སང་ལོ་ལྷ་ས་ནས་མཇལ་ཡོང་།

བོད་ཀྱི་བུད་མེད་ལྷན་ཚོགས་ཀྱིས་༧གོང་ས་མཆོག་གི་བཀའ་དྲིན་རྗེས་དྲན་གྱི་མཚོན་དོན་དང་རྒྱ་གཅེས་དཔའ་བོ་དཔའ་མོ་འདས་གསོན་ཡོངས་ཀྱི་ཞལ་ཆེམས་དང་མངོན་འདོན་མཚོན་པའི་༼སང་ལོ་ལྷ་ས་ནས་མཇལ་ཡོང་༽ཞེས་པའི་ལས་འགུལ་སྤེལ་འདུག

༧གོང་ས་མཆོག་གིས་ནོ་བྷེལ་ཞི་བདེའི་གཟེངས་རྟགས་དགྱེས་བཞེས་གནང་སྟེ་ལོ་ངོ་ ༢༥ འཁོར་བའི་ཉིན་མོ་དང་བསྟུན། བོད་ཀྱི་བུད་མེད་ལྷན་ཚོགས་ཀྱིས་༧གོང་ས་མཆོག་གི་བཀའ་དྲིན་རྗེས་དྲན་གྱི་མཚོན་དོན་དུ་༼སང་ལོ་ལྷ་ས་ནས་མཇལ་ཡོང་༽ཞེས་པའི་ལས་འགུལ་སྤེལ་ཏེ། ༼སང་ལོ་ལྷ་ས་ནས་མཇལ་ཡོང༽ཞེས་པའི་ཁ་པར་གྱི་བརྡ་གཏོང་མཉེན་ཆས་དང་དཔུང་རྟགས། སྟབས་བདེའི་རྒྱབ་ཁུག་བཅས་རིན་མེད་འགྲེམས་སྤེལ་བྱེད་བཞིན་འདུག

སང་ལོ་ལྷ་ས་ནས་མཇལ་ཡོང་ཞེས་པའི་བསྒྲགས་གཏམ་ནང་། གཞུང་མང་གཉིས་ཀྱིས་བཀའ་དྲིན་བསམ་ཤེས་ཀྱི་ཆེད་དུ་ཅི་གསུངས་བཀའ་སྒྲུབ་གནང་གི་ཡིན་ཟེར་ནས་འབོད་ཚིག་བསྒྲགས་རྒྱུ་ཙམ་མ་ཡིན་པར། ཁོང་གི་དྲིན་ལན་འཇལ་ཐབས་ཉག་གཅིག་ནི་མགོན་པོ་གང་གི་རིང་ནས་སྙིང་ལ་བརྣག་པའི་འདོད་དོན་དང་། གཞིས་ལུས་དད་ལྡན་མང་ཚོགས་ཀྱིས་མིག་འཐའ་མཆི་མས་ཁེངས་ནས་རེ་སྒུག་གནང་བཞིན་པ་ནི་ལྷ་ལྡན་ཉི་མའི་གྲོང་ནས་གཞིས་བྱེས་གཉིས་ལྷན་འཛོམས་གནང་རྒྱུ་འདི་རང་ཡིན་སྟབས། ངེད་ལྷན་ཚོགས་ཀྱི་དབུས་ས་གཉིས་ཀྱི་ངོས་ནས་ཀྱང་གོ་སྐབས་འདི་བརྒྱུད་༼སང་ལོ་ལྷ་ས་ནས་མཇལ་ཡོང་༽ ཞེས་པའི་འགོ་བརྗོད་འོག་དུས་དྲན་སྲུང་བརྩི་བྱས་པ་དང་ཆབས་ཅིག སང་ལོ་ལྷ་ས་ནས་མཇལ་ཡོང་ཞེས་པའི་ཁ་པར་བརྡ་གཏོང་མཉེན་ཆས་དང་དཔུང་རྟགས། སྟབས་བདེའི་རྒྱབ་ཁུག་བཅས་བཟོས་ཡོད། ཅེས་དང་།

ཡང་མུ་མཐུད་དུ། འདི་དག་ལས་ཀ་ཆུང་ཆུང་ཞིག་ཡིན་མོད། ནང་དོན་གྱི་ཆ་ནས་བཤད་ན་ཤི་བོས་ཁ་ཆེམས་དང་། གསོན་པོའི་རེ་བ་དཀྱིལ་གཅིག་ལ་བཞག་པའི་མཚོན་དོན་ཡིན་སྟབས། ངེད་ལྷན་ཚོགས་ངོས་ནས་ཁ་པར་གྱི་བརྡ་གཏོང་དང་། དཔུང་རྟགས། རྒྱབ་ཁུག་སོགས་འཛམ་གླིང་གང་སར་གནས་པའི་བོད་དང་། བོད་དོན་རྒྱབ་སྐྱོར་བ་རྣམས་ལ་ཚེགས་མེད་ངང་བཀྲམས་གཏན་འཁེལ་བ་ཡོད་ན། དེས་ཀྱང་རྒྱལ་བ་དགྱེས་པའི་མཆོད་སྤྲིན་གྱི་ཆ་ཤས་ཙམ་འབྱུང་བར་སྨོན་པས་གཏོས་པ་དང་ཆིབས་ཅིག ངེད་ལྷན་ཚོགས་ངོས་ནས་བོད་མི་རྒན་གཞོན་ཚང་མས་དུས་རྒྱུན་ཡིད་ལ་དོ་བདག་རང་ཉིད་བོད་དུ་ལོག་ཕེབས་མཁན་ཡིན་པའི་དྲན་ཤེས་དགོས་རྒྱུ་མ་ཟད་དང་། འཛོམས་བྲལ་ནམ་དུས་དང་ལྷག་པར་པེ་པེ་ཞེས་པའི་ཚབ་ཏུ་༼སང་ལོ་ལྷ་ས་ནས་མཇལ་ཡོང་༽ཞེས་པའི་ཁ་གཡང་འབོད་རེར་གནང་རྒྱུའི་འབོད་བསྐུལ་སྙིང་ནས་ཞུ་ཡི་ལགས་ན་ཅིས་ཀྱང་དགོངས་པ་ཆེ་བཞེས་གནང་རྒྱུ་མཁྱེན། ཞེས་སོགས་བཀོད་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།།