གདུང་སེམས་མཉམ་སྐྱེད་ཀྱི་མཆོད་འབུལ་སྨོན་ལམ།

དེ་རིང་སྡེ་དགེ་རྒྱལ་ཡོངས་ལྷན་ཚོགས་ཀྱི་དབུས་ས་གཉིས་ནས་འདན་མ་ཁུལ་གྱི་བོད་མི་མང་པོ་བསད་རྨས་བྱུང་བར་བསྔོ་སྨོན་མཆོད་འབུལ་དང་གདུང་སེམས་མཉམ་སྐྱེད་ཀྱི་མར་མེའི་ཁྲོམ་སྐོར་བྱས་སོང་།

དེ་རིང་ཉིན་གུང་ཆུ་ཚོད་ ༡༢ ཙམ་ལ། སྡེ་དགེ་རྒྱལ་ཡོངས་ལྷན་ཚོགས་ཀྱི་

དབུས་དང་དྷ་ས་ས་གནས་གཉིས་ཀྱི་གོ་སྒྲིག་འོག ཐེག་ཆེན་གཙུག་ལག་ཁང་གི་དཔའ་བོའི་རྡོ་རིང་མདུན་དུ། ཉེ་སྔོན་རྒྱ་གཞུང་གི་དྲག་གནོན་འོག་འདན་མ་ཁུལ་ནས་ཉུང་མཐའ་བོད་མི་ ༥ ཡིས་ཚེ་སྲོག་ཤོར་བ་རྣམས་ཀྱི་གཙོས་ཁོང་ཚོའི་ཤུལ་ལུས་ནང་མི་ཡོངས་དང་། སྡུག་སྦྱོང་མནར་གཅོད་འོག་ཡོད་པའི་བོད་མི་ཚོའི་ཆེད་དུ། རྣམ་རྒྱལ་གྲྭ་ཚང་གི་གྲྭ་བ་ ༣༠ དང་བོད་མི་མང་སྤྱི་འཐུས་རྒྱུན་ལས་སྐུ་ཚབ་བློ་བཟང་ཡེ་ཤེས་ལགས་ཀྱི་དབུས་དྷ་ས་ཁུལ་གྱི་སེར་སྐྱ་མི་མང་བཅས་འདུ་འཛོམས་ཐོག་མཆོད་འབུལ་སྨོན་ལམ་གནང་ཡོད་པ་དང་། ཕྱི་དྲོའི་ཆུ་ཚོད་ ༦ ཐོག མེག་གྷན་ནས་གཙུག་ལག་ཁང་གི་དཔའ་བོའི་རྡོ་རིང་བར་གདུང་སེམས་མཉམ་སྐྱེད་ཀྱི་མར་མེའི་ཁྲོམ་སྐོར་བྱས་སོང་།

སྐབས་དེར་སྡེ་དགེ་རྒྱལ་ཡོངས་ལྷན་ཚོགས་ཀྱི་དབུས་དྲུང་ཆེ་འགྱུར་མེད་རྡོ་རྗེ་ལགས་ཀྱིས། མར་མེའི་ཁྲོམ་སྐོར་གྱིས་འཛམ་གླིང་མི་མང་ལ་བོད་ནང་གི་ཛ་དྲག་གནས་སྟངས་ཤེས་རྟོགས་ཡོང་བར་ཕན་ནུས་ཆེན་པོ་ཐོན་གྱི་ཡོད་སྐོར་དང་། འཚེ་མེད་ཞི་བའི་ལྟ་སྤྱོད་ལ་འཛམ་གླིང་མི་མང་གིས་རྒྱབ་སྐྱོར་དང་གུས་བརྩི་བྱེད་བཞིན་ཡོད་སྟབས། ཞི་བའི་ཐབས་ལམ་ལ་བརྟེན་ནས་བོད་ཀྱི་བདེན་མཐའ་སེལ་ཐུབ་པར་ཡིད་ཆེས་བརྟན་པོ་ཡོད་སྐོར་སོགས་བརྗོད་རྗེས། དབྱིན་བོད་གཉིས་ཐོག་ནས་ལྷན་ཚོགས་ཀྱི་བསྒྲགས་གཏམ་ཡིག་ཐོག་ནས་སྒྲོག་སྦྱངས་གནང་ནང་། རྒྱ་གཞུང་གིས་ཆ་རྐྱེན་གང་ཡང་མེད་པའི་ཐོག་ནས་འདན་མ་ཤུག་པ་སྡེ་བའི་སྡེ་དཔོན་རྒན་གཞོན་གཉིས་མྱུར་ཏུ་ཀློད་གྲོལ་གཏོང་དགོས་པ་དང་། འདན་མ་ཁུལ་གྱི་དམག་མི་རྣམས་གང་མགྱོགས་ཕྱིར་འཐེན་གྱིས། ཉེ་སྔོན་དྲག་གནོན་འོག་རྨས་སྐྱོན་ཕོག་པའི་རྨས་མ་ཚོར་མྱུར་ཏུ་སྨན་བཅོས་ཀྱི་མཐུན་འགྱུར་བསྐྲུན་དགོས་པ་བཅས་ཀྱི་དགོས་འདུན་བཏོན་ཡོད་པ་མ་ཟད། རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་སོགས་ཞི་བདེ་དང་དྲང་བདེན་ལ་དགའ་བའི་རྒྱལ་ཁབ་དང་ཚོགས་སྡེ་སོགས་ནས་འདན་མའི་ཛ་དྲག་གནས་སྟངས་ལ་རྒྱབ་སྐྱོར་གནང་བའི་འབོད་སྐུལ་བྱས་འདུག

སང་ཉིན་ཤེས་རབ་དགའ་ཚལ་སློབ་གླིང་གི་དགེ་སློབ་ཡོངས་ཀྱིས་མཆོད་འབུལ་སྨོན་ལམ་སོགས་གདུང་སེམས་མཉམ་སྐྱེད་ཀྱི་ལས་འགུལ་སྤེལ་འཆར་ཡོད་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།།