ལོ་བཅུའི་ནང་བོད་མི་ ༣༧༠༠ ལས་སྐྱབས་བཅོལ་རག་མཁན་ ༤༠༠ ཙམ་རེད།

ཉེ་བའི་ལོ་ཤས་ནས་ཡུ་རོབ་ཀྱི་རྒྱལ་ཁབ་སུད་སི་དང་ཧོ་ལན་ཌི། སྦེལ་ཇམ། ཧྥ་རན་སི་སོགས་ཀྱི་ནང་སྐྱབས་བཅོལ་བའི་བཅའ་ཁྲིམས་ཐད་འགྱུར་བ་ཕྱིན་ཏེ། བོད་སྐྱབས་བཅོལ་ཞུ་མཁན་ཚོར་དཀའ་ངལ་ཆེན་པོ་འཕྲད་བཞིན་ཡོད་སྟབས། ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་དང་བཀྲས་མཐོང་དབང་པོ་ལགས་རྣམ་གཉིས་ལ་བཅར་འདྲི་ཞུས་ཡོད།

ཡུ་རོབ་ནང་ཁྱོན་རྒྱལ་ཁབ་ཁག་ཉེར་གྲངས་ཤིག་ཡོད་པའི་ནང་ནས་རྒྱལ་ཁབ་ཁག་ ༢༠ ཙམ་གྱི་ནང་བོད་མི་གནས་སྡོད་བྱས་ཡོད་པ་ལྟར། སུད་སིའི་ནང་བོད་མི་ཁྱོན་ ༦༠༠༠ ཙམ་དང་། སྦེལ་ཇམ་ནང་ ༣༠༠༠། ཧྥ་རན་སིའི་ནང་ ༢༠༠༠ ལྷག་དང་། དེ་བཞིན་རྒྱལ་ཁབ་གཞན་གྱི་ནང་དུའང་བརྒྱ་ཕྲག་འགའ་རེ་བྱས་ནས་གནས་སྡོད་བྱས་ཡོད་ཀྱང་། ཉེ་བའི་ལོ་ཤས་ནས་ཧོ་ལན་ཌི་དང་སྦེལ་ཇམ། སུད་སི། ཧྥ་རན་སི་སོགས་སུ་སྐྱབས་བཅོལ་བའི་བཅའ་ཁྲིམས་ཐད་འགྱུར་བ་ཕྱིན་པར་བརྟེན། བོད་མི་མང་པོར་སྐྱབས་བཅོལ་རག་མ་རག་པའི་དཀའ་ངལ་འཕྲད་བཞིན་ཡོད་པའི་ཁྲོད། དཀའ་ངལ་ཆེ་ཆུང་རིགས་ཁ་ཤས་ཡོད་པ་ལས། ཁག་ཅིག་ལ་སྐྱབས་བཅོལ་རག་མེད་ཀྱང་རྒྱལ་ཁབ་དེའི་ནང་གནས་སྐབས་རིང་སྡོད་ཆོག་པ་མ་ཟད་ལས་ཀའང་བྱེད་ཆོག་པ་དང་། ཁག་ཅིག་ལ་གནས་སྡོད་ཆོག་པའི་ཡིག་ཆ་ཡོད་ཀྱང་ལས་ཀ་བྱེད་མ་ཆོག་པ། ཁག་ཅིག་ལ་ལས་ཀ་བྱེད་མི་ཆོག་པ་མ་ཟད་རྒྱལ་ཁབ་དེའི་ནང་གནས་སྡོད་ཀྱང་མི་ཆོག་པར་ཐོབ་ཐང་གང་ཡང་མེད་པ་བཅས་ཡིན་འདུག

གནད་དོན་འདིའི་ཐད་གསར་འགོད་པས་ཡུ་རོབ་སྤྱི་འཐུས་བཀྲས་མཐོང་དབང་པོ་ལགས་སུ། ད་ལྟའི་ཆར་ཡུ་རོབ་ཁུལ་གྱི་བོད་མི་ག་ཚོད་ཅིག་ལ་ཡིག་ཆའི་ཐད་དཀའ་ངལ་འཕྲད་ཡོད་པ་དང་། ཁོང་ཚོའི་འཚོ་བའི་གནས་སྟངས་ག་འདྲ་ཡོད་དྲིས་པར་ཁོང་གིས། ཉེ་སྔོན་སུད་སིའི་ནང་ཡུ་རོབ་ཀྱི་བོད་རིགས་སྤྱི་མཐུན་ཚོགས་པ་ཚོར་ཚོགས་འདུ་བསྡུས་ཏེ། ལུང་པ་སོ་སོའི་ནང་བོད་པ་ག་ཚོད་ཡོད་མེད་དང་སྐྱབས་བཅོལ་ཞུ་མཁན་ག་ཚོད་ཡོད་མེད་གྲངས་འབོར་བསྡུ་རྒྱུའི་སྐད་ཆ་བཤད་ཀྱང་། ད་བར་གསལ་བོ་ཞིག་ཞུ་མཁན་བྱུང་མ་སོང་། དེ་བཞིན་རྒྱལ་ཁབ་གཅིག་གི་ས་གནས་ཁག་གི་མིང་ཐོ་བསྡུ་ཐབས་བྱས་ཀྱང་རེ་ཟུང་ལས་འབྱོར་མ་སོང་། སུད་སི་སྐྱབས་བཅོལ་ལས་ཁུངས་ཀྱིས་བསྡོམས་རྩིས་ལྟར་ན་ ༢༠༠༤ ནས་ ༢༠༡༤ བར་གྱི་ལོ་༡༠ རིང་བོད་མི་ཁྱོན་ ༣༧༠༠ བསླེབས་ཡོད་པ་དང་། དེའི་ནང་ནས་སྐྱབས་བཅོལ་རག་མཁན་ ༤༠༠ ཙམ་ལས་མེད་པ་དང་། མི་ ༡༠༠༠ ཙམ་གྱི་གནས་སྟངས་ད་དུང་ཁྲིམས་ཐོག་ན་ལྷག་འདུག དེ་ནས་མི་ ༢༠༠༠ ཞིག་གནས་སྐབས་རིང་སྡོད་ཆོག་པའི་རིགས་རེད། འདས་པའི་ལོ་ ༣ ནང་ལོ་ལྟར་སུད་སིའི་ནང་བོད་མི་ ༤༠ རེའི་ཡིག་ཆ་ནག་པོ་ཆགས་ཀྱི་ཡོད་ཀྱང་། ད་ལོར་འདས་པའི་ཟླ་བ་ ༧ ཙམ་གྱི་ནང་མི་ ༡༥༠ ལྷག་གི་ཡིག་ཆ་ནག་པོ་ཆགས་འདུག ངས་འདིར་སུད་སིའི་ནང་གི་བོད་མིའི་གྲངས་འབོར་ཞུ་དགོས་དོན། སུད་སི་ནི་བོད་པའི་ཐོག་ཉམས་མྱོང་རྒྱུན་རིང་ཤོས་ཆགས་ཡོད་སྟབས། ཡུ་རོབ་རྒྱལ་ཁབ་གཞན་པས་སུད་སིའི་བྱེད་སྟངས་ལ་བལྟ་ཡི་ཡོད་པ་དང་། ལྷག་པར་དུ་སྦེལ་ཇམ་སྐྱབས་བཅོལ་ལས་ཁུངས་ཀྱིས་སུད་སིར་ཞེ་དྲག་བལྟ་ཡི་ཡོད་པར་བརྟེན། སྔ་ཕྱི་ཙམ་མ་གཏོགས་གནས་སྟངས་དེ་སྦེལ་ཇམ་ནང་སླེབ་ཀྱི་ཡོད་པ་འདྲ། ཉེ་སྔོན་ཁོ་རང་ཚོ་ཚོགས་འདུ་ཞིག་ཀྱང་ཚོགས་ཡོད་པ་རེད་ཟེར་གྱི་འདུག ཅེས་བརྗོད་བྱུང་།

ཁོང་གིས་མུ་མཐུད་དུ། སྤྱིར་བཏང་སུད་སིའི་མངའ་སྡེ་མ་འདྲ་བ་རེར་འགྲོ་སྟངས་ལོགས་སུ་ཡོད། ཡིག་ཆ་ནག་པོ་ཆགས་པའི་བོད་མི་ ༡༥༠ ལྷག་ཡོད་པའི་ནང་། ཁག་ཅིག་ལ་ཉིན་རེར་སུད་སིའི་སྒོར་མོ་ལྔ་དྲུག་རེ་རག་གི་ཡོད་པ་དང་། ཁག་ཅིག་ལ་དེ་ཡང་མེད་པར་ཀུ་ཤུ་རེ་དང་བག་ལེབ་རེ་སྤྲད་ནས་བཞག་འདུག ཁོང་ཚོར་སྡོད་གནས་མི་འདུག་ལ། ལས་ཀ་བྱེད་པའི་ཐོབ་ཐང་ཡང་མེད་སྟབས། ཁོང་ཚོ་ཁ་ཤས་སེམས་ཁམས་བདེ་བོ་མེད་པ་ཆགས་ནས་སྨན་ཁང་དུའང་ཕྱིན་འདུག མང་པོ་ཞིག་གྲོགས་པོ་དང་སྤུན་མཆེད་སོགས་ཀྱི་ནང་སྡོད་ཀྱི་ཡོད་པ་རེད།

སྤྱིར་བཏང་ངེད་སྤྱི་འཐུས་གཉིས་ཀྱི་ངོས་ནས་ཡུ་རོབ་ནང་མ་ཡོང་ཟེར་གྱི་མེད། བོད་པ་ཡག་པོ་ཞིག་ཡོང་ན་ང་ཚོ་ཡིན་ནའང་འདོད་པ་ཡོད་རེད། འོན་ཀྱང་། ལོ་ལྔ་དྲུག་བདུན་བརྒྱད་ལ་ཡིག་ཆ་ནག་པོའི་ནང་ལྷག་ནས་རང་ཉིད་ལ་ཕན་མ་ཐོགས། མི་ལའང་ཕན་མ་ཐོགས། ནང་མི་ལའང་ཕན་མ་ཐོགས་པར་ལྷག་ན་ཆོད་མི་འདུག ཡུ་རོབ་ཏུ་ཕེབས་མཁན་ཚོས་དང་པོ་ཉམས་ཞིབ་གནང་ནས་ཕེབས་དགོས་ཀྱི་འདུག་མ་གཏོགས། ང་ཚོ་བོད་པའི་བསམ་བློ་གཏོང་སྟངས་དེ་ཕར་སླེབ་སོང་ན་ཅིག་འགྲིག་འགྲོ་བ་རེད་བསམ་པ་དེ་ནོར་འཁྲུལ་ཆེན་པོ་རེད། སུད་སིའི་ནང་ད་དུང་དཀའ་ངལ་ཆེ་བ་འཕྲད་པའི་ཉེན་ཁ་ཏན་ཏན་འདུག དེ་བཞིན་སྦེལ་ཇམ་དང་ཧོ་ལན་ཌི་སོགས་ཀྱི་ནང་དུའང་སྐྱབས་བཅོལ་བའི་ཁྲིམས་ལ་འགྱུར་བ་ཆེན་པོ་འགྲོ་བཞིན་ཡོད་པ་རེད། ཅེས་བརྗོད་བྱུང་།

ཡིག་ཆ་ནག་པོ་ཆགས་པ་ཚོ་མུ་མཐུད་རྒྱལ་ཁབ་དེའི་ནང་གནས་སྡོད་ཐུབ་པར་ཐབས་ལམ་ག་རེ་ཡོད་དྲིས་པར་ཁོང་གིས། ད་ལྟ་ཡིག་ཆ་ནག་པོ་ཆགས་པ་ཚོར་ལམ་ཀ་གཅིག་ཡོད་པ་རེད། ཁྲིམས་ཁང་གིས་ཞིབ་འཇུག་བྱས་པ་བརྒྱུད་བོད་མི་དེ་ཚོ་རྒྱ་གར་ནས་ཡོང་བའི་ཁུངས་སྐྱེལ་ཡིག་ཆ་སྤྲད་པ་ཚོར། སུད་སི་གཞུང་གིས་ག་རེ་ལབ་ཀྱི་ཡོད་པ་རེད་ཟེར་ན། རྒྱ་གར་གཞུང་ཚབ་ཏུ་སོང་ནས་ཕྱིར་ལོག་ཐབས་བྱོས། གང་ལྟར་ང་ཚོས་སྐྱབས་བཅོལ་སྤྲོད་ཀྱི་མིན་ཟེར་གྱི་ཡོད་པ་རེད། ཡིན་ནའང་། རྒྱ་གར་གཞུང་ཚབ་ཀྱིས་ཕྱིར་ལོག་པའི་ཡིག་ཆ་ཅི་ཡང་མ་སྤྲད་པ་ཡིན་ན། སུད་སིའི་ཁྲིམས་ཁང་གིས་ཡང་བསྐྱར་ཉམས་ཞིབ་བྱས་ཏེ། སྐྱབས་བཅོལ་གྱི་ཐོབ་ཐང་མ་སྤྲད་པ་ཡིན་ནའང་གནས་སྐབས་སྡོད་ཆོག་པའི་ཡིག་ཆ་ཞིག་སྤྲོད་རྒྱུ་ཡིན་ཟེར་གྱི་ཡོད་པ་རེད། འོན་ཀྱང་བརྒྱུད་རིམ་དེ་ལ་ལོ་གསུམ་བཞི་དང་ལྔ་དྲུག་དེ་འདྲ་འགོར་གྱི་ཡོད་སྟབས། མི་ཞིག་གི་མི་ཚེའི་ནང་ལོ་ལྔ་དྲུག་ཟེར་ན་དུས་ཡུན་ཐུང་ཐུང་མ་རེད། ཡུ་རོབ་ནང་སོ་སོའི་འཚོ་བ་མགོ་མ་ཐོན་བར་ནང་མི་ཕར་འཐེན་རྒྱུ་ཡོང་ཐབས་མེད་པ་དང་། དེ་བཞིན། གཞུང་གི་སྐྱོབ་གསོ་བླངས་ནས་བསྡད་ཡོད་མཁན་ཚོ་ལོ་བཅུ་དང་ཉི་ཤུར་བསྡད་ཀྱང་བཟའ་ཚང་དང་ཕྲུ་གུ་ཕར་འཐེན་པའི་ཐོབ་ཐང་ཡོད་པ་མ་རེད། ཅེས་བརྗོད་བྱུང་།

ཡང་ཁོང་གིས། བོད་མི་ཁག་ཅིག་གིས་ཞུ་གཏུག་བྱེད་རྒྱུ་ཉུང་དྲགས་ལུགས་རྗོད་ཀྱི་ཡོད་ཀྱང་། དོན་གཅོད་དང་ངེད་གཉིས་ཀྱི་ངོས་ནས་ཞུ་གཏུག་བྱས་པ་མང་མ་དྲགས་ནའང་ཉུང་དྲགས་མེད་ཀྱང་། དཀའ་ངལ་འདི་ཞུ་གཏུག་བརྒྱབ་ནས་སེལ་ཐུབ་པ་ཞིག་མ་རེད། ང་ཚོས་ངེས་པར་དུ་ཁྲིམས་ཀྱི་གནད་ཅིག་དང་ལམ་ཀ་ཞིག་འཚོལ་དགོས་ཀྱི་འདུག དོ་བདག་གི་ངོས་ནས་ག་རེ་བྱེད་དགོས་པ་རེད་ཟེར་ན། ཕར་ཕྱོགས་ཀྱི་སྤྱི་ཚོགས་ནང་འཛུལ་ཞུགས་བྱེད་ཐུབ་རྒྱུ་དེ་གལ་ཆེན་པོ་རེད་བསམ་གྱི་འདུག བོད་མི་མང་ཆེ་བ་ཞིག་བོད་པ་རང་གི་ནང་འཁོར་བསྡད་དེ་ལུང་པ་དེའི་སྐད་མ་ཤེས་དང་ལུང་པའི་མི་དང་འབྲེལ་བ་མི་འདུག ཁྲིམས་ཁང་དུ་ཕྱིན་ཡང་ཁྱེད་རང་གི་ཡིག་ཆ་ནག་པོ་རེད། ཡིན་ནའང་འདས་པའི་ནང་ཁྱེད་རང་ཡེ་ཤུ་ཚོགས་པ་དེ་འདྲའི་ནང་རོགས་པ་འདི་འདྲ་བྱས་འདུག དེར་བརྟེན། དེ་ཚོ་ཡ་རབས་བཟང་སྤྱོད་ཡིན་སྐོར་དང་། ཁྱེད་རང་གིས་ང་ཚོའི་ལུང་པའི་སྐད་ཡག་པོ་ཤེས་ཀྱི་མི་འདུག་ཀྱང་དོ་སྣང་བྱས་འདུག གང་ལྟར་ཁྱེད་རང་ལ་ལུང་པ་འདིའི་ནང་འཚོ་གནས་བྱེད་པའི་འདོད་པ་ཤུགས་ཆེན་ཡོད་པ་ཞིག་ཏུ་མཐོང་གི་འདུག་སྟབས། ང་ཚོས་ཁྱེད་རང་ལ་བསམ་བློ་གཏོང་གི་ཡིན་ཟེར་ནས་དམིགས་བསལ་གཏོང་བ་དེ་འདྲའང་མང་པོ་ཞིག་ཡོང་གི་འདུག ཅེས་བརྗོད་བྱུང་།

གསར་འགོད་པས་ཁོང་ལ་ཡུ་རོབ་ལུང་པར་བོད་མི་སྐྱབས་བཅོལ་ཞུ་མཁན་ཙོས་གྲ་སྒྲིག་བྱེད་དགོས་པ་གང་དག་ཡོད་པ་དྲིས་པར་ཁོང་གིས། སུད་སི་དང་སྦེལ་ཇམ་སོགས་ཡུ་རོབ་རྒྱལ་ཁབ་གང་འདྲ་ཞིག་གི་ནང་སྐྱབས་བཅོལ་ཞུས་པ་ཡིན་ནའང་། དང་པོ་ག་རེ་ཁུངས་སྐྱེལ་དགོས་པ་རེད་ཟེར་ན། བོད་ནས་ཡིན་པ་དེ་ཁུངས་སྐྱེལ་དགོས་པ་རེད། གཉིས་པ་རང་ཉིད་ཆབ་སྲིད་ཀྱི་ལས་འགུལ་ཞིག་གི་ནང་མཉམ་ཞུགས་བྱས་མྱོང་བ་ཁུངས་སྐྱེལ་དགོས་པ་རེད། དཔེར་ན། སོ་སོ་ཁྲིམས་ཁང་ནང་སོང་བའི་ཡིག་ཆ་དང་ཚགས་པར་ཐོག་ཐོན་པའི་གནས་ཚུལ་ལྟ་བུ་སྟོན་རྒྱུ་ཡོད་དགོས་པ་རེད། དེ་ཚོ་སྔ་ས་ནས་གྲ་སྒྲིག་བྱེད་དགོས་པ་ལས་ཕར་བསླེབས་ཚར་དུས་གཞི་ནས་བསམ་བློ་གཏོང་དགོས་ན་ཕྱི་དྲགས་པ་རེད། ཅེས་བརྗོད་བྱུང་།

གཞན་ཡང་། ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཀྱིས། ཉེ་སྔོན་ཁོང་ཊོར་ཀེ་ནང་དཀའ་ངལ་ཆེན་པོ་འཕྲད་བཞིན་པའི་བོད་མི་ ༡༡ ལ་ཆེད་དུ་ཐུག་འཕྲད་གནང་བར་ཕྱིན་པའི་སྐོར་བརྗོད་དོན། ང་ཉེ་སྔོན་ཊོར་ཀེ་ནང་ཡོད་པའི་བོད་མི་ ༡༡ ལ་ཐུག་ཏུ་ཕྱིན་པ་ཡིན། ཁོང་ཚོ་དེར་བསླེབས་ནས་ལོ་ངོ་ ༣ འགྲོ་བཞིན་ཡོད་ཀྱང་། ལོ་ངོ་དེའི་རིང་ས་གནས་ཀྱི་བོད་མི་གཅིག་ལའང་ཐུག་མི་འདུག ད་ལྟ་ཁོང་ཚོར་ལུང་པ་དེའི་ནང་སྡོད་ཆོག་པའི་ཡིག་ཆ་རག་འདུག་ཀྱང་། ལས་ཀ་བྱེད་ཆོག་གི་མི་འདུག ལྷག་པར་དུ་ལུང་པ་དེ་ཁ་ཆེའི་ལུང་པ་ཡིན་སྟབས་ཁོང་ཚོར་དཀའ་ངལ་ཞེ་དྲག་འདུག ཁང་པ་ཆུང་ཆུང་ཞིག་གི་ནང་ཚང་མ་རུག་རུག་བྱས་ནས་བསྡད་འདུག ཚང་མ་སྐྱེས་པ་རྐྱང་རྐྱང་རེད། མ་གཞི་དཀའ་ངལ་ཡོད་དུས་མི་ཚང་མ་ཕན་ཚུན་འཆམ་པོ་ཡོད་པ་ལྟར་ཁོང་ཚོས་དཀའ་སྡུག་མཉམ་མྱོང་འདྲ་བོ་བྱེད་ཀྱིན་འདུག སྲིད་གཞུང་གིས་ཁོང་ཚོ་མི་རེར་ཟླ་བ་ལ་ཨ་སྒོར་ ༤༠ རེ་སྤྲོད་ཀྱི་ཡོད་ཀྱང་དེས་འདང་གི་མི་འདུག གང་ལྟར་ང་ཁོང་ཚོར་ཐུག་ཏུ་ཕྱིན་ནས་ཁོང་ཚོས་དཀའ་སྡུག་མང་པོ་བཤད་སོང་། ངས་ཁོང་ཚོར་དཀའ་སྡུག་གི་ཁྲོད་ནས་བློ་སྟོབས་སྐྱེད་དགོས་པའི་བསླབ་བྱ་འདྲ་བོ་བརྒྱབ་པ་ཡིན། དེ་ནས་ང་རང་གི་ངོས་ནས་དངུལ་ཕྲན་བུ་ཞིག་སྤྲད་པ་ཡིན། དེ་ལས་གང་ཡང་བྱེད་ཐུབ་ཀྱི་མི་འདུག ཅེས་བརྗོད་བྱུང་།

གྲོས་ཚོགས་ནང་ཡུ་རོབ་བོད་མིའི་དཀའ་ངལ་གླེང་སློང་མ་བྱས་པའི་བསམ་འཆར་འདོན་གྱི་ཡོད་པ་དེར། སྤྱི་འཐུས་རྣམ་གཉིས་ནས་གསལ་བཤད་གནང་རྒྱུ་ཅི་ཡོད་དྲིས་པར་སྤྱི་འཐུས་ཐུབ་བསྟན་དབང་ཆེན་ལགས་ཀྱིས། ཕར་ཕྱོགས་ན་དཀའ་ངལ་འཕྲད་བསྡད་ཡོད་པའི་བོད་མི་ཚོས། གྲོས་ཚོགས་ནང་ངེས་པར་དུ་ང་ཚོའི་དཀའ་ངལ་དེ་གླེང་སློང་གནང་རོགས་ཞེས་སྐུལ་མ་གནང་བ་ལྟར། ཡུ་རོབ་སྤྱི་འཐུས་དང་ཨ་རིའི་སྤྱི་འཐུས་རྣམ་པའི་ངོས་ནས་འཆར་གཞི་བཟོས་ཡོད། ཡིན་ནའང་། གྲོས་ཚོགས་ནས་ལམ་སྟོན་ཕེབས་པ་ལྟར། གྲོས་ཚོགས་ནང་ཡོངས་གྲགས་ཀྱིས་བགྲོ་གླེང་ཞེ་དྲག་གནང་བསྡད་པ་ཡིན་ན། ཁོང་ཚོ་ལ་ཕན་པ་ལས་གནོད་སྐྱེལ་བའི་ཉེན་ཁ་ཡོད་སྟབས། གྲོས་ཚོགས་ནང་ཁུལ་བཞུགས་མོལ་ཚོགས་འདུའི་སྐབས་སུ་བགྲོ་གླེང་གནང་རྒྱུ་ཡིན་ལ། སྐབས་དེར་ང་ཚོས་གནས་ཚུལ་ཁ་གསལ་བོ་བྱས་ནས་གླེང་སློང་དང་ཐབས་ལམ་ག་རེ་འཚོལ་རྒྱུ་འདུག་བགྲོ་གླེང་གནང་འཆར་ཡོད་པ་རེད། དེ་ནས་ཡིག་ཆ་རག་མཁན་ཚོའི་ནང་དུའང་དྭང་བླངས་དཔྱ་ཁྲལ་ལག་དེབ་ཐོག་དཀའ་ངལ་མང་པོ་ཞིག་བཤད་ཀྱི་ཡོད་པ་དེ་ཚོ་ཡང་ཞུ་འཆར་ཡོད། ཅེས་བརྗོད་བྱུང་།

ཟླ་འདིའི་ཕྱི་ཚེས་ ༡༧ ཉིན་གྱི་སྔ་དྲོར་སྤྱི་འཐུས་གྲོས་ཚོགས་ནང་ཚོགས་གཙོ་སྤེན་པ་ཚེ་རིང་མཆོག་གིས་གོང་གི་གནད་དོན་དེ་གྲོས་ཚོགས་ནང་གླེང་སློང་མ་གནང་བའི་རྒྱུ་མཚན་སྐོར་ཟུར་འཕྲོས་སུ་གསུངས་དོན། ཡུ་རོབ་བོད་མི་ཚོར་སྐྱབས་བཅོལ་མ་རག་པའི་གནད་དོན་དེ་སྦེལ་ཇམ་གཅིག་པུ་མིན་པར་ཊོར་ཀེ་དང་། ཨ་ཧྥེ་རུ་ཁའི་ནང་དུའང་བོད་མིའི་ཡིག་ཆ་ནག་པོ་ཆགས་པ་དང་འབྲེལ་བའི་ཐོག གྲོས་ཚོགས་དབུ་འབྱེད་གཏམ་བཤད་ནང་ཞུས་པ་དེ་གང་ཡིན་ཟེར་ན། འབྲེལ་ཡོད་སྤྱི་འཐུས་ལ་གྲོས་བསྡུར་བརྒྱུད་དྲི་བ་དེ་སྐར་རྟགས་མེད་པ་བཟོས་པ་རེད། དབུ་འབྱེད་གཏམ་བཤད་ཐོག་གི་ཚོགས་གཙོའི་སྐད་ཆ་དེར་ཕར་ཕྱོགས་ཡུ་རོབ་ནང་། ང་ཚོའི་སྐོར་གྲོས་ཚོགས་ནང་བགྲོ་གླེང་བྱེད་རྒྱུ་ཚོགས་གཙོས་བཀག་པ་རེད་ཟེར་མཁན་ཡོད་ས་རེད། དེར་བརྟེན། ཡིག་ཆ་ནག་པོ་ཆགས་མཁན་ཚོས་ཚོགས་དྲུང་ལ་འབྲེལ་བ་གནང་ཤོག ཁྱེད་རང་ཚོས་ཡིག་ཐོག་ནས་ང་ཚོའི་སྐོར་གྲོས་ཚོགས་ནང་བགྲོ་གླེང་བྱེད་དགོས་ཀྱི་འདུག་ཅེས་ལབ་པ་ཡིན་ན་ང་ཚོས་བསྐྱར་དུ་བསམ་ཞིབ་བྱ་<རྒྱུ་ཡིན་ལ། གལ་སྲིད་བགྲོ་གླེང་བྱས་ཏེ་མི་མང་ལ་གནོད་པ་ཡིན་ན་འགན་ཁོ་རང་ཚོས་འཁུར་དགོས་པ་རེད། ང་ཚོས་དེར་བསམ་ཞིབ་མང་པོ་བྱས་ནས་བཀའ་སྤྱི་ལྷན་རྒྱས་ཚོགས། སྤྱི་འཐུས་རྒྱུན་ལས་ནང་གོ་བསྡུར་མང་པོ་བྱས་ཏེ་གྲོས་ཚོགས་ནང་བགྲོ་གླེང་མ་བྱས་ན་ཡག་པོ་འདུག གྲོས་ཚོགས་ནང་སླེབ་ཚར་ན་ཚང་མས་མཁྱེན་གསལ་རེད། སྤྱི་འཐུས་ཀྱིས་དྲི་བ་ཞིག་སླེབས་ན། བཀའ་ཤག་གིས་ལན་དྲང་མོ་དང་ཁ་གསལ་བོར་འདེབས་དགོས་ཆགས་ཀྱི་རེད། ལན་དེ་ལྟར་བརྒྱབ་པ་ཡིན་ན་མི་མང་ཚོར་ཡིག་ཆ་རག་པར་ཕན་གནོད་གྱི་རེད་དམ་གནོད་གྱི་རེད། དེར་བརྟེན། བཀའ་བློན་རྣམ་པ་དང་སྤྱི་འཐུས་རྣམ་པ་ཚོས་ག་རེ་གསུངས་ཀྱང་གཞན་ཀྱིས་ལག་ཆ་བྱས་ཏེ་དཔང་རྟགས་ཏུ་མ་འགྲོ་བ་ཞིག་ལ་བསམ་བློ་གཏོང་དགོས་ཞེས་ཞུས་པ་ཡིན། ཞེས་དང་།

ཚོགས་གཙོས་མུ་མཐུད་དུ། ཕར་ཕྱོགས་ཀྱི་མི་མང་གི་བདེ་སྡུག་ལ་བསམ་ཤེས་མེད་པ་མ་རེད། དངོས་ཡོད་གནས་སྟངས་ཀྱི་ཐོག་ནས་སྦེལ་ཇམ་ནང་དཀའ་ངལ་འཕྲད་བསྡད་ཡོད་པ་ཤེས་ཀྱི་ཡོད། ང་ཚོས་གཞན་དབང་སྟབས་བསྟུན་བྱེད་དགོས་ཀྱི་ཡོད་ཀྱང་ཞུ་ས་ཞིག་དགོས་པ་རེད། སྦེལ་ཇམ་ནང་ཁྲིམས་ཀྱི་འགྱུར་བ་ཆེན་པོ་ཐེབས་ཏེ་ས་ཁུལ་གཞན་དང་མ་འདྲ་བའི་དཀའ་ངལ་ཞིག་འཕྲད་ཀྱི་ཡོད་པ་རེད། ཡིན་ནའང་། ད་ལྟ་ཞུ་གཏུག་བྱེད་དུ་སོང་བ་ཡིན་ནའང་སྦེལ་ཇམ་ལ་གཞུང་ཡོད་པ་མ་རེད། གཞུང་འཛིན་མ་ཐུབ་པར་ལྷག་བསྡད་ཡོད་སྟབས་ཞུ་གཏུག་སུ་ལ་བྱེད་དུ་འགྲོ་དགོས་པ་རེད། དེ་འདྲའི་གནས་སྟངས་མང་པོ་ཞིག་ཡོད་སྟབས་འཛིན་སྐྱོང་བཀའ་ཤག་གི་ངོས་ནས་གནང་དགོས་པ་དེ་ཚོ་པང་བསྒྲིགས་ནས་བཞག་ཡོད་ལ། སྤྱི་འཐུས་ཀྱི་ངོས་ནས་ཀྱང་དོ་སྣང་བྱེད་བཞིན་ཡོད་སྟབས། རྗེས་སུ་ཕར་ཡོང་བའི་སྐབས་སུའང་ཏན་ཏན་དེའི་སྐོར་ལ་གོ་བསྡུར་ཡོང་གི་རེད། གནས་སྟངས་དེ་འདྲ་ཞིག་གི་འོག་ནས་གྲོས་ཚོགས་ནང་གླེང་སློང་མ་བྱས་པ་རེད། ཅེས་གསུངས་སོང་།

གསར་འགོད་པ། པདྨ་མཚོ།

དུས་བབ་དྲ་བ་ནས།།