ཚེ་མཆོག་གླིང་གི་དགེ་འདུན་པ་ ༢༩ རྩ་དགོངས་ཞུས་འདུག

༢༠༡༡/༠༩/༡༣     དུས་བབ་གསར་འགྱུར་ཁང་ནས།

བདུན་ཕྲག་སྔོན་མའི་ནང་ཚེ་མཆོག་གླིང་གི་དགོན་བདག་བླ་མ་ཕེབས་ཏེ་དགོན་པའི་རྙོག་གླེང་ཐག་གཅོད་ཅིག་གནང་ཡོད་པའི་ནང་། དགོན་པའི་མཁན་པོ་དང་དབུ་མཛད། དགེ་བསྐོས་སོགས་དགེ་འདུན་པ་ ༦ གིས་རྩ་དགོངས་ཞུ་དགོས་སྐོར་བཀོད་ཡོད་སྟབས། གྲྭ་མང་ཚོས་དེ་ལ་མོས་མཐུན་མ་གནང་བར་སྔ་ཕྱིར་གྲྭ་བ་ ༢༩ དགོན་པ་ནས་ཐོན་འདུག

ངྷ་ས་ཚེ་མཆོག་གླིང་གི་དགོན་བདག་བླ་མ་བསྟན་འཛིན་དགེ་ལེགས་རིན་པོ་ཆེ་མཆོག་འབྲས་ལྗོངས་རྒྱལ་ས་སྒང་ཐོག་ནས་བཞུགས་སྒར་ཚེ་མཆོག་གླིང་དགོན་པར་ཕེབས་ཏེ། ཟླ་འདིའི་ཕྱི་ཚེས་ ༧ ཉིན་ཚེ་མཆོག་གླིང་དགོན་པའི་རྙོག་གླེང་སྐོར་ལ་མཁན་པོ་དང་དབུ་མཛད། དགེ་བསྐོས་གཙོས་པའི་དགེ་འདུན་པ་ ༦ དུས་ཚོད་རྒྱས་བཅད་ནང་དགོན་པ་ནས་རྩ་དགོངས་ཞུ་དགོས་པའི་ཐག་གཅོད་ཅིག་གནང་ཡོད་པ་དང་། དེ་ལ་དགོན་པའི་གྲྭ་བ་གཞན་མང་པོ་ཞིག་གིས་མོས་མཐུན་མ་གནང་བར། ཉིན་དེ་རང་ལ་དགོན་པའི་མཁན་པོ་གཙོས་པའི་དགེ་འདུན་པ་ ༢༩ ཚེ་མཆོག་གླིང་དགོན་པ་ནས་ཐོན་ཡོད་འདུག དེའི་ཁྲོད་ཀྱི་གྲྭ་བ་ ༡༡ ཙམ་ཕྱིར་རང་ཡུལ་འབྲས་ལྗོངས་སུ་ལོག་ཡོད་པ་དང་། མཁན་པོ་བསྟན་འཛིན་དོན་བཟང་མཆོག་སྐུ་གཟུགས་བདེ་མིན་གྱིས་མ་ཎ་ལིར་ཕེབས་ཡོད་འདུག བཞུགས་སྒར་ཉེ་འཁོར་གྱི་གྲྭ་བ་ ༣ སོ་སོའི་ཁྱིམ་དུ་ལོག་ཡོད་པ་དང་། གཞན་བོད་ནས་ཕེབས་པའི་གྲྭ་བ་ ༡༤ ཙམ་ལ་འགྲོ་ཡུལ་འདུག་ཡུལ་མ་རག་པར་གནས་སྐབས་རིང་ངྷ་ས་སྟོད་པ་སྐྱིད་སྡུག་ཚོགས་ཁང་དུ་བཞུགས་འདུག

ཐེངས་འདིར་དགོན་བདག་བླ་མ་མཆོག་གིས་མིང་འདོན་གྱིས་ཚེ་མཆོག་གླིང་དགོན་པའི་དགེ་འདུན་པ་ ༦ གིས་རྩ་དགོངས་ཞུ་དགོས་པའི་ཐག་གཅོད་གནང་བ་དེ་དག་ནི། ཚེ་མཆོག་གླིང་གི་ཕྱག་མཛོད་ཐུབ་བསྟན་སྙན་གྲགས་ལགས་ཀྱིས་དེ་སྔོན་མེག་ལོར་ཧྥོ་སིར་གྷན་ཇི་ཡི་རྒྱ་གར་ཉེན་རྟོག་ལས་ཁུངས་སུ་མིང་ཐོ་སྤྲད་དེ་ཟླ་ ༧ ཚེས་ ༩ ཉིན་རྒྱ་གར་ཉེན་རྟོག་པས་བཀག་ཉར་བྱས་པའི་གྲྭ་བ་དག་ཡིན་ཞིང་། ཐེངས་འདིར་ཁོང་ཅག་ལ་དགོན་པའི་ལས་སྣེ་ཚོས་མཐའ་མའི་ཐག་གཅོད་གང་ཡིན་གྱི་ཡིག་ཆ་ཞིག་སྤྲད་ཡོད་པའི་ནང་། “ ཕྱི་ལོ་ ༢༠༡༡ ཟླ་ ༥ པའི་ཚེས་ ༡༥ ནས་ད་ལྟ་བར་མཁན་རིན་པོ་ཆེ་དགེ་བཤེས་བསྟན་འཛིན་དོན་བཟང་གིས་གཙོ་བོ་བྱས་ཏེ་ཡུན་རིང་རྙོག་གླེང་འཁྲུན་ཐག་མ་ཆོད་པར་བརྟེན། ཕྱི་ལོ་ ༢༠༡༡ ཟླ་ ༩ པའི་ཚེས་ ༧ ཉིན་གྱི་ཆུ་ཚོད་ ༡༠།༣༠ ཐོག་ཚེ་མཆོག་གླིང་མཆོག་སྤྲུལ་རིན་པོ་ཆེ་དབུ་བཞུགས་ཐོག་ལས་སྣེ་ལྷན་རྒྱས་ཚོགས་འདུ་རྒྱས་འཛོམས་ཀྱི་སར་ཕན་ཚུན་གྲོས་བསྡུར་ལན་མང་ཞུས་པའི་མཐའ་དོན། དགེ་བཤེས་བསྟན་འཛིན་དོན་བཟང་དང་བསྟན་འཛིན་དོན་འགྲུབ། བཀྲིས་རྒྱལ་མཚན། སྐར་མ་འོད་ཟེར། བྱམས་པ་མཁྱེན་རབ། བསྟན་འཛིན་བྱམས་བརྩེ། བཅས་ནས་རང་མོས་ཀྱིས་གྲྭ་ཚང་ནས་རྩ་དགོངས་ཞུ་དགོས་པ་དང་། དུས་ཚོད་རྒྱས་བཅད་ནང་གྲྭ་ཚང་ནས་ཕྱིར་ཐོན་གནང་དགོས་པའི་གྲོས་ཆོད་དུ། ཚེ་མཆོག་གླིང་ཡིག་ཚང་ནས ”  ཞེས་འཁོད་འདུག

ཕྱི་ཚེས་ ༨ ཉིན་འདི་གའི་གསར་འགོད་པས་དགོན་བདག་བླ་མ་བསྟན་འཛིན་དགེ་ལེགས་རིན་པོ་ཆེ་མཆོག་ལ་ཐུག་འཕྲད་བྱས་ཏེ། ཐེངས་འདིའི་ཐག་གཅོད་ཀྱི་བྱུང་རིམ་སྐོར་ལ་བཅར་འདྲི་ཞུས་པར་ཁོང་གིས “ ཚེ་མཆོག་གླིང་དགོན་པའི་རྙོག་དྲ་དེ་གཙོ་བོ་འཛིན་སྐྱོང་གི་ཐོག་ནས་བྱུང་བ་རེད། ཉེ་ཆར་གནས་ཚུལ་བྱུང་མ་ཐག་ནས་བཟུང་ཕྱག་མཛོད་དང་གྲྭ་མང་ཚོས་དགོན་པའི་དཀའ་ངལ་སྐོར་ང་ལ་སྙན་སེང་ཞུས་སོང་། ང་རང་གི་ངོས་ནས་ཁོང་ཚོར། ང་མ་འབྱོར་སྔོན་ལ་ཕྱོགས་གཉིས་ངོས་ནས་ཞི་འཇགས་ཡོང་ཐབས་ལ་འབད་བརྩོན་གནང་དགོས། གལ་སྲིད་རྙོག་དྲ་ཆེ་རུ་ཕྱིན་ན་ཡུལ་ཁྲིམས་དང་འགལ་ཏེ་དཀའ་ངལ་ཆེན་པོ་ཡོང་གི་རེད། ཅེས་སྔ་ཕྱི་ཐེངས་མང་པོ་ཡིག་ཐོག་ནས་འབོད་སྐུལ་ཞུས་པ་ཡིན། ཕྱིས་སུ་གྲྭ་བ་ཚོའི་ངོས་ནས་མུ་མཐུད་ཡི་གེ་བཀྲམས་པ་དང་། ཕྱག་མཛོད་ཀྱི་མོ་ཊར་འདམ་བྱུགས་པ། ཁང་པར་རྡོ་གཡུགས་པ་སོགས་བྱས་འདུག  མི་སུ་ཡིན་ཡང་སོ་སོའི་སྲོག་ལ་ཉེན་ཁ་ཡོད་ན། སྲུང་སྐྱོབ་བྱེད་པའི་དབང་ཆ་ཡོད་སྟབས། ཕྱག་མཛོད་ཀྱིིས་ཉེན་རྟོག་ལས་ཁུངས་ལ་སྙན་ཞུ་ཕུལ་ཏེ་གྲྭ་བ་ཁག་ཅིག་འཛིན་བཟུང་བྱས་འདུག གནས་ཚུལ་དེ་དག་གི་ཐོག་ནས་ང་རང་དགའ་བོ་བྱུང་མ་སོང་། རྗེས་སུ་ངས་ཡང་བསྐྱར་དབྱིན་ཡིག་ཐོག གལ་སྲིད། ཁྱེད་ཚོ་ཡག་པོ་བསྡད་ན་བཟང་གི་རེད། རྗེས་མ་ས་གནས་གཞུང་གི་ཁྲིམས་ཐོག་ནས་དགོན་པ་ནས་ཕྱིར་ཕུད་གཏོང་དགོས་པའི་གནས་སྟངས་ཆགས་ན་ཡག་པོ་ཡོད་པ་མ་རེད། ཅེས་འབོད་སྐུལ་ཐེངས་མང་ཞུས་པ་ཡིན ” ཞེས་བརྗོད་བྱུང་།

ཡང་དགོན་བདག་བླ་མ་མཆོག་གིས།  ཐེངས་འདིར་ང་ལ་དུས་ཚོད་ཐུང་ཐུང་ཞིག་རག་སྟེ་འདིར་ཡོང་རྗེས་དགོན་པའི་གནས་ཚུལ་ལ་རྒྱུས་ལོན་དང་ཕྱོགས་གཉིས་ཀྱི་གནས་ཚུལ་ལ་རྒྱུས་ལོན་བྱས་པ་ཡིན། ད་ལྟའི་བར་ཚེ་མཆོག་གླིང་དགོན་པའི་ནང་དཀའ་ལས་བརྒྱབ་སྟེ་དགོན་པ་ཡག་ཐག་ཆོད་ཆགས་སུ་འཇུག་མཁན་ཕྱག་མཛོད་བཀྲ་ཤིས་རྒྱལ་མཚན་དང་ཕྱག་མཛོད་ཐུབ་བསྟན་སྙན་གྲགས་ཁོང་ཚོ་མི་ཁག་ཅིག་ཡོད། གལ་སྲིད། གྲྭ་མང་གི་ངོས་ནས་ང་ལ་མཁན་པོ་དང་ཕྱག་མཛོད་གཉིས་ཀྱི་སུ་བདམས་དགོས་ཞེས་བཤད་པ་ཡིན་ན། ངས་ཕྱག་མཛོད་འདེམས་རྒྱུ་ཡིན། གང་ཡིན་ཞེ་ན། མཁན་པོ་ལ་མཚོན་ན་ལོ་གཉིས་གསུམ་ལས་ཕྱིན་མེད་ལ། གྲྭ་བ་ཁ་ཤས་ལོ་ ༨ ལྷག་ལས་ཕྱིན་མེད། ལོ་མང་པོ་དགོན་པར་དཀའ་ལས་རྒྱག་མཁན་དགོན་པ་ནས་ཕྱིར་འཕུད་བྱ་དགོས་པ་དེ་ཡག་པོ་མ་རེད། དེར་བརྟེན། མཁན་པོ་དང་ཁོང་ཚོར་བསམ་བློ་ཡག་པོ་བཏང་སྟེ་དགོངས་པ་ཞུ་དགོས་པའི་རེ་སྐུལ་ཞུས་པ་ལྟར་ཁོང་ཅག་གིས་དགོངས་པ་ཞུས་སོང་། ཐག་གཅོད་འདི་ཆོས་རིག་ལས་ཁུངས་དང་ས་གནས་མགོ་འཛིན་སོགས་ལ་འབྲེལ་བ་མེད་པར་ང་ཚོ་རང་ངོས་ནས་ཐག་གཅོད་བྱས་པ་ཡིན ” ཞེས་བརྗོད་བྱུང་།

གསར་འགོད་པས་ཁོང་ལ། ཉེ་སྔོན་ཕྱི་ཟླ་ ༧ ཚེས་ ༢༥ ཉིན་དགོན་པའི་མཁན་པོ་དང་ཕྱག་མཛོད། ངྷ་ས་ས་གནས་མགོ་འཛིན་སོགས་ལྷན་བཞུགས་ཀྱི་ཐག་གཅོད་ཅིག་བྱུང་ཡོད་པའི་ནང་། ཚེ་མཆོག་གླིང་རིན་པོ་ཆེ་ཕེབས་མ་ཐག་དགོན་པའི་འགན་འཛིན་ལྷན་ཚོགས་ཀྱི་ཚོགས་མི་ ༧ ཁ་སྐོང་འོས་འདེམས་བྱ་དགོས་སྐོར་དང་། ཐུབ་བསྟན་སྙན་གྲགས་ཀྱིས་མ་འོངས་པར་དགོན་པའི་ནང་ཆང་འཐུང་བ་དང་བུད་མེད་ཞག་སྡོད་བྱེད་བཅུག་མི་ཆོག་པའི་སྐོར་སོགས་བཀོད་འདུག དེ་ད་ཆར་ལག་བསྟར་གནང་འཆར་ཡོད་མེད་དྲིས་པར། “ ཕྱག་མཛོད་ལགས་ཀྱིས་དགོན་པའི་ནང་ཆང་བཏུང་ཡོད་མེད་དེ་ང་རང་སྒང་ཐོག་ཏུ་བསྡད་ཡོད་པས་ངས་ཤེས་ཀྱི་མེད། སྐྱེས་དམན་ཉར་མིན་དེ་སོ་སོ་རང་གི་འདོད་པ་རེད། ངས་ཁོང་ལ་ཆང་ས་རྒྱག་ཆོག་གི་མ་རེད། སྐྱེས་དམན་ཉར་ཆོག་གི་མ་རེད། ཅེས་བཤད་རྒྱུའི་དབང་ཆ་ཡོད་པ་མ་རེད། སྐྱེས་དམན་འཁྲིད་མིན་དེ་ཁོང་སྒེར་གྱི་གནད་དོན་རེད་མ་གཏོགས་དགོན་པ་དང་འབྲེལ་བ་ཡོད་པ་མ་རེད། དགོན་པ་གཞན་པར་མཚོན་ནའང་། ཕྱག་མཛོད་སྐྱེས་དམན་ཉར་མཁན་དེ་འདྲ་ཡོད་པ་རེད། ང་རང་ལ་མཚོན་ནའང་། ང་བླ་མ་རེད་ལ་སྐྱེས་དམན་ཡང་ཡོད། དེ་ང་རང་སྒེར་གྱི་གནད་དོན་རེད། མི་སྒེར་གྱི་གནད་དོན་ལ་སུ་གང་གིས་ཐེ་གཏོགས་བྱ་རྒྱུའི་དབང་ཆ་ཡོད་པ་མ་རེད། དགོན་པའི་འགན་འཛིན་ལྷན་ཚོགས་བསྐོ་བཞག་སོགས་ལས་དོན་གཞན་དག་རིམ་པས་ཡར་རྒྱས་གཏོང་འཆར་ཡོད།  ”  ཅེས་བརྗོད་བྱུང་།

ཕྱི་ཚེས་ ༡༡ ཉིན་གསར་འགོད་པ་ཆེད་དུ་ངྷ་ས་སྟོད་པ་སྐྱིད་སྡུག་ཚོགས་ཁང་དུ་གནས་ཚང་གཡར་ཡོད་པའི་ཚེ་མཆོག་གླིང་གི་དགེ་འདུན་པ་དག་གི་སར་བཅར་ཏེ། ཚེ་མཆོག་གླིང་གི་དབུ་མཛད་བསྟན་འཛིན་དོན་འགྲུབ་ལགས་སུ་བཅར་འདྲི་བྱས་པར་ཁོང་གིས། “ ཉེ་ཆར་བྱུང་བའི་དགོན་པའི་རྙོག་དྲ་ཐག་གཅོད་ཐད། ཟླ་འདིའི་ཕྱི་ཚེས་ ༧ ཉིན་ཚེ་མཆོག་གླིང་གི་བླ་མ་བསྟན་འཛིན་དགེ་ལེགས་རིན་པོ་ཆེ་མཆོག་སྒང་ཏོག་ནས་དགོན་པར་ཕེབས་སོང་། ཉིན་དེར་བླ་མ་ཁོང་དང་ཕྱག་མཛོད་དང་མཉམ་དུ་ཉེན་རྟོག་པ་ ༤ ཡང་མཉམ་འཁྲིད་བྱས་འདུག ཐོག་མར་ཕན་ཚུན་གྱི་བསམ་ཚུལ་བསྡུ་ལེན་བྱས་པ་རེད། ཡིན་ནའང་། ང་ཚོ་གྲྭ་མང་གི་བསམ་ཚུལ་བཤད་སྐབས་ཉན་འདོད་མེད་པའི་རྣམ་འགྱུར་བསྟན་པ་མ་ཟད། ད་ལྟའི་བར་ཚེ་མཆོག་གླིང་དགོན་པའི་ཆེད་དུ་དཀའ་ལས་རྒྱག་མཁན་གཙོ་བོ་ཕྱག་མཛོད་རེད། ང་རང་གི་ངོས་ནས་ཕྱག་མཛོད་དང་མཁན་པོ་གཉིས་ལས་ཕྱག་མཛོད་བདམས་རྒྱུ་ཡིན་གསུངས་ཏེ། མཁན་པོ་གཙོས་པའི་གྲྭ་པ་དྲུག་གི་མིང་བཏོན་སྟེ། ཁྱེད་རང་ཚོ་དགོན་པ་ནས་ཕྱིར་འཕུད་བཏང་ཚེ་གྲྭ་ཚང་ལ་མིང་འཆལ་ངན་པ་ཡོང་གི་རེད། དེ་བས་རང་ངོས་ནས་དགོངས་པ་ཞུས་ན་ཡག་གི་རེད། གལ་སྲིད། ཆུ་ཚོད་ ༢༤ རིང་དགོངས་པ་མ་ཞུས་པ་ཡིན་ན། ཁྲིམས་ཐོག་ལ་བསྐྱལ་རྒྱུ་ཡིན་གསུངས་སོང་། དེར་བརྟེན། ཉིན་དེར་སྔ་ཕྱིར་ང་ཚོ་གྲྭ་བ་ ༢༩ ཙམ་དགོན་པ་ནས་རྩ་དགོངས་ཞུས་ཏེ་ཐོན་པ་ཡིན། ”  ཞེས་བརྗོད་བྱུང་།

ཡང་ཁོང་གིས་མུ་མཐུད་གསུངས་དོན། “ ཉིན་དེར་ང་ཚོའི་ངོས་ནས་རིན་པོ་ཆེ་མཆོག་ལ་གྲྭ་ཚང་གི་འདུལ་ཁྲིམས་ཉམས་ཆག་འགྲོ་བཞིན་པ་དང་། དགོན་པའི་ནང་ཆང་རག་བཏུང་བ་དང་བུད་མེད་འཁྲིད་ཡོང་བ་བཅས་ཀྱི་བདེན་དཔང་ལ་ཤེལ་དམ་དང་པར་རིས་སོགས་བསྟན་པ་ཡིན། འོན་ཀྱང་ཁོང་གིས་གྲྭ་མང་གི་བསམ་ཚུལ་དང་བདེན་དཔང་དེ་དག་ལ་མི་གཟིགས་པར་ཁོང་ཅག་ནང་ཁུལ་ནས་ཐག་གཅོད་བྱས་པ་ཞིག་ཁྱབ་བསྒྲགས་བྱས་སོང་། ཉིན་དེའི་ཕྱི་དྲོ་གྲྭ་པ་ ༢༣ཙམ་གྱིས་ཐག་གཅོད་དེར་བློ་ཕམ་བྱུང་སྟེ་དགོན་པ་ནས་རྩ་དགོངས་ཞུས་པ་རེད། ཐག་གཅོད་དེ་རྩ་བ་ནས་དྲང་བདེན་ཞིག་བྱུང་ཡོད་པ་མ་རེད། འོན་ཀྱང་། ང་ཚོའི་ངོས་ནས་ཁྲིམས་གཏུག་བྱ་འདོད་དེ་འདྲ་མེད། ད་ལྟའི་བར་ང་ཚོའི་ངོས་ནས་རེ་བ་ཞུ་ས་ཡོད་ཚད་ལ་ཞུས་ཀྱང་། གནས་ཚུལ་ལ་བདག་པོ་རྒྱག་མཁན་ཞིག་བྱུང་མ་སོང་། ད་ཆར་ང་ཚོའི་རེ་བ་ཆེ་ཤོས། གནས་ཚུལ་འདིའི་སྐོར་༧གོང་ས་མཆོག་ལ་སྙན་སེང་ཞུ་རྒྱུ་དེ་ཁོ་ན་ཡིན། གལ་སྲིད། སྙན་སེང་ཞུ་རྒྱུའི་གོ་སྐབས་མ་བྱུང་ཡང་སྙན་ཞུ་ཞིག་འབུལ་ལམ་ཆོག་པའི་ལམ་ཁ་འཚོལ་བཞིན་ཡོད། ” ཅེས་བརྗོད་བྱུང་།

དེ་རིང་ཞོགས་པར་བོད་གཞུང་ཆོས་རིག་དྲུང་ཆེ་ངག་ཆོས་གྲགས་ལགས་སུ་ཚེ་མཆོག་གླིང་གི་ཛ་དྲག་གི་གནས་སྟངས་དེའི་སྐོར་གོ་ཐོས་ཡོད་མེད་དང་། ཡོད་ཚེ་དེ་ལ་ཐག་གཅོད་གང་འདྲ་གནང་འཆར་ཡོད་མེད་བཅར་འདྲི་བྱས་པར་ཁོང་གིས། “ སྤྱིར་བཏང་ཆོས་རིག་ལས་ཁུངས་ཀྱིས་བཙན་བྱོལ་བོད་མིའི་དགོན་སྡེ་ཁག་ལ་ལྟ་རྟོག་བྱེད་ཀྱི་ཡོད་པ་རེད། ཡིན་ནའང་། དགོན་སྡེ་ཁག་གི་སྒྲིག་སྲོལ་མང་ཆེ་བ་ཆོས་རིག་གི་ཐད་ཀའི་ལྟ་སྐྱོང་འོག་ཡོད་པ་མ་རེད། དགོན་སྡེ་སོ་སོས་འགན་འཁུར་གྱི་ཡོད། ཚེ་མཆོག་གླིང་ལ་མཚོན་ནའང་། ཚེ་མཆོག་གླིང་རིན་པོ་ཆེ་ཁོང་ད་ལྟའི་བར་ལས་བྲེལ་གྱི་དབང་གིས་ཕེབས་ཐུབ་མེད་པ་ལས། དགོན་པར་རྒྱུན་དུ་ལྟ་རྟོག་དང་ཐུགས་འཁུར་གནང་གི་འདུག་ལ། ཕྱི་ཚེས་ ༧ ཉིན་གྱི་ཡར་སྔོན་ནས་དགོན་པར་འབོད་སྐུལ་ཐེངས་མང་ཞུས་འདུག  ང་ཚོའི་ངོས་ནས་ཀྱང་དགོན་པར་ཐེངས་མང་རིང་འབོད་སྐུལ་ཞུས་པ་ཡིན། ཉེ་ཆར་དགོན་པའི་བླ་མ་མཆོག་འདིར་ཕེབས་ཏེ་གནས་ཚུལ་ཐག་གཅོད་བྱུང་བའི་སྐོར་སྙན་སེང་ཞུས་སོང་། དེར་བརྟེན། ང་ཚོའི་ངོས་ནས་དགོན་བདག་བླ་མ་རང་གིས་ཐག་གཅོད་གང་གནང་བ་དང་། ཁོང་གིས་ང་ཚོར་སྙན་གསེང་གང་ཞུས་པ་དེ་ལ་ངོས་འཛིན་བྱེད་ཀྱི་ཡོད། གྲྭ་བ་ཚོའི་ཕྱོགས་ནས་ང་ཚོར་གནས་ཚུལ་གང་ཡང་འབྱོར་མ་སོང་། ཆོས་རིགས་ལས་ཁུངས་ཀྱི་ངོས་ནས་ད་ལྟའི་ཆར་དཀའ་ངལ་སེལ་ཐབས་ཀྱི་འཆར་གཞི་དེ་འདྲ་གང་ཡང་མེད” ཅེས་བརྗོད་བྱུང་།

ཚེ་མཆོག་གླིང་གྲྭ་ཚང་ནི་ ༡༩༧༦ ལོར་ཐོག་བོད་གཞུང་ཟློས་གར་ཚོགས་པའི་ཡང་སྟེང་ར་ཤི་བྷང་ཞེས་པར་གསར་བཞེངས་བྱས་ཤིང་། ༡༩༨༤ ལོར་ད་ལྟའི་དབེན་གནས་དེ་རུ་གནས་སྤར་ཡོད། ད་ལྟའི་ཆར་བོད་ནས་ཕེབས་མཁན་དང་གཞིས་ཆགས་ཁུལ་ནས་ཕེབས་མཁན། ཧི་མ་ལ་ཡའི་རི་རྒྱུད་ནས་ཕེབས་མཁན་བཅས་ཁྱོན་བསྡོམས་དགེ་འདུན་པ་ ༤༨ ཙམ་ཡོད་འདུག

གསར་འགོད་པ། དོན་གོ

ཤོག་ངོས་འདི་ཐེངས་ ༡༠༥༥ ལ་བཀླགས་འདུག