ལྡི་ལིར་ཆུ་ཚོད་ ༡༤ རེའི་ནང་བཙན་གཡེམ་དོན་རྐྱེན་རེ་བྱུང་འདུག

ཉེ་ཆར་རྒྱ་གར་རྒྱལ་ས་ལྡི་ལི་གསར་པར་བཙན་གཡེམ་དོན་རྐྱེན་ཞིག་བྱུང་རྗེས། འདས་པའི་བདུན་ཕྲག་གཅིག་རིང་རྒྱལ་ས་ལྡི་ལི་གཙོས་པའི་རྒྱ་གར་གྱི་གྲོང་ཁྱེར་ཆེ་ཁག་ནང་མི་མང་གི་ངོ་རྒོལ་དོན་རྐྱེན་ཤུགས་ཆེན་འབྱུང་བཞིན་ཡོད་པ་དང་། ལྷག་པར་དུ་ཁ་སང་གཟའ་ཉི་མའི་ཉིན་ལྡི་ལིར་མི་མང་སྟོང་ཕྲག་མང་

པོས་ངོ་རྒོལ་གྱིས་ཉེན་རྟོག་པ་དང་མི་མང་བར་འཁྲུག་འཛིང་ཤོར་ཏེ། ཉེན་རྟོག་པ་ ༧༨ ཚུད་པའི་མི་མང་བརྒྱ་སྐོར་ཞིག་ལ་རྨས་སྐྱོན་ཕོག་ཡོད་འདུག

ཟླ་འདིའི་ཕྱི་ཚེས་ ༡༦ ཉིན་གྱི་དགོང་མོ་རང་ལོ་ ༢༣ ཡིན་པའི་མཐོ་སློབ་བུ་མོ་ཞིག་དགའ་རོགས་དང་ལྷན་དུ་གློག་བརྙན་ལ་ལྟ་རུ་ཕྱིན་ཏེ་ཕྱིར་ལོག་པའི་ལམ་བར་དུ། སྤྱི་སྤྱོད་རླངས་འཁོར་ཞིག་གི་ནང་དུ་ཁ་ལོ་བ་ཚུད་པས་མི་ ༦ གིས་སྐྱེས་པ་དེ་བསྡམས་བཀྱིག་བྱས་ཏེ་བུ་མོ་དེར་བཙན་གཡེམ་བྱས་འདུག་པ་མ་ཟད། མཚན་མའི་ནང་ལྕགས་རྒྱུག་བཙུགས་པ་སོགས་བྱས་མཐར་ཁོ་གཉིས་དམར་རྗེན་དུ་གཞུང་ལམ་སྟེང་གཡུག་ཡོད་འདུག དོན་རྐྱེན་དེས་རྒྱ་གར་མི་མང་ལ་ཁོང་ཁྲོ་ཆེན་པོ་བསླངས་ཏེ། འདས་པའི་བདུན་ཕྲག་གཅིག་རིང་ལྡི་ལི་གཙོས་རྒྱ་གར་གྱི་གྲོང་ཁྱེར་དང་ས་གནས་གང་སར་སློབ་ཕྲུག་དང་མི་མང་གི་ངོ་རྒོལ་ཤུགས་ཆེན་བྱུང་ཡོད་པ་མ་ཟད། དེ་རིང་ཕྱི་དྲོའི་བར་ལྡི་ལིའི་ངོ་རྒོལ་ལས་འགུལ་ཧ་ཅང་ཛ་དྲག་གི་ངོ་བོར་འགྱུར་བཞིན་ཡོད་འདུག

ཕྱི་ཚེས་ ༢༢ ཉིན་ལྡི་ལིར་སློབ་ཕྲུག་དང་མི་མང་གི་ངོ་རྒོལ་ཤུགས་ཆེར་བྱུང་ཡོད་སྟབས། ལྡི་ལི་ཉེན་རྟོག་ལས་ཁུངས་ཀྱིས་བཀའ་ཁྱབ་བཏང་སྟེ་ཕྱི་ཚེས་ ༢༣ ཉིན་ལྡི་ལི་གྲོང་འཁྱེར་ནང་མང་ཚོགས་འདུ་འཛོམ་དང་ངོ་རྒོལ་སྐད་འབོད་བྱ་རྒྱུར་བཀག་འགོག་བྱས་ཡོད་པ་མ་ཟད། ས་འོག་མེ་འཁོར་འབབ་ཚིགས་(Metro stations)དག་སྒོ་བརྒྱབ་སྟེ་མི་མང་ངོ་རྒོལ་འགོག་ཐབས་བྱས་ཡོད་ཀྱང་། ཉིན་དེའི་ཞོགས་པ་ཆུ་ཚོད་ ༨ ཙམ་ནས་སློབ་ཕྲུག་དང་མང་ཚོགས་སྟོང་ཕྲག་མང་པོ་རྒྱ་གར་སྒོ་ཆེན་(India Gate) མདུན་ཐང་དུ་འཛོམས་ཏེ། སྲིད་འཛིན་ཕོ་བྲང་གི་ཕྱོགས་སུ་སྐད་འབོད་གོམ་བགྲོད་བྱས་འདུག

ཁ་སང་གཟའ་ཉི་མའི་ཞོགས་པར་སླར་ཡང་མི་མང་རྒྱ་གར་སྒོ་ཆེན་མདུན་ཐང་དུ་འཛོམས་བཞིན་པར། ཉེན་རྟོག་པས་གཞུང་ལམ་ཁག་ཏུ་འགོག་སྲུང་ར་བ་བཙུགས་ཡོད་ཀྱང་། མང་ཚོགས་ཀྱིས་འགོག་སྲུང་ར་བ་མེར་བསྲེགས་བཏང་པ་སོགས་བྱས་རྐྱེན་ཉེན་རྟོག་པ་དང་མང་ཚོགས་པར་འཁྲུག་རྩོད་ཆེན་པོ་ཤོར་འདུག ཉེན་རྟོག་པ་དང་དྲག་ཆས་དཔུང་དམག་གིས་མང་ཚོགས་སྟེང་མིག་སྒྲུབ་དུག་རླངས་དང་། མེ་གསོད་ཆུ་སྒྱོགས་སོགས་གཏོར་ཏེ་ངོ་རྒོལ་མི་མང་ཁ་གཏོར་ཐབས་བྱས་ཡོད་ཅིང་། ཉིན་དེའི་འཁྲུག་རྩོད་ཁྲོད་མི་མང་ ༦༥ དང་། ཉེན་རྟོག་པ་ ༧༨ ཙམ་ལ་རྨས་སྐྱོན་བཟོས་ཡོད་ཅིང་། ཉེན་རྟོག་པ་སཱུ་བྷ་ཤཱི་ཟེར་པ་ཞིག་ལ་མང་ཚོགས་ཀྱིས་རིབ་རྡུང་བྱས་ཏེ། ད་ཆར་སྨན་ཁང་དུ་སྲོག་ཉེན་ལ་ཐུག་ཡོད་འདུག རྒྱ་གར་སྒོ་ཆེན་མཐའ་འཁོར་གྱི་གཞུང་ལམ་ཁག་ཏུ་མང་ཚོགས་ཚོས་གཞུང་དང་སྒེར་གྱི་རླངས་འཁོར་ཆེ་ཆུང་ ༥༠ ཙམ་ལ་གཏོར་སྐྱོན་བཏང་ཡོད་འདུག

ཉེན་རྟོག་པ་ཚོས་ངོ་རྒོལ་བ་མང་པོ་འཇུ་བཟུང་བྱེད་བཞིན་ཡོད་པ་མ་ཟད། གསར་འགོད་པ་དང་ངོ་རྒོལ་ལ་འབྲེལ་བ་མེད་པའི་མི་མང་པོར་གཅར་རྡུང་ཕོག་ཡོད་འདུག རྒྱ་གར་གྱི་གསར་ལམ་ཁག་ཅིག་ཏུ་དམངས་གཙོའི་རྒྱལ་ཁབ་ཅིག་ཡིན་ན། མི་མང་ལ་ཞི་བའི་ངོ་རྒོལ་བྱེད་རྒྱུའི་ཐོབ་ཐང་ཡོད་པ་དང་། ཐོབ་ཐང་དེས་རྒྱ་གར་ནི་རྒྱ་ནག་ལྟ་བུའི་སྲིད་དབང་སྒེར་འཛིན་གཞུང་ལས་ཁྱད་པར་བ་ཞིག་ཡིན་པའི་རྣམ་པ་འཐོན་དགོས་ཀྱང་། ཐེངས་འདིར་རྒྱ་གར་ཉེན་རྟོག་པ་དང་གཞུང་གིས་མང་ཚོགས་སྟེང་དྲག་ཤུགས་བེད་སྤྱོད་བཏང་པའི་བྱ་སྤྱོད་ནི་ངོ་ཚ་དགོས་པ་ཞིག་ཡིན་པའི་སྐྱོན་བརྗོད་བྱེད་ཀྱིན་འདུག

ལྡི་ལི་མཐོ་རིམ་ཁྲིམས་ཁང་གིས་ཉེན་རྟོག་པ་ཚོས་ཉེས་མེད་མང་པོར་གཅར་རྡུང་བྱས་པར་སྐྱོན་བརྗོད་བྱས་ཡོད་པ་རེད། དམིགས་བསལ་བཀོད་འདོམས་ཉེན་རྟོག་དཔོན་ཀཱུ་མར་(Kumar) གྱིས་ཉེ་ཆར་གྱི་བཙན་གཡེམ་དོན་རྐྱེན་དང་། ཐེངས་འདིར་ཉེན་རྟོག་པས་དྲག་རྡུང་བྱས་པ། ལྡི་ལི་གཙོས་པའི་རྒྱ་གར་ནང་གི་བུད་མེད་ཀྱི་བདེ་འཇགས་སྲུང་སྐྱོབ་ཐད་དམིགས་བསལ་ཚོགས་ཆུང་བཙུགས་ཏེ། གནད་དོན་ཐག་གཅོད་ཡོང་ཐབས་བྱ་རྒྱུ་ཡིན་སྐོར་བརྗོད་ཡོད་འདུག

ཐེངས་འདིའི་བཙན་གཡེམ་དོན་རྐྱེན་དང་འབྲེལ་བའི་མི་མང་གི་ངོ་རྒོལ་ཐད་གཞུང་གིས་ཞིབ་བཤེར་དང་ཁྲིམས་ཆད་ནན་མོ་གཅོད་རྒྱུ་ཡིན་ཚུལ་བསྒྲགས་ཡོད་པ་མ་ཟད། རྒྱ་གར་ནང་གི་བུད་མེད་ཀྱི་བདེ་འཇགས་ལ་འགན་སྲུང་ཐུབ་ཐབས་སུ་མཚན་མོའི་སྐོར་སྲུང་པ་མང་དུ་གཏོང་རྒྱུ། སྤྱི་སྤྱོད་རླངས་འཁོར་ཁ་ལོ་པ་དང་ལས་རོགས་ཚོར་ཞིབ་བཤེར་ལྟ་རྟོག་བྱ་རྒྱུ།སྤྱི་སྤྱོད་རླངས་འཁོར་རིགས་ཀྱི་ཁྲ་ཡོར་འཇོག་མི་ཆོག་པ་བཟོ་རྒྱུ་ཡིན་སྐོར་སོགས་བརྗོད་ཡོད་ཀྱང་། མང་ཚོགས་ཀྱིས་ཐེངས་འདི་གཅིག་པུ་མིན་པར་བཙན་གཡེམ་དོན་རྐྱེན་རིགས་ནི་རྒྱ་གར་ནང་དུས་རྒྱུན་བྱུང་དང་འབྱུང་བཞིན་ཡོད་ཀྱང་།གཞུང་གིས་དེའི་ཐོག་ལས་ཀ་དོན་ཕན་ལྡན་པ་ཞིག་བྱེད་ཐུབ་མེད་པའི་སྐྱོན་བརྗོད་དང་། ལྷག་པར་དུ་ཐེངས་འདིའི་ཉེས་ཅན་ཚོར་སྲོག་ཁྲིམས་གཅོད་དགོས་པའི་འབོད་ཚིག་སྒྲོག་གིན་ཡོད་འདུག

གཟའ་ཉི་མའི་ཕྱི་དྲོར་རྒྱ་གར་གྱི་སྲིད་བློན་མན་མཱོ་ཧཱ་སེན་(Manmoha Singh) མཆོག་གིས་ཉེན་རྟོག་པ་དང་མང་ཚོགས་བར་འཁྲུག་རྩོད་བྱུང་པ་དེར་སེམས་གཏིང་ནས་བློ་ཕམ་ཡོད་སྐོར་དང་། མང་ཚོགས་ཚོ་ལྷོད་ལ་འབབ་དགོས་པའི་འབོད་སྐུལ་གནང་སྟེ། རྒྱ་གར་ནང་གི་བུད་མེད་ཀྱི་བདེ་འཇགས་ལ་ནུས་པ་གང་ཡོད་འདོན་རྒྱུའི་ཁས་ལེན་དང་། བཙན་གཡེམ་ཐེབས་པའི་བུ་མོ་དེར་ཚང་མ་མཉམ་འབྲེལ་ཐོག་དོ་ཁུར་བྱེད་ཀྱི་ཡོད་ཚུལ་བརྗོད་འདུག

ལྡི་ལི་ཉེན་རྟོག་ཁང་གི་སྙན་ཐོ་ལྟར་ན། ལྡི་ལིའི་ནང་ཆ་སྙོམས་ཆུ་ཚོད་ ༡༤ རེར་བཙན་གཡེམ་བྱ་སྤྱོད་རེ་བྱུང་གི་ཡོད་ཅིང་། ལོ་འདིའི་ནང་བཙན་གཡེམ་དོན་རྐྱེན་ ༥༨༢ ཙམ་བྱུང་ཡོད་འདུག

གསར་འགོད་པ། བནྡེ་སྐྱབས།

དུས་བབ་དྲྭ་བ་ནས།