གྲྭ་ཟུར་ཞིག་གིས་རང་ལུས་མེར་བསྲེཊ།

ཁ་སང་ཕྱི་ཚེས་ ༡ ཉིན་སྔ་དྲོར་ཁམས་ཆབ་མདོ་ཀརྨ་དགོན་པར་གྲྭ་བ་བྱས་མྱོང་མཁན། ད་ཆར་རང་ལོ་ ༤༦ ཡིན་པ་བསྟན་འཛིན་ཕུན་ཚོགས་ཞུ་བ་ཞིག་གིས་རང་ལུས་མེར་བསྲེགས་བཏང་སྟེ་རྒྱ་གཞུང་ལ་ངོ་རྒོལ་བྱས་འདུག སྐབས་དེར་ཁོང་གིས་ལག་ཏུ་ཡིག་ཆ་འདྲ་མིན་གཏོར་འགྲེམས་བྱེད་བཞིན་སྐད་འབོད་བརྒྱབ་ཡོད་ཀྱང་། ཡིག་ཆ་དེ་དག་གི་ནང་དོན་དང་འབོད་ཚིག་ནང་དོན་སོགས་གསལ་བོ་རྟོགས་ཐུབ་མི་འདུག

ཅུང་ཙམ་རྗེས་རྒྱ་གཞུང་གི་ཉེན་རྟོག་པ་ཡོང་སྟེ་ཁོང་གི་ལུས་ཀྱི་མེ་བསད་དེ་ཆབ་མདོ་རྫོང་སྨན་ཁང་ཞིག་ཏུ་འཁྲིད་ཡོད་འདུག་ཀྱང་། དེ་རྗེས་ཀྱི་གནས་སྟངས་གསལ་བོ་ཤེས་རྟོགས་ཐུབ་ཡོད་མི་འདུག ཁོང་གི་སྐྱེས་དམན་གྱི་མིང་ལ་སྒྲོལ་མ་ཟེར་ཞིང་ད་ཆར་ཁོང་གཉིས་ལ་བུ་མོ་གཅིག་དང་བུ་གཉིས་བཅས་ཡོད་འདུག རྒྱ་གཞུང་གིས་དེང་སྐབས་ཆབ་མདོ་ཀརྨ་དགོན་པར་དམ་དྲག་བྱེད་ཀྱིན་ཡོད་པ་དེར་ཁོང་གིས་མི་འདོད་པའི་རྣམ་འགྱུར་ཤུགས་ཆེན་བསྟན་ཡོད་པ་ཁོང་གི་ངོ་ཤེས་ཚོས་བརྗོད་ཡོད་འདུག

དུས་བབ་དྲ་བ།