༄༅༎བོད་ཀྱི་བླ་ན་མེད་པའི་དབུ་འཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་བྱང་ཨ་ཡིར་ལེནྜ་ཡི་ཆིབས་བསྒྱུར་མཛད་འཕྲིན་ལེགས་གྲུབ་ཀྱིས། ཕྱི་ཟླ་ ༤ ཚེས་ ༢༠ ཉིན་ དབྱིན་ཇིའི་གྲོང་ཁྱེར་ ཀེམ་སྦིརིཇ་རུ་ཞབས་སོར་འཁོད་གནང་མཛད་པ་དང། ༧གོང་ས་མཆོག་མཐོ་རིམ་གཙུག་ལག་སློབ་གཉེར་ཁང་དེའི་གོ་ལའི་མཁས་དབང་གི་བགྲོ་གླེང་ལྷན་ཚོགས་ནས་ཇི་ལྟར་གདན་ཞུ་ཕུལ་དོན་ལྟར། མཁས་པའི་ལྷན་ཚོགས་དེས་གོ་བསྒྲིགས་ཞུས་པའི་ འཚེ་མེད་ཞི་བ་དང་རྩོད་རྙོག་འདུམ་འགྲིག་གི་བརྗོད་གཞིའི་ཐོག་གི་བགྲོ་གླེང་གི་ཚོགས་འདུའི་ཐོག་བཀའ་སློབ་གསུང་བཤད་བསྩལ་གནང་མཛད་རྒྱུ་ཡིན་པ་རེད།
ཆིབས་བསྒྱུར་གོ་བསྒྲིག་ཞུ་མཁན་ ཀེམ་སྦིརིཇ་མཐོ་རིམ་གཙུག་ལག་སློེབ་གྲྭའི་གོ་ལའི་མཁས་པའི་བགྲོ་གླེང་ལྷན་ཚོགས་ཀྱི་སྤྱི་ཁྱབ་འགན་འཛིན། Brianne Kent གྱིས་༧གོང་ས་ཏཱ་ལའི་བླ་མ་མཆོག་ཀེམ་སྦིརིཇ་རུ་ཆིབས་་བསྒྱུར་ཞབས་སོར་འཁོད་གནང་མཛད་པར་ང་ཚོ་བརྗོད་དུ་མི་ལངས་པའི་དགའ་ཚོར་ཆེན་པོ་ཡོད་ཅེས་དང། ཁོང་གི་བཀའ་སློབ་ཀྱི་ཐོག་ནས་མཁས་པ་རྣམ་པས་རང་རང་སོ་སོའི་གཞི་ཡུལ་འདྲ་མིན་གྱི་ལས་རིགས་ཀྱི་བརྒྱུད་ལམ་དེ་འཛམ་གླིང་ནང་ཞི་བདེ་འཕེལ་རྒྱས་གཏང་རྒྱུའི་ལམ་དུ་བེད་སྤྱོད་གཏང་རྒྱུའི་བསམ་བློ་གསར་པ་ཞིག་བརྙེས་ཐུབ་རྒྱུར་རེ་བ་བྱེད་ཀྱི་ཡོད་ཅེས་གསུངས་འདུག ཨེ་ཤེ་ཡ་རང་དབང་རྲུང་འཕྲིན་ཁང་ནས།།