དགེ་འདུན་པའི་ཁྲོད་གང་བྱུང་བྱེད་མཁན་བྱུང་ན་གནས་དབྱུང་ཐོངས།

ཁ་སང་༧གོང་ས་མཆོག་གིས་ལམ་རིམ་གསུང་ཆོས་སྐབས་དགའ་ལྡན་ཁྲི་རིན་པོ་ཆེ་དང་མཁན་པོ་ཚོས་མེད་པ་གཅིག་ལ་ཡོད་མདོག་མདོག་བྱས་ནས་བསྡད་ན། བླུན་པོས་བླུན་པོར་མགོ་སྐོར་ཟེར་ལྟར་དང་བསྟན་པ་སྤྱི་ལ་གནོད་ཀྱིན་ཡོད་སྟབས་དགེ་འདུན་པའི་ནང་གང་བྱུང་བྱེད་མཁན་བྱུང་ན་གནས་དབྱུང་གཏོང་དགོས་ཞེས་

གསུངས།

ཁ་སང་སྔ་དྲོའི་ཆུ་ཚོད་ ༨།༣༠ ཐོག་༧གོང་ས་མཆོག་གིས་དགའ་ལྡན་བྱང་རྩེ་ཐོས་བསམ་ནོར་གླིང་གྲྭ་ཚང་དུ། གླིང་མཆོག་སྤྲུལ་རིན་པོ་ཆེ་མཆོག་དང་ལམ་རིམ་གསུང་ཆོས་གོ་སྒྲིག་ཚོགས་ཆུང་གིས་གསོལ་འདེབས་ཞུས་པ་ལྟར། ༢༠༡༢ ལོ་ནས་དབུ་འཛུགས་གནང་བའི་ལམ་རིམ་ཁྲིད་ཆེན་བཅོ་བརྒྱད་ཀྱི་བཤད་ལུང་ཁྲིད་གསུམ་གྱི་བཀའ་ཆོས་འཕྲོ་སྐྱོང་དབུ་འཛུགས་གནང་ཡོད་ཅིང་། དེར་གདན་ས་ཁག་དང་ཕྱོགས་མཐའ་ཁག་ནས་ཕེབས་པའི་མཁན་པོ་དང་དགེ་བཙུན་གཙོས། རྒྱལ་སྤྱིའི་རྒྱལ་ཁབ་ ༦༠ ཙམ་ནས་ཕེབས་པའི་དད་ལྡན་ཆོས་ཞུ་བ་དང་བོད་རིགས་ཆོས་ཞུ་བ་བཅས་ཁྱོན་མི་ཁྲི་གསུམ་ ༣༠༠༠༠ ལྷག་འདུ་འཛོམས་གནང་ཡོད་པ་མ་ཟད། ཨུ་རུ་སུའི་སྐད་དང་། དབྱིན་སྐད། རྒྱ་ནག་སྐད། ཧིན་རྡི། ཝེ་ཏུ་ནམ་གྱི་སྐད། སོག་སྐད་བཅས་སུ་གསུང་བསྒྱུར་གནང་བཞིན་ཡོད་འདུག

གསུང་ཆོས་ཀྱི་ཐོག་མར་གླིང་མཆོག་སྤྲུལ་རིན་པོ་ཆེ་མཆོག་དང་ཤར་རྩེ་ཆོས་རྗེ་རྣམ་གཉིས་ཀྱིས་མཎྡལ་རྟེན་གསུམ་འདེགས་འབུལ་ཞུས་རྗེས། ༧གོང་ས་མཆོག་གིས་སྔོན་འགྲོའི་བཀའ་ཆོས་བསྩལ་དོན། ཧ་ལམ་ལོ་གཉིས་གསུམ་གོང་ནས་མགོ་བཙུགས་ནས་དེ་རིང་འཕྲོ་སྐྱོང་བྱེད་རྒྱུ་དེ་དག་ཞྭ་དམར་ལམ་རིམ་རེད། ཞྭ་དམར་ལམ་རིམ་བདེ་ལམ་གྱི་ཟིན་བྲིས་དེ་རེད། དེ་དང་ཞྭ་དམར་རིན་པོ་ཆེས་མཛད་པའི་རྗེའི་ལྷག་མཐོང་ཆེན་མོའི་དཀའ་གནད་ཀྱི་མཆན་འགྲེལ་ཞིག་ཡོད། དེ་གཉིས་པོ་ངོས་ལ་ཨ་མདོའི་བླ་མ་ཞིག་གི་མདུན་ནས་ཐོབ། དེ་ནས་སྐྱབས་རྗེ་བདེ་བར་གཤེགས་པའི་གསུང་རྒྱུན་དྲི་མ་མེད་པ་སྐྱབས་རྗེ་ཁྲི་བྱང་རིན་པོ་ཆེས་ལྗགས་ཁྲིད་གནང་བ་ལམ་རིམ་རྣམ་གྲོལ་ལག་བཅངས་རེད། སྐྱབས་རྗེ་རང་གི་དྲུང་ནས་ཐོབ་བྱུང་། དེ་རིང་འདི་གར་ཁྲིད་རྒྱུ་རེད། དེར་བསྡོམས་ན་ཕལ་ཆེར་ཤོག་གྲངས་ ༧༠༠ ཙམ་འདུག ཉིན་དྲུག་ལ་ཚར་རྒྱུ་ཕལ་ཆེར་ཁག་པོ་བྱེད་ས་རེད། གང་ཐུབ་ཐུབ་ཚར་བ་བྱས་ནས་མ་ཚར་བ་དེ་དག་ལོ་རྗེས་མ་མུ་མཐུད་རྒྱུ་བྱ། ལོ་རྗེས་མ་ཏན་ཏན་ཚར་བ་བྱ་རྒྱུ་ཡིན།

དེ་རིང་དགེ་འདུན་པ་ཧ་ཅང་ཕོན་ཆེན་པོ་ཡོད་ས་འདིར་བསྟན་པའི་སྙིང་པོ་བྱང་ཆུབ་ལམ་རིམ་གྱི་ཆོས་འབྲེལ་བྱ་རྒྱུའི་གོ་སྐབས་འདི་འདྲ་ཞིག་ངོས་ལ་ཐོབ་པར་ཧ་ཅང་བསྐལ་པ་བཟང་པོ་ཡིན། ཆོས་འབྲེལ་དང་བཤད་ལུང་གི་རྒྱུན་ཐོབ་སོང་ཟེར་བ་ཙམ་གྱིས་འགྲིག་གི་མེད། ལམ་རིམ་ནང་གི་ཁྲིད་ཡིག་གཙོ་བོ་དེ་ལམ་རིམ་ཆེན་མོ་འདི་རེད། ལམ་རིམ་ཆེན་མོ་དེ་བཀའ་སྡེ་སྣོད་གསུམ་གྱི་དོན་ཆ་ཚང་བསྡུས་ནས་བསམ་གྱི་མི་ཁྱབ་པ་རེད། ལམ་རིམ་ཆེན་མོ་རྩ་བར་བཞག་ནས་དེའི་ཟིན་བྲིས་ཁག་དེ་དག་ཁ་སྣོན་རྒྱག་རྒྱུ་ཡོད། ལམ་རིམ་ཆེན་མོ་གཞི་མ་ཡག་པོ་ཞིག་ཚུགས་མེད་ན། ལམ་རིམ་ཟིན་བྲིས་ཐུང་ངུ་ཐུང་ངུ་དེ་ཚོས་དེ་ཙམ་གྱི་ས་ཆོད་ཆེན་པོ་ཞིག་ཡོང་རྒྱུ་ཁག་པོ་ཡིན་སྟབས། རྗེ་རིན་པོ་ཆེས་མཛད་པའི་ལམ་རིམ་ཆེན་མོ་ཡག་པོ་ཤེས་པར་ཕར་ཕྱིན་ཡག་པོ་ཤེས་དགོས་པ་མ་ཟད། ལྷག་མཐོང་ཆེན་མོ་ཡག་པོ་ཤེས་པར་དབུ་མ་རྩ་འཇུག་གཞུང་ཡག་པོ་ཤེས་དགོས་སྟབས་དགེ་འདུན་པ་ཚོས་དཔེ་ཆ་ལྟ་རྒྱུ་ཧ་ཅང་གལ་ཆེན་པོ་རེད། ཅེས་གསུངས་འདུག

དགེ་འདུན་པའི་ནང་དུ་གང་བྱུང་བྱེད་མཁན་ཡོད་ན་གནས་བྱུང་གཏོང་དགོས་སྐོར་བཀའ་སྩལ་དོན། འཛམ་གླིང་ནང་མི་དུང་ཕྱུར་བདུན་བཅུ་ཙམ་ཡོད་ཁོངས་ནས་དུང་ཕྱུར་བཅུ་ཙམ་ཆོས་ཁས་མི་ལེན་མཁན་དང་ཆོས་ལ་ངོ་རྒོལ་བྱེད་མཁན་ཆགས་ཡོད་པ་མ་ཟད། ཆོས་བྱེད་མཁན་ནང་ལའང་ཆོས་འབག་ལ་གྱོན་ནས་དོན་དག་ཚེ་འདིའི་ལྟོ་གོས་སྒྲུབ་མཁན་ཆོས་པ་མང་པོ་ཡོད་པ་རེད། ན་ནིང་ཡེ་ཤུའི་བླ་ཆེན་པོབ་ཧྥན་སི་སི་མཆོག་གིས་ཡེ་ཤུའི་དབུ་བླར་བསྐོ་གཞག་གནང་རྗེས། ཁོང་གིས་ཇར་མན་གྱི་ཡེ་ཤུའི་བླ་མ་ཞིག་གིས་སྡོད་ཁང་ནང་རྒྱས་སྤྲོས་ཧ་ཅང་བྱེད་བཞིན་ཡོད་པ་ཤེས་འཕྲལ་གནས་དབྱུང་བཏང་བ་རེད། དེ་ནི་ཡེ་ཤུའི་ཆོས་པ་ཚོས་ལྷ་ཁང་ནང་ཆོས་འཆད་སྐབས་འདོད་ཆུང་ཆོག་ཤེས་དགོས་སྐོར་གསུང་གི་ཡོད་ཀྱང་།  ཇར་མན་བླ་མ་དེས་རྒྱས་སྤྲོས་བྱས་པར་བརྟེན་བླ་ཆེན་པོབ་མཆོག་གིས་གནས་དབྱུང་བཏང་བ་རེད། དེ་རིང་འདིར་དགའ་ལྡན་ཁྲི་རིན་པོ་ཆེ་མཆོག་དང་གདན་སའི་མཁན་པོ་ཚོ་ཡོད་སྟབས། ཁྱེད་ཚོས་ཡེ་ཤུའི་བླ་ཅེན་ལ་དཔེ་བལྟས་ནས་ཁུར་ཆེ་ཙམ་བླངས་ཏེ། ཁ་ཡོད་ལག་ཡོད་གཅིག་བྱེད་དགོས་པ་མ་གཏོགས། མེད་པ་གཅིག་ལ་ཡོད་མདོག་མདོག་བྱས་ནས་བསྡད་ན། བླུན་པོས་བླུན་པོར་མགོ་སྐོར་ཟེར་བ་དེ་ཆགས་རྒྱུ་ཡིན་པ་མ་ཟད། བསྟན་པ་སྤྱི་ལ་གནོད་རྒྱུ་ཡིན་སྟབས་དགེ་འདུན་པའི་ནང་གང་བྱུང་བྱེད་མཁན་འདུག་ན་ཐུགས་རྗེ་ཆེ་ཟེར་ནས་གནས་དབྱུང་གཏོང་དགོས། ཞེས་སོགས་གསུངས་ཡོད་འདུག

གསར་འགོད་པ། དོན་གྲུབ།

དུས་བབ་དྲ་བ་ནས།།