བོད་པའི་བུ་མོ་གྱད་ཆེན་མ།

དུས་བབ་གསར་ཁང་ནས།

འདོན་སྤེལ། ༢༠༡༡/༠༩/༢༡

བོད་པའི་བུ་མོ་རང་ལོ་ ༢༣ སོན་པ་ཤི་ལོག་སྒྲོག་མ་ཞུ་བར་ཊར་ཀེ་ནང་ཚོགས་པའི་རྒྱལ་སྤྱིའི་བུད་མེད་གྱད་རྩལ་འཇུ་རེས་འགྲན་བསྡུར་ཁྲོད་ཨང་དང་པོ་གསེར་གྱི་རྟགས་མ་ཐོབ་འདུག

ཟླ་འདིའི་ཕྱི་ཚེས་ ༡༢ ཉིན་ནས་དབུ་འཛུགས་ཀྱིས་ཊུར་ཀེ་(Turkey)རྒྱལ་ཁབ་ཀྱི་གྲོང་ཁྱེར་ཨིས་ཊན་བྷུལ་(Istanbul) ནང་ཚོགས་པའི་རྒྱལ་སྤྱིའི་བུད་མེད་གྱད་རྩལ་འཇུ་རེས་(wrestling) འགྲན་བསྡུར་གྱི་ཉིན་མཐའ་མ་སྟེ། ཕྱི་ཚེས་ ༡༦ ཉིན་གྱི་རྟིང་རྩོད་འགྲན་བསྡུར་སྟེང་སོག་པོའི་བུ་མོ་ཞིག་དང་། བོད་རིགས་བུ་མོ་ཤི་ལོག་སྒྲོལ་མ་གཉིས་མཐའ་མའི་རྩལ་འགྲན་བྱས་ཏེ། བུ་མོ་ཤི་ལོག་སྒྲོལ་མ་ལགས་སུ་ ༢༠༡༡ལོའི་རྒྱལ་སྤྱིའི་བུད་མེད་གྱད་འགྲན་རྩེད་མོའི་ཨང་དང་པོ་གསེར་གྱི་རྟགས་མ་ཐོབ་འདུག ཐེངས་འདི་ནི་བོད་པའི་བུ་མོ་ཞིག་ལ་རྒྱལ་སྤྱིའི་བུད་མེད་གྱད་རྩལ་འགྲན་བསྡུར་ཁྲོད་གསེར་གྱི་རྟགས་མ་ཐོབ་པ་ཐོག་མ་དེ་ཆགས་ཡོད།

ཐེངས་འདིའི་རྒྱལ་སྤྱིའི་བུད་མེད་གྱད་འགྲན་ཁྲོད་རྒྱལ་ཁབ་ ༡༠༤ ཡི་བུད་མེད་རྩེད་འགྲན་པ་ ༩༠༠ ལྷག་མཉམ་ཞུགས་བྱས་ཡོད་ཅིང་། ད་ལོའི་བུད་མེད་གྱད་རྩལ་འགྲན་བསྡུར་འདི་ ༢༠༡༢ ལོར་དབྱིན་ཡུལ་དུ་འཚོགས་གཏན་འཁེལ་པའི་རྒྱལ་སྤྱིའི་ཨོ་ལིམ་ཕིག་(Olympics) རྩེད་འགྲན་ཆེད་གདམ་གསེས་ཀྱི་འགྲན་བསྡུར་ཞིག་ཆགས་ཡོད་པ་རེད།

ཤི་ལོག་སྒྲོལ་མ་ནི་གོང་པོ་ཉིང་ཁྲི་ས་གནས་ཀྱི་བོད་རིགས་ཁྱིམ་ཚང་དཀྱུས་མ་ཞིག་ནས་ཡིན་ཞིང་། ཐེངས་འདིར་རྒྱ་ནག་གི་བུད་མེད་ལུས་རྩལ་པའི་འཐུས་ཚབ་སྟེང་ཞུགས་པ་ཞིག་ཡིན་འདུག ཁོ་མོ་ ༢༠༡༠ ལོར་རྒྱ་ནག་རྒྱལ་ཡོངས་བུད་མེད་གྱད་འགྲན་རྩེད་མོའི་རུ་ཁག་ཏུ་བདམས་ཐོན་བྱུང་ཡོད་པ་དང་། འདིའི་ལོའི་ཕྱི་ཟླ་ ༤ པའི་ནང་གི་རྒྱ་ནག་རྒྱལ་ཡོངས་བུད་མེད་གྱད་འགྲན་ཁྲོད་ཁོང་ལ་དངུལ་གྱི་རྟགས་མའི་བྱ་དགའ་ཐོབ་མྱོང་ཡོད་འདུག གནས་ཚུལ་ཐོན་གསལ་ལ། ད་ལྟའི་རྒྱ་ནག་གི་རྩེད་འགྲན་པའི་ཁྲོད་དུ་བོད་རིགས་ ༡༢ ཙམ་རྒྱལ་སྤྱིའི་རྩེད་རིགས་འདྲ་མིན་ནང་འགྲན་བསྡུར་བྱེད་བཞིན་ཡོད་འདུག

གསར་འགོད་པ། བནྡེ་སྐྱབས།