱིས་མྱ་ངན་ཞུས་ཡོད་འདུག  

ཕྱི་ཚེས་ ༡༥ ཉིན་ཁམས་རྟའུ་ཉ་མཚོ་དགོན་པའི་གྲྭ་ཚེ་དབང་ནོར་བུ་ལགས་ཀྱིས་བོད་པའི་བདེན་དོན་དང་། རང་དབང་གི་ཆེད་དུ་སྐུ་ལུས་མེར་བསྲེག་བཏང་སྟེ་འདས་གྲོངས་སུ་ཕྱིན་རྗེས། རྒྱ་དམག་གིས་འདས་པོའི་ཕུང་བོ་བཙན་འཕྲོག་བྱེད་རྩིས་བྱས་ཡོད་ཀྱང་། དགོན་པའི་གྲྭ་མང་ཚོས་སྲུང་སྐྱོབ་དམ་པོས་སྐུ་ཕུང་དགོན་པར་གདན་ཞུ་གནང་སྟེ་བསྔོ་སྨོན་མཆོད་འབུལ་གནང་ཡོད།  

ངྷ་སར་གནས་སྡོད་རྟའུ་བློ་བཟང་མཁས་གྲུབ་ལགས་ཀྱིས་བརྗོད་པ་ལྟར། རྟའུ་ཉ་མཚོ་དགོན་པའི་དུར་ཁྲོད་དགོན་པའི་རྒྱབ་རིའི་ངོས་སུ་ཡོད་པ་དང་། ཁ་སང་ཕྱི་ཚེས་ ༡༧ ཉིན་གྱི་ཞོགས་པའི་ཆུ་ཚོད་ ༧ པའི་ཐོག་རྟའུ་ཉ་མཚོ་དགོན་པའི་དགེ་འདུན་པ་ཚོས་འདས་པོའི་སྐུ་ཕུང་དགོན་པའི་རྒྱབ་རིའི་སྟེང་བཞུགས་འབུལ་གནང་རྩིས་བྱས་ཡོད་ཀྱང་། རྒྱ་དམག་གིས་དགོན་པའི་མཐའ་བསྐོར་ཏེ་ཕར་འགྲོ་ཚུར་འོང་གི་ལམ་ཁ་ཡོངས་སུ་བཀག་སྡོམ་བྱས་ཡོད་སྟབས། མཐར་དམ་པ་དེའི་སྐུ་ཕུང་དགོན་པ་རང་ནས་བཞུགས་འབུལ་ཞུ་དགོས་བྱུང་ཡོད་པ་དང་། སྐབས་དེར་རྒྱ་དམག་གིས་དགོན་པ་ཡོངས་སུ་བསྐོར་ཏེ་ཕྱི་ཕྱོགས་ཀྱི་མི་གཅིག་ཀྱང་དགོན་པར་བསྐྱོད་བཅུག་མེད་པར་དམ་དྲག་ཤུགས་ཆེན་བྱས་ཡོད་ཀྱང་། སྐུ་ཕུང་བཞུགས་འབུལ་སྐབས་རྟའུ་རྫོང་དང་དགོན་པའི་ཉེ་འདབས་ཀྱི་བོད་རིགས་མང་ཚོགས་ ༡༠༠༠༠ ལྷག་དགོན་པའི་མཐའ་རུ་འཛོམས་ཏེ་འདས་པོར་མྱ་ངན་བྱས་ཡོད་འདུག

ཉེ་ཆར་གྱི་དོན་རྐྱེན་དེའི་དབང་གིས་རྒྱ་གཞུང་གིས་རྟའུ་རྫོང་ཐོག་དང་བོད་མི་འདུས་སྡོད་ཆེ་ཤོས་ཀྱི་གྲོང་སྡེ་ཁག་ཏུ། དམག་དཔུང་ཕོན་ཆེན་འགྲེམས་འཇོག་གིས་ཉིན་མཚན་དུས་དྲུག་ཏུ་ལྟ་སྲུང་ནན་མོ་བྱས་ཡོད་པ་དང་། ཉེ་ལམ་དོན་རྐྱེན་དེ་བྱུང་རྗེས་རྒྱ་གཞུང་གིས་ཉ་མཚོ་དགོན་པར་ཆུ་དང་གློག་བཅད་དེ་གྲྭ་མང་ལ་གནོན་ཤུགས་སྤྲད་ཡོད་ཀྱང་། དེ་ལ་མང་ཚོགས་ཀྱིས་ངོ་རྒོལ་ཤུགས་ཆེན་བྱས་པར་བརྟེན་ད་ཆར་བསྐྱར་དུ་ཆུ་གློག་བཏང་ཡོད་ཀྱང་། རྟའུ་བྲག་དཀར་བཙུན་དགོན་གྱིས་ཟླ་སྔོན་མར་༧གོང་ས་མཆོག་གི་འཁྲུངས་སྐར་སྲུང་གཙི་བྱས་ཡོད་སྟབས། དུས་ད་ལྟའང་བཙུན་དགོན་དེར་གློག་བཅད་ཡོད་འདུག

བློ་བཟང་མཁས་གྲུབ་ལགས་ཀྱིས་བརྗོད་དོན། “ ཉ་མཚོ་དགོན་པ་ནི་རྟའུ་ཁུལ་གྱི་དགེ་ལུགས་པའི་དགོན་པ་ཆེ་ཤོས་དེ་ཡིན་པ་དང་། དགོན་པ་དེར་ས་གནས་མང་ཚོགས་ཀྱིས་བརྩི་མཐོང་ཆེན་པོ་བྱེད་ཀྱི་ཡོད། ཕྱི་ཚེས་ ༡༧ ཉིན་ཉ་མཚོ་དགོན་པར་འདས་པོའི་སྐུ་ཕུང་བཞུགས་འབུལ་གནང་སྐབས་ཉེ་འཁོར་གྱི་བོད་མི་ཆིག་ཁྲི་ལྷག་འདུ་འཛོམས་བྱུང་འདུག དེར་རྒྱ་གཞུང་ཁོང་ཁྲོ་ལངས་ཡོད་ས་རེད། སི་ཁྲོན་ཞིང་ཆེན་གྱི་རྒྱ་རིགས་མགོ་ཁྲིད་ལིག་ཞའོ་ཕིན་ཟེར་བ་ཞིག་དགོན་པར་ཡོང་སྟེ། དགོན་པ་འདི་ཁ་བྲལ་ལས་འགུལ་སྤེལ་མཁན་གཏེ་བོ་ཞིག་ཆགས་ཡོད། ཁྱོད་ཚོས་ཡག་པོ་མ་བྱས་ན་དགོན་པ་འདི་སྒོ་རྒྱག་རྒྱུ་ཡིན་ཞེས་འཇིགས་སྐུལ་བྱས་སོང་ཟེར། ཁམས་རྟའུ་ས་ཁུལ་གྱི་སྐད་དེ་ལོག་སྐད་ཆགས་ཡོད་སྟབས། དོན་རྐྱེན་དེའི་སྐོར་རྒྱ་སྐད་ནང་མཁོ་སྤྲོད་བྱེད་པ་ལས། བོད་སྐད་ནང་གོ་བརྡ་འཕྲོད་ཀྱི་མེད་དུས་དཀའ་ངལ་ཆེན་པོ་འདུག་ ” ཅེས་བརྗོད་བྱུང་།

ཕྱི་ཚེས་ ༡༥ ཉིན་གྱི་དོན་རྐྱེན་དེ་བྱུང་རྗེས་བཙན་བྱོལ་བོད་མིའི་གཞུང་དང་གཞུང་འབྲེལ་མིན་པའི་ཚོགས་པ་ཁག་དང་བོད་དོན་རྒྱབ་སྐྱོར་ཚོགས་པ་ཁག དགོན་སྡེ་ཁག་བཅས་ཀྱིས་གདུང་སེམས་མཉམ་སྐྱེད་ཀྱི་ལས་འགུལ་འདྲ་མིན་སྤེལ་ཡོད་པ་དང་། ཕྱི་ཚེས་ ༡༦ ཉིན་དབུས་བོད་མིའི་སྒྲིག་འཛུགས་བཀའ་ཤག་དང་། ཁ་སང་ཕྱི་ཚེས་ ༡༧ ཉིན་དབུས་བོད་མི་མང་སྤྱི་འཐུས་རྒྱུན་ལས་བཅས་ཀྱིས་ཛ་དྲག་ཐོག་གསར་འགོད་གསལ་བསྒྲགས་བསྐྱངས་ཏེ། ཁམས་རྟའུ་ཉ་མཚོ་དགོན་པའི་འདས་པོ་ཚེ་དབང་ནོར་བུ་ལ་གདུང་སེམས་མཉམ་སྐྱེད་དང་། རྒྱ་ནག་གཞུང་གི་དྲག་པོའི་སྲིད་བྱུས་ལ་ངོ་རྒོལ་གྱིས་ཁམས་རྟའུ་གཙོས་པའི་བོད་ནང་གི་བོད་མི་ཚོར་དྲག་གནོན་མཚམས་འཇོག་ཡོང་བའི་འབོད་སྐུལ་ཞུས་འདུག

   

ཁམས་རྟའུ་རྫོང་ནི་རྒྱ་བོད་ས་མཚམས་ཀྱི་བོད་རིགས་རྫོང་ཞིག་ཡིན་ཞིང་། རྫོང་དེར་ཁྱོན་བོད་མི་ ༥༠༠༠༠ ཙམ་ཡོད་འདུག ཉ་མཚོ་དགོན་པར་བོད་ས་མ་ཤོར་གོང་གྲྭ་བ་ ༢༠༠༠ ལྷག་ཡོད་ཀྱང་ད་ཆར་གྲྭ་བ་  ༣༠༠ ཙམ་ལས་མི་འདུག

གསར་འགོད་པ། དཔལ་ལྡན།