མཚོ་ཤར་ཡ་རྫི་རྫོང་དུ་དམ་དྲག

རྒྱ་ནག་གཞུང་གིས་རྒྱལ་གཅེས་དཔའ་བོ་དབང་ཆེན་ནོར་བུའི་ནང་མིར་མྱ་ངན་འཚམས་འདྲིར་བསྐྱོད་མཁན་རྣམས་འཛིན་བཟུང་བཀག་འགོག་བྱས་ཡོད་པ་མ་ཟད། ཡ་རྫི་རྫོང་བོད་ཡིག་སློབ་འབྲིང་གི་སློབ་མ་ཚོ་གུང་གསེང་བཏང་ཡོད་འདུག

ཟླ་འདིའི་ཕྱི་ཚེས་  ༡༩ ཉིན་བོད་མདོ་སྨད་མཚོ་ཤར་ཡ་རྫི་རྫོང་རྐང་ཚ་བོད་རིཊ་རང་སྐྱོང་ཞང་རུ་ཁག་དང་པོའི་རང་ལོ་ ༢༥ ཡིན་པའི་རྒྱལ་གཅེས་དཔའ་བོ་དབང་ཆེན་ནོར་བུ་ལགས་ཀྱིས། རྐང་ཚ་དགོན་དགའ་ལྡན་ཆོས་འཕེལ་གླིང་གི་དགོན་འདབས་ནས་རང་ལུས་མེར་བསྲེཊ་ཀྱིས་རྒྱ་གཞུང་གི་དྲག་གནོན་དབང་བསྒྱུར་སྲིད་ཇུས་ལ་ངོ་རྒོལ་བྱས་ཏེ་

སྐུ་གྲོངས་ཟིན་པ་ལྟར། ཨ་ཁུ་བཟོད་པ་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། རང་ལུས་མེར་བསྲེཊ་ཀྱི་གནས་ཚུལ་བྱུང་བའི་ཕྱི་ཉིན་ཡ་རྫི་རྫོང་བིས་མདོ་ཞང་བིས་མདོ་དགོན་ཆེན་གྱི་དགེ་འདུན་པ་རྣམས་ཀྱིས་རྒྱལ་གཅེས་པ་ཁོང་གཙོས། བོད་ནང་བསྟན་སྲིད་མི་རིགས་ཆེད་རང་ལུས་མེར་བསྲེཊ་གནང་མཁན་རྒྱལ་གཅེས་དཔའ་བོ་དཔའ་མོ་ཡོངས་ལ་བསྔོ་སྨོན་མཆོད་འབུལ་གནང་ཡོད་པ་མ་ཟད། བིས་མདོ་དགོན་ཆེན་གྱི་དགེ་འདུན་པ་ཚོས་རླངས་འཁོར་ཆེན་པོ་གཉིས་གླས་པ་དང་། དགོན་པ་གཞན་དག་གི་དགེ་འདུན་པ་ཚོས་འཕྲུལ་རྟར་ཞོན་ཏེ། རྒྱལ་གཅེས་པ་ཁོང་ལ་གདུང་སེམས་མཉམ་སྐྱེད་དང་ནང་མིར་མྱ་ངན་འཚམས་འདྲིའི་ཆེད་རྐང་ཚར་བསྐྱོད་ཡོད་ཀྱང་། ཡ་རྫི་རྫོང་གི་ལས་བྱེད་དང་ཉེན་རྟོག་མི་སྣས་སྐབས་དེར་རྒྱལ་གཅེས་པ་ཁོང་གི་ཁྱིམ་དུ་མྱ་ངན་འཚམས་འདྲིར་བསླེབས་ཟིན་པའི་སྐྱ་སེར་གཉིས་ཀ་འཛིན་བཟུང་བྱས་པ་དང་། གཞན་རྣམས་རྐང་ཚ་ཞང་གི་འདབས་རོལ་གྱི་གསེར་སྒའི་ཉག་གར་བསླེབས་སྐབས་བཀག་འགོག་བྱས་ཡོད་འདུག

ཕྱིས་སུ་གྲྭ་བ་ཚོས་འཛིན་བཟུང་བྱས་ཟིན་པའི་བོད་མི་དེ་དག་གློད་གྲོལ་གཏོང་དགོས་པའི་རེ་སྐུལ་ཞུས་མཐར་བོད་མི་མང་ཆེ་བ་ཀློད་ཡོད་ཀྱང་། རླངས་འཁོར་བདག་པོ་གཉིས་བཀག་ཉར་བྱས་ཡོད་འདུག

གཞན། རྒྱལ་གཅེས་དཔའ་བོ་དབང་ཆེན་ནོར་བུ་ལགས་ཀྱི་མེར་བསྲེཊ་གནས་ཚུལ་བྱུང་བའི་ཕྱི་ཉིན་ཡ་རྫི་རྫོང་བོད་ཡིག་སློབ་འབྲིང་ (ཞོན་ཧྭ་བོད་ཡིག་སློབ་འབྲིང་) གི་སློབ་མ་ཞིག་གིས་རང་ལུས་མེར་བསྲེཊ་གནང་རྩིས་བྱེད་སྐབས། དེར་ཡོད་དགེ་སློབ་རྣམས་ཀྱིས་ཤེས་རྟོགས་བྱུང་ཡོད་པ་དང་། ཕྱིས་སུ་ཉེན་རྟོག་པ་དང་དམག་མི་ཡོང་སྟེ་སློབ་མ་ཚོའི་ཉལ་ཁང་ལ་སྔོག་བཤེར་དང་ཉིན་ཤས་རིང་སློབ་གྲྭའི་དགེ་སློབ་གཉིས་ཀ་སློབ་གྲྭའི་ཕྱི་ལོག་ཏུ་མ་བཏང་བར་བཀག་སྡོམ་ནན་མོ་བྱས་པ་མ་ཟད། ཕྱི་ཚེས་ ༢༡ ཉིན་ནས་བཟུང་སློབ་གྲྭའི་དགེ་རྒན་ཚོས་རྡོ་སྦིས་ཞང་དང་བསེ་ཆང་བཅས་ཞང་ཁག་གཞན་ནས་ཡོང་བའི་སློབ་མ་རྣམས་རང་ཁྱིམ་དུ་བསྐྱལ་ཏེ་སློབ་གྲྭ་གུང་གསེང་བཏང་ཡོད་འདུག་ལ། ད་ཆར་ཡ་རྫི་རྫོང་རྐང་ཚ་ཞང་དང་བིས་མདོ་བཅས་སུ་དམ་དྲག་བཀག་སྡོམ་བྱེད་ཀྱི་ཡོད་འདུག

གསར་འགོད་པ། དོན་གོ

དུས་བབ་དྲྭ་བ་ནས།