དྲ་ཇག་གི་འཇབ་རྒོལ།

བོད་ཀྱི་དུས་བབ་དྲ་ཚིགས་དྲ་ཇག་གི་འཇབ་རྒོལ་ལས་འཐར་ཏེ་བསྐྱར་དུ་ཤར་གཏོང་བྱས་པ་དང་། བོད་ཀྱི་དུས་བབ་ཟིན་བྲིས་སྔར་རྒྱུན་བཞིན་དྲ་ཚིགས་མདུན་ངོས་འོག་ཏུ་འཆར་ཐུབ་པ་བཟོས་འདུག

ཟླ་འདིའི་ཚེས་ ༩ ཉིན་གྱི་ཕྱི་དྲོའི་ཆུ་ཚོད་ ༣།༠༦ སྟེང་ཨ་རིའི་བརྡ་འཕྲིན་ཞིབ་འཇུག་ལས་ཁུངས་ཤིག་གི་གློག་ཀླད་མཆེད་མཁས་པ་སི་ཊ་བེན་ལགས་ཀྱིས་ངྷ་སྟེང་བོད་ཁྱིམ་གློག་ཀླད་སྡེ་ཚན་བརྒྱུད་དེ། འདི་ག་དུས་བབ་གསར་ཁང་ལ་གློག་འཕྲིན་

ཞིག་འབྱོར་བའི་ནང་། བོད་ཀྱི་དུས་བབ་དྲ་ཚིགས།(tibettimes[.]net)དང་། བོད་མིའི་སྒྲིག་འཛུགས་ཀྱི་དྲ་བརྙན་།(tibetonline[.]tv) གཉིས་ནང་དཀའ་རྙོག་མང་པོ་ཞིག་འཕྲད་ཉེན་ཡོད་པ་དང་། ལྷག་པར་དུ་བོད་ཀྱི་དུས་བབ་དྲ་ཚིགས་ལ་དྲ་ཇག་གིས་གཏོར་རྒོལ་གཏོང་འཆར་འདུག་སྟབས། གང་མགྱོགས་དེ་ལ་གདོང་ལེན་བྱེད་པར་གྲ་སྒྲིག་དགོས་ཚུལ་གྱི་ཉེན་བརྡ་ཞིག་འབྱོར་སོང་།

ཕྱི་ཚེས་ ༡༣ ཉིན་གྱི་ཞོགས་པའི་ཆུ་ཚོད་ ༩ དང་སྐར་མ་ ༤༠ པའི་སྟེང་གྷོ་གྷལ་(google)བཤེར་ཆས་བརྒྱུད་ཐད་ཀར་བོད་ཀྱི་དུས་བབ་དྲ་ཚིགས་ཁ་འབྱེད་མི་ཐུབ་པ་ཆགས་ཤིང་། གྷོ་གྷལ་བཤེར་ཆས་ཀྱིས་“ བོད་ཀྱི་དུས་བབ་དྲ་ཚིགས་ནང་དྲ་ཇག་སིམ་འཛུལ་བྱས་འདུག་སྟབས། གང་མགྱོགས་འབྲེལ་ཡོད་མི་སྣས་ཞིབ་བཤེར་བྱས་ཏེ་བསྐྱར་དུ་སྒྲིག་སྦྱོར་བྱེད་དགོས” ཞེས་ལམ་སྟོན་སྤྱི་བསྒྲགས་སྤེལ་སོང་། འདི་དང་མཉམ་དུ་བཙན་བྱོལ་ནང་གི་དྲ་ཚིགས་གཞན་ཁག་ཅིག་ལའང་དཀའ་ངལ་འཕྲད་ཡོད་འདུག

དེའི་རྗེས་སུ་འཛམ་གླིང་ཤར་ནུབ་གང་ས་ནས་བོད་ཀྱི་དུས་བབ་ཀློག་པ་པོ་ཚོས་ཁ་པར་དང་གློག་འཕྲིན་སོགས་འབྱོར་ཏེ། བོད་ཀྱི་དུས་བབ་དྲ་ཚིགས་ཁ་འབྱེད་མི་ཐུབ་ཚུལ་དང་། ཁ་ཤས་ཀྱིས་གློག་ཀླད་སྟེང་ནས་ཁ་འབྱེད་མི་ཐུབ་ཀྱང་ལག་ཁྱེར་ཁ་པར་ནང་བདེ་བླག་ཏུ་འབྱེད་ཐུབ་སྐོར་སོགས་བཤད། ཡང་ཁག་ཅིག་གིས་དཀའ་རྙོག་འདི་རིགས་ཇི་ལྟར་འབྱུང་གི་ཡོད་མེད་དང་། དེ་སེལ་ཐབས་གང་འདྲ་ཡོད་མེད་ཀྱི་གནས་ཚུལ་དང་ལམ་སྟོན་གལ་ཆེན་རེ་ཟུང་ཡང་འབྱོར་སོང་།

འདི་ག་གསར་ཁང་གིས་ཞིབ་འཇུག་བྱས་འབྲས་སུ། དུས་བབ་དྲ་བར་གནོན་འཚེ་གཏོང་མཁན་ཁ་ཤས་ཡོད་པ་ལས། གཙོ་བོ་གཅིག་ཡའུ་ཁཱི་རན་རྒྱལ་ཁབ་(Ukranian)ནས་ཡོང་གི་ཡོད་པ་ཤེས་རྟོགས་བྱུང་། འདི་ལོའི་ཕྱི་ཟླ་ ༢ པའི་ནང་དྲ་ཚིགས་ཨ་མར་ཐེངས་དང་པོར་ཞིབ་འཇུག་བྱས་སྐབས། ནམ་རྒྱུན་བོད་ཀྱི་དུས་བབ་དྲ་བར་གནོད་སྐྱོན་བཟོ་མཁན་མང་པོ་ཞིག་ཡོང་གི་ཡོད་པ་ལས་གཙོ་བོ་གསུམ་ནི། དང་པོ་ཡའུ་ཁཱི་རན་དང་། གཉིས་པ་རྒྱ་ནག གསུམ་པ་པ་ཀི་སི་ཐན་བཅས་ཆགས་འདུག

ཐེངས་འདིའི་གནོན་སྐྱོན་འབྱུང་ཁུངས་གཙོ་བོ་བོད་ཀྱི་དུས་བབ་ཟིན་བྲིས་པ་ཞིག་གི་ཟིན་བྲིས་བརྒྱུད་དེ་དྲ་ཚིགས་ཨ་མར་གནོན་སྐྱོན་བཟོ་ཐབས་བྱས་ཡོད་པ་དང་། དེར་ཞིབ་འཇུག་བྱས་དོན་ལྟར་ན། ཟིན་བྲིས་དེའི་བདག་པོ་སྔོན་ཆད་རྒྱ་གར་ནང་ཡོད་ཀྱང་། ༢༠༡༡ ལོའི་མཇུག་ཏུ་བོད་ནང་ལོག་སྟེ་དེང་སྐབས་རྒྱ་ནག་གི་གྲོང་ཁྱེར་ཞིག་ཏུ་ལས་ཀ་བྱེད་བཞིན་འདུག གློག་ཀླད་ཆེད་མཁས་པས་ངོས་འཛིན་ལྟར་ན། ཟིན་བྲིས་བདག་པོ་དེས་ཆེད་དུ་དུས་བབ་དྲ་བར་གནོན་འཚེ་བྱས་པ་ཞིག་མིན་པར། ཁོས་རྒྱ་ནག་ནང་དུ་བོད་ཀྱི་དུས་བབ་དྲ་ཚིགས་བསྔོགས་ཏེ་ཁོ་རང་གི་དེ་སྔའི་ཟིན་བྲིས་ཁ་འབྱེད་སྐབས། ཁོ་རང་གང་དུ་ཡོད་པའི་གློག་ཀླད་དེ་དང་། ཡང་ན་གློག་ཀླད་དེར་མཐུད་ཡོད་པའི་བརྡ་འཕྲིན་བརྒྱུད་ལམ་གྱིས་བོད་ཀྱི་དུས་བབ་ལ་གནོན་སྐྱོན་བཟོ་ཐབས་བྱས་པ་ཞིག་ཡིན་ཚུལ་བརྗོད་བྱུང་།

གཞན། ཉེ་ལམ་ཞིག་ནས་འདི་ག་གསར་ཁང་གིས་བོད་ཀྱི་དུས་བབ་དྲ་ཚིགས་བཟོ་བཅོས་ཀྱི་ལས་རིམ་ཞིག་འགྲོ་བཞིན་ཡོད་པ་དང་། དུས་བབ་དྲ་ཚིགས་མདུན་ངོས་འོག་ཏུ་དུས་བབ་༼ ཟིན་བྲིས་གསར་ཤོས༽ དང་། ༼ ཟིན་བྲིས་ཁྱབ་ཤོས ༽ འཆར་ས་དེ་མེད་པ་ཆགས་ཏེ་ཟླ་གཉིས་ལྷག་ཕྱིན་ཡོད་ཀྱང་། ད་རེབ་བསྐྱར་དུ་དུས་བབ་ཟིན་བྲིས་ཀྱི་བྱེད་ལས་ཁག་སྔར་རྒྱུན་བཞིན་འཆར་ཐུབ་པ་བཟོས་འདུག་པ་དང་། དེང་སྐབས་བོད་ཀྱི་དུས་བབ་ཟིན་བྲིས་ལ་བཟོ་བཅོས་གཏོང་གི་ཡོད་སྟབས། དུས་བབ་ཟིན་བྲིས་བ་དག་གིས་དག་གིས་མཉམ་རུབ་ཡོང་བའི་འབོད་སྐུལ་བཅས་ཞུས་འདུག

དུས་བབ་དྲ་བ་ནས།