བོད་མི་ཞིག་ལ་ཁྲིམས་ཆད།

རྒྱ་གཞུང་གིས་བོད་མདོ་སྨད་རྨ་ལྷོ་རེབ་གོང་གི་བོད་མི་ཞིག་འཛིན་བཟུང་གིས་གསང་བའི་སྒོ་ནས་ཁྲིམས་ཐག་བཅད་དེ།  ད་ཆར་ཟི་ལིང་གྲོང་ཁྱེར་གྱི་བཙོན་ཁང་ཞིག་ཏུ་བཀག་ཉར་བྱས་འདུག

ཉེ་སྔོན་རྒྱ་ནག་གཞུང་གིས་བོད་མདོ་སྨད་མཚོ་སྔོན་ཞིང་ཆེན་རྨ་ལྷོ་ཁུལ་རེབ་གོང་སེང་གེ་གཞུང་གི་གཞོན་སྐྱེས་ཡུམ་སྐྱབས་ཞུ་བ་ཞིག་འཛིན་བཟུང་བྱས་ཏེ། ཟླ་ཤས་རིང་གར་ཡོད་ཅི་བྱུང་གི་གནས་ཚུལ་ཤེས་མེད་ཀྱང་། ཉེ་ལམ་ནང་མི་ཉེ་འབྲེལ་ཚོས་

ཁོང་མཚོ་སྔོན་ཟི་ལིང་གྲོང་ཁྱེར་བཙོན་ཁང་ཞིག་ཏུ་གསང་བའི་ཐོག་བཙོན་འཇུག་ཁྲིམས་ཐག་བཅད་ཡོད་པའི་གནས་ཚུལ་ཙམ་ལས། ལོ་ག་ཚོད་ཅིག་ལ་ཁྲིམས་ཐག་བཅད་ཡོད་མེད་དང་ད་ལྟའི་གནས་སྟངས་གང་ཡིན་མ་ཤེས་པར་ལྷག་ཡོད་འདུག

རྒྱ་གཞུང་གིས་ཡུམ་སྐྱབས་ལགས་འཛིན་བཟུང་བྱས་དོན་ནི། ཁོང་གི་ལག་འཁྱེར་ཁ་པར་ནང་༸གོང་ས་མཆོག་གི་སྐུ་པར་དང་།  ༣༡༤ དོན་རྐྱེན་སྐབས་དམག་མིས་མི་མང་ལ་གང་བྱུང་གཅར་རྡུང་བྱེད་བཞིན་པའི་འདྲ་པར་ཉར་ཡོད་པའི་ཉེས་མིང་འོག་འཛིན་བཟུང་བྱས་པ་ཞིན་ཡིན་འདུག་ལ། ཡང་ས་གནས་བོད་མིའི་ཁྲོད་དུ། རྒྱ་གཞུང་གིས་ཁོང་བོད་ཕྱི་ཕྱོགས་ཀྱི་གསར་འགོད་པ་ཞིག་དང་འབྲེལ་བ་ཡོད་པའི་གནས་ཚུལ་ཤེས་རྟོགས་བྱུང་བ་དང་། ཕྱིས་སུ་ཁ་པར་ནང་སྔོག་བཤེར་བརྒྱུད་འདྲ་པར་ཁག་ལག་སོན་བྱུང་སྟེ་འཛིན་བཟུང་བྱས་པ་ཡིན་པའི་གླེང་སློང་ཡོང་གི་ཡོད་ཚུལ་བོད་ནས་འབྲེལ་ཡོད་བོད་མི་ཞིག་གིས་ཨེ་ཤ་ཡ་རང་དབང་རླུང་འཕྲིན་ཁང་ལ་བརྗོད་ཡོད་འདུག

རང་ལོ་ ༢༥ ཡིན་པའི་ཡུམ་སྐྱབས་ལགས་ནི། རྨ་ལྷོ་ཁུལ་རེབ་གོང་རྫོང་སེ་གེ་གཤོང་ཡ་མགོ་སྡེ་བའི་ཕ་མཁའ་འགྲོ་མཐར་དང་མ་མི་མཚོ་ཁོ་གཉིས་ཀྱི་བུ་ཡིན་འདུག་ལ། བཟའ་ཟླའི་མིང་ལ་རྟ་མགྲིན་སྒྲོལ་མ་འབོད་ཀྱི་ཡོད་འདུག  ཁོང་གིས་ཆུང་དུས་ནས་ལྷ་བྲིས་སྒྱུ་རྩལ་ལ་སློབ་སྦྱོང་བྱས་ཏེ། ད་ལྟའི་བར་ཐང་ག་འབྲི་བཞེངས་ཀྱི་ལམ་ནས་ནང་མིའི་འཚོ་ཐབས་བཙལ་གྱི་ཡོད་འདུག་ལ། ཁོང་འཛིན་བཟུང་བྱས་རྗེས་ནང་མི་ཚོ་དཀའ་ངལ་ཁྲོད་ལྷག་ཡོད་འདུག

གསར་འགོད་པ། དོན་གོ

དུས་བབ་དྲྭ་བ་ནས།