འཚམ་སློབ་ཕྲུག་ཚོཊ་པས་རྒྱ་གཞུང་ལ་ངོ་རྒོལ།

ཁ་སང་ཉིན་རྒྱབ་རྒྱ་གར་ལྷོ་ཕྱོགས་ཅེ་ནའེ་གྲོང་ཁྱེར་དུ། མ་དྷི་ར་སི་བོད་པའི་སློབ་ཕྲུག་ཚོགས་པས་རྒྱ་གཞུང་ལ་ངོ་རྒོལ་གྱི་སྐད་འབོད་ཁྲོམ་སྐོར་གྱི་ལས་འགུལ་སྤེལ་འདུག

ཁ་སང་ཕྱི་ཚེས་ ༢༡ ཉིན་གྱི་ཉིན་རྒྱབ་ཆུ་ཚོད་ ༣ སྟེང་།  རྒྱ་གར་ལྷོ་ཕྱོགས་ཊ་མེལ་ན་ཌོ་མངའ་སྡེ་མ་དྷི་ར་སི་སློབ་ཕྲུག་ཚོགས་པའི་(TSAM)  སློབ་ཕྲུག་ ༡༡༠ ཡིས།  ཅེ་ནའེ་གྲོང་ཁྱེར་ནང་གི་མི་ཚོགས་འདུ་འཛི་ཆེ་བའི་ཨ་རིའི་གཞུང་ཚབ་ཁང་གི་མདུན་

ཐད་ཇཱ་མི་ནཱེ་ལམ་སྒང་ཟམ་ཆེན་ཐོག  བོད་ནང་བོད་མི་ ༧༨ ལྷག་གིས་རང་ལུས་མེར་བསྲེགས་བཏང་སྟེ་རྒྱ་གཞུང་གི་དྲག་གནོན་དབང་སྒྱུར་སྲིད་ཇུས་ལ་ངོ་རྒོལ་བྱས་པ་དེར། རྒྱ་གཞུང་དམར་ཤོག་མགོ་ཁྲིད་ཚོས་ལོག་འགྲེལ་བྱེད་བཞིན་པར་ངོ་རྒོལ་སྐད་འབོད་ཀྱི་ཁྲོམ་སྐོར་ལས་འགུལ་སྤེལ་ཡོད་པ་རེད། 

ངོ་རྒོལ་སྐད་འབོད་ཀྱི་ཁྲོམ་སྐོར་བྱེད་མཁན་སློབ་ཕྲུག་དེ་དག་གིས་ལུས་ལ་བོད་རང་དབང་སྐོར་གྱི་འབོད་ཚིག་སྣ་ཚོགས་བྲིས་ཡོད་པའི་སྟོད་གོས་ནག་པོ་གྱོན་པ་དང་། ལག་ཏུ་བོད་རྒྱལ་ཁབ་ཆེན་པོའི་རྒྱལ་དར་དང་འབོད་ཚིག་བྱང་བུ་འདྲ་མིན་བསྣམས་ཡོད་པ་མ་ཟད།  སློབ་ཕྲུག་ཡོངས་རྫོགས་ཁག་གཉིས་སུ་བགོས་ཏེ། ཁག་གཅིག་གིས་ “བོད་ནི་རྒྱ་ནག་གི་ཆ་ཤས་མ་རེད ” ཅེས་བྲིས་ཡོད་པའི་འཕྲེད་དར་ཆེན་པོ་ཞིག་འཕྱར་ཏེ་ངོ་རྒོལ་བྱས་ཡོད་པ་དང་།  ཁག་གཞན་པ་དེས་ད་ལྟའི་རྒྱ་གཞུང་གི་མགོ་ཁྲིད་གསར་པ་བདུན་མཚོན་བྱེད་དུ།  “བོད་ནང་འཇིགས་སྐུལ་རང་ལུགས་པ་གསར་པ་བདུན” ཞེས་པའི་པར་རིས་ཅན་གྱི་འཕྲེད་དར་ཆེན་པོ་ཞིག་འཕྱར་ཏེ་ངོ་རྒོལ་ཁྲོམ་སྐོར་བྱས་ཡོད་འདུག

སློབ་ཕྲུག་ཚོའི་ངོ་རྒོལ་ལས་འགུལ་སྤེལ་སྐབས། རྒྱ་གར་ཉེན་རྟོག་པ་མང་པོ་བསླེབས་ཏེ་ངོ་རྒོལ་སྐད་འབོད་བྱེད་མཁན་སློབ་ཕྲུག་ཡོངས་རྫོགས་འཇུ་བཟུང་བཀག་བསྐྱིལ་བྱས་ཡོད་འདུག

གསར་འགོད་པ། ཚེ་རིང་རྒྱལ།

དུས་བབ་དྲ་བ་ནས།