ཡཱ་སིན་ལགས་འདས་གྲོངས།

ཡུ་གུར་གྱི་རྩོམ་པ་པོ་ཡཱ་སིན་ལགས་རྒྱའི་བཙོན་འོག་ནས་འདས་གྲོངས་ཕྱིན་འདུག

རྒྱ་ནག་གི་ཁྲིམས་ལུགས་ཆེད་མཁས་པ་ཕིན་ཧུའུ་ཡིས་འཕྲུལ་སྒྲའི་(Twitter)སྟེང་གནས་ཚུལ་སྤེལ་བ་ལྟར་ན།༢༠༠༥ ལོར་རྒྱ་གཞུང་གིས་བཙོན་འཇུག་ཁྲིམས་ཐག་བཅད་པའི་ཡུ་གུར་རྩོམ་པ་པོ་ཡཱ་སིན་ལགས།  འདས་པའི་ལོ་གཅིག་གི་སྔོན་ནས་ཤིན་ཅང་ཧྲ་ཡཱ་བཙོན་ཁང་དུ་འདས་གྲོངས་སུ་ཕྱིན་ཡོད་ཀྱང་། རྒྱ་གཞུང་གིས་རྩོམ་པ་པོ་ཁོང་བཙོན་ཁང་ནང་འདས་གྲོངས་ཕྱིན་པ་སྦེད་གསང་གིས་ཕྱིར་བསྒྲགས་བྱས་མི་འདུག  ད་ལྟའི་ཆར་རྩོམ་པ་

པོ་ཁོང་བཙོན་ཁང་ནང་འདས་གྲོངས་ཕྱིན་པའི་རྒྱུ་རྐྱེན་དང་བཙོན་ཁང་དུ་མནར་གཅོད་ག་རེ་བཏང་ཡོད་མེད་སྐོར་གསལ་བོ་ཤེས་རྟོགས་བྱུང་ཐུབ་མེད་པ་རེད།

ཡུ་གུར་རྩོམ་པ་པོ་ཡཱ་སིན་ལགས་རྒྱ་གཞུང་གིས་འཇུ་བཟུང་བྱས་རྗེས། རྒྱལ་སྤྱིའི་སྨྱུག་ཚོགས་ཀྱིས་རྩོམ་པ་པོ་ཁོང་ནི་རྒྱ་གཞུང་གིས་དེང་སྐབས་རྩོམ་འབྲིའི་རང་དབང་དང་མི་རིགས་ཀྱི་སྐད་ཡིག་ཁེ་དབང་རྡོག་རོལ་གཏོང་བཞིན་པའི་དཔེ་མཚོན་གསལ་ཤོས་ཤིག་ཏུ་ངོས་འཛིན་ཐོག    ཨ་རིའི་སྨྱུག་ཚོགས་དང་དབྱིན་ཇིའི་སྨྱུག་ཚོགས། རྒྱའི་རང་དབང་སྨྱུག་ཚོགས་སོགས་ཀྱིས་རྩོམ་པ་པོ་ཁོང་ལ་མཚན་མཐོང་ཆེན་པོ་གནང་ཡོད་པ་མ་ཟད། ༢༠༠༩ ལོར་ཨ་རིའི་སྨྱུག་ཚོགས་ཀྱི་དབྱིན་ལཱན་ཡན་ལག་ཚོགས་པས་རྩོམ་པ་པོ་ཡཱ་སིན་ལགས་ལ་ ༼ཝ་སལ་སི་ཏོ་སི་རང་དབང་རྩོམ་རིག་གཟེངས་རྟགས(Vasil Situ Si Freedom to Write Award.)༽ ཕུལ་ཡོད་ལ།  རྒྱལ་སྤྱིའི་སྨྱུག་ཚོགས་ཁག་གིས་རྒྱ་གཞུང་གིས་རྩོམ་པ་པོ་ཁོང་ཀློད་གྲོལ་གཏོང་དགོས་པའི་འབོད་སྐུལ་རིམ་པར་གནང་ཡོད་པ་རེད། 

༢༠༠༤ ལོའི་ཕྱི་ཟླ་ ༥ ནང་རྩོམ་པ་པོ་ཡཱ་སིན་ལགས་ཀྱིས་ཡུ་གུར་གྱི་<<ཀི་ཧྲི་ཀཱ་ཨེར་རྩོམ་རིག>> དུས་དེབ་སྟེང་<ཕུག་རོན>ཞེས་པའི་སྒྲུང་རྩོམ་ཞིག་སྤེལ་ཏེ།  མིའི་རིགས་ཀྱིས་གཟེབ་དྲར་བཅུག་ཡོད་པའི་ཕུག་རོན་ལ་རང་དབང་མེད་པ་དང་། འཆི་ལམ་ཁོ་ན་སྙེག་དགོས་པའི་གནས་ལུགས་གསལ་འདོན་བྱས་ཡོད་སྟབས། ས་གནས་རྒྱ་གཞུང་གིས་ཁོང་གི་བརྩམས་སྒྲུང་དེས་ཁ་བྲལ་ངལ་སྐུལ་བྱས་ཡོད་པའི་ཉེས་མིང་བཏགས་ཏེ།  ༢༠༠༤ ལོའི་ཕྱི་ཟླ་ ༡༡ ཚེས་ ༢༩ ཉིན་ཤིན་ཅང་ཡུ་གུར་རང་སྐྱོང་ལྗོངས་ཀི་ཧྲི་ས་ཁུལ་གྱི་རྒྱལ་སྲུང་ཉེན་རྟོག་པས་གསང་བའི་ཐོག་རྩོམ་པ་པོ་ཡཱ་སིན་དང་།  ཀི་ཧྲི་ཀཱ་ཨར་རྩོམ་རིག་དུས་དེབ་ཀྱི་རྩོམ་སྒྲིག་པ་ཁའོ་ར་ཞི་ཧུའུ་སི་ཡཱན་(Korash Huseyin) གཉིས་འཇུ་བཟུང་བཙན་ཁྲིད་བྱས་པ་དང་། ༢༠༠༥ ལོའི་ཕྱི་ཟླ་ ༥ ནང་རྩོམ་པ་པོ་ཡཱ་སིན་ལ་ཁ་བྲལ་སྐུལ་སློང་བའི་ཉེས་མིང་འོག་ལོ་ ༡༠ དུས་བཀག་བཙོན་འཇུག་དང་། རྩོམ་སྒྲིག་པ་ཁའོ་ར་ཞི་ཧུའུ་སི་ཡཱན་ལ་ལོ་༣ དུས་བཀག་བཙོན་འཇུག་བཅས་ཀྱི་ཁྲིམས་ཐག་བཅད་ཡོད་པ་རེད།

དེ་བཞིན། ལོ་སྔོན་མའི་ཕྱི་ཟླ་ ༣ པའི་ནང་འཇར་མན་ལཱེབ་རྫིག་དཔེ་དེབ་འགྲེམས་ཚོང་(Leipzig Book Fair)དབུ་འབྱེད་སྐབས། འཇར་མན་གྱི་གནོད་ཐེབས་མི་རིགས་རོགས་སྐྱོར་མཐུན་ཚོགས་ཀྱི་ཨེ་ཤ་ཡའི་སྡེ་ཁག་གི་འགན་འཛིན་ཨོལ་རའེ་ཆི་ཌི་ལའོ་སི་(Ulrich Delius) ལགས་ཀྱིས། རྒྱ་གཞུང་གིས་ཉེ་ཆར་རྩོམ་པ་པོ་ ༥༤ ལྷག་བཙོན་འཇུག་བྱས་ཡོད་པ་དང་། དེའི་ཁྲོད་ཀྱི་མང་ཆེ་ཤོས་ནི་བོད་དང་ཡུ་གུར། སོག་པོ་མི་རིགས་བཅས་ཀྱི་རྩོམ་པ་པོ་ཡིན་པ་བརྗོད་ཡོད།

ཡུ་གུར་རྩོམ་པ་པོ་ཡཱ་སིན་(Nurmuhemmet Yasin) ལགས་ནི།  ༡༩༧༤ ལོའི་ཕྱི་ཟླ་ ༣ ཚེས་ ༦ ཉིན་ཤིན་ཅང་ཡུ་གུར་རང་སྐྱོང་ལྗོངས་ཀི་ཧྲི་ས་ཁུལ་པཱ་ཁྲུའུ་རུ་སྐྱེས་པ་དང་། ཁོང་ནི་རང་དབང་རྩོམ་འབྲི་བ་དང་སྙན་ངག་པ། གསར་འགོད་པ་བཅས་ཡིན་པ་དང་། སྨྱུག་མིང་ལ་ཨའོ་ཨར་ཁེ་ཞཱི་ཟེར་ཞིང་། ཁོང་གིས་སྙན་རྩོམ་དང་བརྩམས་སྒྲུང་སོགས་བརྩམས་ཆོས་ ༧༠༠ ལྷག་སྤེལ་མྱོང་ཡོད་འདུག

གསར་འགོད་པ། ཚེ་རིང་རྒྱལ།

དུས་བབ་དྲ་བ་ནས།