དཔའ་བོའི་ཞལ་ཆེམས་བསྒྲཊ་པ།

དེ་རིང་ཨོ་སི་ཊིར་ལེ་ཡར་གནས་སྡོད་བོད་མི་སྐོར་ཞིག་གིས་བོད་ཕྱི་ནང་གི་རྒྱལ་གཅེས་དཔའ་བོ་དཔའ་མོ་དག་གི་ཞལ་ཆེམས་ས་གནས་མི་མང་ལ་བརྒྱུད་བསྒྲགས་གནང་མགོ་བཙུགས་ཡོད།

དེ་རིང་ཕྱི་ཚེས་ ༢༦ ཉིན་གྱི་ཞོགས་པའི་ཆུ་ཚོད་ ༩ པའི་ཐོག་ནས་མགོ་འཛུགས་ཀྱིས། ཨོ་སི་ཊིར་ལེ་ཡར་གནས་བཞུགས་བོད་མི་མདའ་བཞིའི་ཕུན་ཚོགས་དང་

བསྟན་འཛིན་ཆོས་རྒྱལ། འབྲུ་རི་བློ་བཟང་གསུམ་གྱི་སྣེ་ཁྲིད་འོག་བོད་མི་སྐོར་ཞིག་གིས་མཉམ་རུབ་ཐོག བོད་བསྟན་སྲིད་མི་རིགས་ཆེད་རང་ལུས་མེར་བསྲེགས་གནང་མཁན་བོད་ཕྱི་ནང་གཉིས་ཀྱི་རྒྱལ་གཅེས་དཔའ་བོ་དཔའ་མོ་དག་གི་ཞལ་ཆེམས་དང་རེ་འདུན། བོད་ནང་གི་ཛ་དྲག་གནས་སྟངས་སོགས་དབྱིན་ཡིག་དང་རྒྱ་ཡིག་ནང་བཀོད་པའི་ཡིག་ཆ་མང་པོ་ཞིག ཨོ་སི་ཊིར་ལེ་ཡའི་ས་གནས་མན་ལེ་དང་། སེ་ཌི་ནེ་གྲོང་ཁྱེར། དེའི་ཉེ་འཁྲིས་སུ་ཡོད་པའི་སྐད་གྲགས་ཆེ་བའི་ལྷ་མོའི་ཚོགས་ཁང་གི་མདུན་བཅས་ཀྱི་མི་མང་ཁྲོད་བརྒྱུད་བསྒྲགས་དང་འགྲེམ་སྤེལ་བྱས་སོང་།

ལས་འགུལ་འདི་དེ་རིང་ནས་མགོ་འཛུགས་ཀྱིས་བདུན་ཕྲག་གཅིག་རིང་སྤེལ་རྒྱུ་ཡིན་པ་དང་། གཟའ་འཁོར་རྗེས་མའི་གཟའ་ལྷག་པའི་ཉིན་འདི་གའི་སེ་ཌི་ནེ་མཉམ་འབྲེལ་རྒྱལ་ཚོགས་ཡན་ལག་ལས་ཁུངས་མདུན་དུ། ཉིན་གཅིག་ཟས་བཅད་ངོ་རྒོལ་དང་རྒྱལ་ཚོགས་ལ་ཞུ་སྙན་ཕུལ་ཏེ་ལས་འགུལ་མཇུག་བསྡུ་རྒྱུ་ཡིན་འདུག

 ས་གནས་གསར་འགོད་པ། བཀྲ་ཤིས་རྒྱ་མཚོ།

དུས་བབ་དྲྭ་བ་ནས།