བོད་མིར་གོད་ཆག་བྱུང་བ་མི་གླེང་དོན་ཅི་ཡིན།

ཁ་སང་ཨ་རིའི་ཕོ་བྲང་དཀར་པོའི་མགྲིན་ཚབ་པས་བལ་ཡུལ་གཙོས་པའི་ས་ཁུལ་ཁག་ཏུ་ས་ཡོམ་གོད་ཆག་སྐོར་བསྒྲགས་སྐབས་བོད་གླེང་མི་འདུག

ཁ་སང་ཨ་རིའི་ཕོ་བྲང་དཀར་པོའི་མགྲིན་ཚབ་པ་ཇའོ་ཤེ་ཨར་ཎེ་སེ་ཌི་ (Josh Earnest) ཡིས་གསར་འགོད་གསལ་བསྒྲགས་ཤིག་སྤེལ་ཏེ། ཟླ་འདིའི་ཚེས་ ༢༥ ཉིན

་གྱི་བལ་ཡུལ་གྱི་ས་ཡོམ་ཁྲོད་བལ་ཡུལ་དང་རྒྱ་གར། བྷང་ལ་དྷེ་ཤེ་བཅས་ཀྱི་རྐྱེན་འདས་སུ་སོང་བ་དག་གི་ནང་མི་སྤུན་མཆེད་ལ་ཐུགས་གསོའི་འཚམས་འདྲི་ཞུས་ཡོད་ཀྱང་། བོད་ནང་འདས་གྲོངས་སོང་བ་དག་གླེང་མེད་སྟབས། བོད་མིའི་སྒྲིག་འཛུགས་ཀྱི་ཨ་རིའི་སྐུ་ཚབ་དོན་གཅོད་མཆོག་གིས་ང་ཚོས་ཨ་རིའི་གཞུང་གིས་གནོད་འཚེ་ཕོག་ཡུལ་གྱི་ས་ཁུལ་གཅིག་ཀྱང་མ་ལུས་པར་གསལ་ཁ་འདོན་པར་ཡིད་ཆེས་བྱེད་བཞིན་ཡོད་ཅེས་སོགས་གསུངས་འདུག

ཇའོ་ཤེ་ཨར་ཎེ་སེ་ཌི་ཡིས་གསར་འགོད་པ་ཚོར་འདི་ལྟར་བརྗོད་འདུག “ཨ་རིའི་གཞུང་གིས་བལ་ཡུལ་གྱི་ས་ཡོམ་ཁྲོད་རྐྱེན་འདས་སུ་སོང་བའི་བལ་པོའི་ནང་མི་སྤུན་མཆེད་ལ་ཐུགས་གསོའི་འཚམས་འདྲི་ཞུ་བཞིན་ཡོད་པ་མ་ཟད། རྒྱ་གར་དང་བྷང་ལ་དྷེ་ཤེ་ནང་འདས་གྲོངས་སོང་བ་དག་ལའང་གཅིག་མཚུངས་གདུང་སེམས་མཉམ་སྐྱེད་ཞུ་བཞིན་ཡོད”ཅེས་དང་། བདུན་ཕྲག་སྔོན་མའི་རེས་གཟའ་སྤེན་པའི་ཉིན་ཨ་རིའི་རྒྱལ་ཡོངས་བདེ་འཇགས་ལྷན་ཚོགས་ ཀྱི་མགྲིན་ཚབ་མ་མེ་ཧན་ (Bernadette Meehan) གྱིས། “ཨ་རིའི་གཞུང་དམངས་གཉིས་ཀྱིས་བལ་ཡུལ་གྱི་ས་ཡོམ་རྐྱེན་པས་འདས་གྲོངས་དང་གོད་ཆག་བྱུང་བའི་བལ་པོ་དང་རྒྱ་གར་བ། བྷང་ལ་དྷེ་ཤེ་བ་བཅས་ཀྱི་ནང་མི་སྤུན་མཆེད་དག་ལ་གདུང་སེམས་མཉམ་སྐྱེད་ཞུ་བཞིན་ཡོད་པ་མ་ཟད། བལ་བོའི་ནང་རྐྱེན་ངན་གྲོལ་འདོམས་བྱེད་མཁན་གྱི་ཆེད་མཁས་རུ་ཁག་གཏོང་རྒྱུ་དང་ཨ་སྒོར་ས་ཡ་གཅིག་གི་འཕྲལ་སེལ་རོགས་དངུལ་སྤྲོད་རྒྱུ་དང་མ་འོངས་རོགས་རམ་གང་དགོས་ཀྱང་བྱ་རྒྱུ་ཡིན”ཞེས་བརྗོད་འདུག

ཨ་རིའི་སྐུ་ཚབ་དོན་གཅོད་དབུ་དཀར་ཚང་སྐལ་རྡོར་མཆོག་གིས་ཐབས་ཇུས་མཁས་པ་ (Politico) ཞེས་པའི་ཐོག “བལ་ཡུལ་གྱི་ས་ཡོམ་རྐྱེན་པས་བལ་ཡུལ་དང་ས་འབྲེལ་ཡིན་པའི་བོད་ཀྱི་ས་ཁུལ་མང་ཆེ་བར་གནོད་སྐྱོན་ཚབས་ཆེན་ཕོག་ཡོད་སྟབས། ང་ཚོས་ཨ་རིའི་གཞུང་གིས་གནོད་འཚེ་ཕོག་ཡུལ་གྱི་ས་ཁུལ་གཅིག་ཀྱང་མ་ལུས་པ་གསལ་ཁ་བཏོན་ནས་འགྲེལ་བརྗོད་བྱ་རྒྱུར་ཡིད་ཆེས་བྱེད་བཞིན་ཡོད། དེ་འདྲ་བྱེད་ཐུབ་ཚེ་ཁོ་ཚོར་དགོས་ངེས་ཀྱི་དོ་སྣང་དང་ངལ་སེལ་རོགས་སྐྱོར་འཐོབ་རྒྱུར་ཐུགས་ཕན་སོས་ཀྱི་རེད”ཅེས་བརྗོད་འདུག

སྲིད་དོན་དབྱེ་ཞིབ་པ་ཚོས། ༢༠༡༠ ལོར་ཨོ་བྷ་མས་རྒྱ་ནག་གི་སྲིད་འཛིན་ཧུའུ་ཅིན་ཐའོ་མ་ཐུག་བར་༧གོང་ས་མཆོག་དང་མཇལ་འཕྲད་གནང་མེད་པ་མ་ཟད། འདི་ལོ་ཟླ་ ༩ པའི་ནང་ཞི་ཅིན་ཕིན་ཨ་རིར་རྒྱལ་དོན་སྐོར་སྐྱོད་ཐེངས་དང་པོ་བྱ་འཆར་ཡོད་སྟབས། ཨ་རིའི་གཞུང་གིས་རྒྱ་ནག་གཞུང་ལ་ཁོང་ཁྲོ་སློང་གཞིའི་བྱ་འགུལ་དང་བསྒྲགས་གཏམ་སྤེལ་རྒྱུར་དོགས་ཟོན་བྱེད་བཞིན་ཡོད་ཚུལ་བརྗོད་འདུག

ཐེངས་འདིའི་ས་ཡོམ་ཁྲོད་ད་བར་བལ་ཡུལ་གྱི་མི་ ༤༣༡༠ རྐྱེན་འདས་དང་། མི་༧༩༥༣ ལྷག་ལ་རྨས་སྐྱོན་དང་མི་ས་ཡ་༨ ལྷག་ལ་གནོད་འཚེ་ཕོག་ཡོད་འདུག རྒྱ་གར་ནང་མི་ ༨༦ དང་། བྷང་ལ་དྷེ་ཤེ་ནང་མི་ ༨ ལྷག་འདས་གྲོངས་སོང་ཡོད་འདུག བོད་ནང་གི་བོད་མི་ ༢༥ རྐྱེན་འདས་དང་མི་ ༡༡༧ ལྷག་ལ་རྨས་སྐྱོན་ཕོག་ཡོད་དང་། སྐྱིད་གྲོང་དང་གཉའ་ལམ། དིང་རི་འགྲམ་སོགས་ཀྱི་སྡོད་ཁང་བརྒྱ་ཆ་ ༨༠ ཙམ་ལ་གནོད་སྐྱོན་ཐེབས་ཡོད་འདུག ད་ལྟ་བལ་ཡུལ་ལ་ནོར་ཝེ་གཞུང་གིས་ཨ་སྒོར་ས་ཡ་ ༥ དང་། ཨ་རིས་ཨ་སྒོར་ས་ཡ་ ༡༠ དང་ཆེད་ལས་མི་སྣ་ཆེད་གཏོང་བྱས་ནས་རོགས་སྐྱོར་བྱེད་བཞིན་ཡོད་པ་མ་ཟད། རྒྱ་དཀར་ནག་གཉིས་དང་ཁེ་ན་ཌ། དབྱིན་ཡུལ་སོགས་ཀྱིས་མི་རྒྱུ་གཉིས་ཀྱི་རོགས་སྐྱོར་བྱེད་བཞིན་ཡོད་འདུག

དེ་རིང་རྩོམ་པ་པོ་ཎན་སན་ཀར་ཌིན་གྱིས་རྒྱལ་སྤྱིའི་དཔལ་འབྱོར་ཚད་ཐིག་ཐོག ཨ་རིའི་གཞུང་གིས་བལ་ཡུལ་གྱི་ས་ཡོམ་གོད་ཆག་ཁྲོད་འདས་གྲོངས་སོང་བའི་ནང་མི་སྤུན་མཆེད་དག་ལ་ཐུགས་གསོའི་འཚམས་འདྲི་ཞུས་ཡོད་ཀྱང་། བོད་ནང་གི་བོད་མི་ཚོར་མ་ཞུས་དོན་ནི་ཨ་རི་དང་རྒྱ་ནག་གི་འབྲེལ་ལམ་ལ་དོ་ཕོག་མི་འགྲོ་ཆེད་ཡིན་སྐོར་བརྗོད་འདུག

གསར་འགོད་པ། དོན་གྲུབ།

དུས་བབ་དྲ་བ་ནས།།