སྐྱེས་པ་ཞིག་གིས་རང་ལུས་མེར་བསྲེཊ།

ཕྱི་ཚེས་ ༡༥ ཉིན་གྱི་སྔ་དྲོར་རྒྱ་ནག་ཨན་ཧེ་ཞིང་ཆེན་ཧྥོ་ཡང་གྲོང་ཁྱེར་གྱི་སྲིད་གཞུང་ལས་ཁུངས་མདུན་དུ་སྐྱེས་པ་ཞིག་གིས་ངོ་རྒོལ་བྱས་ཏེ་རང་ལུས་མེར་བསྲེགས་བཏང་ཡོད་འདུག
ཟླ་འདིའི་ཕྱི་ཚེས་ ༡༥ ཉིན་སྔ་དྲོ་པེ་ཅིན་གྱི་ཆུ་ཚོད་ ༩ ཙམ་པ་ལ། རྒྱ་ནག་ཨན་ཧེ་ཞིང་ཆེན་ཧྥོ་ཡང་གྲོང་ཁྱེར་གྱི་སྲིད་གཞུང་ལས་ཁུངས་མདུན་དུ། སྐྱེས་པ་ཞིག་གིས་རང་ལུས་མེར་བསྲེགས་བཏང་ནས་ངོ་རྒོལ་བྱས་ཡོད་པ་དང་། ཅུང་ཙམ་འགོར་རྗེས་ཉེ་འགྲམ་གྱི་ཉེན་རྟོག་པ་ཞིག་གིས་མེ་གསོད་འཕྲུལ་ཆས་ཀྱིས་མེ་བསད་དེ་སྨན་ཁང་དུ་བསྐྱལ་ཡོད་པ་དང་། ད་ལྟའི་ཆར་ཤི་གསོན་གྱི་གནས་ཚུལ་གང་ཡང་གོ་ཐོས་མེད་པར་གྱུར་ཡོད་པ་མ་ཟད། ཝེ་པའོ་སོགས་སུ་ཐོན་པའི་དེ་འབྲེལ་གྱི་པར་རིས་དང་གནས་ཚུལ་རྣམས་ནག་གསུབ་བཏང་ཡོད་འདུག
དངོས་སུ་མཐོང་མཁན་དང་བརྒྱུད་ལམ་དུ་ཐོན་པའི་འདྲ་རིས་ལས་གསལ་བ་ལྟར་ན། མི་དེས་པུས་མོ་ས་ལ་བཙུགས་ཏེ་རང་ལུས་སུ་མེ་ལྕེ་དམར་པོ་ལྷབ་ལྷུབ་ཏུ་འབར་གྱིན་ཡོད་པ་དང་། འགྲམ་དུ་མེ་གསོད་འཕྲུལ་ཆས་ཤིག་ཀྱང་བཞག་འདུག སྐབས་དེར་ཉེ་འགྲམ་དུ་མི་མང་པོ་ཡོད་པ་མ་ཟད། ཉེན་རྟོག་པ་ཞིག་གིས་ལག་གཉིས་ཁུག་མའི་ནང་དུ་བཅུག་སྟེ་ལྟད་མོ་བལྟས་ནས་བསྡད་ཡོད་སྟབས། གནས་ཚུལ་དེ་བརྒྱུད་ལམ་དུ་ཁྱབ་རྗེས་མི་མང་པོས་ཉེན་རྟོག་པ་དེ་དང་མཐའ་འཁོར་གྱི་མི་ཚོའི་བྱ་སྤྱོད་ལ་སྐྱོན་བརྗོད་ཤུགས་ཆེན་བྱེད་བཞིན་འདུག
རྒྱ་ནག་གཞུང་ཕྱོགས་ནས་ད་ལྟའི་ཆར་མི་དེས་རང་ལུས་མེར་བསྲེགས་གཏོང་དགོས་པའི་རྒྱུ་རྐྱེན་ཐད་ཞིབ་བཤེར་བཞིན་ཡོད་ལུགས་བསྒྲགས་ཡོད་ཀྱང་། པེ་ཅིན་གྱི་གསར་འགྱུར་དྲ་བ་ཞེས་པའི་ནང་སྐྱེས་པ་དེ་གྲོང་ཁྱེར་སྲིད་གཞུང་གི་ར་བའི་ལྷོ་ངོས་སུ་གནས་སྡོད་བྱས་ཡོད་པ་དང་། སྲིད་གཞུང་གིས་ས་གནས་དེར་མྱུར་བགྲོད་གཞུང་ལམ་གསར་རྒྱག་བྱས་ཏེ་ཁོ་བོ་གནས་སྤོར་དུ་བཅུག་ཡོད་པ་མ་ཟད། གུན་གསབ་ཉུང་ངུ་ལས་མ་སྤྲད་པར་ངོ་རྒོལ་བྱས་པ་ཡིན་ལུགས་བརྗོད་འདུག་པ་དང་། ས་གནས་དེར་ལོ་མང་རིང་ནས་འཛུགས་སྐྲུན་ལས་གཞི་ཤུགས་ཆེན་སྤེལ་ཏེ། མི་མང་བཙན་གྱིས་གནས་སྤོ་རུ་བཅུག་པ་དང་གུན་གསབ་ཉུང་ཉུང་ཞིག་ལས་སྤྲོད་ཀྱི་མེད་པར་བརྟེན། མི་མང་གིས་ངོ་རྒོལ་ཐེངས་མང་བྱས་ཡོད་པ་མ་ཟད། ཕྱི་ལོ་ ༢༠༡༣ ལོར་ཀྲུའུ་ཀྲིན་ཉང་ཟེར་བའི་རྒྱ་མི་ཞིག་པེ་ཅིན་དུ་ཕྱིན་ཏེ་གནམ་བདེ་སྒོ་མོ་ཆེའི་མདུན་དུ་རང་ལུས་མེར་བསྲེགས་བཏང་ཡོད་འདུག
རྒྱ་རིགས་རྩོམ་པ་པོ་གྲགས་ཅན་ཁྲིན་ཝེ་ཅན་གྱིས་བོད་རྒྱ་རང་ལུས་མེར་བསྲེགས་གཏོང་མཁན་ཚོའི་སྐོར་ལ་དཔྱད་རྩོམ་ཞིག་སྤེལ་བའི་ནང་། རྒྱ་རིགས་རང་ལུས་མེར་བསྲེགས་གཏོང་མཁན་གྱི་གྲངས་འབོར་དེ་བོད་མི་དང་བསྡུར་ན་དེ་ཙམ་མང་པོ་མིན་ཡང་། རྒྱ་རིགས་རང་ལུས་མེར་བསྲེགས་གཏོང་མཁན་མང་ཆེ་བ་འབྱོར་འབྲིང་བ་སྟེ་དཔེར་ན། ཁྲིན་ཏུའུ་རུ་རང་ལུས་མེར་བསྲེགས་གཏོང་མཁན་ཐང་ཧྥོ་ཀྲིན་དང་ཀྲུའུ་ཀྲིའི་གྲོང་ཁྱེར་གྱི་ཝང་ཅཱ་ཀྲིན་སོགས་སྒེར་གྱི་རླངས་འཁོར་དང་ཐོག་ཁང་། ས་ཆ་སོགས་ཡོད་པའི་འབྱོར་འབྲིང་གྲལ་རིམ་གྱི་ཕྱུག་བདག་ཆུང་ཆུང་དག་རེད། ཡིན་ནའང་། འདས་པའི་ལོ་ ༡༠ ཙམ་གྱི་ནང་རྒྱ་ནག་གི་འབྱོར་འབྲིང་གྲལ་རིམ་གྱི་རྒྱུ་དངོས་ལ་གྱོང་གུད་ཆེན་པོ་བྱུང་བར་བརྟེན། མི་མང་པོ་ཨུ་ཐུག་ཐབས་ཟད་ཀྱིས་རང་ལུས་མེར་བསྲེགས་ཀྱི་ལམ་ཀར་ཞུགས་དགོས་ཁེལ་གྱི་ཡོད་སྐོར་བརྗོད་འདུག

གསར་འགོད་པ། པདྨ་མཚོ།

དུས་བབ་དྲ་ནས།