བོད་རིཊ་བྱིས་པ་གཉིས་ལ་བྱ་དགའ་ཐོབ།

བོད་རིཊ་བྱིས་པ་གཉིས་ཀྱིས་ཕྱི་ལོ་ ༢༠༡༣ ལོའི་རྒྱ་ནག་རྒྱལ་ཡོངས་ཨོ་ལིམ་ཕིག་བྱིས་པའི་འཕྲུས་ཆས་མི་སྒྲིག་བཟོ་འགྲན་སྡུར་ཁྲོད་ཨང་དང་པོའི་བྱ་དགའ་བླངས་ཡོད་འདུག

ཟླ་འདིའི་ཕྱི་ཚེས་ ༡༥ ནས་ ༡༧ བར་ཧིན་རྡུ་ཉི་ཞི་ཡའི་རྒྱལ་ས་ཇཱ་ཀཱར་ཊཱ་(Jakarta)རུ་བསྡུས་པའི་འཛམ་གླིང་ཨོ་ལིམ་ཕིག་ ‘བྱིས་པའི་འཕྲུལ་ཆས་མི་སྒྲིག་བཟོ’ འགྲན་སྡུར་ཁྲོད། མཚོ་ལྷོ་ཁུལ་ཐུན་ཏེ་རྫོང་མི་རིགས་སློབ་གྲྭའི་སློབ་མ་ཀུན་དགའ་རྒྱལ་མཚན་དང་རྟ་མགྲིན་རྡོ་རྗེ་གཉིས་ཀྱིས་ཕུལ་བྱུང་བྱ་དགའ་བླངས་ཡོད་འདུག

བོད་ནང་གི་དྲ་ཚིགས་སུ་གནས་ཚུལ་སྤེལ་བ་ལྟར་ན། ད་ལོའི་ཕྱི་ཟླ་༨ ཚེས་ ༡༨ ཉིན་རྒྱ་

ནག་ཧུའུ་ནན་ཧྲང་ཧྲར་སྐོང་ཚོགས་བྱས་པའི་ཕྱི་ལོ་ ༢༠༡༣ ལོའི་རྒྱ་ནག་རྒྱལ་ཡོངས་སྐབས་བཅུ་པའི་ཨོ་ལིམ་ཕིག་བྱིས་པའི་འཕྲུལ་ཆས་མི་སྒྲིག་བཟོ་འགྲན་སྡུར་ཁྲོད། སློབ་མ་འདི་གཉིས་ཀྱིས་བཟོས་པའི་༼ང་ཡི་གྲོང་ཁྱེར། ༽ཞེས་པར་ཨང་དང་པོའི་བྱ་དགའ་ཐོབ་ཡོད་འདུག  

ཐེངས་འདིའི་འཛམ་གླིང་རང་བཞིན་གྱི་འགྲན་སྡུར་ནང་རྒྱལ་ཁབ་ ༣༧ ནས་བྱིས་པ་ ༡༠༣༠ཞུགས་བྱས་ཡོད་པ་དང་། དེ་བཞིན། སྐབས་བཅུ་པའི་རྒྱ་ནག་རྒྱལ་ཡོངས་ཀྱི་འགྲན་བསྡུར་ནང་ཞིང་ཆེན་དང་གྲོང་ཁྱེར། རང་སྐྱོང་ལྗོངས་༢༤ དང་། ཧོང་ཀོང་བཅས་ཁྱོན་འགྲན་སྡུར་པ་  ༣༢༦ མཉམ་ཞུགས་བྱས་ཡོད་འདུག

 གསར་འགོད་པ། པདྨ་མཚོ།

དུས་བབ་དྲ་བ་ནས།