རུང་རྒྱས་ཨ་གྲགས་ལགས་བཙོན་འོག་ནས་ལོ་བརྒྱད་འཁོར་གྱིན་ཡོད།

རྒྱལ་གཅེས་དཔའ་བོ་རུང་རྒྱས་ཨ་གྲགས་ལགས་ཀྱིས་རྒྱ་ནག་གི་རྒྱལ་འཛུགས་དམག་མིའི་དུས་ཆེན་ཟེར་བའི་ཉིན་མོར་མི་མང་སྟོང་ཕྲག་མང་པོ་འདུ་འཛོམས་ཀྱི་སྡིངས་ཆའི་སྟེང་བོད་པའི་བདེན་དོན་དང་རང་དབང་ཆེད་འབོད་སྒྲ་བསྒྲགས་སྟབས། རྒྱ་གཞུང་གིས་ཁོང་ལ་ལོ་བརྒྱད་ཀྱི་ཁྲིམས་ཐག་བཅད་དེ་ད་ཆར་བཙོན་

འཇུག་དུས་ཡུན་རྫོགས་གྲབས་ཡོད།

རྒྱ་དམག་བཅིངས་འགྲོལ་དམག་མི་བཙུགས་པའི་དུས་ཆེན་ཏེ། ༢༠༠༧ ལོའི་ ༨ ཚེས་ ༡ ཉིན་གྱི་དཀར་མཛེས་ལི་ཐང་རྟ་རྒྱུགས་མཛད་སྒོའི་སྟེང་། རུང་རྒྱས་ཨ་གྲགས་ལགས་ཀྱིས་རྒྱ་ནག་གི་མགོ་ཁྲིད་དང་མི་མང་སྟོང་ཕྲག་མང་པོ་འཛོམས་པའི་མདུན་གྱི་སྡིངས་ཆའི་སྟེང་ཐོན་ཏེ། ༧གོང་ས་མཆོག་བོད་མི་ས་ཡ་དྲུག་གི་མགོན་སྐྱབས་ཡིན་པ་དང་། ཁོང་མགྱོགས་མྱུར་བོད་ལ་གདན་འདྲེན་ཞུ་དགོས་པ། པཎ་ཆེན་སྐུ་ཕྲེང་བཅུ་པའི་ཡང་སྲིད་དགེ་འདུན་ཆོས་ཀྱི་ཉི་མ་མཆོག་དང་། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་རྣམ་གཉིས་ཀློད་གྲོལ་གཏོང་དགོས་པ། བོད་ནང་རྒྱ་གཞུང་གི་དྲག་གནོན་འོག་རང་དབང་མེད་པའི་དངོས་ཡོད་གནས་སྟངས་སྐོར་གྱི་གཏམ་བཤད་སྤེལ་ཡོད་སྟབས། རྒྱ་གཞུང་གི་ཉེན་རྟོག་པས་ཁོང་འཛིན་བཟུང་བྱས་ཡོད་པ་མ་ཟད། ལོ་དེའི་ཟླ་ ༡༡ པའི་ནང་དཀར་མཛེས་བོད་རིགས་རང་སྐྱོང་ཁུལ་འབྲིང་རིམ་ཁྲིམས་ཁང་གིས། ཁོང་ལ་རྒྱལ་ཁབ་ཁ་བྲལ་དང་སྤྱི་ཚོགས་བརྟན་བརླིང་ལ་གནོད་སྐྱོན་བཟོས་པའི་ཉེས་མིང་འོག་ལོ་ ༨ ཀྱི་ཁྲིམས་ཐག་བཅད་དེ་སི་ཁྲོན་མཱེན་ཡཱང་བཙོན་ཁང་དུ་བཙོན་འཇུག་བྱས་ཡོད།

ད་ཆར་བཙོན་འཇུག་དུས་ཡུན་རྫོགས་གྲབས་ཡོད་པ་དང་བསྟུན་ཏེ་ཁོང་གི་ཚ་བོ་བོད་མི་མང་སྤྱི་འཐུས་ཨ་ཀྲུག་ཚེ་བརྟན་ལགས་སུ། རུང་རྒྱས་ཨ་གྲགས་དང་ཁོང་གི་ནང་མི་སྤུན་མཆེད། ཁོང་དང་མཉམ་དུ་བཙོན་འཇུག་བྱས་པའི་གཉེན་ཚན་དག་གི་གནས་སྟངས་སྐོར་བཅར་འདྲི་ཞུས་པར། ཨ་ཀྲུག་ཚེ་བརྟན་ལགས་ཀྱིས་འདི་ལྟར་བརྗོད་བྱུང་། རྒྱ་ནག་གཞུང་གིས་ནམ་རྒྱུན་དམ་དྲག་དང་གསང་བ་ཆེན་པོ་བྱེད་ཀྱི་ཡོད་སྟབས། རུང་རྒྱས་ཨ་གྲགས་ལགས་ཀྱི་སྐུ་གཟུགས་གནས་སྟངས་རྟོགས་དཀའ་བ་ཆགས་ཡོད་ཀྱང་། ཐོག་མར་ཁོང་རྒྱ་གཞུང་གིས་འཛིན་བཟུང་བྱེད་སྐབས་ཉེས་རྡུང་ཚབས་ཆེན་བཏང་བ་མ་ཟད། ༢༠༡༠ ལོར་སླར་ཡང་ཁོང་ལ་རྡུང་རྡེག་ཚད་མེད་བཏང་ཡོད་སྟབས། ད་ཆར་ཁོང་གི་མིག་ཡ་གཅིག་དང་རྣ་བ། རྐང་པ་ཡ་གཅིག་བཅས་ལ་རྨས་ཕོག་ཡོད་པ་དང་། སྐེད་པ་ཡང་ནད་པ་ཆགས་ཡོད་པ་ཞིག་གོ་སོང་། ༢༠༡༣ ལོའི་ཟླ་ ༣ ནང་ཁོང་གིས་ཉིན་གྲངས་ ༣༣ རིང་ཟས་བཅད་ངོ་རྒོལ་གནང་འདུག ཅེས་བརྗོད་བྱུང་།

རུང་རྒྱས་ཨ་གྲགས་ལགས་ཀྱི་ནང་མི་ཚོ་ཁོང་ལ་ཐུག་འཕྲད་བྱེད་ཐུབ་ཀྱི་ཡོད་མེད་དྲིས་པར་ཁོང་གིས། སྔོན་མ་རྒྱ་གཞུང་གིས་ལོ་གཅིག་ནང་ཐེངས་གཅིག་ཐུག་ཆོག་ཚུལ་བཤད་ཡོད་ཀྱང་། འདས་པའི་ལོ་འགའི་རིང་ནང་མི་ཚོ་ཁོང་ལ་ཐུག་ཐུབ་པ་དང་མ་ཐུབ་དཀའ་ངལ་མང་པོ་བྱུང་འདུག ཕྲན་ཙམ་རེར་ཐུག་བཅུག་སྐབས་ཀྱང་བཙོན་ཁང་གི་ཤེལ་སྒྲོམ་ར་བ་བརྒྱུད་ཕན་ཚུན་མིག་གིས་མཐོང་ཐུབ་པ་ཙམ་དང་། ཁ་པར་བརྒྱུད་ནས་སྐད་ཆ་བཤད་རྒྱུའི་གོ་སྐབས་ཙམ་ལས་མེད་པ་དང་། ཐུག་འཕྲད་སྐབས་བཙོན་པ་གཞན་དང་མ་འདྲ་བར། ཁོའི་གཡས་གཡོན་དུ་ཉེན་རྟོག་པ་རེ་ལངས་ཏེ་ལྟ་རྟོག་བྱེད་ཀྱིན་ཡོད་པ་དང་། ནང་མི་ཚོས་ཁོ་ལ་ཁ་པར་ནང་སྐད་ཆ་ཤོད་སྐབས། ཁོང་གིས་ང་ལ་སྐད་ཆ་བཤད་རྒྱུའི་ཆོག་མཆན་མེད་སྟབས། ཁྱེད་རང་ཚོས་སྐད་ཆ་ཤོད་ཤོག ངས་ཉན་ནས་སྡོད་རྒྱུ་ལས་ཐབས་ཡོད་པ་མ་རེད་ཅེས་བཤད་ཀྱི་འདུག ཅེས་བརྗོད་བྱུང་།

ཡང་ཁོང་ལ་རོང་རྒྱས་ཨ་གྲགས་ལགས་ཀྱི་ནང་མི་གཉེན་འབྲེལ་ཚོར་སུན་གཙེར་རིགས་བཟོ་བཞིན་ཡོད་མེད་དྲིས་པར། རུང་རྒྱས་ཨ་གྲགས་ཀྱི་བཟའ་ཟླ་དང་ཕྲུ་གུ། གཉེན་འབྲེལ་ཚོའི་འགྲོ་འདུག་སྤྱོད་གསུམ་ལ་རྒྱུན་དུ་སོ་ལྟ་བྱེད་ཀྱིན་ཡོད་ས་རེད། སྡུག་ཤོས་ཤིག་ལ། ཁོང་གི་གཉེན་འབྲེལ་སློབ་ཆེན་ཐོན་པ་ཚོར་ལས་ཀ་སྤྲོད་ཀྱི་མེད་པ་མ་ཟད། ལས་ཀ་ཐོབ་ཐབས་འབད་བརྩོན་བྱེད་མཁན་ཚོར་ཡང་གནོན་ཤུགས་སྤྲོད་ཀྱིན་འདུག་ཟེར། སྔོན་མ་ཁོ་རང་ཚོ་ངོ་ཤེས་མཁན་བོད་རིགས་ལས་བྱེད་ཚོས་ཁོང་ཚང་ལ་དགའ་བོ་དང་སྒོ་གང་ས་ནས་རོགས་རམ་བྱེད་ཀྱིན་ཡོད་ཀྱང་། རྒྱ་གཞུང་གིས་ཁོང་ཚང་ལ་རོགས་རམ་བྱེད་མཁན་ཚོར་དངོས་ཤུགས་བརྒྱུད་གསུམ་ནས་གནོན་ཤུགས་དང་མྱུལ་ཞིབ་བྱེད་ཀྱིན་ཡོད་སྟབས། ད་ཆར་ཁོ་ཚོར་རོགས་རམ་བྱེད་རྒྱུར་ཡང་དོགས་ཟོན་བྱེད་དགོས་པ་ཆགས་འདུག ཅེས་བརྗོད་བྱུང་།

རྒྱ་གར་ནང་ཡོད་པའི་རུང་རྒྱས་ཨ་གྲགས་ལགས་ཀྱི་བུ་མོ་གཉིས་ཀྱི་སྐོར་དྲིས་པར། ཁོང་གིས་འདི་ལྟར་བརྗོད་བྱུང་། རུང་རྒྱས་ཨ་གྲགས་ལགས་ཀྱི་བུ་མོ་གཉིས་རྒྱ་གར་ནང་སྐྱབས་བཅོལ་དུ་བསླེབས་ཏེ། བོད་མིའི་སྒྲིག་འཛུགས་ཀྱི་བཀའ་དྲིན་བདག་སྐྱོང་འོག་ད་ལྟ་སཱ་ར་མཐོ་སློབ་ནང་སློབ་སྦྱོང་བྱེད་ཀྱིན་ཡོད་པ་རེད། དེ་ནི་ནམ་རྒྱུན་ཕ་རྒན་གྱི་རེ་བར་བོད་ཡིག་བོད་སྐད་སྦྱང་ནས་༧གོང་ས་མཆོག་དང་བོད་གཞུང་ལ་ཞབས་ཕྱི་ཞུ་ཐུབ་པ་ཅིག་བྱུང་ན་དགོངས་ཀྱི་ཡོད་སྟབས། ཕ་རྒན་གྱི་རེ་བ་ལྟར་བོད་པའི་སྐད་ཡིག་རིག་གཞུང་གཙོ་བོར་བཟུང་སྟེ་སློབ་སྦྱོང་བྱེད་ཀྱི་ཡོད་པ་རེད། མ་འོངས་པར་ཡང་རྒྱ་གར་ནང་དང་ཕྱི་རྒྱལ་སོགས་ནས་སློབ་སྦྱོང་གང་ཐུབ་ཐུབ་བྱས་རྗེས། བོད་མིའི་སྒྲིག་འཛུགས་ལ་ཞབས་ཞུ་བསྒྲུབས་ཏེ་བོད་པ་རང་གི་སྤྱི་ཚོགས་ལ་ལས་ཀ་བྱེད་རྒྱུའི་འདུན་པ་ཡོད་པ་རེད། ཅེས་བརྗོད་བྱུང་།

ལོ་རྗེས་མའི་ཕྱི་ཟླ་ ༨ ཚེས་ ༡ ཉིན། རུང་རྒྱས་ཨ་གྲགས་ཀྱི་བཙོན་འཇུག་དུས་ཡུན་རྫོགས་ཀྱི་ཡོད་སྟབས། དེའི་ཐད་ནང་མི་ཚོར་སེམས་འཚབ་འདྲ་ཡོད་མེད་དྲིས་པར་ཁོང་གིས། ད་ལྟ་ང་ཚོར་སེམས་འཚབ་ག་རེ་འདུག་ཟེར་ན། ཁོང་དུས་ཐོག་ཀློད་གྲོལ་ཐོབ་ཨེ་ཡོང་སྙམ་པ་དང་། གལ་ཏེ་ཀློད་གྲོལ་ཐོབ་པ་ཡིན་ན་ཡང་། དེ་སྔོན་ཆབ་སྲིད་བཙོན་པ་མང་པོ་ཞིག་མིང་ཙམ་གྱི་ཀློད་གྲོལ་ཙམ་ལས། ནང་ལ་བསླེབས་རྗེས་སྐུ་འཚོ་མ་ཐུབ་པའི་གནས་ཚུལ་བྱུང་ཡོད་སྟབས། གནས་ཚུལ་གང་འདྲ་ཆགས་ཡོང་ན་བསམས་ནས་སེམས་འཁྲལ་བྱེད་བསྡད་ཀྱི་ཡོད་པ་རེད། ཅེས་བརྗོད་བྱུང་།

ཨ་ཀྲུག་ཚེ་བརྟན་ལགས་སུ་རྒྱ་གཞུང་གིས་འཇུ་བཟུང་བྱས་པའི་རུང་རྒྱས་ཨ་གྲགས་ཀྱི་ཚ་བོ་ཨ་ཀྲུག་བློ་སྦོ་ལགས་དང་ཨ་ཀྲུག་སྐལ་བཟང་རྒྱ་མཚོ་སོགས་ཀྱི་གནས་སྟངས་གང་འདྲ་ཆགས་ཡོད་མེད་དྲིས་པར་ཁོང་གིས། རུང་རྒྱས་ཨ་གྲགས་ལགས་ཀྱི་ཚ་བོ་ཨ་ཀྲུག་བློ་སྦོ་ལགས་ལ་རྒྱལ་ཁབ་ཀྱི་གསང་བ་ཕྱི་བསྒྲགས་དང་རྒྱལ་ཁབ་མགོ་བརྟིང་བསློགས་པའི་ཉེས་མིང་འོག་ལོ་ ༡༠ དང་། སྒྱུ་རྩལ་པ་ཀུན་མཁྱེན་ལགས་ལ་ལོ་ ༩ ཡི་ཁྲིམས་ཐག་བཅད་དེ། རུང་རྒྱས་ཨ་གྲགས་ལགས་ཡོད་སའི་བཙོན་ཁང་དེར་བཅུག་ཡོད་པ་རེད། ཨ་ཀྲུག་སྐལ་བཟང་རྒྱ་མཚོ་ལགས་ལ་གཞུང་གི་སློབ་གསོའི་འདུ་འཛོམས་གཏོར་བརླག་དང་རྒྱལ་ཁབ་མགོ་བརྟིང་བསློགས་པའི་ཉེས་མིང་འོག ལོ་ ༥ ཁྲིམས་ཐག་བཅད་དེ་ལོ་དུས་ཚང་ནས་ཀློད་གྲོལ་ཐོབ་ཟིན་ཡང་། ད་ལྟ་རྒྱ་གཞུང་གིས་ཁོང་གི་འགྲོ་འདུག་སྤྱོད་གསུམ་ལ་ལྟ་རྟོག་བྱེད་ཀྱིན་ཡོད་འདུག ཅེས་བརྗོད་བྱུང་།

མཇུག་ཏུ་ཁོང་ལ་རེ་བ་འདྲ་བཤད་རྒྱུ་ཡོད་མེད་དྲིས་པར། རུང་རྒྱས་ཨ་གྲགས་ལགས་ལ་གཞུང་དང་གཞུང་འབྲེལ་མ་ཡིན་པ། གང་ཟག་མི་སྒེར་བཅས་ཀྱིས་རྒྱབ་སྐྱོར་ཐུགས་ཁུར་ཆེན་པོ་གནང་བར་ཐུགས་རྗེ་ཆེ་ཞུ་རྒྱུ་ཡིན། ཁོང་ལོ་རྗེས་མའི་ཟླ་ ༨ ཚེས་ ༡ ཉིན། བཙོན་འཇུག་དུས་ཡུན་རྫོགས་ཏེ་ཆ་རྐྱེན་གང་ཡང་མེད་པར་ཀློད་གྲོལ་དང་། གཟུགས་པོ་བདེ་ཐང་ཡོང་རྒྱུ་སོགས་ལ་ད་དུང་མུ་མཐུད་དེ་ཐུགས་འཁུར་རྒྱབ་སྐྱོར་ཡོང་བའི་འབོད་སྐུལ་ཞུ་བཞིན་ཡོད། སྤྱིར་བཏང་ཆབ་སྲིད་དང་འབྲེལ་བའི་མི་ཞིག་ཐོག་མར་འཛིན་བཟུང་བྱེད་པའི་ཁ་ཐུག་ལ་ས་བསྒྲགས་གནམ་བསྒྲགས་ཆགས་པ་དང་། དེ་དང་འབྲེལ་བའི་ལས་འགུལ་ཡང་ཚ་ཚ་འུར་འུར་གྱིས་སྤེལ་གྱིན་ཡོད་ཀྱང་། རྒྱ་གཞུང་གིས་བཙོན་པ་དེར་ནག་ཉེས་བཙུགས་ཏེ་ཁྲིམས་ཐག་བཅད་པ་ནས་བཟུང་གྲགས་འགུལ་གང་ཡང་མེད་པར་གོ་མེད་ཚོར་མེད་ངང་བརླག་འགྲོ་བ་ཞིག་འདུག དེ་ཁྱོན་ནས་ཡག་པོ་མི་འདུག ཁོའི་གནས་སྟངས་ག་འདྲ་ཡོད་མེད་དང་མ་འོངས་པར་ག་འདྲ་ཆགས་མིན་སོགས་མགོ་བརྩམས་པ་ནས་མཇུག་མ་བསྡུས་པར་འགན་འཁྱེར་དགོས་པ་ཧ་ཅང་གལ་ཆེན་པོ་རེད་བསམ་གྱི་འདུག ཅེས་བརྗོད་བྱུང་།

གསར་འགོད་པ། དོན་གྲུབ།

དུས་བབ་དྲ་བ་ནས།།