མི་སྐྱ་གཉིས་ཀྱིས་རང་ལུས་མེར་བསྲེཊ།

དུས་བབ་གསར་ཁང་ནས།

ད་ལྟ་རང་གནས་ཚུལ་འབྱོར་གསལ་ལ། དེ་རིང་སྔ་དྲོའི་བོད་ནང་གི་ཆུ་ཚོད་ ༡༡།༣༠ ཐོག་རྔ་པ་རྫོང་མཐའ་བ་གོང་མའི་འཇུག་རིས་ཚང་གི་བུ་རང་ལོ་ ༡༩ ཡིན་པ་ཆོས་འཕེལ་དང་། མཐའ་བ་གོང་མའི་གསོང་པོ་ཚང་གི་སྐལ་བཟང་གི་བུ་རང་ལོ་ ༡༨ ཡིན་པ་མཁའ་དབྱིངས་༼ཁག་ཅིག་གིས་ཁོང་གི་མིང་ལ་ལྷུང་ཡངས་ཡིན་རབས་ཀྱང་ཟེར། ༽གཉིས་ཀྱིས་རྔ་པ་རྫོང་གི་ཁྲོམ་གཞུང་དུ་ཐོན་ནས་རང་ལུས་ལ་མེ་སྦར་ཞིང་ལག་གཉིས་ཐལ་མོ་སྦྱར་ནས་རྒྱ་ནག་གཞུང་ལ་ངོ་རྒོལ་སྐད་འབོད་གནང་ཡོད་འདུག

སྐབས་དེར་ཉེན་རྟོག་པ་སོགས་ཀྱིས་ཁོང་གཉིས་ལུས་ཀྱི་མེ་བསད་ཅིང་གཅར་རྡུང་གཏོང་བཞིན་ས་གནས་རྫོང་མི་མང་སྨན་ཁང་དུ་འཁྱེར་ཡོད་ཅིང་། ས་གནས་བོད་མི་ཚོས་བརྗོད་ན། ཉེན་རྟོག་པ་ཚོས་སྨན་ཁང་ནང་ཁྲིད་འགྲོ་སྐབས། བུ་མཁའ་དབྱངས་ཀྱིས་ད་དུང་ཁུ་ཚུར་གནམ་ལ་འཕྱར་ནས་འབོད་སྒྲ་སྒྲོག་བཞིན་ཡོད་ཚུལ་བཤད་ཀྱང་། འབོད་ཚིག་གི་ནང་དོ་ཅི་ཡིན་གསལ་པོ་ཐོས་མི་འདུག བུ་ཆོས་འཕེལ་དངོས་སུ་མཐོང་མཁན་མང་པོས་ཞིག་གིས་གསུངས་པ༌ལྟར་ན། བོད་ནང་གི་དུས་ཚོད་ ༡༢ ཡས་མས་སུ་གྲོངས་ཚར་ཡོད་པའི་གནས་ཚུལ་འབྱོར་ཡོད་ཅིང་། ཁོང་གཉིས་ཀ་དེ་སྔོན་རྔ་པ་ཀིརྟི་དགོན་པའི་གྲྭ་པ་ཡིན་ཞིང་རྗེས་སུ་གྲྭ་ལོགས་བྱས་ཡོད་འདུག

སྐལ་བཟང་གི་བུ་མཁའ་དབྱངས་ནི་ཕྱི་ལོ་ ༢༠༠༨ ལོར་རྒྱ་གཞུང་གིས་དམར་གསོད་བྱས་པའི་མཐའ་བ་གོང་མའི་རྩེ་ཕྲུག་ཚང་གི་རྒྱལ་གཅེས་དཔའ་བོ་བཀྲ་ཤིས་ཀྱི་ཚ་བོ་ཡིན་འདུག དེང་སྐབས་རྔ་པ་རྫོང་ལ་དམ་དྲགས་ཤུགས་ཆེ་ཡོད་མུས་ཐོག་སྔར་བས་དམ་དྲགས་ཤུགས་རུ་སོང་ཡོད་པ་དང་། དམག་མི་གང་སར་འགྲེམས་འཇོག་བྱས་ཡོད་འདུག་ལ། མི་མང་སྐྱོ་གདུང་དྲག་པོས་གཟིར་ཞིང་ཚོར་བ་རབ་ཏུ་འབར་གྱིན་ཡོད་པས་ཆེས་ཛ་དྲག་དང་ཉེན་ཁ་ཆེན་པོ་ཞིག་ལ་འཕྲད་བཞིན་ཡོད་འདུག

གནས་ཚུལ་གཏོང་མཁན། གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་།