སྡེ་དགེ་ནས་བོད་མི་མང་པོ་འཛིན་བཟུང་བྱས་འདུག

དེ་རིང་ཞོགས་པར་སྡེ་དགེ་དགོན་ཆེན་དང་དཔོན་མདའ་རུ་དམག་མི་འབོར་ཆེན་འབྱོར་ཏེ་ཉེ་ཆར་ས་འོག་ཕུག་ལམ་བཟོ་བར་བཀག་འགོག་བྱེད་མཁན་གྱི་ཉེས་འཛུགས་འོག་བོད་མི་མང་པོ་འཛིན་བཟུང་བྱས་ཡོད་འདུག

བོད་ནས་གནས་ཚུལ་འབྱོར་བ་ལྟར་ན། དེ་རིང་ཞོགས་པར་སྡེ་དགེ་དགོན་ཆེན་དང་དཔོན་མདའ་རུ་རྒྱ་ནག་གི་དམག་མི་ཕོན་ཆེན་གློ་བུར་དུ་འབྱོར་ཏེ། འདས་ལོའི་ཕྱི་ཟླ་ ༡༢ ཚེས་ ༢༧ ཉིན་ས་འོག་ཕུག་ལམ་གྱི་ལས་གཞིར་བཀག་འགོག་བྱེད་མཁན་

ཡིན་པའི་ཉེས་འཛུགས་འོག་བོད་མི་མང་པོ་ཞིག་འཛིན་བཟུང་བྱས་ཡོད་འདུག་པ་དང་། ཁོང་ཅག་གི་ནང་ནི་ཉེ་འབྲེལ་དང་ཡུལ་མི་ཚོས་འཛིན་བཟུང་བྱས་ཟིན་པ་དེ་དག་ཀློད་གྲོལ་མ་བཏང་ཚེ། ང་ཚོའང་ཁོང་ཅག་དང་མཉམ་དུ་བཙོན་འཇུག་བྱེད་རོགས་ཞེས་ཞུ་སྐུལ་བྱེད་བཞིན་ཡོད་འདུག ད་ལྟའི་ཆར་མི་ག་ཚོད་འཛིན་བཟུང་བྱས་པ་དང་གང་དུ་ཁྲིད་ཡོད་མེད་སོགས་གསལ་ཁ་མི་འདུག

འདས་ལོའི་ཕྱི་ཟླ་ལྔ་པ་དྲུག་པ་ཙམ་ནས་བཟུང་རྒྱ་གཞུང་གིས་སྡེ་དགེ་མཐིལ་ནས་ས་འོག་ཕུག་ལམ་བཟོ་འཆར་གྱིས། ལོ་དེའི་ཕྱི་ཟླ་ ༥ པའི་ཚེས་ ༢༠ ཉིན་ལས་མི་དང་འཕྲུལ་ཆས་ཆེད་གཏོང་གིས་ལས་གཞི་མགོ་འཛུགས་ཀྱི་མཛད་སྒོ་བསྡུས་ཡོད་སྟབས། ས་གནས་བོད་མི་ཚོས་ས་བརྐོ་རྡོ་སློག་བྱས་ཏེ་ས་འོག་ཕུག་ལམ་བཟོས་ན་ས་གནས་མི་མང་གི་འཚོ་བར་བརྡབ་གསིག་དང་ཁོར་ཡུག་ལ་གཏོར་སྐྱོན་ཐེབས་ངེས་ཡིན་སྟབས། ལས་གཞི་དེ་མཚམས་འཇོག་བྱེད་དགོས་པའི་ཞུ་གཏུག་རིམ་པར་བྱས་ཀྱང་། གཞུང་གིས་ཉན་འཇོག་མ་བྱས་པར་ལས་གཞི་མགོ་འཛུགས་བྱས་ཡོད་པ་མ་ཟད། བཙན་ཤེད་ཀྱིས་ཁྱིམ་ཚང་མང་པོ་གནས་སྤོར་དུ་བཅུག་པ་དང་སྡོད་ཁང་མང་པོ་གས་ཞིག་ཕྱིན་པ། ཁག་ཅིག་ལ་རྡིབ་སྐྱོན་བྱུང་བ་སོགས་ས་གནས་མི་མང་ལ་བརྡབ་གསིག་ཆེན་པོ་བཏང་ཡོད་སྟབས། འདས་ལོའི་ཕྱི་ཟླ་ ༡༢ ཚེས་ ༢༧ ཉིན་ས་གནས་བོད་མི་ ༡༠༠ ཡས་མས་ཤིག་ས་འོག་ཕུག་ལམ་རྒྱག་སར་འཛོམས་ཏེ་བཀག་འགོག་བྱས་ཡོད་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།།