རིག་གནས་ཀྱི་ཁོར་ཡུག་གཙང་བཟོ་བྱེད་བཞིན་འདུག

རྒྱ་གཞུང་གིས་ཟླ་གཅིག་རིང་མཚོ་སྔོན་ཞིང་ཆེན་ནང་འཇིགས་སྐུལ་དྲག་སྤྱོད་དང་རྨོངས་དད་རིགས་ཀྱི་དཔེ་དེབ་དང་འོད་སྡེར་སོགས་ལ་ཞིབ་བཤེར་བྱེད་བཞིན་འདུག

མཚོ་སྔོན་ཞིང་ཆེན་འཆལ་ཕྱགས་འགལ་རྡུང་ལས་ཁུངས་ཟེར་བ་ཞིག་གིས། ན་གཞོན་ཚོ་སྐྱོན་བྲལ་ངང་འཚར་ལོངས་འབྱུང་བར་རིག་གནས་ཀྱི་ཁོར་ཡུག་ཡག་པོ་

བསྐྲུན་དགོས་སྐོར་བརྗོད་དེ། ཟླ་འདིའི་ཚེས་མགོ་ནས་བཟུང་ཟླ་ ༡ རིང་མཚོ་སྔོན་ཞིང་ཆེན་ཡོངས་དང་། ལྷག་པར་དུ་ཟི་ལིང་དང་མཚོ་ཤར། མཚོ་ལྷོ། མཚོ་ནུབ། རྨ་ལྷོ་སོགས་ཀྱི་སློབ་གྲྭ་ཁག་གི་མཐའ་འཁོར་དཔེ་ཚོང་ཁང་དང་དཔེ་སྐྲུན་ཁང་ཚང་མར་ཞིབ་བཤེར་བྱེད་བཞིན་ཡོད་པ་མ་ཟད། ཁྲིམས་དང་འགལ་བའི་བྱ་སྤྱོད་སྤེལ་མཁན་ཚོར་ཁྲིམས་ཆད་ནན་པོ་གཅོད་དགོས་ལུགས་བསྒྲགས་འདུག

མཚོ་སྔོན་བརྙན་འཕྲིན་ཁང་གིས་དེའི་སྐོར་གནས་ཚུལ་སྤེལ་བའི་ནང་། སློབ་གྲྭ་འབྲིང་ཆུང་གི་མཐའ་འཁོར་གནད་སར་བརྩིས་ནས་ཚོང་རར་གཙང་བཤེར་བྱེད་པ་དང་། ན་གཞོན་ལོ་ཆུང་ལ་གནོད་པ་ཡོད་པའི་ནང་དོན་མི་ལེགས་པའི་དཔེ་ཆ་དང་ཡང་ན་འོད་སྡེར། རྩུབ་སྤྱོད་དང་འཇིགས་སྐུལ། རྨོངས་དད་སོགས་ཀྱི་ཁྲིམས་འགལ་ལུགས་འགལ་གྱི་ནང་དོན་དང་། ཡང་ན་ཁྲིམས་དང་འགལ་ནས་པར་དུ་བསྐྲུན་པའི་ལོ་ཆུང་བྱིས་པའི་དཔེ་དེབ་སོགས་དང་། བསྐྱར་དཔར་སློབ་དེབ་ཚང་མ་གཞུང་བཞེས་བྱས་ཡོད། ཅེས་བརྗོད་འདུག

ཡང་གནས་ཚུལ་ནང་། ཁྲིམས་དང་འགལ་ནས་པར་དུ་བསྐྲུན་པའི་གནས་གཏན་ཁེལ་མེད་པའི་ཚོང་བ་དང་། ལག་རྟགས་མེད་པའི་ཚོང་གཉེར་མཁན་རྣམས་མེད་པར་བཟོ་བ་དང་། ས་གནས་ཁག་གི་པར་སྐྲུན་དང་བསྐྱར་དཔར་མཁན་གྱི་ཁེ་ལས་དག་ལ་ཕྱོགས་ཡོངས་ནས་ཞིབ་བཤེར་བྱེད་དགོས་ལ། ནང་སྒོས་སུ་ཟི་ལིང་དང་མཚོ་ཤར། མཚོ་ནུབ། མཚོ་ལྷོ། རྨ་ལྷོ་སོགས་སུ་ཞིབ་བཤེར་ནན་པོ་བྱས་ཏེ། ཁྲིམས་འགལ་ལུགས་འགལ་གྱི་སྒོ་ནས་པར་སྐྲུན་དང་བསྐྱར་དཔར་བྱས་པའི་སློབ་དེབ་སོགས་ལ་ཁྲིམས་ཆད་ནན་མོ་གཅོད་དགོས་ལུགས་བསྒྲགས་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།།