རུལ་རྒོལ་ལས་འགུལ་གཏིང་ཇེ་ཟབ་ཏུ་འགྲོ་བཞིན་ཡོད་པའི་ངོས་འཛིན།

རྒྱ་ནག་མིན་ཧྲིན་དངུལ་ཁང་གི་འགན་འཛིན་མའོ་ཞོ་ཧྥིན་བཀག་ཉར་ཞིབ་བཤེར་འོག་ཚུད་ཡོད་པའི་གནས་ཚུལ་ཞིག་ཐོན་པ་དང་བསྟུན་ཏེ། སྲིད་དོན་དབྱེ་ཞིབ་པ་ཚོས། ཞི་ཅིན་ཕིན་གྱིས་ཕྱི་ལོ་གསར་པ་དང་བསྟུན་ཏེ་རུལ་རྒོལ་ལས་ཁུལ་གྱི་ཁ་ཕྱོགས་ཀྱང་གསར་བརྗེ་བྱས་ཡོད་སྐོར་གླེང་།

ཟླ་སྔོན་མའི་ཚེས་ ༣༡ ཉིན་མིན་ཧྲིན་ (Minsheng)དངུལ་ཁང་དྲ་བའི་སྟེང་། དངུལ་ཁང་དེའི་འགན་འཛིན་མའོ་ཞོ་ཧྥིན་ (Mao Xiaofeng)དབུས་སྒྲིག་ཁྲིམས་ཞིབ་བཤེར་ལྷན་ཁང་གི་བརྟག་དཔྱད་འོག་ཚུད་ཡོད་པ་འཁོད་ཡོད་ཀྱང་། ཅུང་ཙམ་རྗེས་དྲ་ཚིགས་དེའི་སྟེང་སླར་ཡང་མའོ་ཞོ་ཧྥིན་གྱིས་མིན་ཧྲིན་དངུལ་ཁང་ནས་དགོངས་པ་ཞུས་ཚུལ་བསྒྲགས་ཡོད་འདུག

ཟླ་འདིའི་ཚེས་ ༢ ཉིན་ནས་བཟུང་རྒྱ་ནག་དང་རྒྱལ་སྤྱིའི་གསར་ལམ་ཁག་ཏུ་མའོ་ཞོ་ཧྥིན་དང་འབྲེལ་བའི་གནས་ཚུལ་མང་པོ་ཞིག་རིམ་བསྟུད་དུ་ཐོན་ཡོད་ཅིང་། མང་པོ་ཞིག་གིས་མའོ་ཞོ་ཧྥིན་དེ་སྔ་གོ་གནས་ཕབ་ཟིན་པའི་ལིན་ཅི་ཧྭ་དང་འབྲེལ་བ་ཡོད་པ་དང་ཅིང་ཤོག་ཁག་གི་མི་སྣ་ཡིན་པ། ཁོ་ནི་ན་གཞོན་ཡང་ལྐོག་ཟ་རུལ་སུངས་དང་བུད་མེད་ཚོར་ཚུལ་མིན་བྱེད་མཁན་སྤྱོད་ངན་ཞིག་ཡིན་སྐོར་གླེང་།

རྒྱ་ནག་གི་ཚད་ཞིན་དྲ་བའི་སྟེང་མའོ་ཞོ་ཧྥིན་གྱི་ཆགས་སྲེད་སྐོར་གྱི་གནས་ཚུལ་ཞིག་སྤེལ་བའི་ནང་། མའོ་ཞོ་ཧྥིན་གྱིས་དུས་རྒྱུན་མིན་ཧྲིན་དངུལ་ཁང་གི་ལས་བྱེད་བུད་མེད་ཚོར་ལྐོག་འབྲེལ་བྱེད་ཀྱིན་ཡོད་པ་མ་ཟད། ཁོ་རྒྱ་ནག་གི་བུད་མེད་འཁྲབ་སྟོན་མ་ཚོར་འབྲེལ་བ་ཡོད་པ་དང་། འཁྲབ་སྟོན་མ་དེ་ཚོར་ཐོག་མར་ངོ་ཐུག་པ་ཙམ་གྱིས་(Audi A4)རྟགས་ཅན་གྱི་རླངས་འཁོར་ལག་སྐྱེས་སུ་སྤྲོད་བཞིན་ཡོད་འདུག མའོ་ཞོ་ཧྥིན་ལ་དེ་ལྟ་བུའི་རྒྱུ་ཤུགས་དང་ང་རྒྱལ་ཆེན་པོ་ཡོད་དོན་ནི། དེ་སྔོན་ཁོའི་གནས་རིམ་ཁྲོད་དུ་ཁོ་རང་ཟླ་ཕོགས་མཐོ་ཤོས་དེ་ཡིན་འདུག་ལ། ལོ་གཅིག་ལ་རྒྱ་སྒོར་ས་ཡ་བཞི་དང་ཉིས་འབུམ་ (༤༢༥༠༠༠༠)ཙམ་ཡོད་འདུག

ཚེས་ ༣ ཉིན་ཀྲུང་གོར་ལྟ་བ་ཞེས་པའི་དྲ་ཚིགས་སྟེང་། མའོ་ཞོ་ཧྥིན་གྱི་སྐྱེས་དམན་ཁྲིན་ཐན་ཅཱ་ (Chen Tinjia)ཡི་འདྲ་པར་ཞིག་ཁྱབ་བསྒྲགས་བྱས་པ་དང་བསྟུན་ཏེ། མའོ་ཞོ་ཧྥིན་དང་ལིན་ཅི་ཧཱ་ཡི་ཁྱིམ་རྒྱུད་འབྲེལ་བ་ཡོད་སྐོར་གླེང་སློང་བྱུང་ཡོད་ཅིང་། མའོ་ཞོ་ཧྥིན་ད་ལྟ་ལྐོག་ཟ་རུལ་སུངས་ཞིབ་བཤེར་འོག་ཚུད་ཡོད་པ་སྨྲོས་མེད་ཡིན་ཡང་། ཁོའི་སྐྱེས་དམན་ཁྲིན་ཐན་ཅཱ་གྱོད་དོན་དེ་དང་འབྲེལ་བ་ཡོད་མེད་གླེང་སློང་བྱས་མི་འདུག ཁྲིན་ཐན་ཅཱ་མཐའ་མཇུག་ཝའེ་པའོ་དྲ་བའི་སྟེང་བཞུགས་པའི་ཉིན་མོ་ནི་ ༢༠༡༥ལོའི་ཟླ་ ༡ཚེས་ ༢༤ ཉིན་གྱི་ཆུ་ཚོད་ ༢༠:༢༥ ཡིན་འདུག

མའོ་ཞོ་ཧྥིན་དང་ལིན་ཅི་ཧྭ་ (Ling Jihua)ཡི་ཁྱིམ་ཚང་བར་འབྲེལ་བ་ཐེངས་གཉིས་བྱུང་ཡོད་པ་དང་། གཅིག་ནི་ལིན་ཅི་ཧཱ་ཡི་སྤུན་མཆེད་ལི་བན་ཁྲིན་ (Ling Wancheng)དང་མའོ་ཞོ་ཧྥིན་གཉིས་སྔོན་ཆད་ཧའོ་ནན་སློབ་ཆེན་ནས་སློབ་སྦྱོང་བྱས་སྐབས་འབྲེལ་བ་ཡོད་པ་དང་། གཞན་ཞིག་ནི། མིན་ཧྲིན་དངུལ་ཁང་ནང་ལོགས་སུ་བུད་མེད་སྤྲོ་ཚོམས་ཁང་ཞིག་ཡོད་ཅིང་། སྤྲོ་ཚོམས་ཁང་དེར་ཀོ་ལི་ཕིན་ (Gu liping)དང་སྔོན་ཆད་རྒྱ་ནག་དབུས་སྲིད་གྲོས་འགན་འཛིན་གཞོན་པ་སཱོ་རོན་ (Surong)གྱི་སྐྱེས་དམེན་ལེ་ཧྥོང་ (Lifang)སོགས་མཐོ་རིམ་དཔོན་རིགས་དག་གི་སྐྱེས་དམན་བཅུ་གྲངས་ཤིག་གིས་ལས་ཀ་བྱེད་མི་དགོས་པར་ཟླ་ཕོགས་ལེན་བཞིན་ཡོད་འདུག ད་དུང་ཀོ་ལི་ཕིན་སྔོན་ཆད་མིན་ཧྲིན་དངུལ་ཁང་ཡན་ལག་བོགས་གཏོང་ལས་དོན་གྱི་འགན་འཛིན་དུ་ལོ་ ༣ ཙམ་རིང་བསྡད་མྱོང་སྐོར་ཞིག་མའོ་ཞོ་ཧྥིན་ཁོ་རང་ཉིད་ཀྱིས་བཤད་ཡོད་འདུག

ཟླ་འདིའི་ཚེས་ ༡ ཉིན་རྒྱ་ནག་གི་གསར་འགོད་པ་ལོའོ་ཁྲོང་ཕིན་(Lou Changping)གྱིས་གནས་ཚུལ་སྤེལ་པ་ལྟར་ན། ལིན་ཅི་ཧཱ་ནི་མ་དངུལ་ཁྲོམ་ར་དང་དངུལ་ལོར་ས་ཁུལ་མང་པོ་ཞིག་ལ་འབྲེལ་པ་ཡོད་སྟབས། མའོ་ཞོ་ཧྥིན་ནི་ལིན་ཅི་ཧཱ་ཡིས་ཕུགས་རྒྱང་རིང་བོར་བསམ་བློ་བཏང་ཡོད་པའི་མི་སྣ་གལ་ཆེན་གྲས་ཤིག་ཡིན་འདུག

ཟླ་འདིའི་ཚེས་ ༥ ཉིན་ཏཱ་ཅིས་ཡེན་དྲ་ཚིགས་ཀྱིས་གནས་ཚུལ་སྤེལ་པ་ལྟར་ན། མའོ་ཞོ་ཧྥིན་ཞིབ་བཤེར་ལ་ཁྱབ་བསྒྲགས་བྱས་པའི་ཉིན་གཉིས་ཀྱི་རྗེས་ཏེ་ཚེས་ ༢ ཉིན་རྒྱ་ནག་ཚོང་ལས་དངུལ་ཁང་ཚཱོང་ཀྲའོ་ཡན་ལག་པའོ་ཐའོ་ཀྲི་དངུལ་ཁང་གི་འགན་འཛིན་ཁང་རྩེག་སྟེང་ནས་རང་ཤི་བརྒྱབ་ཡོད་པ་དང་། དགོང་མོ་དེར་པེ་ཅིན་དངུལ་ཁང་གི་མ་རྐང་ལས་ཁང་གསུམ་པའི་འགན་འཛིན་ལོ་ཧེ་ཅོན་ (Lu Haijun)རྒྱ་གཞུང་གིས་འཛིན་བཟུང་ཞིབ་བཤེར་ཁྱབ་བསྒྲགས་བྱས་ཡོད་འདུག

དབྱེ་ཞིབ་པ་ཚོས། ད་ལྟ་རྒྱ་ནག་གཞུང་གི་རྒྱུ་དབང་ཡོད་པའི་དཔོན་རིགས་ཚོར་རྒོལ་རྡུང་ལས་འགུལ་གྱི་ཁ་ཕྱོགས་གསར་པ་ཞིག་ཏུ་སྐྱོད་བཞིན་ཡོད་ཅིང་། འདིའི་དམིགས་ཡུལ་ཅང་ཙེ་མིན་ཤོག་ཁག་གི་རྒྱུ་དབང་ཡོད་ཚད་ཕྱིར་ལེན་བྱ་རྒྱུ་དེ་ཡིན་སྐོར་བརྗོད་འདུག

ཧོང་ཀོང་རྨ་བྱ་བརྙན་འཕྲིན་ལས་ཁང་གིས་དབྱེ་ཞིབ་བྱས་པ་ལྟར་ན། མིན་ཧྲིན་དངུལ་ཁང་གི་འགན་འཛིན་མའོ་ཞོ་ཧྥིན་གྱི་གྱོད་དོན་བརྒྱུད་དེ། ཞི་ཅིན་ཕིན་གྱི་རུལ་སུངས་རྒོལ་རྡུང་ལས་འགུལ་དེ་ད་དུང་གཏིང་ཟབ་དུ་འགྲོ་བཞིན་ཡོད་པ་མཚོན་ཞིང་། ལྐོག་ཟ་རུལ་སུངས་གྱོད་དོན་ཡོད་ཚད་དབང་ཆ་བེད་སྤྱོད་བཏང་སྟེ་རྒྱུ་ནོར་ལེན་པ་དང་། རྒྱུ་ནོར་བཀོལ་ནས་དབང་ཆ་ཉོ་བ་སོགས་རྒྱུ་དང་དབང་ཆའི་ཉོ་ཚོང་ཞིག་ཡིན་སྟབས། མང་པོ་ཞིག་གིས་དཔལ་འབྱོར་གྱི་སྒྲིག་སྲོལ་ལག་བསྟར་བྱེད་ཀྱིན་ཡོད་པའི་མིང་ཐོག་ནས་མ་དངུལ་འབོར་ཆེན་ཕན་ཚུན་ལ་སྐྱེལ་འདྲེན་བྱེད་བཞིན་ཡོད་ཅིང་། གནད་དོན་འདིར་ཕྱིའི་ངོ་བོ་ཙམ་གྱི་ཐོག་ནས་བལྟས་ན་རབ་རུབ་ཅིག་ཡིན་ཡང་། དོན་དངོས་སུ་དེ་ནི་ཛ་དྲག་གི་གནད་དོན་ཆགས་ཆགས་ཡོད་ཅེས་སོགས་བརྗོད་འདུག

ལྐོག་ཟ་རུལ་སུངས་ཀྱི་གནད་དོན་འདི་གཙོ་བོ་རྒྱུ་ནོར་ལ་ཐུག་ཡོད་སྟབས། ཞི་ཅིན་ཕིན་གྱིས་ ༢༠༡༢ ལོའི་ཏང་གི་ཚོགས་ཆེན་བཅོ་བརྒྱད་པ་ནས་བཟུང་། རྒྱ་ནག་གི་དཔལ་འབྱོར་གནས་སྟངས་ལ་རྒྱུས་མངའ་ཆེན་པོ་ཡོད་པའི་ཝང་ཆེ་ཧྲན་དབུས་སྒྲིག་ཁྲིམས་ཞིབ་བཤེར་ཁང་དུ་ཉར་ཡོད་པ་དེ་ནི། དཔལ་འབྱོར་རུལ་སུངས་རྒོལ་རྡུང་ཐད་སྔོན་བརྡ་ཞིག་ཡིན་པ་དང་། ད་རེབ་དངུལ་ཁང་གི་དཔོན་རིགས་ཚོར་ཞིབ་བཤེར་བྱེད་པ་དེ་ནི་རུལ་སུངས་རྒོལ་རྡུང་ལས་འགུལ་ཁྲོད་ཀྱི་ཁ་ཕྱོགས་གསར་པ་དེ་རེད། ཅེས་སོགས་བརྗོད་འདུག

ཕྱི་སྡོད་རྒྱ་མི་ཆབ་སྲིད་དཔྱད་ཞིབ་པ་ཞཱ་ཞའོ་ཆུང་ (Xia Xiaoqiang)གིས། མའོ་ཞོ་ཧྥིན་གོ་གནས་ནས་ཕབ་པ་ནི་ལིན་ཅི་ཧྭ་ལ་འབྲེལ་བ་ཡོད་པ་མ་ཟད། གྱོད་དོན་འདི་དག་དང་འགྲོག་ནས་ད་དུང་གནས་ཚུལ་འདྲ་མིན་ཞིག་ཕྱི་རུ་ཐོན་སྲིད་པ་དང་། ཞི་ཅིན་ཕིན་གྱིས་ཅང་ཙེ་མིན་གྱི་ཕྱོགས་ཡོངས་ནས་སྐོར་བཅོམ་བྱེད་བཞིན་ཡོད་པ་རྒྱ་ནག་སྤྱི་ཚོགས་ནང་གསལ་པོ་ཆགས་བཞིན་ཡོད་སྟབས། དཔལ་འབྱོར་རུལ་སུངས་ལ་རྒོལ་རྡུང་གཏོང་པ་ནི། ཞི་ཅིན་ཕིན་གྱི་གཡུལ་འཐབ་ཁྲོད་ཀྱི་ཆ་ཤས་ཙམ་རེད་ཅེས་བརྗོད་འདུག

མའོ་ཞོ་ཧྥིན་ནི་ ༡༩༧༢ ལོར་སྐྱེས་ཤིང་། ཨ་རིའི་ཧཱ་བོ་ཊི་སློབ་ཆེན་ནས་རབ་འབྱམས་པའི་གནས་རིམ་མཐར་ཕྱིན་ཡོད་པ་དང་། ཧའོ་ནན་སློབ་ཆེན་གྱི་འབུམ་རམས་པ་ཐོན་རྗེས། རྒྱ་ནག་རྒྱལ་ཡོངས་སློབ་ཕྲུག་ཚོགས་པའི་འགན་འཛིན་བྱས་ཡོད་པ་དང་། ༢༠༡༤ཟླ་ ༨པ་ནས་རྒྱ་ནག་མིན་ཧྲིན་དངུལ་ཁང་གི་འགན་འཛིན་བྱས་ཡོད་འདུག

མའོ་ཞོ་ཧྥིན་གྱི་སྐྱེས་དམན་ཁྲིན་ཐན་ཅཱ་ ༡༩༨༠ ལོར་ཟླ་ ༡༡ ཚེས་ ༡༥ཉིན་སྐྱེས་ཤིང་། ༢༠༠༥ལོར་ཁྲོན་ཆིན་གྲོང་ཁྱེར་གློག་བརྙན་སློབ་ཆེན་ནས་མཐར་ཕྱིན་རྗེས། རྒྱ་ནག་ནང་ཁུལ་གྱི་གློག་བརྙན་ཁ་ཤས་འཁྲབ་ཡོད་འདུག ༢༠༡༤ལོར་རྒྱ་ནག་རྒྱལ་ཡོངས་འཁྲབ་སྟོན་མའི་རྟགས་མ་ཞིག་ཀྱང་ཐོབ་ཡོད་འདུག  དུས་བབ་དྲ་བ་ནས།།