མི་ ༤༨༦ སྲོག་ཉེན་ལས་ཐར།

ཁ་སང་སྔ་དྲོར་ལྷོ་ཨ་ཧྥེ་རི་ཁའི་གཏེར་ཁ་སྔོག་འདོན་ཁང་ཞིག་གི་ས་འོག་ཕུག་ལམ་ནང་མེ་སྐྱོན་བྱུང་སྟེ། གཏེར་ལས་པ་ ༤༨༦ ས་འོག་ཏུ་ཚུད་ཡོད་ཀྱང་ཚང་མ་སྲོག་ཉེན་ལས་བསྐྱབས་ཐུབ་ཡོད་འདུག

བརྒྱུད་ལམ་ཁག་ནས་གནས་ཚུལ་ཐོན་པ་ལྟར་ན། ཁ་སང་སྔ་དྲོར་ལྷོ་ཨ་ཧྥེ་རི་ཁའི་

གསེར་གྱི་གཏེར་ཁ་སྔོག་འདོན་ཁང་(Harmony Gold Mining ) གི་གཏིང་ཚད་རྨིད་ ༢༣༠༠ ཡོད་པའི་ས་འོག་ཕུག་ལམ་ནང་དུ། གློ་བུར་དུ་མེ་སྐྱོན་བྱུང་སྟེ་གཏེར་ལས་པ་ ༤༨༦ སྲོག་ཉེན་ལ་ཐུག་ཡོད་ཀྱང་། དོན་རྐྱེན་བྱུང་མ་ཐག་ལས་གྲྭ་ཡོངས་ཀྱི་ལས་མཚམས་བཞག་སྟེ། ཆུ་ཚོད་ ༡༠ ལྷག་རིང་མྱུར་སྐྱོབ་བྱས་པ་བརྒྱུད་གཏེར་ལས་པ་ཚང་མ་སྲོག་ཉེན་ལས་བསྐྱབས་ཐུབ་ཡོད་པ་དང་། མེ་སྐྱོན་དེ་གཏེར་ལས་པ་ཚོས་ཕུག་ལམ་ནང་གྲང་རླུང་འཕྲུལ་ཆས་ལ་བཟོ་བཅོས་བྱེད་སྐབས་བྱུང་ཡོད་སྐོར་བརྗོད་ཡོད་པ་རེད།

དེ་རིང་སྔ་དྲོར་གཏེར་ཁ་སྔོག་འདོན་ཁང་དེའི་མགྲིན་ཚབ་པ་ཆཱར་མིན་རོ་སལ་(Charmane Russell )གྱིས། ས་འོག་མེ་སྐྱོན་ཁྲོད་ལྷག་པའི་གཏེར་ལས་པ་༤༨༦ སྲོག་ཉེན་ལས་བསྐྱབས་ཐུབ་ཡོད་པ་དང་། ཁོ་ཚོ་ཚང་མར་རྨས་སྐྱོན་ཕོག་མེད་ཀྱང་། གཏེར་ལས་ཁང་གི་གོ་སྒྲིག་འོག་ཁོ་ཚོའི་སེམས་ཁམས་སྙོམ་སྒྲིག་དང་ལུས་པོར་བརྟག་དཔྱད་བྱ་རྒྱུ་ཡིན་ལུགས་བརྗོད་འདུག

གསེར་གྱི་གཏེར་ཁ་སྔོག་འདོན་ཁང་དེ་ཕྱི་ལོ་ ༡༩༥༠ ལོར་གསར་དུ་བཙུགས་ཏེ། འཛམ་གླིང་གི་རྒྱལ་ཁབ་ཁག་ནང་གསེར་ཏུན་མང་པོ་ཕྱིར་ཚོང་བྱེད་བཞིན་པའི་ལྷོ་ཨ་ཧྥེ་རི་ཁའི་གསེར་གྱི་གཏེར་ལས་ཁང་ཆེ་ཤོས་ཨང་གསུམ་པ་དེ་ཡིན་ལ། ཕྱི་ལོ་ ༢༠༡༢ ནས་ ༢༠༡༤ ལོ་བར་ཕུག་ལམ་བརྡིབས་པ་དང་མེ་སྐྱོན་སོགས་བྱུང་སྟེ་མི་བརྒྱ་ལྷག་རྐྱེན་འདས་སུ་ཕྱིན་ཡོད་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།།