བཙན་གཡེམ་ཐེབས་པའི་བུ་མོ་དེ་གྲོངས་འདུག

༢༠༡༢/༡༢/༢༩ ལ་ཆུ་ཚོད་ ༢ དང་སྐར་མ་ ༡༥ སྟེང་། ཉེ་ཆར་རྒྱལ་ས་ལྡི་ལིར་བཙན་གཡེམ་ཐེབས་པའི་རང་ལོ་ ༢༣ ཅན་གྱི་བུ་མོ་དེ་དེ་སེང་གྷ་པོར་སྨན་ཁང་ཞིག་ནས་འདས་གྲོངས་སུ་ཕྱིན་འདུག

ཉེ་སྔོན་ཕྱི་ཚེས་ ༡༦ ཉིན་གྱི་དགོང་མོར་རྒྱ་གར་རྒྱལ་ས་ལྡི་ལི་ནས་རང་ལོ་ ༢༣ ཡིན་པའི་མཐོ་སློབ་བུ་མོ་ཞིག་ལ་མི་དྲུག་གིས་བཙན་གཡེམ་བཏང་ཡོད་ཅིང་། ཁོང་མོར་ཐོག་མར་རྒྱ་གར་

སྨན་ཁང་ནས་སྨན་བཅོས་རྗེས། གཟའ་ཕུར་བུའི་ཉིན་སྨན་པའི་ལམ་སྟོན་འོག་ལྡི་ལི་གཞུང་གི་སྨན་ཁང་ནས་མཁའ་ལམ་བརྒྱུད་སེན་གྷ་པོར་ཨི་ལེ་ཛ་བྷེ་ཐཱི་(Mount Elizabeth hospital) སྨན་ཁང་དུ་སྨན་བཅོས་བྱས་པར་ཁྲིད་པ་རེད།

ད་ནང་བཙན་གཡེམ་ཐེབས་མཁན་བུ་མོ་དེ་འདས་གྲོངས་སུ་གྱུར་པའི་གནས་ཚུལ་བྱུང་འཕྲལ། རྒྱ་གར་གྱི་སྲིད་འཛིན་པཱི་ར་ནབ་མཱུ་ཀར་ཇེ་(Pranab Mukherjee) ཡིས་བུ་མོ་ཁོང་འདས་གྲོངས་སུ་ཕྱིན་པར་བློ་ཕམ་ཡོད་སྐོར་དང་། ཁོ་མོར་བཙན་གཡེམ་ཐེབས་རྗེས་མ་ཤི་བར་དུ་བློ་སྟོབས་ཆེར་སྐྱེད་ཀྱིས་རང་ཉིད་ཀྱི་ཚེ་སྲོག་དང་ཆེ་མཐོང་ལ་འབད་བརྩོན་བྱས་ཡོད་པ་ནི། རྒྱ་གར་གྱི་ན་གཞོན་དང་བུད་མེད་ཚོའི་མིག་དཔེ་ཞིག་ཡིན་སྐོར་སོགས་བརྗོད་འདུག

དེ་བཞིན། སྲིད་བློན་མན་མོ་ཧན་སེན་གྱིས་མྱ་ངན་དང་ནང་མར་སེམས་གསོ་དང་སྦྲགས། ཐེངས་འདིའི་དོན་རྐྱེན་དང་འབྲེལ་རྒྱ་གར་གྱི་ཆབ་སྲིད་པ་དང་སྤྱི་ཚོགས་ཁྱོན་ཡོངས་ནས་རྒྱ་གར་ནང་གི་བུད་མེད་ཀྱི་བདེ་འཇགས་ལ་འགན་སྲུང་ཐུབ་ཐབས་བྱ་དགོས་པ་དང་། བུ་མོ་ཁོང་འཆི་ལམ་དུ་ཕྱིན་པ་སྟོང་ཟད་དུ་མི་འགྲོ་བ་བྱ་རྒྱུའི་འགན་ཡོད་ཅེས་བསྒྲགས་འདུག

ཉེ་སྔོན་ཁོ་མོར་སྤྱི་སྤྱོད་རླངས་འཁོར་ནས་མི་དྲུག་གིས་བཙན་གཡེམ་གཅར་རྡུང་བཏང་རྗེས། ལྡི་ལི་གཙོས་རྒྱ་གར་གྱི་གྲོང་ཁྱེར་དང་ས་གནས་གང་སར་སློབ་མ་དང་མི་མང་གིས་ངོ་རྒོལ་ཤུགས་ཆེན་བྱས་ཡོད་པ་དང་། ད་ཆར་ཁོ་མོ་འདས་གྲོངས་སུ་ཕྱིན་པའི་གནས་ཚུལ་བྱུང་རྗེས་ཡང་བསྐྱར་མི་མང་གི་ངོ་རྒོལ་བྱ་རྒྱུར་དོགས་ཏེ། ད་ནང་ཞོགས་པར་ལྡི་ལི་ཉེན་རྟོག་ཁང་གིས་རྒྱ་གར་སྒོ་ཆེན་གཡས་གཡོན་དང་ས་གནས་གང་དུའང་མི་མང་འདུ་འཛོམས་བྱ་མི་ཆོག་པའི་ཁྱབ་བསྒྲགས་བྱས་ཡོད་པ་མ་ཟད། ཞོགས་པ་སྔ་བོ་ནས་ལྡི་ལི་གྲོང་ཁྱེར་གང་སར་ཉེན་རྟོག་པ་དང་དམག་མི་འབོར་ཆེན་འགྲེམས་འཇོག་གིས། ལྟ་རྟོག་འགོག་སྲུང་ནན་མོ་བྱེད་བཞིན་ཡོད་འདུག

བཙན་གཡེམ་བྱེད་མཁན་མི་དྲུག་ཚང་མ་འཛིན་བཟུང་བྱས་ཡོད་པ་དང་། ཁོ་ཚོར་བཙན་གཡེམ་ཙམ་མ་ཡིན་པར་དམར་གསོད་པའི་ཉེས་ཁྲིམས་ཕོག་རྒྱུ་ཡིན་འདུག  དུས་བབ་དྲ་བ་ནས།