སྡེ་དཔོན་ལྷག་བསམ་ཅན་ཞིག་རྒྱ་གཞུང་གིས་དམར་གསོད་བཏང་སོང་།

བོད་ནས་གནས་ཚུལ་འབྱོར་བ་ལྟར་ན་ཟླ་སྔོན་མའི་ཟླ་མཇུག་ཙམ་ལ་འབྲི་རུ་རྫོང་ཁོངས་རྒྱ་ཤོད་གཡང་ཤོད་ཤང་འོག་གི་དབུ་གཞུང་གྲོང་སྡེའི་མགོ་ཁྲིད་འབའ་ཆེན་རྒྱལ་ཞུ་བ་ཁོང་རྒྱ་གཞུང་གིས་དམར་གསོད་བཏང་ཡོད་པ་མ་ཟད། གཞན་ས་གནས་ཀྱི་ཉེས་མེད་མི་མང་པོ་ཞིག་ཀྱང་འཛིན་བཟུང་བྱས་ཡོད་འདུག

བོད་ནས་མིང་བརྗོད་འདོད་མེད་མཁན་ཞིག་གིས་ཕྱི་ཕྱོགས་སུ་ཡིག་ངག་གཉིས་ཐོག་ནས་གནས་ཚུལ་མཁོ་སྤྲོད་བྱས་པ་ལྟར་

ན། ཕྱི་ལོ་ ༢༠༡༤ ཟླ་ ༡༡ ཚེས་ ༢༡ ཉིན། འབྲི་རུ་རྫོང་ཁོངས་རྒྱ་ཤོད་གཡང་ཤོད་ཤང་ངམ་(སེན་ཚ་ཤང་)ཁོངས་དབུ་གཞུང་གྲོང་སྡེའི་མགོ་ཁྲིད་འབའ་ཆེན་རྒྱལ་བའམ་ངག་དབང་སྨོན་ལམ་ཞུ་བ་རང་ལོ་ ༥༠ ཡས་མས་ཡིན་པ་ཁོང་རྒྱ་གཞུང་གིས་སེན་ཚ་ཤང་དུ་དམར་གསོད་བཏང་ཡོད་འདུག་པ་མ་ཟད། གྲོང་ཚོ་དེའི་མི་མང་ ༥༠ ཙམ་འཛིན་བཟུང་བྱས་ཏེ། གཡང་ཤོད་ཤང་དུ་བཀག་ཉར་བྱས་མཐར་འབྲི་རུ་རྫོང་དུ་ཁྲིད་དེ་བཙོན་འཇུག་བྱས་ཡོད་འདུག༼མིང་ཤེས་པ་ཁག་ཅིག་ནི་དཔའ་དགའ་དང་ནད་མེད། དྲོ་རིལ། བཀྲ་ཤིས་བཅས་རེད་འདུག ༽

དོན་རྐྱེན་དེའི་འབྱུང་རྐྱེན་ད་སྔ་ཁ་གསལ་བོ་ཞིག་རག་ཐུབ་མེད་ཀྱང་། དབུ་གཞུང་གྲོང་ཚོའི་མགོ་ཁྲིད་འབའ་ཆེན་རྒྱལ་བ་ལགས་རྒྱ་ཤོད་པད་དཀར་དགོན་པའི་གྲྭ་ཟུར་ཞིག་ཡིན་པ་དང་། ཁོང་ནི་བོད་མི་རིགས་ལ་ལ་རྒྱ་ཆེ་ཞིང་། སྙིང་སྟོབས་ལྡན་པའི་གཤིས་བཟང་གཞུང་དྲང་ཞིག་ཡིན་པ་དང་། ལོ་མང་རིང་དབུ་གཞུང་གྲོང་ཚོའི་མགོ་ཁྲིད་གནང་སྟེ། མང་ཚོགས་ཀྱིས་ཁོང་ལ་གུས་བཀུར་གདེང་འཇོག་ཆེན་པོ་བྱེད་ཀྱིན་ཡོད་སྟབས། རྒྱ་གཞུང་གིས་ཁོང་ལ་དུས་རྒྱུན་ལྟ་སྟངས་ཡག་པོ་མེད་པ་དང་། ཉེ་ཆར་རྒྱ་གཞུང་གིས་འབའ་ཆེན་རྒྱལ་བ་གྲོང་ཚོའི་མགོ་ཁྲིད་དུ་བཞག་མི་ཆོག་པའི་བཙན་བཀའ་བཏང་ཡོད་པ་མ་ཟད། རྒྱ་ཡིས་མགོ་ཁྲིད་གསར་པ་ཞིག་ཀྱང་གྲོང་སྡེའི་མགོ་ཁྲིད་ལ་བསྐོ་རྒྱུ་བྱས་འདུག་སོགས་ལ་བརྟེན་ཏེ། ཁོང་ལ་ཉེས་མེད་ཉེས་འཛུགས་ཀྱིས་དམར་གསོད་བཏང་བ་ཡིན་པར་ས་གནས་མི་མང་ཚོས་ཚོད་དཔག་བྱེད་ཀྱིན་ཡོད་འདུག

སེན་ཚ་ཤང་དུ་དམར་གསོད་དང་འཇུ་བཟུང་དོན་རྐྱེན་དེ་དག་བྱུང་མ་ཐག རྒྱ་གཞུང་གིས་མི་མང་ལ་གནས་ཚུལ་ཕྱི་གྱར་མི་ཆོག་པའི་སྡིགས་ར་སྐུལ་བ་དང་། ས་གཞན་ལ་འགྲོ་སྐྱོད་མི་ཆོག་པའི་དམ་དྲག་བྱས་པ། ཡུལ་མི་རྣམས་ཀྱིས་གནས་ཚུལ་ཕྱི་ལ་མི་སྒྲག་རྒྱུའི་ས་རྟགས་དང་མཛུབ་ཐེལ་རྒྱག་འཇུག་གི་ཡོད་འདུག

སྡེ་དཔོན་འབའ་ཆེན་རྒྱལ་ལགས་ཀྱིས་བོད་པའི་ཆོས་དང་རིགས་གཞུང་དར་སྤེལ་དང་། གཞོན་སྐྱེས་ཚོའི་ཤེས་ཡོན་ཡར་རྒྱས། ནང་ཁུལ་མཐུན་སྒྲིལ་བཅས་ཀྱི་ཐོག་ལས་འགུལ་སྣ་ཚོགས་སྤེལ་བར་གྲུབ་ཆེན་པོ་ཐོན་ཡོད་ཅིང་། ཁོང་གིས་གྲོང་ཚོའི་ནང་སྤྱི་ཁང་རྒྱ་ཆེན་པོ་ཞིག་བརྒྱབ་ཡོད་པ་དེར། བླ་མ་དགེ་བཤེས་ཚོའི་བཀའ་ཆོས་གོ་སྒྲིག་ཞུ་ས་དང་། ལོ་ལྟར་མང་ཚོགས་ཀྱིས་སྒྲོལ་མ་དང་མ་ཎི་དུང་སྒྲུབ། མང་ཚོགས་ཀྱིས་གླུ་གར་ཞབས་བྲོ་སྦྱང་ས་དང་སྤྲོ་སྐྱིད་བཏང་ས་བྱེད་ཀྱིན་ཡོད་པ་དང་། ཡིག་རྨོངས་སེལ་ཕྱིར་ཁོང་གིས་གྲོང་ཚོའི་སློབ་གྲྭ་ཞིག་བརྒྱབ་ཡོད་པའི་ནང་ཡིག་རྨོངས་བ་རྒན་གཞོན་དར་གསུམ་ལ་གྲོང་སྡེའི་ནང་གི་ཤེས་ཡོན་ཅན་དང་སློབ་གྲྭར་འགྲོ་མྱོང་མཁན་ཚོས་སློབ་ཁྲིད་གནང་སྟེ་གཅིག་ཕན་གཅིག་གྲོགས་ཀྱི་ལམ་ལུགས་བཟོས་ཡོད་འདུག གྲོང་ཚོ་ནས་བོད་ཀྱི་ཟློས་གར་རུ་ཁག་ཆེ་འབྲང་ཆུང་གསུམ་བཙུགས་པ་སྐབས་མཚམས་དབུ་གཞུང་གྲོད་སྡེ་དང་པད་དཀར་དགོན་པའི་དབྱར་སྐྱིད་སྐབས་བོད་ཀྱི་རིགས་གཞུང་ཁྲབ་སྟོན་གནང་གི་ཡོད་འདུག དེ་བཞིན། གྲོང་སྡེའི་སྨན་ཁང་དང་ཚོང་ཁང་། སྣུམ་འཁོར་རྒྱ་ལམ་བཅས་འཛུགས་སྐྲུན་བྱས་ཡོད་འདུག

ཁོང་གིས་བོད་མི་ནང་ཁུལ་ནང་དམེ་སྤང་དུ་བཅུག་པ་དང་། གྲོང་ཚོའི་ཕོ་གཞོན་ཚོའི་རྒྱན་རྩེད་རིགས་དང་། ཆང་རག་དང་དུ་བ་སོགས་སྤང་དུ་བཅུག་པ། རྐུན་ཇག་སྤང་དུ་བཅུག་པ་སོགས་ཀྱི་ལས་དོན་ལ་མི་དམངས་གིས་བཀའ་གསུང་ཅི་སྒྲུབ་ཞུས་ཏེ། གྲོང་སྡེའི་གཞོན་སྐྱེས་ཚོའི་འགྲོ་འདུག་སྤྱོད་གསུམ་ཐོག་འགྱུར་ལྡོག་ཆེན་པོ་ཕྱིན་ཡོད་འདུག

གཞན། རྒྱ་ཤོད་པད་དཀར་དགོན་ནས་གྲྭ་བ་ ༤༠ ལྷག་ཙམ་ཕྱིར་ཕུད་བཏང་བ་དང་། རྒྱ་ཤོད་ཡ་ང་བྱ་མདའ་བཙུན་དགོན་བྱ་མདའ་དགོན་ནས་བཙུན་མ་བརྒྱ་ལྷག་ཙམ་ཕྱིར་ཕུད་བཏང་ཡོད་འདུག༼དེ་སྔོན་བཙུན་མ་གྲངས་ ༢༦ ཙམ་ཕྱིར་ཕུད་བཏང་བའི་གནས་ཚུལ་སྤེལ་ཟིན།༽ད་དུང་མདོ་སྟོད་སྨད་ཁུལ་དུ་རྒྱ་ཤོད་ཀྱི་གྲྭ་བཙུན་མང་པོ་སློབ་གཉེར་དུ་སྐྱོད་ཡོད་པ་ཚང་མ་ཕྱིར་རང་ཡུལ་ལ་འཕྲལ་དུ་ལོག་དགོས་ཚུལ་ནང་མི་དང་དགོན་པའི་འགན་འཛིན་སོགས་ལ་བཙན་བཀའ་བཏང་བ་དང་། གལ་སྲིད་དུས་ལྟར་མ་ལོག་ཚེ་ཕ་ཡུལ་ནས་གཏན་འཕུད་བྱ་རྒྱུ་ཡིན་པའི་ཁྱབ་བསྒྲགས་ཀྱང་བྱས་ཡོད་འདུག དེར་བརྟེན། ས་ཕྱོགས་གཞན་དུ་ཡོད་པའི་གྲྭ་བཙུན་མང་པོ་ཞིག་གིས་མི་འདོད་བཞིན་དུ་སློབ་གཉེར་བློས་བཏང་བྱས་ཏེ་ཕྱིར་ལོག་དགོས་བྱུང་བ་དང་། ད་ཆར་ཉིན་ལྟར་དགོན་པ་དེ་དག་ནང་བསམ་བློའི་སློབ་གསོ་སྤེལ་ཏེ་སུན་འཚེར་བཟོ་བཞིན་ཡོད་འདུག

གནས་ཚུལ་གཞན་ཞིག་ནི། དེང་སྐབས་འབྲི་རུ་རྫོང་གི་མགོ་ཁྲིད་དྲེང་འགང་ཧྲུའུ་ཅི་ཟེར་དེས་དོན་ཚན་ ༥༩ ཅན་གྱི་སྒྲིག་ཁྲིམས་ཞིག་རྫོང་འོག་གི་ས་ཁུལ་ཁག་དུ་ལག་བསྟར་བྱས་ཏེ། མི་མང་ལ་དོན་མེད་ཉེས་འཇུགས་ཀྱིས་སྡུག་སྦྱོངས་མནར་གཅོད་གཏོང་གི་ཡོད་པ་དང་། ཉེ་ལམ་མི་མང་ ༣༠༠ ལྷག་འབྲི་རུ་རྩམ་མདོ་མ་ཟེར་བའི་ས་ཚུགས་དེར་རྒྱ་དམག་གིས་རྡུང་རྡེག་ཚད་མེད་བཏང་པ་དང་། མི་དེ་དག་ས་དོང་ཆེན་པོ་ཞིག་གི་ཁ་ནས་མཆོང་དུ་བཅུག་ཅིང་། ལོ་རྒས་པ་རྣམས་མཆོང་མ་ཐུབ་པར་རྡུང་རྡེག་མནར་གཅོད་བཏང་ཡོད་འདུག བོད་མི་དེ་ཚོས་ངག་ནས་མ་འོངས་པར་མི་ང་ཚོའི་མྱོང་བ་ནང་བཞིན་བོད་མི་གཞན་ཚོས་མི་མྱོང་བར་ཤོག་ཟེར་ནས་སྨོན་ལམ་བཏབ་པ་དང་། ང་ཚོ་མི་ལུས་མ་རེད་ཟེར་ནས་སྡུག་སྐད་ཀྱང་ཤོར་དགོས་བྱུང་ཡོད་འདུག

གནས་ཚུལ་བརྗོད་མཁན་གྱིས་འབྲི་རུ་རྫོང་གི་མགོ་ཁྲིད་དྲེང་འགང་ཧྲུའུ་ཅིའི་ལས་འགུལ་དེ་མཚམས་འཇོག་ཡོང་ཐབས་ལ། རྒྱལ་སྤྱིའི་ཐོག་ནས་གནོན་ཤུགས་དང་ཐབས་ཤེས་འདྲ་གཏོང་རྒྱུ་ཡོད་ན་མགྱོགས་མྱུར་གཏོང་དགོས་པ་ལས། མི་མང་ཚོས་མ་ཤི་མྱལ་བའི་སྡུག་བསྔལ་མྱོང་བཞིན་འདུག ཅེས་ཚོར་བ་རྐྱེན་པོའི་འབོད་སྐུལ་ཞུ་བཞིན་ཡོད་འདུག

གནས་ཚུལ་ནང་འཁོད་པར། བོད་ལྗོང་ཤར་ཕྱོགས་ཤན་ཁག་གསུམ་དང་༼སྦར་ཆེན་རྫོང་དང་། སོག་རྫོང།་ འབྲི་རུ་རྫོང་བཅས་གསུམ་ཡིན།༽འབྲི་རུ་རྫོང་ཁུལ་དང་སྒོས་སུ་རྒྱ་ཤོད་ཁུལ་ནི་བོད་རང་སྐྱོང་ལྗོངས་སྲིད་གཞུང་གི་ཆེས་དམ་དྲག་ཆེ་ས་དང་། གསང་རྒྱ་དམ་སའི་དམིག་བཀར་ས་ཁུལ་ཞིག་ཡིན་སྟབས། ལོ་ཤས་གོང་ནས་ཆབ་སྲིད་ཀྱི་གནས་ཚུལ་བསྟུད་མུར་བྱུང་སྟབས། སྐབས་ཤིག་རིང་ཁ་པར་བཀག་པ་དང་། དྲ་ལམ་རྩ་བཀག་བཏང་བས་ཕྱི་ཕྱོགས་ནས་ཕ་མ་སྤུན་མཆེད་ལའང་འབྲེལ་བ་བྱེད་ཐབས་མེད་པ་ཆགས་ཡོད་འདུག

རྒྱ་ཤོད་བསྟན་འཛིན་རབ་བརྟན་ལགས་ཀྱིས་གནས་ཚུལ་བཏང་འབྱོར་བྱུང་། དུས་བབ་དྲ་བ་ནས།།