སློབ་མ་ ༡༨ འཛིན་བཟུང་།

དེ་རིང་སྔ་དྲོར་རེབ་གོང་ཁུལ་རྨ་ལྷོ་མི་རིགས་དགེ་ཐོན་སློབ་གྲྭའི་སློབ་མ་ ༡༨ རྒྱ་གཞུང་གིས་འཛིན་བཟུང་བཙན་འཁྲིད་བྱས་ཡོད་འདུག

ད་ལྟ་རང་སུད་སིར་གནས་བཞུགས་ཤ་བོ་རྡོ་རྗེ་ལགས་སུ་བོད་ནས་གནས་ཚུལ་འབྱོར་བར། དེ་རིང་སྔ་དྲོར་མདོ་སྨད་རེབ་གོང་ཁུལ་ཐོག་གི་རྨ་ལྷོ་མི་རིགས་དགེ་ཐོན་སློབ་གྲྭའི་སློབ་མ་ ༡༨

ཙམ་ཁུལ་ཉེན་རྟོག་པས་གློ་བུར་དུ་འཛིན་བཟུང་བྱས་ཡོད་འདུག སློབ་མ་དེ་དག་གི་མིང་དང་ལོ་ཚོད་འཛིན་གྲྭ་སོགས་ད་སྔ་གསལ་བོ་ཤེས་རྟོགས་མ་ཐུབ་ཀྱང་། སློབ་མ་མང་ཆེ་བ་རྩེ་ཁོག་རྫོང་ཁོངས་ཀྱི་ཡིན་པར་ངོས་འཛིན་བྱེད་ཀྱི་ཡོད་འདུག

གཞན། ཟླ་སྔོན་མའི་ཕྱི་ཚེས་ ༢༢ ཉིན་མཚོ་སྔོན་མི་རིགས་སློབ་གྲྭ་ཆེན་མོ་དང་མཚོ་སྔོན་ཁྲིམས་ལུགས་སློབ་གྲྭ མཚོ་སྔོན་བོད་ལུགས་གསོ་རིགས་སློབ་གླིང་བཅས་ཀྱི་ནང་། རྒྱ་གཞུང་གིས་ཁ་བྱང་ལ་<<ཏཱ་ལའི་བླ་མ>>ཞེས་པའི་དཔེ་དེབ་རྒྱབ་ཤ་དཀར་པོ་ཅན་ཞིག་འགྲེམས་སྤེལ་བྱས་ཡོད་པའི་ནང་། བོད་ནང་གི་རང་སྲེག་དོན་རྐྱེན་དང་ངོ་རྒོལ་ཟིང་ཆ་རྣམས་ཏཱ་ལའི་བླ་མས་ཕྱི་ལོགས་ནས་བརྒྱུད་སྐུལ་བྱས་པ་ཡིན་ཚུལ་བཀོད་ཡོད་སྟབས། ཕྱི་ཚེས་ ༢༤ ཉིན་སློབ་གྲྭ་དེ་དག་གི་བོད་རིགས་སློབ་ཕྲུག་བཞི་ཡིས་ཤོག་ངོས་ ༤ ཅན་གྱི་ལན་འདེབས་ཡིག་ཆ་ཞིག་སློབ་ཕྲུག་ནང་ཁུལ་དུ་འགྲེམས་སྤེལ་བྱས་ཏེ། ཐེངས་འདིར་སྲིད་གཞུང་གིས་བཀྲམས་པའི་རྫུན་གཏམ་སྤུངས་པའི་དཔེ་དེབ་དེ་ལ་ཡིད་ཆེ་གཏན་ནས་བྱ་མི་རུང་སྐོར་དང་། ༧གོང་ས་ཏཱ་ལའི་བླ་མ་མཆོག་ནི་སྤྱིར་འཛམ་གླིང་ཞི་བདེ་དེད་དཔོན་ཆེན་མོ་ཞིག་དང་། ཡང་སྒོས་ཁ་བ་གངས་ཅན་ལྗོངས་ཀྱི་ཆོས་སྲིད་གཉིས་ཀྱི་དབུ་འཁྲིད་དང་། འདུ་ཕྱི་གཉིས་ཀྱི་སྐྱབས་གནས་ཉག་ཅིག་དེ་ཡིན་སྐོར་བཀོད་ཡོད་འདུག དེའི་རྗེས་རྒྱ་གཞུང་གིས་གོང་གསལ་སློབ་མ་དག་ལས་སངས་རྒྱས་བཀྲ་ཤིས་ཞུ་བ་ཞིག་འཛིན་བཟུང་བྱས་ཏེ་ད་བར་གར་སོང་ཆ་མེད་ཆགས་ཡོད་འདུག

ཟླ་སྔོན་མའི་ཕྱི་ཚེས་ ༢༦ ཉིན་མདོ་སྨད་མཚོ་ལྷོ་ཁུལ་གསེར་ཆེན་རྫོང་ཆབ་ཆ་གྲོང་རྡལ་གྱི་མངའ་ཁོངས་སུ་ཡོད་ པའི་གསོ་རིག་སློབ་གླིང་གི་སློབ་མ་ཚོས་རྒྱ་གཞུང་གི་སྲིད་བྱུས་ལ་ངོ་རྒོལ་ཁྲོམ་སྐོར་བྱས་པར། གཞུང་གི་ཉེན་རྟོག་པ་དང་དམག་མིས་འཛིན་བཟུང་གཅར་རྡུང་ཚད་ལས་བརྒལ་བ་བཏང་ཡོད་པ་དང་། ཟླ་འདིའི་ཚེས་ ༥ ཉིན་སློབ་མ་རབ་བརྟན་དང་དབང་འདུས་ཚེ་རིང་། བྱམས་པ་ཚེ་རིང་། ཆོས་སྐྱོང་། བཀྲ་ཤིས་ཀུན་བཟང་། རྡོ་ལ་ཚེ་རིང་། སངས་རྒྱས་དོན་གྲུབ། ཀུན་བཟང་འབུམ་བཅས་ལ་རྒྱ་གཞུང་གིས་ལོ་ལྔའི་བཙོན་འཇུག་ཁྲིམས་ཐག་བཅད་ཡོད་འདུག།

དུས་བབ་དྲ་བ་ནས།