བོད་ཁུལ་གྱི་སློབ་གསོ་དང་འཕྲོད་བསྟེན་ཞིང་ལྗོངས་གཞན་ལས་ལྡབ་འགྱུར་གྱི་རྗེས་ལུས་རེད།

བོད་ནང་གི་ཆབ་སྲིད་གནས་སྟངས་དང་འཕྲོད་བསྟེན་གང་ཐད་ནས་ཧ་ཅང་སྐྱོ་ཤོས་ཀྱི་གནས་སྟངས་ཆགས་ཡོད་པ་དང་། དེང་སྐབས་བཙོན་འོག་ཏུ་གནས་སྡོད་ཆབ་སྲིད་བཙོན་པ་ ༢༡༡༠ ཡོད་པ་དང་། དེའི་ནང་ཕྱི་ལོ་ ༢༠༡༤ ལོ་གཅིག་པུར་བཙོན་འཇུག་ཁྲིམས་ཐག་བཅད་པའི་བཙོན་པ་ ༡༣༧ འདུག་ཟེར།

དེ་རིང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ ༢༠༡༤ ལོའི་བོད་ནང་གི་འགྲོ་བ་མིའི་ཐོབ་ཐང་སྐོར་གྱི་སྙན་ཐོ་འདོན་སྤེལ་སྐོར་གྱི་གསར་འགོད་གསལ་

བསྒྲགས་ཤིག་སྤེལ་བའི་ནང་། འདས་ལོར་བོད་ནང་ཛ་དྲག་ཆེ་ཤོས་ཀྱི་གནད་དོན་གསུམ་ནི། བོད་མི་རྣམས་འཛིན་བཟུང་དང་བཀག་སྡོམ་འོག་འདས་གྲོངས་ཕྱིན་པ་དང་། བོད་མི་ཐུན་མོང་ལ་སྡུག་སྦྱོང་ཁྲིམས་གཅོད་གཏོང་བཞིན་པ། བོད་མིའི་འདུ་འཛོམས་རང་དབང་ལ་བརྡལ་བཤིག་གཏོང་གི་ཡོད་པ་བཅས་ཆགས་ཡོད་སྐོར་འཁོད་འདུག

གསལ་བསྒྲགས་ནང་འཁོད་དོན། ལྟེ་གནས་ཁང་གི་ངོས་ནས་ ༢༠༡༤ ལོའི་བོད་ནང་གི་འགྲོ་བ་མིའི་ཐོབ་ཐང་ཐད་ཀྱི་ལོ་འཁོར་སྙན་ཐོ་དེ། དེབ་གཟུགས་དང་གློག་རྡུལ་པར་དེབ་གཉིས་ཀྱི་ལམ་ནས་འགྲེམས་སྤེལ་དང་། དེ་བཞིན། ལོ་འཁོར་སྙན་ཐོ་འདི་ཉིད་རྒྱལ་སྤྱིའི་སྤྱི་ཚོགས་ཁྲོད་ཁྱབ་སྤེལ་ཡོང་ཐབས་སུ་བོད་དབྱིན་རྒྱ་གསུམ་སྐད་ཡིག་ཐོག་པར་འགྲེམས་བྱས་ཡོད།

ལོ་འཁོར་སྙན་ཐོའི་ནང་། རྒྱ་གཞུང་གིས་དེ་སྔོན་རྒྱལ་ཚོགས་གཙོས་རྒྱལ་སྤྱིའི་ཚོགས་སྡེ་ཁག་ལ། བོད་ནང་གི་འགྲོ་བ་མིའི་ཐོབ་ཐང་གནས་སྟངས་མང་པོ་ཞིག་གི་ཐད་ལེགས་བཅོས་གཏོང་རྒྱུའི་ཁས་ལེན་བྱས་ཡོད་པ་རྣམས་དོན་དངོས་ལག་ལེན་བྱས་མེད་པར། བོད་ནང་གི་འགྲོ་བ་མིའི་ཐོབ་ཐང་གནས་སྟངས་མཐའ་དག་སྔར་བས་ཇེ་སྡུག་ཇེ་ཞན་དུ་གྱུར་ཡོད། དེ་བས་སྙན་ཐོའི་ནང་རྒྱ་གཞུང་གིས་བོད་མི་རྣམས་འཇུ་བཟུང་བཀག་སྡོམ་འོག་འདས་གྲོངས་བཏང་བ་དང་། བོད་མི་ཐུན་མོང་ལ་སྡུག་སྦྱོང་ཁྲིམས་གཅོད་གཏོང་བཞིན་པ། བོད་མིའི་འདུ་འཛོམས་རང་དབང་བརྡལ་བཤིག་བཏང་ཡོད་པ་བཅས། དོན་ཚན་གསུམ་དམིགས་བསལ་འབུར་དུ་བཏོན་ནས་གླེང་སློང་བྱས་ཡོད། གནད་དོན་དེ་གསུམ་གྱི་ཐོག་ནས་རྒྱ་གཞུང་གིས་བོད་མི་སྤྱི་ཡོངས་ལ་དྲག་གནོན་ཚབས་ཆེན་བྱས་ཡོད།

དེ་བཞིན། བོད་མི་ཆབ་སྲིད་བཙོན་པ་རྣམས་ལ་རྒྱ་གཞུང་གིས་མི་སྤྱོད་ལས་འདས་པའི་གཅར་རྡུང་དང་མནར་གཅོད་བཏང་ཡོད་པ་མ་ཟད། ཁོང་ཚོར་སྨན་བཅོས་ཀྱི་མཐུན་རྐྱེན་མ་སྦྱར་བར་སྡུག་སྦྱོང་བཏང་ཡོད། ༢༠༡༤ ལོའི་ལོ་ཧྲིལ་པོའི་ནང་རྒྱ་གཞུང་གིས་བཀག་ཉར་འོག་སྡུག་སྦྱོང་མནར་གཏོང་བཏང་སྟེ་འདས་གྲོངས་སུ་ཕྱིན་པའི་བོད་མི་ཆབ་སྲིད་བཙོན་པའི་གྲངས་འབོར་སྔར་ལས་མང་དུ་ཕྱིན་ཡོད། དཔེར་མཚོན་ཙམ་བརྗོད་ན། རྒྱ་གཞུང་གིས་བཙོན་འཇུག་འོག་བོད་མི་བསྟན་འཛིན་ཆོས་གྲགས་ལ་སྡུག་སྦྱོང་མནར་གཅོད་ཚད་མེད་བཏང་སྟེ་གཟུགས་པོའི་གནས་སྟངས་ཛ་དྲག་ཆགས་རྗེས། རྐང་པ་གཉིས་ལ་རྐང་ལྕགས་རྒྱབ་སྟེ་སྨན་ཁང་དུ་བསྐྱལ་ཡོད་པ་དང་། སྨན་ཁང་ནང་གསོན་ཐབས་བྲལ་བའི་གནས་སྟངས་ཤེས་རྟོགས་བྱུང་མཐར། བཙོན་འཇུག་དུས་ཡུན་མ་རྫོགས་པར་གློད་བཀྲོལ་གྱི་རྣམ་པའི་ཐོག་ནས་ནང་མིར་རྩིས་སྤྲོད་བྱས་ཡོད་ཀྱང་། ཉིན་གཉིས་ལ་མ་གཏོགས་འཚོ་བཞུགས་མ་ཐུབ་པར་འདས་གྲོངས་ཕྱིན་ཡོད།

ད་དུང་རྒྱ་གཞུང་གིས་བོད་མིའི་ཐོག་སྡུག་སྦྱོང་ཁྲིམས་གཅོད་གཏོང་བའི་ཁྱབ་རྒྱ་ཆེ་རུ་བཏང་ཡོད། དཔེར་ན། རང་ལུས་མེར་བསྲེགས་ཀྱི་གནས་ཚུལ་བྱུང་བ་དང་། ཡང་ན། རྒྱ་གཞུང་གིས་བཀག་སྡོམ་བྱེད་ཀྱིན་པའི་ཆོས་ལུགས་བྱེད་སྒོར་མི་སྒེར་གང་རུང་འཛུལ་ཞུགས་བྱས་སྐབས། གནད་དོན་དང་འབྲེལ་ཡོད་མི་སྒེར་སོ་སོ་ཁོ་ན་ཙམ་མ་ཡིན་པར། ཁོ་ཚོའི་ནང་མི་དང་སྡེ་པ། དགོན་སྡེ་སྤྱི་ཡོངས་ལ་སྡེབ་གཅིག་ཏུ་སྡུག་སྦྱོང་ཁྲིམས་གཅོད་བཏང་ཡོད། དེར་མ་ཟད། ས་གནས་སྡེ་གྲོང་སོ་སོའི་བོད་རིགས་མགོ་བ་རྣམས་ཉེས་མེད་འཇུ་བཟུང་བྱས་པ་རྣམས་ཀློད་གྲོལ་དང་། གཏེར་ཁ་བསྔོག་འདོན་གྱིས་རང་བྱུང་ཁོར་ཡུག་ལ་གཏོར་སྐྱོན་བཟོ་བཞིན་པ་བཀག་སྡོམ་བཅས་ཀྱི་ཆེད། ས་གནས་བོད་རིགས་མང་ཚོགས་འདུ་འཛོམས་ཀྱིས་ཞུ་འབོད་ངོ་རྒོལ་བྱས་སྐབས། རྒྱ་གཞུང་གིས་བོད་མིའི་ཞི་བའི་འདུ་འཛོམས་རང་དབང་ཐོབ་ཐང་མཐའ་གཅིག་ཏུ་བརྡལ་བཤིག་བཏང་སྟེ་དྲག་གནོན་ཤུགས་ཆེན་བྱས་ཡོད།

གཞན་ཡང་། ལོ་འཁོར་སྙན་ཐོའི་ནང་བོད་ཁུལ་དུ་དུས་ཡུན་རིང་པོའི་ནང་བོད་མིའི་འཕྲོད་བསྟེན་དང་སློབ་གསོའི་ཐད། རྒྱ་གཞུང་གིས་གོ་རིམ་དང་སྒྲིག་གཞི་ལྡན་པའི་སྲིད་ཇུས་ཀྱི་གནད་དོན་ཐད་ལ་དབྱེ་ཞིབ་དང་འགྲེལ་བརྗོད་བྱས་ཡོད། རྒྱ་གཞུང་གིས་སྡོམ་རྩིས་བྱས་པའི་མི་འབོར་ཞིབ་བཤེར་ཡིག་ཆར་དབྱེ་ཞིབ་བརྒྱུད་འདི་ག་ལྟེ་གནས་ཁང་གིས་ཤེས་རྟོགས་བྱུང་དོན། བོད་ཁུལ་ཡོངས་སུ་མང་ཚོགས་ཀྱི་འཕྲོད་བསྟེན་གནས་སྟངས་ནི་རྒྱ་ནག་རྒྱལ་ཡོངས་ཁྲོད་ཆེས་སྐྱོ་ཤོས་དང་། བོད་རིགས་བྱིས་པ་རྣམས་སློབ་ཞུགས་ཀྱི་གོ་སྐབས་ཧ་ཅང་ཉུང་བའི་རྐྱེན་གྱིས། བོད་ཁུལ་གྱི་བྱིས་པའི་སློབ་ཞུགས་ཚད་ནི་ཧ་ཅང་དམའ་བོ་ཆགས་ཡོད། རྒྱ་གཞུང་གི་ཡིག་ཆ་གཞིར་བཟུང་ཞིབ་འཇུག་བྱས་པའི་གྲུབ་དོན་དེ་དག་དང་། རྒྱ་གཞུང་གིས་ནམ་རྒྱུན་༼བོད་ཁུལ་གྱི་འཚོ་བའི་གནས་ཚད་ཡར་རྒྱས་ཆེན་པོ་ཕྱིན་ཡོད༽ པར་དྲིལ་སྒྲོག་བྱེད་པ་གཉིས་ཕན་ཚུན་རྒྱབ་འགལ་ཆགས་ཡོད། དངོས་ཡོད་གནས་སྟངས་ཐོག་ནས་བོད་ཁུལ་གྱི་སློབ་གསོ་དང་འཕྲོད་བསྟེན་གནས་སྟངས་ནི། རྒྱ་ནག་རྒྱལ་ཡོངས་ཀྱི་ཞིང་ལྗོངས་གཞན་པ་དག་ལས་ལྡབ་འགྱུར་གྱི་རྗེས་སུ་ལུས་ཡོད།

འདི་ག་ལྟེ་གནས་ཁང་གིས་ལོ་ལྟར་ཆབ་སྲིད་བཙོན་པའི་མིང་ཐོ་ཕྱོགས་བསྒྲིག་བྱེད་བཞིན་ཡོད་པ་ལྟར། རྒྱལ་སྤྱིའི་བརྒྱུད་ལམ་དང་གནས་ཚུལ་སོགས་ཕྱོགས་མང་པོ་གཤིབ་བསྡུར་དང་དབྱེ་ཞིབ་བརྒྱུད། ཕྱི་ལོ་ ༢༠༡༤ ལོའི་ཆབ་སྲིད་བཙོན་པའི་མིང་ཐོ་ནི་སྔར་ལས་ཞིབ་ཚགས་དང་འཐུས་ཚང་དུ་བཏང་ཡོད། འདི་ལོའི་ཆབ་སྲིད་བཙོན་པའི་མིང་ཐོའི་རེའུ་མིག་གཞིར་བཟུང་ལྟར་ན། དེང་སྐབས་བཙོན་འོག་ཏུ་གནས་སྡོད་ཆབ་སྲིད་བཙོན་པ་ ༢༡༡༠ ཡོད་པ་དང་། དེའི་ནང་ཕྱི་ལོ་༢༠༡༤ ལོ་གཅིག་པུར་བཙོན་འཇུག་ཁྲིམས་ཐག་བཅད་པའི་བཙོན་པ་ ༡༣༧ འདུག

སྙན་ཐོའི་ནང་གཞན་ད་དུང་། བོད་ནང་དུ་རྒྱ་གཞུང་གིས་སྤྱི་དམངས་དང་ཆབ་སྲིད་ཐོབ་ཐང་བརྡལ་བཤིག་བཏང་ཡོད་པའི་གནས་སྟངས་གསལ་བཤད་བྱས་ཡོད། དཔེར་ན། རྒྱལ་ཁབ་ཀྱི་བདེ་འཇགས་ཁ་གཡར་ཏེ་བཀག་སྡོམ་ཞིབ་བཤེར་ཁྱབ་ཁོངས་རྒྱ་བསྐྱེད་ཀྱིས་མི་སྒེར་གྱི་གསང་བ་ཉར་འཇོག་གི་ཐོབ་ཐང་བརྡལ་བཤིག་དང་། དེ་མིན་དཔལ་འབྱོར་དང་སྤྱི་ཚོགས། རིག་གནས་བཅས་ཀྱི་ཐོབ་ཐང་བརྡལ་བཤིག་བཏང་སྟེ། བཙན་ཤུགས་ཀྱི་སྒོ་ནས་འབྲོག་དམངས་གཏན་སྡོད་འཆར་འགོད་བྱེད་བཞིན་པའི་གནས་སྟངས་སོགས་བཀོད་ཡོད།

དེ་བཞིན། མཇུག་ཏུ་མཉམ་འབྲེལ་རྒྱལ་ཚོགས་ནང་བོད་ཀྱི་འགྲོ་བ་མིའི་ཐོབ་ཐང་གནས་སྟངས་སྐོར་ལ་དོ་སྣང་དང་། རྒྱལ་སྤྱིའི་སྤྱི་ཚོགས་སྟེང་བོད་དོན་ལས་འགུལ་གྱི་འཕེལ་རིམ་དང་ཤུགས་རྐྱེན་བཅས་གླེང་སློང་བྱས་ཡོད། དུས་བབ་དྲ་བ་ནས།།