བོད་མི་ཞིག་འཛིན་བཟུང་།

༢༠༡༡/༠༨/༠༢ ལ་དུས་བབ་གསར་ཁང་ནས།

ཁམས་དཀར་མཛེས་ཁུལ་གྱི་བོད་མི་དངོས་གྲུབ་ལགས་ཀྱིས་རྫོང་གི་ཁྲོམ་གཞུང་དུ་༸གོང་ས་མཆོག་བོད་ལ་ཕེབས་བཅུག་དགོས། ཞེས་སྐད་འབོད་བརྒྱབ་སྟེ་རྒྱ་གཞུང་གིས་འཛིན་བཟུང་བྱས་འདུག  

ཟླ་སྔོན་མའི་ཕྱི་ཚེས་  ༢༩ ཉིན་དཀར་མཛེས་རྫོང་ཉག་རོང་མཐའ་གྲོང་ཚོ་ནས་ཡིན་པའི་དངོས་གྲུབ་ལགས་ཀྱིས་དཀར་མཛེས་ཁྲོམ་གཞུང་དུ་༸གོང་ས་མཆོག་གི་སྐུ་པར་ཆེན་པོ་ཞིག་སྐེ་ལ་འཁུར་ཏེ། ༸གོང་ས་མཆོག་བོད་ལ་ཕེབས་བཅུག་དགོས་ཞེས་རྒྱ་གཞུང་ལ་ངོ་རྒོལ་སྐད་འབོད་བྱས་ཏེ་ཁྲོམ་སྐོར་བྱས་སྐབས་ཉེན་རྟོག་པས་འཛིན་བཟུང་བཙོན་འཇུག་བྱས་ཡོད་འདུག  

འབྲེལ་ཡོད་མི་སྣས་ངོ་སྤྲོད་གནང་བ་ལྟར་ན། ཉེ་ཆར་རང་ལོ་ ༢༣ ཡིན་པའི་དངོས་གྲུབ་ལགས་དང་ཁོང་གི་བཟའ་ཟླ་གཉིས་ཀྱིས་རྫོང་གི་ཁྲོམ་གཞུང་དུ་ངོ་རྒོལ་སྐད་འབོད་བྱ་རྒྱུའི་དམ་བཅའ་བཞག་ཡོད་པ་ལྟར། ཉིན་ཤས་སྔོན་ཁོང་གི་བཟའ་ཟླས་ཁྲོམ་གཞུང་དུ་སྐད་འབོད་བྱས་ཏེ་འཛིན་བཟུང་རྗེས། ཕྱི་ཚེས་ ༢༩ ཁོང་གིས་སྐད་འབོད་བྱས་ཡོད་འདུག་ལ། སྐབས་དེར་ས་གནས་ཉེན་རྟོག་པ་འབྱོར་ཏེ་གཅར་རྡུང་བྱས་ཏེ་དྲན་པ་མ་འཐོར་བར་སྐད་འབོད་བྱས་ཡོད་ཚུལ་ས་གནས་བོད་མི་ཚོས་བརྗོད་ཡོད།   

གསར་འགོད་པ། དོན་གོ