གྱེན་ལངས་ཤོག་ཁག་ཁྲིམས་མཐུན་ངོས་ལེན།

ཨ་རིའི་གཞུང་གིས་སེ་རི་ཡའི་ཁ་གཏད་མཉམ་འབྲེལ་སྒྲིག་འཛུགས་ཁྲིམས་མཐུན་དུ་ངོས་ལེན་བྱས་ཡོད་འདུག་ལ། ཨོ་བྷ་མས་དེ་ནི་ཨ་རིའི་ཐག་གཅོད་ཆེན་པོ་ཞིག་ཡིན་སྐོར་བརྗོད་ཡོད་འདུག 

ཁ་སང་ཕྱི་ཚེས་ ༡༡ ཉིན་སྲིད་འཛིན་ཨོ་བྷ་མས། ཨ་རིའི་གཞུང་གིས་སེ་རི་ཡའི་གྱེན་ལངས་ཤོག་ཁག་གི་སྒྲིག་འཛུགས ༼སེ་རི་ཡའི་རྒྱལ་ཡོངས་ལྷན་ཚོགས༽ 

ཞེས་པ་ཁྲིམས་མཐུན་དུ་ངོས་འཛིན་བྱས་ཡོད་ཚུལ་བསྒྲགས་ཡོད་པ་མ་ཟད། ཁོང་གིས་སེ་རི་ཡའི་གྱེན་ལངས་ཤོག་ཁག་གི་སྒྲིག་འཛུགས་དེ་ནི་ད་ཆར་སེ་རི་ཡའི་གྱེན་ལངས་ཤོག་ཁག་མཉམ་སྒྲིལ་དང་། མང་ཚོགས་ཀྱི་ངོ་བོ་དང་འཐུས་ཚབ་མཚོན་ཐུབ་པ་ཞིག་ཆགས་ཡོད་སྟབས། ཨ་རིའི་གཞུང་གིས་གྱེན་ལངས་ཤོག་ཁག་གི་སྒྲིག་འཛུགས་དེར་ཁྲིམས་མཐུན་དུ་ངོས་ལེན་བྱས་པའི་ཐག་གཅོད་རང་བཞིན་གྱི་གོམ་སྟབས་ཆེན་པོ་ཞིག་སྤོས་ཡོད་སྐོར་བརྗོད་འདུག

ཨ་རིའི་ཁྲིམས་མཐུན་ངོས་ལེན་གྱི་ཐག་གཅོད་དེ་ནི། ཡུ་རོབ་མཐུན་ཚོགས་དང་དབྱིན་ཇི།ཧྥ་རན་སི། ཊུར་ཀེ་སོགས་ཀྱིས་སེ་རི་ཡའི་གྱེན་ལངས་ཤོག་ཁག་གི་སྒྲིག་འཛུགས་ལ་ཁྲིམས་མཐུན་དུ་ངོས་འཛིན་བྱས་ཏེ་ཟླ་གཅིག་གི་རྗེས་སུ་ངོས་ལེན་བྱས་པ་ཞིག་ཆགས་ཡོད་པ་དང་། ཨོ་བྷ་མས་གྱེན་ལངས་ཤོག་ཁག་གི་སྒྲིག་འཛུགས་ལ་དྲག་སྤྱོད་པའི་བྱ་འགུལ་མི་སྤེལ་རྒྱུའི་སྐུལ་འདེད་བྱས་ཡོད་པ་མ་ཟད། ཨོལ་ཁཱ་ཊ་དྲག་སྤྱོད་ཤོག་ཁག་དང་འབྲེལ་ལམ་ཡོད་པའི་འཇིགས་སྣང་བྱེད་ཀྱི་ཡོད་འདུག  

གཞན། དེ་རིང་གཟའ་ལྷག་པའི་ཉིན་མཱོ་རཱོ་ཀཱོ་ (Morocco) ནང་སེ་རི་ཡའི་གྲོགས་པོའི་ལྷན་ཚོགས་ཞིག་ཚོགས་ཡོད་ཅིང་། ལྷན་ཚོགས་དེར་རྒྱལ་ཁབ་༧༠ཕྱི་སྲིད་བློན་ཆེན་མཉམ་ཞུགས་ཐོག  སེ་རི་ཡའི་ནང་གི་གནས་བབ་དང་རྒྱལ་སྤྱིའི་སྤྱི་ཚོགས་ཀྱིས་གདོང་ལེན་ཇི་ལྟར་བྱ་དགོས་པའི་སྐོར་ལ་གྲོས་བསྡུར་བྱས་ཡོད་འདུག་ལ། ལྷན་ཚོགས་དེར་སེ་རི་ཡའི་རྒྱལ་ཡོངས་ལྷན་ཚོགས་ཀྱི་འཐུས་མི་ཡང་བཅར་ཡོད་འདུག

དེ་བཞིན་དབྱིན་ཡུལ་དུ་རྒྱལ་སྤྱིའི་དམག་དོན་མཐོ་རིམ་དཔོན་རིགས་ཀྱི་ལྷན་ཚོགས་ཤིག་ཚོགས་ཏེ། སེ་རི་ཡའི་གྱེན་ལངས་ཤོག་ཁག་ལ་སྦྱོང་བརྡར་སྤྲོད་རྒྱུ་དང་། མཁའ་དམག་དང་མཚོ་དམག་གི་རྒྱབ་སྐྱོར་བྱེད་བྱ་ཕྱོགས་ཐད་གྲོས་བསྡུར་བྱས་ཡོད་འདུག

སེ་རི་ཡའི་ལྟ་ཞིབ་སྡེ་ཚན་ཁག་གི་བཏོན་པའི་སྙན་ཐོ་ལྟར་ན། འདས་པའི་པའི་ཟླ་ ༡༨ རིང་སེ་རི་ཡའི་གྱེན་ལངས་ཤོག་ཁག་གིས་སྲིད་འཛིན་བྷ་ཤར་དང་ཁོང་གི་སྲིད་གཞུང་ལ་ངོ་རྒོལ་གྱེན་ལངས་བྱས་པའི་ཟིང་འཁྲུག་ཁྲོད། མི་ཁྲི་ ༤  ཙམ་དམར་གསོད་རྐྱེན་འདས་སུ་ཕྱིན་ཡོད་པ་དང་། ཡུལ་མི་བྱེ་བ་ ༥༠ ཙམ་ཁྱིམ་མཚེས་རྒྱལ་ཁབ་ཁག་ཏུ་བྲོས་བྱོལ་སྐྱབས་བཅོལ་དུ་ཕྱིན་ཡོད་འདུག

གསར་འགོད་པ། བནྡེ་སྐྱབས།

དུས་བབ་དྲྭ་བ་ནས།