ཞི་ཅིན་ཕིན་ཨ་རིར་བསྐྱོད་འཆར།

ཨ་རིས་མགྲོན་འབོད་གནང་བ་ལྟར་འདི་ལོར་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ཨ་རིའི་ནང་ཆེད་དམིཊ་རྒྱལ་དོན་སྐོར་སྐྱོད་ཐེངས་དང་པོ་བྱ་འཆར་ཡོད་འདུག

ཟླ་འདིའི་ཕྱི་ཚེས་ ༨ ཉིན་ཨ་རིར་ཡོད་པའི་རྒྱ་ནག་གི་གཞུང་ཚབ་པ་ཚེ་ཐེན་ཁེ་

ཡིས། ཨ་རི་གཞུང་གིས་མགྲོན་འབོད་གནང་བ་ལྟར། འདི་ལོར་ཞི་ཅིན་ཕིན་གྱིས་ཨ་རིའི་ནང་རྒྱལ་དོན་སྐོར་སྐྱོད་བྱ་རྒྱུ་གཏན་འཁེལ་བྱུང་ཡོད་ལ། སྐོར་སྐྱོད་ཀྱི་ཟླ་ཚེས་ཁྱབ་བསྒྲགས་བྱས་མེད་ཀྱང་ཨ་རྒྱ་གཉིས་ནས་སྐོར་སྐྱོད་ཀྱི་ལས་འཆར་གོ་སྒྲིག་བྱེད་བཞིན་ཡོད་སྐོར་བསྒྲགས་འདུག ཕྱི་ལོ་ ༢༠༡༣ ལོར་ཞི་ཅིན་ཕིན་གྱིས་ལྭ་ཌེན་ཨ་རིའི་ནང་རྒྱལ་དོན་སྐོར་སྐྱོད་བྱེད་སྐབས། ལམ་ཞོར་དུ་ཨ་རིའི་མངའ་སྡེ་ཁ་ལེ་ཧྥོར་ནི་ཡའི་ནང་སྲིད་འཛིན་ཨོ་བྷ་མ་མཆོག་གིས་མཇལ་འཕྲད་ཅིག་གནང་མྱོང་བ་ཙམ་ལས། ཞི་ཅིན་ཕིན་རྒྱ་ནག་གི་སྲིད་འཛིན་ཆགས་ཏེ་ལོ་ ༢ ལྷག་འགོར་བའི་རིང་། ཨ་རིའི་ནང་ཆེད་དམིགས་རྒྱལ་དོན་སྐོར་སྐྱོད་གནང་མྱོང་མེད་སྟབས། ད་ལོའི་སྐོར་སྐྱོད་དེ་ཐེངས་དང་པོ་ཆགས་ཀྱི་ཡོད་འདུག

ཟླ་འདིའི་ཕྱི་ཚེས་ ༦ ཉིན། ཨ་རིའི་རྒྱལ་ཁབ་བདེ་འཇགས་ལྷན་ཁང་གི་སློབ་སྟོན་པ་ལྕམ་ཨེ་ལི་ཛཱ་བྷེ་ཊི་རི་སི་ (Susan Elizabeth Rice)མཆོག་གིས། ཨ་རིའི་གཞུང་གིས་རྒྱ་ནག་གི་སྲིད་འཛིན་ཞི་ཅིན་ཕིན་དང་ཉི་ཧོང་གི་སྲིད་བློན་ཤིན་ཛོ་ཨ་བྷེ་རྣམ་གཉིས་ཨ་རིའི་ནང་རྒྱལ་དོན་མཚམས་གཟིགས་སུ་ཕེབས་པར་མགྲོན་འབོད་གནང་ཡོད་པ་དང་། དེ་བཞིན་ལྷོ་ཀོ་རི་ཡའི་སྲིད་འཛིན་ཕག་ཇན་ཧེ་(Park Geun-hye)དང་། ཧིན་རྡུ་ཉི་ཞི་ཡའི་སྲིད་འཛིན་ཇོ་ཁོ་ཝེ་ཌོ་ཌོ་( Joko Widodo) རྣམ་གཉིས་མགྲོན་འབོད་གནང་ཡོད་ལ། དེ་ནི་ཨ་རིའི་གཞུང་གིས་ཞི་བདེ་རྒྱ་མཚོའི་ཁུལ་དང་ཨེ་ཤ་ཡ་ནང་དུ་བསྐྱར་ལོག་གི་སྲིད་བྱུས་ཕྱོགས་ཡོངས་ནས་ལག་བསྟར་བྱེད་ཀྱི་ཡོད་པ་མཚོན་ཡོད་སྐོར་བརྗོད་འདུག

འདས་ལོའི་ཕྱི་ཟླ་ ༡༡ ནང་པེ་ཅིན་དུ་ཚོགས་པའི་ཞི་བདེ་རྒྱ་མཚོའི་མངའ་ཁུལ་གྱི་དཔལ་འབྱོར་མཉམ་ལས་གླེང་སྟེགས་ཐོག སྲིད་འཛིན་ཨོ་བྷ་མ་དང་ཞི་ཅིན་ཕིན་གཉིས་མཇལ་འཕྲད་བྱུང་རྗེས། རྒྱལ་ཁབ་གཉིས་ཀྱི་བར་དྲ་རྒྱའི་འགོག་རྒོལ་གནད་དོན་ཐད་ཕན་ཚུན་སྐྱོན་འཛུགས་བྱས་ཡོད་པ་དང་།  དེ་བཞིན་ལྷོ་རྒྱ་ནག་རྒྱ་མཚོ་དང་ཞི་བདེ་རྒྱ་མཚོའི་མངའ་ཁུལ་གྱི་མཚོ་གླིང་གནད་དོན་བཅས་ནི་ཨ་རྒྱ་བར་གྱི་རྩོད་རྙོག་ཆེ་ཤོས་ཤིག་ཏུ་གྱུར་ཡོད་འདུག

ཟླ་འདིའི་ཕྱི་ཚེས་ ༧ ཉིན་རྒྱ་ནག་ནང་གི་ཨ་རིའི་སྐུ་ཚབ་དོན་གཅོད་ཟུར་པ་ལོ་ཅཱ་ཧེ་ཡིས། ཨ་རྒྱ་གཉིས་ཀྱི་འབྲེལ་བ་ནི་ཧ་ཅང་རྙོག་འཛིང་ཆེ་བ་ཞིག་ཡིན་ནའང་། རྒྱ་ནག་གི་སྟོབས་འབྱོར་གྱིས་ཨ་རིར་ཁེ་ཕན་བསྐྲུན་གྱི་ཡོད་ལ། ཨ་རྒྱ་གཉིས་ཀྱི་འབྲེལ་ལམ་སྲ་བརྟན་གྱིས་འཛམ་གླིང་སྤྱི་ཡོངས་ལ་ཁེ་ཕན་བསྐྲུན་གྱི་ཡོད་སྐོར་བརྗོད་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།།