བརྟན་བཞུགས་ཀྱི་རྩ་བ་ཐུག་ས་དེ་དམ་ཚིག་ལ་ཐུག་ཡོད།

དེ་རིང་སྔ་དྲོར་དྷ་ས་ཐེག་ཆེན་གཙུག་ལག་ཁང་དུ་༧གོང་ས་མཆོག་ལ་བོད་མིའི་ཚོགས་ སྐྱིད་ཁག་ལྔ་ནས་བརྟན་བཞུགས་ཕུལ་སྐབས། ཡ་རབས་སྤྱོད་བཟང་བྱས་ན་རང་གཞན་གྱི་དོན་འགྲུབ་པ་མ་ཟད། རྒྱལ་བའི་བསྟན་པ་རྒྱས་པར་ཕན་ཐོགས་སྐོར་གསུངས་སོང་།

དེ་རིང་སྔ་དྲོར་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་མཆོག་དགུང་
གྲངས་༨༠ ཕེབས་པའི་སྐབས་དང་བསྟུན་ཏེ། བྷེལ་རྗམ་བོད་རིགས་ཚོགས་པ་དང་། ཆོལ་གསུམ་ཆིག་སྒྲིལ་ཚོགས་པ། བོད་མིའི་ཚོང་པའི་བདེ་ཚོགས། ལྷ་ས་རྫོང་ཁག་ཚོགས་པ། ལྷོ་ཁ་གཞིས་བྱེས་གཉིས་ཚོགས་སྐྱིད་ཁག་ལྔ་ནས་བརྟན་བཞུགས་བསྟར་འབུལ་ཞུས་སོང་ལ། ༧གོང་ས་མཆོག་དབུ་བཞུགས་ཐོག སྔ་འགྱུར་རྙིང་མའི་དབུ་འཛིན་སྟག་ལུང་རྩེ་སྤྲུལ་རིན་པོ་ཆེ་མཆོག་དང་མཁོ་ཁྱིམ་ རིན་པོ་ཆེ་རྣམ་གཉིས་ཀྱི་དབུས་བླ་སྤྲུལ་དགེ་བཤེས་དང་དགེ་འདུན་པ། དེ་བཞིན་དབུས་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་མཆོག་དང་སྲིད་སྐྱོང་བློ་བཟང་སེང་གེ་མཆོག་རྣམ་གྱིས་གཙོས་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་སྡེ་ཚན་ཁག་གི་འགན་འཛིན་རྣམ་པ། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་གཞོན་གྱིས་གཙོས་སྤྱི་འཐུས་ལས་ཐོག་དང་ཟུར་བ་ཁག་ཅིག དེ་བཞིན། དྷ་ས་ཁུལ་གྱི་སེར་སྐྱ་མི་མང་དང་ཡུལ་ལུང་གང་ས་ནས་ཕེབས་པའི་ཕྱི་རྒྱལ་བ་བཅས་ཁྱོན་མི་གྲངས་༣༠༠༠ ཡས་མས་འཛོམས་འདུག

བརྟན་བཞུགས་ཀྱི་མནྜལ་ལྗགས་བཤད་སོགས་ཆོ་ག་རྣམས་གྲུབ་རྗེས། ༧གོང་ས་མཆོག་གིས་བརྟན་བཞུགས་ཀྱི་སྙིང་དོན་སྐོར་བཀའ་སློབ་གནང་དོན། བརྟན་བཞུགས་ཟེར་བ་འདིའི་རྩ་བ་ཐུག་ས་དེ་དམ་ཚིག་ལ་ཐུག་བསྡད་ཡོད་པ་རེད། ཆོས་ཕྱོགས་ནས་བཤད་པ་ཡིན་ན་དམ་ཚིག་ལ་ཐུག་གི་ཡོད་པ་དང་། སྤྱིར་བཏང་གིས་མིའི་འགྲོ་སྟངས་ཀྱི་ཐོག་ནས་བཤད་ནའང་སེམས་བག་ཕེབས་པོ་དང་སེམས་སྐྱིད་ལུགས་ལ་ཁྱད་པར་ཡོད་པ་ཡོངས་གྲགས་རེད། ཁྱེད་རང་ཚོ་ཚང་མས་ཆོས་ཕྱོགས་ཀྱི་ཐོག་ནས་བཤད་ན་དད་པ་དམ་ཚིག་གཡོ་བ་མེད་པ་གནང་བ་དེ་ཞེ་དྲག་ཡག་པོ་རེད། བླ་མ་དང་སློབ་མའི་འབྲེལ་བ་ཡོད་པ་ཞིག་ཡིན་ན་སློབ་མའི་ངོས་ནས་དགེ་སྦྱོར་བསྒྲུབ་དགོས་པ་རེད། བླ་མས་ཡུལ་ལུགས་བཤད་པ་དེ་ཚོ་སློབ་མས་བློར་བཅངས་རྒྱུ་གལ་ཆེན་པོ་རེད།

བླ་མས་ལབ་པའི་ནང་དུ་རྒྱུ་མཚན་མེད་པ་ཞིག་ཡོང་གི་འདུག་ན་ཁ་ཁ་རེད་མ་གཏོགས་རྒྱུ་མཚན་ལྡན་པ་ཞིག་ཡིན་ན་ཉམས་ལེན་དགོས་པ་རེད། མདོ་དོན་སྙིང་པོར་ཁྱེད་རང་ཚོས་སེམས་པ་བཟང་པོ་བྱེད་དགོས་པ་རེད། རེ་ཟུང་རེད་མ་གཏོགས་སྤྱི་ཡོངས་ནས་བོད་གཞིས་བྱེས་གཉིས་ཀྱི་བོད་མི་ཚོ་སེམས་པ་བཟང་པོ་ཡོད་པའི་མཐོང་ཚུལ་ཡོད་ལ། མཐོང་ཚུལ་དེ་རིན་ཐང་ཅན་ཞིག་ཡིན་པས་ང་ཚོ་ཚང་མས་གཙོ་བོ་སེམས་པ་བཟང་པོ་དང་ཡ་རབས་སྤྱོད་བཟང་བྱས་ཏེ། མ་རབས་ཐ་ཤལ་གྱི་བྱ་སྤྱོད་རིགས་ཁྱོན་ནས་བྱེད་རྒྱུ་ཡོད་པ་མ་རེད། བོད་སྤྱི་པའི་དོན་ལ་དེས་ཕན་གྱི་ཡོད་ལ། སོ་སོ་སྒེར་གྱི་དོན་དག་ལའང་དེས་ཕན་གྱི་ཡོད་པ་རེད། ཚེ་འདི་ཕྱི་གཉིས་ལ་དེས་ཕན་གྱི་རེད། རྒྱལ་བའི་བསྟན་པར་ཞབས་འདེགས་ཟེར་བ་དེ་དེ་ལྟར་བསྒྲུབ་རྒྱུ་རེད་མ་གཏོགས་ཆོས་ལ་དད་པ་ཡོད་ཀྱང་སོ་སོའི་ངོས་ནས་དགེ་བའི་བླངས་དོར་ཆོས་དང་མཐུན་པ་ཞིག་མེད་པར་བསྟན་པ་རྒྱས་པར་ཤོག་ཅེས་སྨོན་ལམ་བརྒྱབ་ན་བསྟན་པ་རྒྱས་རྒྱུ་ཡོད་པ་མ་རེད། ཅེས་གསུངས་སོང་།

ཁོང་གིས་མུ་མཐུད་དུ། དགེ་འདུན་རབ་བྱུང་བ་ཞིག་ཡིན་ནའང་བསླབ་པ་གསུམ་གྱི་ཉམས་ལེན་ཡོད་པ་ཞིག་བྱུང་བ་ཡིན་ན། བསྟན་པའི་ཞབས་འདེགས་སུ་འགྲོ་ཡི་ཡོད་པ་རེད། དེ་མིན་གཙུག་ལག་ཁང་ཆེན་པོ་ཞིག་ཡོད་ནའང་ཧ་ལས་དགོས་པ་ཅི་ཡང་མི་འདུག བརྟན་བཞུགས་དང་ཞབས་བརྟན་ངོ་མ་རང་རང་སོ་སོས་དགེ་སྦྱོར་ཡག་པོ་བསྒྲུབ་རྒྱུ་དེ་རེད། བོད་ལ་ཡོད་པའི་སངས་རྒྱས་ཀྱི་ཆོས་འདི་དེ་རིང་ཁ་སང་འཛམ་གླིང་འདིའི་སྒང་གི་རྣམ་དཔྱོད་ཡོད་མཁན་གྱི་མིས་བལྟས་པ་ཡིན་ན། རྒྱུ་མཚན་ལྡན་པའི་བློ་སྦྱོང་ཐབས་ཁྱད་པར་བ་ཞིག་ཏུ་མཐོང་གི་འདུག་གཱ། ཆོས་འདི་འདྲ་ཞིག་སོ་སོའི་ལག་པར་ཡོད་པ་རེད། སྐད་ཡིག་གཞན་དག་བརྒྱུད་ནས་བསླབ་མི་དགོས་པར་བོད་ཡིག་ནང་དུ་ཡོད་པ་རེད། དོན་གྱི་བརྟན་བཞུགས་དེ་ཚང་མས་དགེ་སྦྱོར་ཡག་པོ་སྒྲུབས། དགེ་སྦྱོར་དགེ་སྦྱོར་ཟེར་དུས་ཞབས་བརྟན་བསྒྲུབ་ནས་གྲངས་ཀ་གསོག་བསྡད་རྒྱུ་གཅིག་པུ་མ་རེད། བློ་ཆོས་སུ་སོང་བ་ཞིག་དགོས་པ་རེད། ཅེས་གསུངས་སོང་།

ཡང་ཁོང་གིས་བརྟན་བཞུགས་ཕུལ་མཁན་མང་པོ་ཡོང་གི་ཡོད་སྟབས། མ་འོངས་པར་ཚང་མ་ཟླ་སྒྲིལ་བྱས་ན་སྟབས་བདེ་ཡོད་པ་དང་། དེ་སྔོན་དགུང་ལོ་ ༡༣ དགུང་ཀེག་ཐོག་ཁྲལ་ཙམ་གྱི་ཐོག་ནས་བརྟན་བཞུགས་མང་པོ་ཕུལ་ཡོད་པ་དང་། དགུང་ལོ་ ༢༥ ཐོག་རྒྱ་ནག་གིས་བོད་ཡུལ་བཙན་བཟུང་བྱས་ཏེ་བོད་མི་ཚོ་རང་ཉིད་ཀྱི་ལུང་པ་དང་ཁ་བྲལ་ནས་བཙན་བྱོལ་དུ་ཡོང་དགོས་ཁེལ་ཡོད་པ་དང་། ད་ལྟ་ལོ་འཁོར་མོ་རྩིས་པ་ཡིན་ན་དགུང་ལོ་ ༨༠ ལ་ཕེབས་ཡོད་ཀྱང་། པུས་མོར་དཀའ་ངལ་ཏོག་ཙམ་ཡོད་པ་མ་གཏོགས་སྐུ་གཟུགས་བདེ་ཐག་གཅོད་ཡོད་པས། སྐུ་གཟུགས་གནས་སྟངས་ཀྱི་ཐོག་ནས་ལོ་བརྒྱ་ཕྲག་བར་བཞུགས་ཐུབ་པའི་ཆ་རྐྱེན་ཡོད་སྐོར་སོགས་གསུངས་སོང་།

ཆོ་འཕྲུལ་དུས་ཆེན་དང་སྟབས་བསྟུན་ནས་སང་ཉིན་ཞོགས་པའི་ཆུ་ཚོད་༨།༣༠ ནས་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་མཆོག་གིས་དད་ལྡན་སེར་སྐྱ་མི་མང་ལ་སྐྱེས་རབས་གསུང་ཆོས་བཀའ་དྲིན་བསྩལ་རྒྱུ་ཡིན་པ་དང་། སྐབས་དེར་དབྱིན་སྐད་དང་རྒྱ་སྐད། ཝེ་ནམ་གྱི་སྐད། ར་ཤི་ཡའི་སྐད་བཅས་ཀྱི་ནང་དུ་ཐད་ཀར་གསུང་བསྒྱུར་རྒྱང་སྲིང་གནང་རྒྱུ་ཡིན་འདུག

གསར་འགོད་པ། པདྨ་མཚོ

དུས་བབ་དྲ་བ་ནས།