ས་འོག་བུ་སྐྱེས་ཁང་ཞིག་རྩད་ཆོད།
ཉེ་སྔོན་རྒྱ་ནག་ཧྲན་ཏུང་ཞིང་ཆེན་ཅི་ནན་གྲོང་ཁྱེར་ནས་ས་འོག་བུ་སྐྱེས་ཁང་ཞིག་རྩད་ཆོད་དེ། དོགས་ཡོད་ཉེས་ཅན་ ༡༠༣ འཛིན་བཟུང་བྱས་ནས་བྱིས་པ་ ༣༧ བསྐྱབས་ཡོད་འདུག
ཁ་སང་རྒྱ་ནག་གཞུང་འབྲེལ་དྲ་ལམ་ཁག་ནས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༢ ཉིན་རྒྱ་ནག་ཧྲན་ཏུང་ཞིང་ཆེན་ཅི་ལིན་གྲོང་ཁྱེར་གྱི་ཉེན་རྟོག་པས། གྲོང་ཁྱེར་དེའི་གད་སྙིགས་བཟོ་གྲྭ་རྙིང་པ་ཞིག་ནས་ས་འོག་བུ་སྐྱེས་ཁང་ཞིག་རྩད་ཆོད་དེ།
ལྐོག་ཚོང་བྱས་པའི་བྱིས་པ་ ༣༧ བསྐྱབས་ཡོད་པ་མ་ཟད། དོགས་ཡོད་ཉེས་ཅན་ ༡༠༣ འཛིན་བཟུང་བྱས་ཡོད་འདུག སྤྱི་ཚོགས་གནད་དོན་དཔྱད་ཞིབ་པ་ཚོས་རྒྱ་གཞུང་གི་འཆར་ལྡན་བུ་སྐྱེས་དང་ཕོ་མོ་དབྱེ་འབྱེད་ཀྱི་ཐོག་ནས་གནད་དོན་འདི་རིགས་བྱུང་བཞིན་ཡོད་སྟབས། རྩ་བའི་གནད་དོན་ཐག་བཅད་དེ་བྱིས་པ་ཉོ་མཁན་ཉུང་དུ་བཏང་བ་ཡིན་ན། ད་གཟོད་བྱིས་པ་བཙོང་སའི་ཚོང་ར་ཉུང་དུ་ཕྱིན་ཏེ། བྱིས་པ་བསླུ་ཚོང་གི་གནད་དོན་རང་བཞིན་གྱིས་ཉུང་དུ་འགྲོ་རྒྱུ་ཡིན་སྐོར་བརྗོད་ཀྱི་འདུག
ཐེངས་འདིར་ཉེན་རྟོག་པས་རྩད་ཆོད་བྱུང་བའི་ཕྲུ་གུ་མང་ཆེ་བ་ནི། ས་འོག་བུ་སྐྱེས་ཁང་དེས་ཐབས་ལམ་སྣ་ཚོགས་སྤྱད་དེ་ཕ་མ་ཚོར་གྲོས་ཆོད་འཇོག་ཏུ་བཅུག་རྗེས། སྦྲུམ་མ་བུ་སྐྱེས་ཁང་དུ་ཁྲིད་ཡོང་ནས་ཕྲུ་གུ་སྐྱེས་མ་ཐག་བུ་མོ་ཞིག་ལ་རྒྱ་སྒོར་ཁྲི་ ༥ ནས་ ༦ དང་། བུ་གཅིག་ལ་ཁྲི་ ༨ སྤྲད་ནས་ཉོས་ཡོད་པ་དང་། ཕྲུ་གུ་དེ་ཚོ་བསླུ་བྲིད་བཏང་ནས་བརྐུས་ཡོང་བའི་བྱིས་པ་ཚོ་དང་མཉམ་དུ་གྲོང་གསེབ་ཀྱི་འགོས་ནད་སྨན་ཁང་ཞིག་གི་རོ་ཁང་དུ་བཅུག་སྟེ། རྒྱུན་དུ་སྟབས་བདེའི་ཐུག་པ་དང་སྔོ་ཚལ་སྙིགས་རོ་སོགས་སྤྲད་དེ་མ་ཤི་ཙམ་དུ་བཞག་ཡོད་པ་མ་ཟད། ཕྲུ་གུ་ནད་པ་ཚོ་གང་བྱུང་དུ་གཡུགས་ཏེ་འཆི་གསོན་ལ་དོ་སྣང་བྱས་མེད་སྟབས། ཕྲུ་གུ་ཁ་ཤས་རྙིང་རུལ་དུ་གྱུར་ཡོད་པ་དང་། གསོན་པོར་ལུས་པའི་ཕྲུ་གུ་ཚོའི་ནང་དུའང་བདེ་ཐང་ཡིན་པ་གཅིག་ཀྱང་མེད་པ་མ་ཟད། ཕྲུ་གུ་ ༧ ལ་ཨེ་ཙི་དང་རེག་དུག་གི་ན་ཚ་ཡོད་འདུག
རྩད་ཆོད་པའི་བྱིས་པ་ཚོའི་ནང་ནས་ལོ་ན་ཆེ་ཤོས་ཡིན་པའི་ལོ་ ༣ ཅན་གྱི་བྱིས་པ་ཞིག་གིས། ཁོ་བོ་རྨོ་མོ་དང་ཨ་སྲུ་གཉིས་ཀྱིས་རྒྱ་སྒོར་ཁྲི་ ༤༢༠༠ བྱས་ཏེ་གཞན་ལ་བཙོང་ཡོད་ལུགས་བརྗོད་ཡོད་པ་དང་། ཕྱིས་སུ་ཕྲུ་གུ་དེའི་ཨ་མས་རང་གི་བྱིས་པ་རྙེད་སོན་བྱུང་ཡོད་པ་ཤེས་རྟོགས་བྱུང་སྟེ་ལེན་དུ་ཡོང་ཡོད་འདུག ཡིན་ནའང་། ད་ལྟའི་བར་ཕྲུ་གུ་གཞན་རྣམས་ལ་བདག་པོ་བྱུང་མེད་སྟབས། གནས་སྐབས་རིང་ཁ་ཤས་ཕ་ཚབ་མ་ཚབ་ཀྱི་ཁྱིམ་དུ་བཞག་ནས་བདག་སྐྱོང་བྱེད་ཀྱི་ཡོད་པ་དང་། ཁ་ཤས་ཧྲན་ཏུང་ས་གནས་ཀྱི་བྱིས་པའི་ཕན་བདེ་གླིང་གཉིས་སུ་བསྐྱལ་ཡོད་འདུག
ཧྲན་ཏུང་ཉེན་རྟོག་པས་གསར་འགྱུར་བརྒྱུད་ལམ་དུ། བྱིས་པ་ལྐོག་ཚོང་གི་ཉེས་དོན་འདི་ནི་རྣམ་པ་གསར་པའི་ཉེས་དོན་ཞིག་ཡིན་ལ། དང་ཐོག་ཧྲན་ཏུང་ཡན་ཀྲུའུ་ལྕགས་ལམ་ཉེན་རྟོག་པས་ས་གནས་གཞན་གྱི་སྦྲུམ་མ་མང་པོ་ཅི་ལིན་གྲོང་ཁྱེར་དུ་ཡོང་ནས་ཉིན་ཤས་བསྡད་རྗེས། ཕྲུ་གུ་འཁྱེར་མེད་པར་ཕྱིར་ལོག་འགྲོ་བའི་དོགས་ཡོད་གནས་ཚུལ་ཤེས་རྟོགས་བྱུང་ཡོད་པར་བརྟེན། འདས་པའི་ཟླ་ ༢ ལྷག་རིང་ཉེན་རྟོག་པས་རྩད་གཅོད་བྱས་པ་བརྒྱུད་ས་འོག་བུ་སྐྱེས་ཁང་འདི་རྩད་ཆོད་ཡོད་པ་དང་། འཛིན་བཟུང་བྱས་པའི་དོགས་ཡོད་ཉེས་ཅན་ཚོས་ཧྲན་ཏུང་ཅི་ལིན་དུ་སྦྲུམ་མ་མང་པོ་ཁྲིད་ཡོང་སྟེ་ཕྲུ་གུ་ལྐོག་ཚོང་བྱས་ཡོད་པ་མ་ཟད། སི་ཁྲོན་དང་ཡུན་ནན། ཀེ་ཀྲུའུ་སོགས་ནས་ཕྲུ་གུ་མངར་འབྱར་བརྐུ་འཕྲོག་བསླུ་ཉོ་བྱས་ཏེ། ཧྲན་ཏུང་ཅི་ལིན་དང་ཆི་ཧྥོ། ལིན་ཡེ་སོགས་སུ་ཕྱིར་ཚོང་བྱེད་ཀྱི་ཡོད་པའི་ཁུངས་སྣེ་རྙེད་ཡོད་སྟབས། མུ་མཐུད་ཉེས་དོན་འདིར་གཏིང་ཟབ་ཀྱིས་རྩད་གཅོད་ཞིབ་འཇུག་བྱ་རྒྱུ་ཡིན་ལུགས་བརྗོད་འདུག
གོང་གི་གནད་དོན་ཐད་ཧྲིན་ཀྲིན་དེང་རབས་སྤྱི་ཚོགས་ཞིབ་འཇུག་ཁང་གི་འགན་འཛིན་ལུའུ་ཁེ་མིན་གྱིས། ཕ་མས་རང་གི་བྱིས་པ་ལྐོག་ཚོང་བྱིས་པའི་གནས་ཚུལ་རྒྱ་ནག་ཡུན་ནན་དང་ཀེ་ཀྲུའུ་སོགས་སུའང་བྱུང་ཡོད་ཀྱང་། ཧྲན་ཏུང་ས་འོག་བུ་སྐྱེས་ཁང་གི་གནད་དོན་འདིས་མི་རྣམས་ཧང་སང་ཞིང་སྡང་སེམས་ཆེན་པོ་བསླངས་ཡོད་ཀྱང་། རང་ཉིད་ཀྱི་ཕྲུ་གུ་བཙོང་མཁན་གྱི་ཨ་མ་ཚོ་ཉེས་ཅན་ཡིན་ལ། གནོད་འཚེ་ཐེབས་མཁན་ཡང་ཡིན་སྟབས། སྲིད་གཞུང་གིས་གནད་དོན་འདི་རིགས་ཀྱི་ཐོག་ནས་སྤྱི་ཚོགས་ཀྱི་འགན་སྲུང་མ་ལག་ཇི་ལྟར་ལེགས་བཅོས་བྱས་ན། ད་གཟོད་ཉེས་དོན་འདི་རིགས་རྩ་བ་ནས་མི་འབྱུང་བར་བསམ་ཞིབ་བྱེད་དགོས་པ་རེད། རྒྱ་ནག་གིས་སྒོར་མོ་ཡོད་ལབ་པ་དེ་དོན་དངོས་ཐོག་སྲིད་གཞུང་ལ་སྒོར་མོ་ཡོད་པ་ཙམ་མ་གཏོགས་སྒོར་མོ་ཡོད་མཁན་གྱི་མི་ཉུང་ཉུང་རེད། ལྷག་པར་དུ་ཞིང་གྲོང་བ་ཚོར་སྲིད་གཞུང་གིས་རོགས་རམ་བྱས་པ་ཉུང་བའི་ཁར་ཁོ་ཚོར་ཡོང་སྒོ་འཚོལ་བའི་གོ་སྐབས་ཀྱང་ཧ་ཅང་ཉུང་སྟབས། ཐ་ན་འཚོ་གནས་ལའང་དཀའ་ངལ་ཡོད་པ་ཡོངས་ཁྱབ་ཡིན་པ་དང་། དེའི་ནང་ནས་ཀྱང་ཞིང་གྲོང་གི་བུད་མེད་ཚོར་དཀའ་ངལ་ཆེན་པོ་ཡོད་སྐོར་བརྗོད་འདུག
འདས་པའི་ལོ་ཤས་ནང་རྒྱ་ནག་ནང་བྱིས་པ་དང་བུད་མེད་ལྐོག་ཚོང་བྱས་པའི་ཉེས་དོན་མང་པོ་རྩད་ཆོད་ཡོད་པ་ལྟར། བསྡོམས་རྩིས་ལྟར་ན་ཕྱི་ལོ་ ༢༠༡༠ དང་ ༢༠༡༡ ནང་ལྐོག་ཚོང་བྱས་པའི་བྱིས་པ་ ༡༣༠༠༠ དང་། ༢༠༡༢ ལོར་བྱིས་པ་དང་བུད་མེད་ཁྱོན་ ༢༤༠༠༠ བསྐྱབས་ཡོད་པ་དང་། ཕྱི་ལོ་ ༢༠༡༣ ཟླ་ ༣ པའི་ནང་རྒྱ་ནག་ཉེན་རྟོག་ཁང་གིས་ཧུའུ་ནན་དང་ཡུན་ནན། སི་ཁྲོན། ཧྲན་ཏུང་། ཀང་ཏུང་སོགས་ཞིང་ཆེན་ ༡༡ ནང་ནས་ལྐོག་ཚོང་བྱས་པའི་བྱིས་པ་ ༩༢ དང་བུད་མེད་གཉིས་བསྐྱབས་ཏེ། དོགས་ཡོད་ཉེས་ཅན་ ༣༠༡ འཛིན་བཟུང་བྱས་ཡོད་པ་དང་། དེ་ནི་ཉེ་བའི་ལོ་འགའི་ནང་རྩད་ཆོད་བྱུང་བའི་མི་ལྐོག་ཚོང་གི་ཉེས་དོན་ཚབས་ཆེ་ཤོས་ཤིག་ཆགས་ཡོད་འདུག
གསར་འགོད་པ། པདྨ་མཚོ།
དུས་བབ་དྲ་བ་ནས།།
