ཧུའུ་ཡོ་པཱང་སྐྱེས་ཏེ་ལོ་ ༡༠༠ འཁོར་གྱི་ཡོད།

ད་ལོར་རྒྱ་ནག་གི་ཧུའུ་ཡོ་པཱང་ (Hu Yaobang) སྐྱེས་ནས་ལོ་ ༡༠༠ འཁོར་ཀྱིན་ཡོད་སྟབས། ཧོ་ཀོང་སོགས་ཕྱི་ཕྱོགས་ཀྱི་བརྒྱུད་ལམ་ཁག་ཏུ། ༢༠༠༥ ལོར་ཧུ་ཡོ་པང་སྐྱེས་ནས་ལོ་ ༩༠ འཁོར་བའི་མཛད་སྒོར་སྐབས་དེའི་རྒྱ་ནག་གི་སྲིད་འཛིན་ཧུའུ་ཅིན་ཐའོ་གཡོལ་ཡོད་ཀྱང་། ད་རེབ་སྲིད་འཛིན་ཞི་ཅིན་ཕིན་མཛད་སྒོ་དེར་གཡོལ་

མིན་ལ་ཚོད་དཔག་སྣ་ཚོགས་བྱེད་བཞིན་འདུག

བྷི་བྷི་སི་གསར་ཁང་གིས་ཧོང་ཀོང་གི་གསར་འགྱུར་ལུང་འདྲེན་བྱས་པ་ལྟར་ན། ཧུའུ་ཡོ་པཱང་གི་བུ་ཆེ་བ་ཧོ་ཏི་ཕིན་ (Hu Deping) ད་ལོར་ཅང་ཞི་ཞིང་ཆེན་གུང་ཆིན་གྲོང་ཁྱེར་གྱི་ལིན་ཡོན་དུ་ཧུའུ་ཡོ་པཱང་གི་དུར་མཆོད་དུ་སྐྱོད་སྐབས། ཧུའུ་ཡོ་པཱང་སྐྱེས་ནས་ལོ་བརྒྱ་འཁོར་བའི་མཛད་སྒོར་ད་ལོ་རྒྱ་གཞུང་གིས་གཞི་རྒྱ་ཆེན་བའི་བྱེད་སྒོ་ཞིག་གྲ་སྒྲིག་བྱེད་ཀྱིན་ཡོད་སྐོར་བརྗོད་འདུག་ཀྱང་། ཧུ་ཡོ་པང་སྐྱེས་ནས་ལོ་ ༡༠༠ འཁོར་བའི་ཉིན་མོ་དེ་ནི་འབྱུང་གྱུར་གྱི་ཟླ་༡༡ ཚེས་ ༢༠ ཉིན་རེད་ཅེས་སོགས་བཀོད་འདུག

རྒྱ་ནག་གསར་འགྱུར་དྲ་བའི་སྟེང་། དགྲ་འགོག་དམག་འཁྲུག་རྒྱལ་ཁ་ཐོབ་ནས་ལོ་ ༧༠ འཁོར་བ། ཞེས་པའི་རྩོམ་ཡིག་ཅིག་སྤེལ་བའི་ནང་ ༢༠༡༥ ལོར་གལ་ཆེ་བའི་དྲན་གསོའི་རྗེས་དྲན་གྱི་ཉིན་མོ་བཞི་ཡོད་པའི་ཁྲོད་ཀྱི་གཅིག་དེ་རྒྱ་ནག་གི་སྲིད་འཛིན་ཟུར་བ་ཧུའུ་ཡོ་པཱང་སྐྱེས་ནས་ལོ་ ༡༠༠ འཁོར་བའི་མཛད་སྒོ་དེ་ཆགས་ཡོད་སྐོར་བརྗོད་འདུག

༢༠༠༥ ལོའི་ཟླ་ ༡༡ ཚེས་ ༨ ཉིན། རྒྱ་ནག་གིས་པེ་ཅིན་དུ་ཧུའུ་ཡོ་པཱང་སྐྱེས་ནས་ལོ་ ༩༠ འཁོར་བའི་མཛད་སྒོ་རྒྱ་ཆེན་པོ་ཞིག་བསྡུས་སྐབས། མཛད་སྒོ་དེའི་སྔོན་ཙམ་ནས་བཟུང་ཧུའུ་ཡོ་པཱང་གིས་གུང་ཁྲན་ཏང་གི་ནོར་འཁྲུལ་ཅན་གྱི་སྲིད་བྱུས་མང་པོ་ཞིག་ལ་བཅོས་བསྒྱུར་གཏོང་རྩིས་བྱས་པའི་གནས་ཚུལ་ཁག་གླེང་མི་ཆོག་པ་བྱས་འདུག ཧོང་ཀོང་གི་ཀུ་ཤུ་ཉིན་རེ་ (Apple Daily) ཡིས་གནས་ཚུལ་སྤེལ་བ་ལྟར་ན། སྐབས་དེར་ཆབ་སྲིད་ལྷན་ཁང་གི་རྒྱུན་ལས་མང་པོ་ཞིག་གིས་ཧུ་ཡོ་པང་རྗེས་དྲན་མཛད་སྒོ་ལ་ངོ་རྒོལ་བྱས་ཡོད་པ་སོགས་ལ་བརྟེན་ཏེ། རྗེས་སུ་མཛད་སྒོ་སྔར་ལས་རྒྱ་ཆུང་དུ་སོང་ཡོད་པ་མ་ཟད། སྐབས་དེའི་རྒྱ་ནག་གི་སྲིད་འཛིན་ཧུའུ་ཅིན་ཐོ་ཡང་མཛད་སྒོར་གཡོལ་ཏེ་མཉམ་ཞུགས་གནང་མེད་སོགས་ལ་གཞིགས་ན། རྒྱ་ནག་མཐོ་རིམ་རྙིང་ཞེན་ཅན་ཚོར་མཚོན་ན་ཧུ་ཡོ་པང་དང་དྲུག་བཞིའི་ལས་འགུལ་སོགས་ནི་ཧ་ཅང་གནད་འགག་ཅིག་ཆགས་ཡོད་པ་མཚོན་ཐུབ་ཅེས་བརྗོད་འདུག

ཕྱིའི་བརྒྱུད་ལམ་ཁག་ཏུ་གནས་ཐོན་པའི་ནང་། རྒྱ་ནག་གུང་ཁྲན་ཏང་ནང་གི་རྒན་རབས་པ་ཚོའི་དབང་ཤུགས་ཀྱིས་ཧུའུ་ཡོ་པཱང་གོ་གནས་ནས་ཕབ་སྐབས། ཞི་ཅིན་ཕིན་གྱི་ཨ་ཕ་ཞི་ཀྲོན་ཞཱིས་ (Xi Zhongxun) ཀྱིས་ཧུའུ་ཡོ་པཱང་ལ་རོགས་སྐྱོར་བྱས་ཡོད་སྟབས། ཞི་ཅིན་ཕིན་གྱི་ཁྱིམ་རྒྱུད་དང་ཧུའུ་ཡོ་པཱང་གི་ཁྱིམ་རྒྱུད་བར་འབྲེལ་བ་དམ་པོ་ཡོད་པ་དང་། ཞི་ཅིན་ཕིན་དང་ཧུའུ་ཡོ་པཱང་གི་བུ་ཆེ་པ་ཧོ་ཏི་ཕིན་གཉིས་སྒེར་ངོས་ནས་ཀྱང་འབྲེལ་བ་ཡག་པོ་ཡོད་སྟབས། ད་རེབ་ཞི་ཅིན་ཕིན་གྱིས་ཧུའུ་ཅིན་ཐོ་དང་མ་འདྲ་བའི་གདམ་ཀ་གཞན་ཞིག་བྱས་ཏེ། འབྱུང་གྱུར་ཧུ་ཡོ་པང་གི་རྗེས་དྲན་མཛད་སྒོར་མཉམ་ཞུགས་གནང་རྒྱུ་ཡིན་སྐོར་སོགས་བཀོད་འདུག

ཧུའུ་ཡོ་པཱང་ནི་ ༡༩༨༧ ལོར་ “འབྱོར་ལྡན་གྲལ་རིམ་གྱི་རང་དབང་” ལ་རྒོལ་རྡུང་གཏོང་བའི་ལས་འགུལ་ཁྲོད་ཕམ་ཉེས་བྱུང་སྟེ། ཁོ་རང་གོ་གནས་ནས་ཕབ་ཡོད་པ་དང་ ༡༩༨༩ ལོའི་ཟླ་ ༤ བའི་ནང་ཁོ་ཚེ་ལས་འདས་ཡོད། ཁོ་འདས་གྲོངས་སུ་ཕྱིན་རྗེས་རྒྱ་ནག་མང་ཚོགས་འབོར་ཆེན་གྱིས་འདས་མཆོད་ལས་འགུལ་རྒྱ་ཆེན་པོ་སྤེལ་ཡོད་པ་དང་། རྗེས་སུ་འདས་མཆོད་དེའི་ངོ་བོར་འགྱུར་བ་ཐེབས་ཏེ་སློབ་མ་ཚོའི་རྔམ་སྟོན་ཁྲོམ་སྐོར་དུ་གྱུར་པ་དང་། མཐའ་འཇུག་རྒྱ་གཞུང་གིས་དྲག་གནོན་བྱས་ཏེ་ “དྲུག་བཞིའི་ལས་འགུལ་” ཞེས་པའི་སྐད་གྲགས་ཅན་དེ་བྱུང་ཡོད།

 གསར་འགོད་པ། འཇིགས་མེད་རྒྱ་མཚོ'

དུས་བབ་དྲ་བ་ནས།།