རྒྱལ་གཅེས་པ་ཞིག་འདས་གྲོངས།

བོད་ཀྱི་དུས་བབ་གསར་ཁང་ནས།
འདོན་སྤེལ། ༢༠༡༡/༠༨/༡༣

རྒྱལ་གཅེས་དཔའ་བོ་འཕྲིན་ལས་ལགས་ལ་རྒྱ་གཞུང་གིས་ཉེས་རྡུང་དྲག་པོ་བཏང་སྟེ་གཅོང་ནད་ཆགས་རྗེས། ཟླ་འདིའི་ཚེས་ ༡༠ ཉིན་རང་ཁྱིམ་ནས་འདས་གྲོངས་སུ་ཕྱིན་ཡོད་འདུག  

ཟླ་འདིའི་ཕྱི་ཚེས་ ༡༠ ཉིན་ཁམས་དཀར་མཛེས་བེ་རི་གསེར་ཁ་གྲོང་ནས་ཡིན་པའི་རྒྱལ་གཅེས་དཔའ་བོ་འཕྲིན་ལས་ལགས་རང་ཁྱིམ་དུ་ནད་གཅོང་འོག་འདས་གྲོངས་སུ་ཕྱིན་ཡོད་པ་དང་། ཁོང་ནི་ཕྱི་ལོ་ ༢༠༠༩ ཟླ་ ༤ ནང་ཁམས་དཀར་མཛེས་ཁུལ་ཞི་རྒོལ་ནང་ཞུགས་ཏེ་རྒྱ་གཞུང་གིས་འཛིན་བཟུང་བྱས་ཡོད་ཅིང་། འདས་པའི་ཟླ་ངོ་ ༧ རིང་ཉེས་རྡུང་མནར་གཅོད་དྲག་པོ་བཏང་སྟེ་རིག་འཚོ་མི་ཟིན་པའི་ནད་གཅོང་གི་གནས་བབ་ཐོག་ཀློད་གྲོལ་བཏང་ཡོད་འདུག

རྗེས་སུ་ནང་མིས་སྨན་ཁང་དུ་ཁྲིད་དེ་བརྟག་དཔྱད་བྱས་སྐབས། ཉེས་རྡུང་དྲག་པོ་བཏང་བའི་རྐྱེན་གྱིས་ཀླད་པར་སྐྱོན་བྱུང་ཡོད་པ་ཤེས་རྟོགས་བྱུང་ཡོད་ཀྱང་།ནང་མིའི་ཆ་རྐྱེན་ཧ་ཅང་སྐྱོ་བའི་གནས་སྟངས་འོག་སྨན་ཁང་ཆེ་སར་ཁྲིད་དེ་སྨན་བཅོས་ཀྱི་མཐུན་རྐྱེན་མེད་སྟབས། ཁོང་ཕྱིར་རང་ཁྱིམ་དུ་ཁྲིད་དེ་སྨན་བཅོས་ལྟ་རྟོག་གནང་ཡོད་ཀྱང་། དྲག་སྐྱེད་མ་བྱུང་བར་ལོ་གཅིག་ལྷག་རིང་ནད་མནར་གྱི་མཐའ་མར་འདས་གྲངས་སུ་སོང་ཡོད་འདུག

དྷ་སར་གནས་སྡོད་འཇིགས་མེད་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། རྒྱལ་གཅེས་དཔའ་བོ་འཕྲིན་ལས་ལགས་གྲོངས་རྗེས་སྐུ་ཕུང་བྱ་གཏོར་བྱས་ཡོད་པ་དང་། སྐབས་དེར་ཁོང་གི་ཀླད་པར་ན་ཚ་བཟོས་ཡོད་པ་ཙམ་གཅིག་པུ་མ་ཡིན་པར། རྒྱ་གཞུང་གིས་ཉེས་རྡུང་དྲག་པོ་བཏང་པའི་རྐྱེན་གྱིས་ཁོང་གི་རུས་པའི་ལྷུ་ཚིགས་རྣམས་ཀྱང་ནག་པོར་གྱུར་ཡོད་ཚུལ་བརྗོད་བྱུང་།

ཕ་བློ་བུ་དང་མ་རིན་ཆེན་སྒྲོལ་མ་གཉིས་ཀྱི་བུ་རུ་སྐྱེས་པའི་རྒྱལ་གཅེས་དཔའ་བོ་འཕྲིན་ལས་ལགས་ནི་ད་ལྟ་རང་ལོ་ ༢༥ ཡིན་པ་དང་། ཁོང་གི་ཁྱིམ་དུ་ཕ་མ་གཉིས་དང་། ཆུང་མ། གཞན་སྤུན་མཆེད་ཆུང་བ་གཉིས་བཅས་ཡོད་འདུག

གསར་འགོད་པ། ཚེ་རིང་རྒྱལ།