སློབ་སྦྱོང་ཐོག་ཕོ་མོ་འདྲ་མཉམ་བྱོས།

༧གོང་ས་མཆོག་གིས་རྒྱ་གར་ལྷོ་ཕྱོགས་དགའ་ལྡན་བྱང་རྩེ་གྲྭ་ཚང་དུ་བྱང་ཆུབ་ལམ་རིམ་ཆེན་མོའི་བཀའ་ཆོས་འཕྲོར་སྐྱོང་གནང་གི་ཡོད་པ་དང་བསྟུན་ཏེ། ཕྱི་ཚེས་ ༢༨ ཉིན་གྱི་ཕྱི་དྲོར་༧གོང་ས་མཆོག་བཙུན་དགོན་བྱང་ཆུབ་ཆོས་གླིང་དུ་ཆིབས་བསྒྱུར་བསྐྱངས་ཏེ། བཙུན་མ་རྣམས་ལ་ཕོ་མོ་འདྲ་མཉམ་གྱི་འདུ་ཤེས་ཐོག་ནས་བསླབ་པ་
སློབ་གཉེར་མཐར་ཕྱིན་པ་དགོས་པའི་སྐོར་གསུངས་པ་འདིར་བསྡུ་སྒྲིག་བྱས་ཡོད།

༧གོང་ས་མཆོག་གིས་བཀའ་གནང་དོན། ཡེ་ཤུའི་ཨ་ནེ་དེ་འདྲས་སྤྱི་ཚོགས་ཀྱི་ཞབས་འདེགས་བསྒྲུབ་རྒྱུ་དང་། སློབ་གྲྭ་ཁག་ནང་དགེ་རྒན་སོགས་བྱེད་བཞིན་འདུག ང་རང་ཚོའི་བཙུན་མའི་ནང་དེ་འདྲ་མང་ཙམ་འཐོན་ཐུབ་པ་བྱུང་ན། ལྷག་པར་དགེ་རྒན་བྱེད་མཁན་མང་ཙམ་བྱུང་ན་ཧ་ཅང་ཕན་ཐོགས་ཡོང་ངེས་རེད། དེང་སྐབས་ཕོ་མོ་འདྲ་མཉམ་ཞེས་ང་ཚོས་ཤོད་ཀྱི་ཡོད། འདྲ་མཉམ་ཡོང་རྒྱུ་ངོ་མ་དེ་སློབ་སྦྱོང་ཐོག་ནས་དགེ་བཤེས་དང་དགེ་བཤེས་མ་ཞེས་འདྲ་འདྲ་འཐོན་ཐུབ་པ་ཞིག་བྱུང་ན་ང་རང་ཚོའི་ཕོ་མོ་འདྲ་མཉམ་གྱི་གནས་ཚུལ་ལའང་ཕན་ཐོགས་ཡོད། བཅོམ་ལྡན་འདས་ཀྱི་རྩ་བའི་ཆ་ནས་དགེ་སློང་ཕ་དང་དགེ་སློང་མ་ཞེས་ཐོབ་ཐང་གཅིག་པ་གནང་ཡོད། འོན་ཀྱང་དེའི་དུས་ཀྱི་རྒྱ་གར་གྱི་ཡུལ་སྤྱོད་དང་བསྟུན་ནས་དགེ་སློང་ཕ་གྲལ་གྱི་གོང་དུ་བསྡད། དགེ་སློང་མ་གྲལ་གྱི་མཇུག་ཏུ་སྡོད་རྒྱུ་དེ་འདྲ་ཞིག་ཡོད། དེ་ནི་གཙོ་བོ་སྐབས་དེའི་རྒྱ་གར་གྱི་ཡུལ་སྤྱོད་དང་མཐུན་པ་ཞིག་རེད། དེ་རིང་ཁ་སང་དུས་སྐབས་སུ་བུད་མེད་དང་སྐྱེས་པ་འདྲ་མཉམ་ཡིན། ཞེས་འགྲོ་དགོས་པ་ཧ་ཅང་གལ་ཆེན་པོ་རེད། དེ་ཙམ་དུ་མ་ཟད། ངོས་ཀྱིས་ནམ་རྒྱུན་དུ་རྗོད་ཀྱི་ཡོད། དེ་རིང་ཁ་སང་དུས་སྐབས་སུ་དེང་དུས་ཀྱི་ཤེས་ཡོན་རྐྱང་པས་འདང་གི་མེད། དེ་རིང་ཁ་སང་དུས་ཚོད་ལ་བྱམས་བརྩེ་ཡར་རྒྱས་གཏོང་རྒྱུ་དེ་གནད་དགག་ཆེན་པོ་ཞིག་ཆགས་ཡོད། དེ་འདྲ་ཡིན་དུས་བྱམས་བརྩེ་ཡར་རྒྱས་གཏོང་རྒྱུར་སོ་སོའི་ལུས་པོའི་བསྒྲུབ་ཆ་ནས་བུད་མེད་ཚོས་གཞན་སྡུག་བསྔལ་གྱི་མནར་བ་ལ་མི་བཟོད་པ་དེ་ཤུགས་ཆེ་བ་ཡོང་གི་ཡོད། དེ་འདྲ་ཡིན་དུས་དེ་རིང་ཁ་སང་གི་དུས་ཚོད་ལ་འཛམ་གླིང་ཤེས་ཡོན་གྱི་ནང་བྱམས་བརྩེ་སློབ་སྦྱོང་སྤྲོད་རྒྱུ་ཡོད་པ་ཞིག་དང་། དེའི་ཐོག་ནས་སྤྱི་ཚོགས་ནང་བྱམས་བརྩེ་གོང་མཐོར་གཏོང་དགོས་པའི་དུས་ཚོད་གཅིག་ལ་ཁྱེད་རང་ཚོ་བུད་མེད་ཚོ་གནད་དགག་ཆེན་པོ་ཞེ་དྲག་ཆགས་ཡོད། དེ་མཁྱེན་བྱུང་ནམ། ཞེས་སོགས་གསུངས་འདུག

ཡང་ཁོང་གིས་གསུངས་དོན། མིའི་ཀླད་པ་ལ་བུད་མེད་དང་ཁྱོ་ག་གཉིས་ལ་དབྱེ་བ་གང་ཡང་མེད། ཐོབ་ཐང་དབྱེ་བའང་གང་ཡང་མེད། རྒྱ་གར་གྲུབ་ཆེན་བརྒྱད་བཅུའི་ནང་དུའང་བུད་མེད་འགའ་ཤས་ཡོད། བོད་ལ་དགེ་སློང་མ་དཔེར་ན་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་སྨྱུང་གནས་ཀྱི་ཕྱག་སྟོང་སྤྱན་སྟོང་སྤྱན་རས་གཟིགས་ཀྱི་ཆོ་ག་དེ་འདྲའི་སྨྱུང་གནས་གཏོང་གི་ཡོད། དེ་ཡང་དང་པོ་ཁུངས་གཏུགས་ས་དེ་དགེ་སློང་མ་རེད། དགེ་སློང་མ་དཔལ་མོ་ཞུ་བ་ཁོང་རེད། གང་ལྟར་བསྟན་པའི་བྱ་བ་ཆེན་པོ་བསྒྲུབ་ཡོད། བོད་དུའང་བུད་མེད་ཀྱི་རྣལ་འབྱོར་མ་ཆེན་པོ་དེ་འདྲ་བྱུང་ཡོད། དཔེར་ན་དཔྱོད་གཏོང་མཁན་ལ་མཚོན་ནའང་རེད། གང་ལྟར་མང་པོ་གཅིག་གིས་བུད་མེད་ཀྱི་རྟེན་ལ་བསྟན་པའི་བྱ་བ་སྒྲུབ་མཁན་མང་པོ་བྱུང་ཡོད། དེར་བརྟེན། ཁྱེད་ཚོས་ང་ཚོ་བུད་མེད་ཡིན། ཞེ་དྲག་གང་ཡང་ཡོང་གི་མ་རེད་བསམ་པའི་བསམ་བློ་དེ་འདྲ་མ་བཏང་བར་ང་ཚོ་འདྲ་མཉམ་ཡིན་ཞེས་ངར་སེམས་དོད་ཙམ་བྱེད་དགོས། ཡང་འདྲ་མཉམ་ཡིན་ཞེས་འཛིང་རེས་དང་ཨབ་ཏང་ཚད་དགོས་ནའང་འདྲ་མཉམ་ཡིན་ཞེས་བརྗོད་ཐུབ་རྒྱུ་རྩ་བ་ནས་མེད། ང་ཚོ་འདྲ་མཉམ་ཡིན་བརྗོད་རྒྱུ་དེ་སངས་རྒྱས་ཀྱི་ཆོས་བཅོམ་ལྡན་འདས་ཁོང་རང་གིས་དགེ་སློང་མ་ཞེས་ཐོབ་ཐང་གཅིག་པ་གནང་ཡོད། དེར་བརྟེན་ང་ཚོས་སློབ་སྦྱོང་བྱེད་རྒྱུ་ཚང་མ་སྐྱེས་པ་དང་འདྲ་མཉམ་བྱས་ཏེ། བསྟན་པ་དང་འགྲོ་བའི་དོན་དུ་ཞབས་འདེགས་བསྒྲུབ་རྒྱུ་དེ་དག་རབ་བྱུང་ཕོ་དང་འདྲ་མཉམ་བྱེད་ཐུབ་པ་གཅིག་བྱ་དགོས། ཞེས་བཀའ་སློབ་བསྩལ་ཡོད་འདུག

པདྨ་མཚོས་བསྡུ་སྒྲིག་བྱས།

དུས་བབ་དྲ་བ་ནས།།