རྒྱ་དཔོན་ ༨ ཀྱིས་རྒྱའི་དཔལ་འབྱོར་སྟངས་འཛིན།

ཉེ་ཆར་ཨ་རིའི་བྷི་ལོན་བྷིར་ཇི་གསར་ཁང་གིས་རྒྱ་དཔོན་ ༨ ཀྱི་བུ་རབས་ཚ་རྒྱུད་ཀྱིས་རྒྱ་གཞུང་གི་ཆབ་སྲིད་དང་དཔལ་འབྱོར་སྟངས་འཛིན་བྱས་ཡོད་པའི་གནས་ཚུལ་སྤེལ་འདུག

ཕྱི་ཚེས་ ༢༦ ཉིན། ཨ་རིའི་བྷི་ལོན་བྷིར་ཇི་(Bloomberg)གསར་ཁང་གིས། རྒྱ་ནག་དང་ཨ་རིའི་ཁེ་ལས་སྙན་ཐོ་དང་། རྒྱུ་ནོར་ཟིན་ཐོ། མཐོ་རིམ་དཔོན་རིགས་ཀྱི་འབྲེལ་བ་དང་ལོ་རྒྱུས་ཡིག་ཚགས་སོགས་འབྲེལ་ཡོད་ཡིག་རིགས་ཤོག་ལྷེ་

གྲངས་ཕྲག་འགའ་བསྡུ་རུབ་བརྒྱུད།༼མའོ་ཡི་རྒྱུན་འཛིན་པ་ད་ལྟའི་རྒྱ་ནག་གི་མ་རྩ་རིང་ལུགས་རྩེ་གྲོས་ཀྱི་སྐུ་དྲག་གསར་པ།༽ ཞེས་པའི་ཉམས་ཞིབ་རང་བཞིན་གྱི་གསར་འགྱུར་ཞིག་སྤེལ་ཏེ། རྒྱ་ནག་དམར་ཕྱོགས་དཔོན་ཤོག་སྐུ་སྲས་ཚོགས་པའི་མི་སྣ་ ༡༠༣ གྱི་ལོ་རྒྱུས་རྒྱབ་ལྗོངས་དང་། དཔལ་འབྱོར་གནས་སྟངས། གཉེན་ཉེ་འབྲེལ་གྱི་སྐུད་ཐག་སོགས་གསལ་འདོན་གྱི་སྒོ་ནས།  དམར་ཤོག་དཔོན་ཤོག་མི་རབས་གཉིས་པའི་མི་སྣ་ ༢༦ གིས་རྒྱ་ནག་གཞུང་གི་ཁེ་ལས་ཆེ་ཁག་ཚང་མ་སྟངས་འཛིན་བྱས་ཡོད་པ་ཕྱིར་བསྒྲགས་བྱས་འདུག 

དེ་བཞིན། རྒྱ་ནག་གི་ཆབ་སྲིད་དང་དཔལ་འབྱོར་ལ་སྟངས་འཛིན་བྱེད་མཁན་རྒྱ་དམར་དཔོན་ཤོག་མི་ཚང་གཙོ་བོ་ ༨ ནི། ཏུན་ཞོ་ཕིན་དང་པའོ་ཡུས་པའོ།ཁྲིན་ཡོན། སུང་རན་ཆཱུང་། ཕིན་ཀྲིན། ཝང་ཁྲིན། ཡཱང་ཧྲང་ཁོན། ལིས་ཞན་ཉཱིན་བཅས་ཡིན་པ་དང་། ཏུན་ཞོ་ཕེན་གྱི་བུ་མོའི་མག་པ་ཧི་ཕིན་དང་། ཝང་ཁྲིན་གྱི་བུ་ཝང་ཅོན། ཁྲིན་ཡོན་གྱི་བུ་ཁྲིན་ཡཱན་གསུམ་གྱིས།  ༢༠༡༡ ལོར་རྒྱ་ནག་གི་མ་དངུལ་ཨ་སྒོར་དུང་ཕྱུར་ཆིག་ཁྲི་དྲུག་སྟོང་(༡༦༠༠༠༠༠༠༠༠༠༠༠)ལ་སྟངས་འཛིན་བྱས་ཡོད་ལ། གྲངས་འབོར་དེ་ནི་ལོ་གཅིག་གི་རྒྱ་ནག་རྒྱལ་ཡོངས་དཔལ་འབྱོར་ཐོན་སྐྱེད་ཀྱི་ལྔ་ཆའི་གཅིག་ཙམ་ཟིན་གྱི་ཡོད་འདུག

དམར་ཤོག་དཔོན་རྒྱུད་མི་རབས་གཉིས་པ་དེ་དག་གིས་དཔོན་རིགས་ནང་ཁུལ་གྱི་འབྲེལ་བ་སྤྱད་དེ་རྒྱ་གཞུང་གི་གྲོས་གཞི་ཤེས་རྟོགས་དང་། རྒྱལ་ཁབ་ཀྱི་བཅའ་ཁྲིམས་ཆུ་སྣ་གར་འཁྲིད་ཀྱི་ནུས་པ་འདོན་པ། ལས་སླ་བོའི་ཐོག་ནས་རྒྱལ་ཁབ་ཀྱི་ཁྲལ་དངུལ་ལས་གཡོལ་ཐབས་དང་མ་དངུལ་ཕྱིར་གཏོང་བྱེད་པ། ཕྱིའི་རྒྱལ་ཁབ་ཁག་གི་མི་སེར་གྱི་འཛིན་ཡིག་སོགས་བླངས་ཏེ་རྐང་པ་ཉིས་འཛུགས་ཀྱིས་ཕྱི་ཕྱོགས་ནས་ཁེ་ལས་གཉེར་བ་དང་། རྒྱལ་ཁབ་གཞན་གྱི་ཁེ་ལས་བཟོ་ཚོང་ཁྲོད་མ་དངུལ་གཏོང་འཇོག་བྱེད་པ་སོགས་བྱས་ཏེ།  རྒྱལ་ཁབ་ཀྱི་དཔལ་འབྱོར་ཕྱོགས་ཡོངས་ནས་སྒེར་སྡེམ་རུལ་སུངས་ཅན་དུ་བསྒྱུར་ཡོད་འདུག 

གསར་འགོད་པ། ཚེ་རིང་རྒྱལ།  

དུས་བབ་དྲྭ་བ་ནས།