གསར་འགོད་པའི་མགོ་བཅད་དེ་ཨ་རིར་ཉེན་བརྡ་བཏང་།

ཁ་སང་ཨི་རག་དང་སི་རི་ཡའི་མཉམ་འབྲེལ་དྲག་སྤྱོད་པས་ཨ་རིའི་གསར་འགོད་པ་ཞིག་གི་སྐེ་བཅད་དེ་དམར་གསོད་གཏོང་བཞིན་པའི་བརྙན་ཐུང་ཞིག་ཁྱབ་བསྒྲགས་བྱས་འདུག

ཁ་སང་ཨི་རག་དང་སི་རི་ཡའི་མཉམ་འབྲེལ་དྲག་སྤྱོད་ཤོག་ཁག་ (ISIS) གིས་

 ༢༠༡༢ ལོའི་ཟླ་ ༡༡ ཚེས་ ༢༢ ཉིན་འཛིན་བཟུང་བྱས་པའི་ཨ་རིའི་གོ་ལའི་ཆ་འཕྲིན་ (Global Post)གསར་ཁང་གི་གསར་འགོད་<པ་ཇེམ་སེ་ཧྥོ་ལེ་(James Wright Foley) ཡི་སྐེ་བཅད་དེ་དམར་གསོད་བཏང་ཡོད་པའི་སྐར་མ་ ༡།༢༤ ཅན་གྱི་བརྙན་ཐུང་ཨ་རིར་བརྡ་སྤྲོད་པ་(A Message To America)ཞེས་པ་ཞིག་ཕྱིར་བསྒྲགས་བྱས་ཏེ། ཨ་རིས་མུ་མཐུད་ཨི་རག་གི་གནད་དོན་ལ་ཐེ་ཇུས་བྱས་ཚེ། དུས་ཚོད་ངེས་མེད་ཐོག་ཨ་རིའི་ནང་དྲག་སྤྱོད་ལས་འགུལ་སྤེལ་རྒྱུ་ཡིན་པ་མ་ཟད། ད་ལྟ་ཁོ་ཚོའི་ལག་འོག་ཏུ་ཡོད་པའི་ཨ་རིའི་གསར་འགོད་པ་སེ་ཌེ་ཝན་ (Steven Sotloff) གྱི་ཚེ་སྲོག་ལའང་ཉེན་ཁ་འཕྲད་སྲིད་པའི་བརྡ་བཏང་ཡོད་འདུག

བརྙན་འཕྲིན་ནང་ཇེམ་སེ་ཧྥོ་ལེ་ལགས་ཀྱིས། "€œངས་གྲོགས་པོ་དང་ནང་མི་ཉེ་འདུ་ཚོས་ང་གསོད་མཁན་ལ་ཡར་ལངས་བྱ་རྒྱུར་འབོད་སྐུལ་ཞུ་བཞིན་ཡོད་ལ། ཨ་རིའི་གཞུང་གིས་ཀྱང་འཇིགས་སྐུལ་རིང་ལུགས་པས་ང་གསོད་དགོས་དོན་ནི་ཁོ་ཚོའི་འདོད་པ་འཚིམ་རྒྱུ་དང་ནག་ཉེས་གསོག་རྒྱུའི་ཆེད་དུ་ཡིན་པ་ཤེས་རྟོགས་ཐུབ་པའི་རེ་བ་རྒྱག་གི་ཡོད" €ཅེས་བརྗོད་ཡོད་འདུག

བརྙན་འཕྲིན་ནང་ཇེམ་སེ་ཧྥོ་ལེ་གསོད་མཁན་གདོང་རས་ནག་པོ་དཀྲིས་པའི་དྲག་སྤྱོད་པ་དེས། "འདི་ནི་ཨ་རིའི་མི་སེར་ཇེམ་སེ་ཧྥོ་ལེ་རེད། ཨ་རིས་ཁ་ཆེའི་རྒྱལ་ཁབ་ནང་བཙན་འཛུལ་བྱས་པ་མ་ཟད། མཁའ་དམག་བཏང་སྟེ་ཨི་རག་ནང་ཉིན་ལྟར་བཙན་རྒོལ་གྱིས་ཁ་ཆེ་གང་མང་ལ་གནོད་འཚེ་བཏང་ཡོད། ཨ་རིས་ང་ཚོར་མུ་མཐུད་འཐབ་རྩོད་བྱེད་ཐབས་མེད། ང་ཚོ་ནི་ཁ་ཆེའི་དམག་དཔུང་ཞིག་ཡིན་པ་མ་ཟད། རྒྱལ་སྤྱིའི་ཁ་ཆེའི་མང་ཚོགས་མང་ཆེ་བས་ངོས་ལེན་ཡོད་པའི་སྒྲིག་འཛུགས་ཤིག་ཀྱང་ཡིན་སྟབས། ད་ལྟ་ང་ཚོའི་ལག་འོག་ཏུ་ཡོད་པའི་ཨ་རིའི་གསར་འགོད་པ་སེ་ཌེ་ཝན་ (Steven Joel Sotloff) གྱི་ཚེ་སྲོག་ཀྱང་རྗེས་ལ་ཨོ་བྷ་མས་ཐག་གཅོད་གང་འདྲ་བྱེད་མིན་ལ་རག་ལུས་ཡོད" €ཅེས་བརྗོད་འདུག

ཨ་རིའི་ཕོ་བྲང་དཀར་པོའི་རྒྱལ་སྲུང་ལྷན་ཚོགས་ཀྱི་མགྲིན་ཚབ་པ་ཧེ་ཌིན་ (Caitlin Hayden) ལགས་ཀྱིས། "€œཁ་སང་ཨི་རག་གི་དྲག་སྤྱོད་ཤོག་ཁག་གིས་འགྲེམས་སྤེལ་བྱས་པའི་བརྙན་ཐུང་དེར། ད་ལྟ་ཨ་རིའི་གསང་བའི་ལས་ཁུངས་ཀྱིས་ཁུངས་ལྡན་ཡིན་མིན་རྟོག་ཞིབ་བྱེད་བཞིན་ཡོད། གལ་ཏེ་བརྙན་འཕྲིན་དེ་ངོ་མ་ཡིན་ཚེ། ཨ་རིའི་གཞུང་གིས་དེ་ནི་གདུག་རྩུབ་མནར་གཅོད་བཏང་སྟེ། ཉེས་མེད་མི་སེར་དམར་གསོད་བཏང་བ་ཞིག་ལ་ངོས་འཛིན་འོག ཁོང་གི་ནང་མི་ཉེ་འདུ་ཚོར་གདུང་སེམས་མཉམ་སྐྱེད་ཞུ་རྒྱུ་ཡིན" €ཞེས་བརྗོད་འདུག

ཟླ་འདིའི་ཚེས་ ༡༦ ཉིན་ཨ་རིའི་དམག་དཔུང་གིས་ཨི་རག་གི་མོ་སོལ་ཆུ་རགས་དང་ཀར་ཌེ་ཤིའི་རྒྱལ་ས་ཨེར་བྷེལ་(Kurdish Erbil) ལ་འཇབ་རྒོལ་བྱེད་མཁན་འཇིགས་སྐུལ་རིང་ལུགས་པར་མཁའ་ཐོག་ནས་གཏོར་རྒོལ་ཐེངས་ ༩ དང་ཚེས་ ༡༧ ཉིན་ ༡༥ བཅས་བྱས་ཏེ་དྲག་སྤྱོད་པ་ ༡༥ བསད་ཡོད་པ་དང་། དྲག་སྤྱོད་པའི་དམག་རྒྱག་འཕྲུལ་འཁོར་ ༡༩ ཙམ་གཏོར་ཡོད་སྟབས། ཐེངས་འདིར་ཨ་རིའི་གསར་འགོད་པ་ཇེམ་སེ་ཧྥོ་ལེ་དམར་གསོད་བཏང་བ་ཞིག་ཡིན་འདུག

ཁ་སང་དྲག་སྤྱོད་པའི་ལག་འོག་ནས་འདས་གྲོངས་ཕྱིན་པའི་ཨ་རིའི་གསར་འགོད་པ་ཇེམ་སི་ཧྥོ་ལེའི་སྐྱེད་མ་ཌལ་ནེ་ (Diane Foley) ལགས་ཀྱིས་ངོ་དེབ་ཐོག"ངའི་བུ་ཇེམ་སི་ཧྥོ་ལེ་ནི་མི་བཟང་པོ་ཞིག་ཡིན་ལ་གསར་འགོད་པ་ཡག་པོ་ཞིག་ཀྱང་ཡིན། ད་ལྟ་དྲག་སྤྱོད་པས་འཇུ་བཟུང་བྱས་པའི་མི་སྣ་དག་ལ་ཨི་རག་དང་སི་རི་ཡ་གཙོས་རྒྱལ་སྤྱིའི་ནང་ཆབ་སྲིད་ཇི་ལྟར་བཟུང་མིན་གྱི་དབང་ཆ་གང་ཡང་མེད་སྟབས། འཇུ་བཟུང་བྱེད་མཁན་ཚོས་ཁོ་ཚོ་ཀློད་གྲོལ་གཏོང་རྒྱུར་འབོད་སྐུལ་ཞུ་བཞིན་ཡོད། ངའི་བུ་ཇེམ་སེ་ཧྥོ་ལེ་ཡིས་རྒྱལ་སྤྱིའི་སྟེང་སི་རི་ཡའི་མི་མང་ཚོས་དཀའ་སྡུག་གནས་ཚུལ་རྒྱལ་སྤྱིའི་ཐོག་གསལ་སྟོན་བྱས་ཏེ་མང་ཚོགས་ཚོས་དགའ་མོས་ཆེན་པོ་ཐོབ་ཡོད་སྟབས། ང་སྤོབས་པ་ཆེན་པོ་སྐྱེ་ཡི་འདུག" ཅེས་བརྗོད་འདུག

ཆབ་སྲིད་དབྱེ་ཞིབ་པ་ཚོས། ཨི་རག་གི་དྲག་སྤྱོད་ཤོག་ཁག་གིས་ཨ་རིའི་གསར་འགོད་པ་ཞིག་གི་སྐེ་བཅད་ནས་བསད་པ་དེས་ཨ་རིར་ཁོང་ཁྲོ་ཆེན་པོ་བསླངས་ཡོད་སྲིད་ཀྱང་། ད་ལྟ་ཁོ་ཚོའི་སྟོབས་ཤུགས་ཇེ་ཆེར་འགྲོ་བཞིན་ཡོད་སྟབས། ཨ་རིས་དམག་རྒྱག་རྒྱུའི་ཚབ་ཏུ་བསམ་བློ་གཉིས་པ་ཞིག་གཏོང་སྲིད་སྐོར་བརྗོད་འདུག

༢༠༠༦ ལོར་ཨི་རག་ནང་ཟིང་འཁྲུག་ལངས་པ་ནས་བཟུང་ད་བར་སུ་ནེ་དྲག་སྤྱོད་རིང་ལུགས་པས་མི་སེར་ ༢༦༩༧༤༨ ལྷག་དམར་གསོད་དང་། ཡུལ་མི་མང་པོ་སྐྱབས་བཅོལ་འགྲོ་དགོས་བྱུང་ཡོད་ཅིང་། དེ་དག་ལས་ ༢༠༡༢ ལོ་ནས་ ༢༠༡༣ ལོའི་བར་མི་སེར་ ༡༢༦༨༧ ཙམ་རྐྱེན་ལམ་དུ་བཏང་ཡོད་པ་དང་། ཟླ་ ༦ ཚེས་ ༡༠ ཉིན་ཨི་རག་དྲག་སྤྱོད་ཤོག་ཁག་གིས་གྲོང་ཁྱེར་བྷ་ཁེའུ་བྷ་(Baqubah) ནང་འབར་གས་དོན་རྐྱེན་བཟོས་ཏེ། དགེ་རྒན་ཆེན་མོ་བ་གཅིག་ཐེ་བའི་མི་༢༠ ཙམ་བསད་པ་ཟད། དྲག་སྤྱོད་པ་ ༡༣༠༠ ཙམ་གྱིས་ཨི་རག་ནཱི་ནེ་ཝེ་མངའ་སྡེའི་མཱོ་སོལ་ ( Mosul) གྲོང་ཁྱེར་ནང་འཇབ་རྒོལ་བྱས་ཏེ། མངའ་སྡེའི་གཞུང་ལས་ཁང་དང་བརྙན་འཕྲིན་ཁང་། དངུལ་ཁང་སོགས་བཙན་འཕྲོག་དང་བཙོན་པ་ ༢༤༠༠ ལྷག་བཙན་འཕྲོག་བྱས་ཡོད། ཟླ་འདིའི་ཚེས་ ༨ ཉིན་ཨ་རིའི་སྲིད་འཛིན་ཨོ་བྷ་མས་ཨི་རག་གི་ཡཱ་ཛི་ཌི་སི་(Yazidis) དང་སེན་ཇར་ (Sinjar) རི་ཁྲོད་གཉིས་སུ་འཇིགས་སྐུལ་རིང་ལུགས་པར་ཉེན་ཡོལ་བྱེད་མཁན་ཨི་རག་ཡུལ་མི་ཚོར་མཁའ་དམག་གནམ་གྲུ་བཏང་ནས་རོགས་རམ་བྱས་ཡོད།

༢༠༡༡ ལོའི་ཟླ་ ༣ ནས་ད་བར་ཨི་རག་དང་སི་རི་ཡའི་མཉམ་འབྲེལ་དྲག་སྤྱོད་ཤོག་ཁག་གིས་ཨི་རག་དང་སི་ར་ཡའི་གནས་ཚུལ་མཁོ་གཏོང་བྱེད་མཁན་རྒྱལ་སྤྱིའི་གསར་འགོད་པ་ ༤༠ ལྷག་བསད་ཡོད་པ་མ་ཟད། ཨ་རིའི་གསར་འགོད་པ་སེ་ཌེ་ཝན་གཙོས་པའི་གསར་འགོད་པ་ ༡༧༨ ལྷག་བཙོན་འཇུག་བྱས་ཡོད་འདུག

ཇེམ་སེ་ཧྥོ་ལེ་ (James Foley) ལགས་ནི་ཨ་རིའི་ཧམ་ཤེར་(New Hampshire) མངའ་སྡེའི་ནང་སྐྱེས་ཤིང་། འབྲིང་རིམ་དང་མཐོ་རིམ་སློབ་གྲྭ་ཐོན་རྗེས། ཨ་རིའི་གསར་འགྱུར་བརྒྱུད་ལམ་འདྲ་མིན་ནང་ཕྱག་ལས་གནང་ཡོད་འདུག༢༠༡༡ ལོར་ལེ་བྷེ་ཡ་ (Libya) ནང་གནས་ཚུལ་མཁོ་སྒྲུབ་བྱེད་སྐབས་ལེ་བྷེ་ཡ་གཞུང་གིས་བཀག་བསྐྱིལ་དང་། ༢༠༡༢ ལོའི་ལོ་མཇུག་ཏུ་ཨ་རིའི་གོ་ལའི་ཆ་འཕྲིན་གྱི་གསར་འགོད་པའི་འགན་བླངས་ཏེ། ཨི་རག་ནང་གནས་ཚུལ་མཁོ་སྒྲུབ་བྱེད་པར་སྐྱོད་སྐབས་ཨི་རག་གི་དྲག་སྤྱོད་པས་འཇུ་བཟུང་བྱས་ཏེ། ཟླ་འདིའི་ཚེས་ ༡༩ ཉིན་བསད་ཡོད་ཅིང་ད་ལྟ་རང་ལོ་ ༤༠ ཡིན་འདུག

གསར་འགོད་པ། དོན་གྲུབ།

དུས་བབ་དྲ་བ་ནས།།