བཙོན་ཁང་ནས་རྙེད་འདུག

ཟླ་སྔོན་མའི་ནང་རེབ་གོང་རྩེ་ཁོག་རྡོ་དཀར་མོ་ཞང་སྲིད་གཞུང་སྒོ་ཁར་བོད་མི་གཉིས་ཀྱིས་སྔ་རྗེས་སུ་རང་ལུས་མེར་བསྲེགས་གནང་རྗེས། ས་གནས་དེ་གའི་ན་གཞོན་གཞན་གཉིས་བོར་བརླག་ཏུ་ཕྱིན་ཡོད་འདུག རྗེས་སུ་ནང་མིས་རྩད་གཅོད་བྱས་སྐབས་ཁོང་གཉིས་རྩེ་ཁོག་རྫོང་དུ་བཙོན་འཇུག་བྱས་ཡོད་པ་ཤེས་རྟོགས་བྱུང་འདུག

སུད་སིར་གནས་བཞུགས་ཤ་བོ་རྡོ་རྗེ་ལགས་སུ་བོད་ནས་གནས་ཚུལ་འབྱོར་བ་ལྟར་ན། ཟླ་སྔོན་མའི་ཕྱི་ཚེས་ ༡༧ ཉིན་

རེབ་གོང་རྩེ་ཁོག་རྫོང་རྡོ་དཀར་མོ་ཡུལ་ཚོའི་སྲིད་གཞུང་སྒོ་ཁར། རྒྱལ་གཅེས་དཔའ་བོ་བསང་བདག་ཚེ་རིང་ལགས་ཀྱིས་རང་ལུས་མེར་བསྲེགས་བཏང་རྗེས། རྡོ་དཀར་མོ་ཞང་ཆུ་དམར་སྡེ་བའི་རང་ལོ་ ༢༢ ཡིན་པའི་མགོ་བྷེ་ཞུ་བ་གར་སོང་ཆ་མེད་ཆགས་ཡོད་འདུག དེ་ནས་ནང་མི་ཚོས་ཡར་མར་རྩད་གཅོད་བྱས་མཐར་ཁོང་རྒྱ་གཞུང་གིས་འཛིན་བཟུང་བྱས་ཏེ། ད་ཆར་རྩེ་ཁོག་རྫོང་གི་བཙོན་ཁང་ཞིག་ཏུ་བཀག་ཉར་བྱས་ཡོད་པ་གསར་དུ་ཤེས་རྟོགས་བྱུང་འདུག མགོ་བྷེ་ལགས་ཀྱི་མ་མིང་ལ་ཁྱི་མོ་ཐར་ཞུ་བཞིན་ཡོད་པ་དང་ཕ་འདས་གྲོངས་སུ་ཕྱིན་ཡོད་འདུག

དེ་བཞིན། ཟླ་སྔོན་མའི་ཕྱི་ཚེས་ ༢༣ ཉིན་རྒྱལ་གཅེས་དཔའ་བོ་རྟ་མགྲིན་རྡོ་རྗེ་ལགས་ཀྱིས་རྡོ་དཀར་མོ་ཞང་སྲིད་གཞུང་སྒོ་ཁར་རང་ལུས་མེར་བསྲེགས་བཏང་རྗེས། ཁ་སོག་སྡེ་བའི་རང་ལོ་ ༢༦ ཡིན་པའི་སྐལ་བཟང་བཀྲ་ཤིས་ཞུ་བ་གར་སོང་ཆ་མེད་ཆགས་ཡོད་ཅིང་། རྗེས་སུ་ནང་མིས་ཤེས་རྟོགས་བྱུང་བར་གོང་བཞིན་རྩེ་ཁོག་རྫོང་དུ་བཙོན་འཇུག་བྱས་ཡོད་འདུག སྐལ་བཟང་བཀྲ་ཤིས་ལགས་ཀྱི་ཕ་མང་ལ་བཀྲ་རྡོ་དང་། མ་མིང་ལ་སྐོ་རྡོ་ཞུ་བཞིན་ཡོད་འདུག

ད་ཆར་ས་གནས་མི་མང་ཚོའི་ངོས་ནས། གསང་བདག་ཚེ་རིང་དང་མགོ་བྷེ་གཉིས་ངོ་ཤེས་གྲོགས་པོ་ཡིན་པ་དང་། དེ་བཞིན་རྟ་མགྲིན་རྡོ་རྗེ་དང་སྐལ་བཟང་བཀྲ་ཤིས་གཉིས་ཀྱང་ངོ་ཤེས་གྲོགས་པོ་ཡིན་པའི་རྒྱུ་མཚན་ལ་བརྟེན་ཏེ། རྒྱ་གཞུང་གིས་དེ་སྔའི་མེར་བསྲེགས་སྐོར་ཁོང་གཉིས་ལ་རྒྱུས་མངའ་ཡོད་པའི་ཉེས་འདོགས་ཀྱིས་དོན་མེད་འཛིན་བཟུང་བྱས་པ་ཡིན་པར་ཚོད་དཔག་བྱེད་ཀྱི་ཡོད་འདུག

གཞན། ཟླ་འདིའི་ཕྱི་ཚེས་ ༩ ཉིན་གྱི་དགོང་མོར་རྩེ་ཁོག་རྡོ་དཀར་འབྲོག་ཏུ་རྒྱལ་གཅེས་དཔའ་མོ་བན་ཆེན་སྐྱིད་ལགས་ཀྱིས་རང་ལུས་མེར་བསྲེགས་གནང་པའི་ཕྱི་ཉིན། ས་གནས་དེ་ཁུལ་གྱི་གྲྭ་བ་དང་སྔགས་པ། བཙུན་མ་སོགས་ཧ་ཅང་མང་པོ་ཞིག་འདས་པོའི་ཁྱིམ་དུ་བསྔོ་སྨོན་གསུང་བར་ཕེབས་ཡོད་ཀྱང་། དེ་མ་ཐག་རྒྱ་ནག་གི་ཉེན་རྟོག་པ་མང་པོ་འབྱོར་ཏེ་སྨོན་ལམ་གསུང་དུ་ཡོང་མཁན་ཚང་མ་ཕྱིར་རང་རང་གི་སར་ལོག་དགོས་པའི་བཙན་བཀའ་བཏང་མཐར། དགེ་འདུན་པ་བཞི་ཁོ་ནས་བསྔོ་སྨོན་གསུང་དགོས་བྱུང་བའི་གནས་སྟངས་འོག འདས་པོའི་ཕ་མ་གཉིས་རྒྱ་གཞུང་གི་བྱེད་སྟངས་དེར་ཧ་ཅང་བློ་ཕམ་བྱུང་ཡོད་འདུག

དུས་བབདྲྭ་བ་ནས།