ཨུ་རུ་སུའི་དཔལ་འབྱོར་ཉམས་གུད་དུ་ཕྱིན།

ད་ཆ་ཨུ་རུ་སུར་དཔལ་འབྱོར་ཉམས་ཉེས་ཤུགས་ཆེན་ཕྱིན་ཏེ་ཨ་སྒོར་གཅིག་ལ་ཨུ་རུ་སུའི་སྒོར་ ༨༠ ལྷག་སྤྲོད་དགོས་ཀྱི་ཡོད་འདུག

ཉེ་ལམ་ཨུ་རུ་སུའི་སྲིད་འཛིན་པུ་ཌེན་གྱིས་གསར་འགོད་གསལ་བསྒྲགས་ཤིག་སྤེལ་ཏེ། ཡུག་རེན་གནད་དོན་གྱི་རྐྱེན་པས་ཨུ་རུ་སུར་ཡུ་རོབ་མཐུན་ཚོགས་དང་ཨ་རིས་

དཔལ་འབྱོར་ཉེས་ཆད་བཅད་པ་དང་། རྒྱལ་སྤྱིའི་ཁྲོམ་རའི་ཐོག་རྡོ་སྣུམ་གྱི་གོང་ཚད་ཆག་པ་བཅས་ལ་བརྟེན་ཏེ། འདི་ལོར་ཨུ་རུ་སུའི་དངུལ་གྱི་ཛ་ཐང་བརྒྱ་ཆ་ ༤༨ ལྷག་མར་ཆག་ཡོད་པ་ཕྱིར་བསྒྲགས་ཡོད་པ་དང་། ཟླ་འདིའི་ཚེས་ ༢༦ ཉིན་ཨུ་རུ་སུའི་དཔལ་འབྱོར་བློན་ཆེན་ཨན་ཌོན་སེ་ལུ་ཎེ་ཝུ་ (Anton Siluanov) ཡིས་ད་ལྟ་རྒྱལ་སྤྱིའི་ཐོག་རྡོ་སྣུམ་བྷེ་རལ་(barrel)གཅིག་ལ་ཨ་སྒོར་ ༦༠ བྱེད་བཞིན་པ་དེར་འགྱུར་བ་ཞིག་མ་བཏང་ཚེ། ཨུ་རུ་སུའི་དཔལ་འབྱོར་བརྒྱ་ཆ་ ༤ ཉམས་རྒུད་འགྲོ་རྒྱུ་ཡིན་པ་དང་། ལོ་རྗེས་མ་ནས་བཟུང་གཞུང་གི་བང་མཛོད་ནང་གསོག་འཇོག་བྱས་པའི་གཏན་འཇགས་མ་དངུལ་ནས་འགྲོ་གྲོན་གཏོང་དགོས་ཆགས་རྒྱུ་ཡིན་ཚུལ་སོགས་བརྗོད་འདུག

སྲིད་འཛིན་པུ་ཌེན་གྱི་དཀའ་ངལ་དེ་སེལ་ཆེད་ཨུ་རུ་སུས་གསོག་འཇོག་བྱས་པའི་གཏན་འཇགས་མ་དངུལ་ནས་ཨ་སྒོར་ཁྲག་ཁྲིག་ ༨༢༦ བཏང་ནས་དཀའ་ངལ་སེལ་ཐབས་བྱས་ཡོད་ཀྱང་། ཟླ་ཤས་གོང་རྒྱལ་སྤྱིའི་ཁྲོམ་རར་རྡོ་སྣུམ་གྱི་རིན་གོང་ཆག་པར་བརྟེན་ཨུ་སུ་སུའི་དཔལ་འབྱོར་སྐྱོབ་ཐབས་ཀྱི་སྲིད་ཇུལ་ལ་ནུས་པ་ཐོན་མེད་སྟབས། ཟླ་འདིའི་ཚེས་ ༡༧ ཉིན་པུ་ཌེན་གྱི་ཨུ་སུའི་དངུལ་གྱི་ཛ་ཐང་བརྒྱ་ཆ་ ༤༨ ལྷག་ཆག་ཡོད་པ་ཕྱིར་བསྒྲགས་བྱས་ཡོད་འདུག

ཨུ་རུ་སུའི་ཁྱིམ་མཚེས་རྒྱལ་ཁབ་()ཡུག་རེན་ནང་ཤར་ཕྱོགས་ཨུ་རུ་སུར་དགའ་མོས་བྱེད་མཁན་ཕྱོགས་ཁག་ཅིག་དང་། ནུབ་ཕྱོགས་ཡུ་རོབ་ལ་དགའ་མོས་བྱེད་མཁན་ཕྱོགས་ཁག་ཅིག་བཅས་ཡོད་པ་ལྟར། ༢༠༡༣ ལོའི་ཟླ་ ༡༡ ནང་། སྲིད་འཛིན་ཡཱ་ཎོ་ཁོ་བེ་ཆི་ (Viktor Yanukovych) ཡིས་ཡུ་རོབ་མཐུན་ཚོགས་དང་ཚོང་དོན་གྲོས་ཆོད་འཇོག་རྒྱུའི་འཆར་གཞི་ལ་ཨུ་རུ་སུའི་གནོན་ཤུགས་སྤྲད་མཐར། གྲོས་མཐུན་དེར་མིང་རྟགས་འགོད་ཐུབ་མེད་སྟབས། ༢༠༡༤ ལོའི་ཟླ་ ༢ ཚེས་ ༢༡ ཉིན་ནས་བཟུང་ཡུག་རེན་རྒྱལ་སའི་ཐང་ཆེན་དུ། མང་ཚོགས་ཚོས་ངོ་རྒོལ་ཤུགས་ཆེན་བྱུང་ཡོད་ཅིང་། ཁག་ཅིག་གིས་ཡུ་རོབ་མཐུན་ཚོགས་དང་མཉམ་འབྲེལ་བྱེད་པ་དང་ཁག་ཅིག་གིས་ཨུ་རུ་སུར་མཉམ་འབྲེལ་བྱེད་དགོས་པའི་དགོས་བཏོན་ཡོད།

ཕྱི་ཚེས་ ༢༢ ཉིན་ཡུག་རེན་གྲོས་ཚོགས་ཀྱིས་ཡཱ་ཎོ་ཁོ་བོ་ཆི་སྲིད་འཛིན་གྱི་ལས་གནས་ནས་གནས་དབྱུང་བཏང་ཡོད་སྟབས། ཨུ་རུ་སུར་དགའ་མོས་བྱེད་མཁན་ཡུག་རེན་ཤར་ཕྱོགས་གྱེན་ལོག་ཤོག་ཁག་དང་ཡུག་རེན་གཞུང་བར་དམག་འཁྲུག་ཐེངས་མང་བྱུང་ཡོད་ཅིང་། ཨུ་རུ་སུས་ཡུག་རེན་གྱི་གྱེན་ལོག་ཤོག་ཁག་ལ་རྒྱབ་སྐྱོར་བྱས་ཏེ་གོ་མཚོན་དང་དཔལ་འབྱོར་རོགས་རམ་སྤྲད་ཡོད་པ་དང་ཁཱེར་མེ་ཡ་བཙན་བཟུང་བྱས་པ། ཕྱི་ཟླ་ ༧ ཚེས་ ༡༧ ཉིན་ཨུ་རུ་སུར་རྒྱབ་སྐྱོར་བྱེད་མཁན་ཡུག་རེན་གྱེན་ལོག་ཤོག་ཁག་གིས་མཱ་ལེ་ཤི་ཡའི་འགྲུལ་སྐྱེལ་གནམ་གྲུ་ཞིག་གཏོར་རྒོལ་བཏང་བཅས་ལ་བརྟེན་ཏེ། ཕྱི་ཟླ་ ༧ ཚེས་ ༣༠ ཉིན་ཨ་རིའི་སྲིད་འཛིན་ཨོ་བྷ་མས་ཨ་རིའི་ཁེ་ལས་དང་ཨུ་རུ་སུ་གཞུང་གི་སྟངས་འཛིན་འོག་ཡོད་པའི་རོ་སེ་ནཱེབ་རྡོ་སྣུམ་ཁེ་ལས་དང་ཝུབ་དངུལ་རྩའི་ཁེ་ལས་ (VEB)། དེ་བཞིན། སྒེར་གཉེར་རྡོ་སྣུམ་ཁེ་ལས་ནཱོ་ཝ་ཌེག་ (Novatek) དང་སྒེར་གཉེར་དངུལ་ཁང་གྷ་ཛེ་པོར་རོམ་ (Gazprombank) བཅས་བར་གྱི་མཉམ་ལས་གྲོས་མཐུན་བཀག་སྡོམ་བྱས་པ་དང་། ཡུ་རོབ་མཐུན་ཚོགས་ཀྱིས་ཨུ་རུ་སུའི་ནང་ཡུ་རོབ་མ་འཛུགས་དངུལ་ཁང་དང་། ཡུ་རོབ་དངུལ་ཁང་གཉིས་ཀྱིས་མ་དངུལ་གཏོང་མཚམས་བཞག་ཏེ་ཨུ་རུ་སུར་དཔལ་འབྱོར་ཉེས་ཆད་བཏང་ཡོད་སྟབས། ཨུ་རུ་སུའི་དཔལ་འབྱོར་ཉམས་གུད་འགྲོ་མགོ་ཚུགས་ཡོད།

ཟླ་འདིའི་ཚེས་ ༢༦ ཉིན་ཨུ་རུ་སུའི་དཔལ་འབྱོར་བློན་ཆེན་གྱིས་ལོ་འདིའི་ལོ་མགོར་ཨ་སྒོར་གཅིག་ལ་ཨུ་རུ་སུའི་སྒོར་ ༣༠ ནས་ ༣༥ བར་བྱས་ནས་བརྗེ་པོ་རྒྱག་ཐུབ་ཀྱི་ཡོད་ཀྱང་། ད་ལྟ་རྒྱལ་སྤྱིའི་ཁྲོམ་རའི་ཐོག་རྡོ་སྣུམ་གྱི་གོང་ཚད་ཆག་ཡོད་སྟབས། ཨ་སྒོར་གཅིག་ལ་ཨུ་རུ་སུའི་སྒོར་ ༨༠ ཙམ་ཡིན་སྟབས། གཞུང་གི་གཏན་འཇགས་མ་དངུལ་ནས་སྒེར་གཉེར་དངུལ་ཁང་གྷ་ཛེ་པོར་རོམ་ (Gazprombank) ཨུ་རུ་སུའི་སྒོར་ཐེར་འབུམ་ ༧༠ དང་། དངུལ་ཁང་ཆེ་ཤོས་ཨང་གཉིས་པ་ (VTB) ལ་ཨུ་རུ་སུའི་སྒོར་ཐེར་འབུམ་ ༢༥༠ ཙམ་སྤྲད་ནས་ལྕགས་ལམ་འཛུགས་སྐྲུན་གྱི་ལས་གྲྭ་སོགས་ལ་མ་འཇོག་བྱས་ཏེ་དཔལ་འབྱོར་ཉམས་ཉེས་སེལ་ཐབས་བྱེད་དགོས་པའི་བཀོད་ཁྱབ་བཏང་ཡོད་པ་དང་། ཁ་སང་པུ་ཌེན་གྱིས་རྒྱ་དཀར་ནག་གཉིས་ཀྱི་སྲིད་འཛིན་དང་སྲིད་བློན་ལ་ཏར་འཕྲིན་བཏང་སྟེ། ཨུ་རུ་སུར་ཚོང་དོན་གྲོས་མཐུན་མང་ཙམ་འཇོག་རྒྱུར་རེ་སྐུལ་ཞུས་ཡོད་འདུག

༡༩༩༡ ལོར་ཨུ་རུ་སུ་སྤྱི་མཐུན་མཉམ་འབྲེལ་རྒྱལ་ཁབ་ཁ་གཏོར་བྱུང་བ་དང་འབྲེལ་འཛམ་གླིང་གི་གྲང་དམག་མཇུག་སྒྲིལ་རྗེས། ཨུ་རུ་སུའི་དཔལ་འབྱོར་ཉམས་ཉེས་ཤུགས་ཆེན་བྱུང་ཞིང་། ཨ་རུ་སུའི་དངུལ་རུབ་བྷེ་ལེ་(Ruble)ཡི་ཛ་ཐང་ཆག་ནས་དཀའ་ངལ་ཤུགས་ཆེན་འཕྲད་ཡོད་ཀྱང་། རིམ་པས་རྒྱལ་ཁབ་ཀྱི་དཔལ་འབྱོར་ཡར་རྒྱས་ཕྱིན་ཏེ་ཨུ་རུ་སུ་འཛམ་གླིང་ཐོག་དཔལ་འབྱོར་ཆེ་ཤོས་ཨང་བཞི་པ་ཆགས་ཡོད་ཀྱང་། ༡༩༩༨ ལོར་སླར་ཡང་ཨུ་རུ་སུའི་དཔལ་འབྱོར་ཉམས་རྒུད་ཕྱིན་ཏེ་དངུལ་གྱི་ཛ་ཐང་ཉམས་ནས་ལས་བྱེད་ལ་ཟླ་ཕོགས་སྤྲོད་དཀའ་བ་བྱུང་ཡོད་སྟབས། ༢༠༠༠ ལོར་པུ་ཌེན་ཨུ་རུ་སུའི་སྲིད་འཛིན་བསྐོ་བཞག་བྱུང་རྗེས་རྒྱལ་ཁབ་གཞན་དང་ཚོང་ དོན་འབྲེལ་ལམ་ཤུགས་ཆེན་བྱས་ཏེ་དཔལ་འབྱོར་སླར་གསོ་ཐུབ་ཡོད་པ་མ་ཟད། ལོ་བརྒྱད་རིང་གི་སྲིད་འཛིན་དུས་ཡུན་སྐབས་གཉིས་རིང་ཨུ་རུ་སུའི་དཔལ་འབྱོར་འཕེལ་རྒྱས་ཆེན་པོ་སོང་སྟེ། ལོ་རེའི་རྒྱལ་ཁབ་ཀྱི་ཐོན་རྫས་བརྒྱ་ཆ་ ༧༢།༨༤ ལ་བསླེབས་པ་མ་ཟད། ཨུ་རུ་སུ་ནི་རྒྱལ་སྤྱིའི་རྡུལ་ཕྲན་གློག་ཤུགས་ཀྱི་ཐོན་ཁུངས་བྱེད་ས་གཙོ་བོ་ཞིག་ཆགས་ཏེ། རྒྱལ་སྤྱིའི་རྒྱལ་ཁབ་ཁག་གིས་ཚོང་དོན་གྲོས་མཐུན་མང་པོ་འཇོག་སའི་སྟོབས་ཆེན་རྒྱལ་ཁབ་ཅིག་ཏུ་འགྱུར་ཡོད།

ནེའུ་ཡོག་དུས་བ་ཀྱི་རྩོམ་སྒྲིག་གཏམ་ནང་། ཨ་རི་དང་ཡུ་རོབ་མཐུན་ཚོགས་ཀྱིས་ཨུ་རུ་སུར་དཔལ་འབྱོར་ཉེས་ཆད་བཏང་ནས་ཨུ་རུ་སུར་གྱོང་གུད་ཆེན་པོ་ཕོག་ཡོད་སྟབས། པུ་ཌེན་གྱི་རྐུབ་སྟེགས་དེ་རྒྱུན་རིང་གནས་ཐུབ་དཀའ་མོ་ཆགས་སོང་ཞེས་བརྗོད་འདུག

གསར་འགོད་པ། དོན་འགྲུབ།

དུས་བབ་དྲ་བ་ནས།།