པེ་ཅིན་དུ་རྒྱ་བོད་འཁྲུག་འཛིང་།

གཟའ་ཉི་མའི་ཕྱི་དྲོའི་ཆུ་ཚོད་ ༥ ཙམ་ལ་རྒྱ་ནག་པེ་ཅིན་གྲོང་ཁྱེར་གྱི་ཤར་སྒོའི་སྲིང་ལམ་ཞིག་ཏུ། རྒྱ་རིགས་དང་བོད་རིགས་ཚོང་གཉེར་བ་ཁག་ཅིག་གི་བར་འཁྲུག་འཛིང་ཤོར་འདུག

རྒྱ་ནག་གི་སྒྱུ་རྩལ་བ་གྲགས་ཅན་ཨེ་ཝེ་ཝེ་ཡིས་བརྙན་བླངས་ཏེ་ཁྱབ་བསྒྲགས་བྱས་པ་ལྟར་ན། ཟླ་འདིའི་ཕྱི་ཚེས་ ༡༢ ཉིན་གྱི་ཕྱི་དྲོའི་ཆུ་ཚོད་ ༥ ཐོག རྒྱ་ནག་པེ་ཅིན་གྲོང་ཁྱེར་གྱི་ཤར་སྒོའི་སྲིང་ལམ་འགྲམ་གྱི་ཟ་ཁང་ཞིག་ཏུ་ལས་ཀ་བྱེད་མཁན་རྒྱ་རིགས་དང་། ཟ་ཁང་དེའི་མདུན་ཐང་དུ་ཚོང་ཁྲོམ་སྟོན་མཁན་བོད་མིའི་བར་འཁྲུག་འཛིང་ཤོར་ཏེ། རྒྱ་མི་ཚོས་ཚོང་ཁྲོམ་སྟོན་

མཁན་དག་གི་ཁྲོམ་སྟེགས་དང་ཅོག་ཙེ། རྐུབ་སྟེགས་སོགས་བཅོམ་བཅག་བཏང་ཡོད་པ་མ་ཟད། བོད་པ་ཚོས་ཀྱང་ཟུར་གྱི་ཟ་ཁང་དེའི་སྒོ་དང་སྒེའུ་ཁུང་སོགས་ལ་རྡོ་དང་དབྱུག་པ་སོགས་གཞུས་ཏེ་བཅག་ཡོད་འདུག

འཁྲུག་འཛིང་དེའི་ཁྲོད་ཚོང་ཁྲོམ་སྟོན་མཁན་དག་གི་མགོ་དང་ལུས་པོར་རྨས་སྐྱོན་གང་འཚམ་བཟོས་ཡོད་པ་དང་། བུད་མེད་ཅིག་ལ་རྨས་སྐྱོན་ཆེན་པོ་ཕོག་ཡོད་འདུག དེའི་རྗེས་ཉེན་རྟོག་པས་བར་འདུམ་བྱས་ཡོད་ཅིང་། ཉེན་རྟོག་པས་བརྗོད་པ་ལྟར་ན། ཁོང་ཅག་གིས་བར་འདུམ་བྱས་པ་ལས་མི་ལ་གཅར་རྡུང་དང་འཛིན་བཟུང་རིགས་བྱས་མེད་ལུགས་བརྗོད་འདུག  ཡང་ཡུལ་དངོས་སུ་ཡོད་པའི་རྒྱ་མི་ཞིག་གིས། ཉེན་རྟོག་པས་བར་འདུམ་བྱས་པ་ཧ་ཅང་ཞན་སྟབས། འཁྲུག་འཛིང་དོན་རྐྱེན་འདིའི་ཁྲོད་ཕྱོགས་གཉིས་ཀར་རྨས་སྐྱོན་ཕོག་སྟེ། མི་རེ་འགའ་སྨན་ཁང་དུ་བསྐྱལ་དགོས་བྱུང་ཡོད་སྐོར་དང་། འཁྲུག་འཛིང་ཤོར་བ་ཧ་ཅང་ཚབས་ཆེ་ཡང་ཉེ་འཁོར་གྱི་ཚོང་ལས་གཉེར་མཁན་ཚོར་གནོད་པ་གང་ཡང་ཐེབས་མེད་ལུགས་བརྗོད་འདུག

གོང་གསལ་གནས་ཚུལ་སྐོར་རྒྱ་ནག་ལ་ལྟ་བ།(kanzhongguo)ཞེས་པའི་དྲ་ཚིགས་ཐོག་ཨེ་ཝེ་ཝེ་ཡི་སྐད་ཆ་ལུང་འདྲེན་བྱས་པ་ལྟར་ན། ཚོང་ཁྲོམ་སྟོན་མཁན་དེ་དག་བོད་པ་ཡིན་པ་དང་། ཟ་ཁང་གི་བདག་པོས་ཕྱི་ལོགས་སུ་ཚོང་ཁྲོམ་ཐོག་བོད་ཀྱི་དངོས་ཟོག་ཚོང་མཁན་དེ་ཚོས་ས་ཆ་བདག་བཟུང་བྱས་ཡོད་ལུགས་བརྗོད་དེ་འཁྲུག་འཛིང་ཤོར་བ་ཞིག་ཡིན་ཚུལ་བརྗོད་འདུག

ཡང་བུད་མེད་རྩོམ་པ་པོ་འོད་ཟེར་ལགས་ཀྱི་སྐད་ཆ་ཞིག་ལུང་འདྲེན་བྱས་པའི་ནང་། ཚོང་ཁྲོམ་སྟོན་མཁན་དེ་དག་བོད་པ་མིན་སྐོར་དང་། ཟི་ཁྲོན་རྔ་པ་ཁུལ་བོད་རིགས་ཆང་རིགས་རང་སྐྱོང་ཁུལ་འོག་གི་ཆང་རིགས་ཡིན་ཞིང་། ཁོང་ཅག་གིས་དེ་སྔོན་ནས་ཁོང་ཚོ་བོད་པ་ཡིན་ཚུལ་དང་། བོད་པའི་ཐོན་རྫས་ཡིན་ཁུལ་གྱིས་བཅའ་དངོས་རྫུན་མ་སྣ་ཚོགས་ཤིག་འཚོང་གི་ཡོད་སྐོར་ཞིག་ཀྱང་བཀོད་འདུག

དུས་བབ་དྲ་བ་ནས།