གྲྭ་བ་གཉིས་ཀྱིས་རང་ལུས་མེར་བསྲེཊ།

དུས་བབ་གསར་ཁང་ནས།

ད་ལྟ་རང་གནས་ཚུལ་འབྱོར་གསལ་ལ། དེ་རིང་སྔ་དྲོའི་བོད་ནང་གི་ཆུ་ཚོད་ ༡༠ ཙམ་ལ་རྔ་པ་ཀིརྟི་དགོན་པའི་བོད་བསྟན་སྲིད་ཀྱི་དོན་དུ་རང་ལུས་མེར་བསྲེགས་གཏོང་མཁན་གྲྭ་ཕུན་ཚོགས་ལགས་ཀྱི་ཚ་བོ་གྲྭ་བློ་བཟང་སྐལ་བཟང་དང་། གཞན། གྲྭ་བློ་བཟང་དཀོན་མཆོག་ཞུ་བ་གཉིས་ཀྱིས་རྔ་པ་རྫོང་གི་ཁྲོམ་གཞུང་ནས་རང་ལུས་མེར་བསྲེགས་བཏང་ཡོད་འདུག

གནས་ཚུལ་འདིའི་སྐོར་ད་ལྟ་རང་སྤྱི་འཐུས་ཚོགས་གཞོན་སློབ་དཔོན་བསོད་ནམས་བསྟན་འཕེལ་མཆོག་གིས་ངྷ་ས་གངས་སྐྱིད་དུ་ཚོགས་བཞིན་པའི་བོད་མི་མང་སྤྱི་འཐུས་གྲོས་ཚོགས་ནང་སྙན་གསེང་ཞུས་ཏེ། གྲྭ་གཞོན་དེ་གཉིས་ཀྱིས་རང་ལུས་མེར་བསྲེགས་བཏང་སྟེ། རྔ་པ་ཀིརྟི་དགོན་པ་ད་ལྟ་ཧ་ཅང་ཛ་དྲག་ཆགས་ཡོད་པ་དང་། དོན་རྐྱེན་དེ་བྱུང་མ་ཐག་ཁོང་གཉིས་སྨན་ཁང་དུ་བསྐྱལ་ཡོད་ཀྱང་། དགེ་འདུན་པ་གཅིག་སྐུ་གྲོངས་ཡོད་པའི་གནས་ཚུལ་འདུག་ཅེས་གསུངས་སོང་།

བཞུགས་སྒར་ཀིརྟི་བྱེས་པ་གྲྭ་ཚང་གི་བོད་ནས་འབྲེལ་མཐུད་པས་ཞིབ་ཕྲའི་གནས་ཚུལ་བཏང་འབྱོར་ལ། དེ་རིང་སྔ་དྲོའི་བོད་ནང་གི་ཆུ་ཚོད་ ༡༠ དང་ཕྱེད་ཀ་ཙམ་ལ། རྔ་པ་རྫོང་རྨེའུ་རུ་མའི་རུ་ཆེན་གཉིས་པའི་ཇ་རུ་ཚང་གི་ཚེ་རིང་བཀྲ་ཤིས་ཀྱི་བུ་རྒྱལ་གཅེས་དཔའ་བོ་བློ་བཟང་ཕུན་ཚོགས་ཀྱི་སྤུན་ཆུང་རང་ལོ་ ༡༨ ཡིན་པ་རྔ་པ་ཀིརྟི་དགོན་པའི་གྲྭ་བློ་བཟང་སྐལ་བཟང་ལགས་དང་། ཚེ་རྒྱས་ཚང་གི་རྔ་པ་ཀིརྟི་དགོན་པའི་རང་ལོ་ ༡༨ ཡས་མས་ཡིན་པའི་གྲྭ་བློ་བཟང་དཀོན་མཆོག་གཉིས་ཀྱིས་རྔ་པ་རྫོང་གི་ཁྲོམ་གཞུང་དུ། ༧རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག བོད་ལ་ཆོས་དད་རད་དབང་དགོས་སོགས་ཀྱི་སྐད་འབོད་གནང་བཞིན་རང་ལུས་མེར་བསྲེགས་བཏང་འདུག

ཅུང་ཙམ་རྗེས་རྒྱ་གཞུང་གི་ཉེན་རྟོག་པ་དང་དྲག་ཆས་དམག་དཔུང་མང་པོས་གཡས་གཡོན་ནས་ཆུ་དང་མེ་གསོད་ཡོ་ཆས་བེད་སྤྱོད་ཀྱིས་མེ་བསད་ཡོད་ཀྱང་། མི་མང་ཚོས་ངོ་རྟགས་གསལ་བོ་མ་ཆོད་ཀྱང་དགེ་འདུན་པ་གཅིག་གྲོངས་ཡོད་པའི་མཐོང་སྣང་བྱུང་ཡོད་འདུག་ལ། གྲྭ་བ་གཞན་དེའི་སྟེང་གི་མེ་བསད་མ་ཐག་ཉེན་རྟོག་པས་འཁྱེར་ཡོད་འདུག་ལ། དེའི་རྗེས་ཀྱི་གནས་ཚུལ་ཤེས་རྟོགས་ཐུབ་མི་འདུག

ཁོང་གཉིས་འདི་ལྟར་གནང་དོན་ནི། འདས་པའི་ལོ་མང་རིང་རྒྱ་གཞུང་གིས་བོད་ཐོག་ནོར་འཁྲུལ་ཅན་གྱི་སྲིད་བྱུས་བཟུང་བ་དང་། ལྷག་པར་དུ་འདི་ལོའི་ཕྱི་ཟླ་གསུམ་པར་གྲྭ་ཕུན་ཚོགས་ལགས་ཀྱིས་རང་ལུས་མེར་བསྲེག་བཏང་སྟེ་ངོ་རྒོལ་བྱས་ཏེ་ད་བར་རྔ་པའི་ས་གནས་ཡོངས་ལ་དམ་དྲག་ཤུགས་ཆེན་བྱས་པ་དང་། ཟླ་བ་ལྔ་ལྷག་རིང་དགོན་པའི་གྲྭ་མང་ལྕགས་རིའི་ཕྱི་ལ་ཐོན་མ་བཅུག་པར་བཟང་བཙོན་ལྟ་བུར་བཀག་སྟེ། རྒྱལ་གཅེས་ཆོས་གཅེས་ཟེར་བའི་ལས་འགུལ་འོག་གྲྭ་བ་བརྒྱ་ཕྲག་མང་པོ་ཕྱིར་འཕུད་བཏང་བ། གྲྭ་ཕུན་ཚོགས་ལགས་ཀྱི་ལས་འགུལ་དང་འབྲེལ་བ་ཡོད་པའི་ཉེས་འཛུགས་ཐོག་མི་གསོད་ལག་དམར་དང་། མི་གསོད་ལགས་དམར་གྱི་ལག་རོགས་བཅས་ཀྱི་ཉེས་མིང་འོག་ཁྲིམས་ཐག་བཅད་པ་སོགས་ད་ལྟ་ཡང་རྒྱ་གཞུང་གི་ལས་བྱེད་མང་པོས་ཉིན་མཚན་གཉིས་ཀར་སུན་གཙེར་བཟོ་བཞིན་ཡོད་པ་བཅས་ལ་བརྟེན་ཏེ་བྱུང་བ་ཞིག་ཡིན་འདུག

དེ་རིང་གི་དོན་རྐྱེན་བྱུང་མ་ཐག་རྔ་པའི་ས་ཁུལ་ཚང་མར་དམག་མི་འགྲེམ་བཞིན་ཡོད་པ་དང་། རྔ་པ་རྫོང་དང་ཀིརྟི་དགོན་ཡོངས་རྫོགས་དམ་དྲག་འོག་གནོན་ཡོད་འདུག གསུམ་པའི་བཅུ་དྲུག་རྗེས་ནས་ད་བར་རྔ་པ་རྫོང་ཐོག་གི་དྲ་ཁང་ཚང་མ་སྒོ་བརྒྱབ་ཡོད་པ་དང་། ཁ་པར་གྱི་འཕྲིན་ཐུང་སོགས་ཀྱང་བཀག་འགོག་བྱས་ཡོད་འདུག