ཟས་བཅད་ངོ་རྒོལ་ཉིན་ ༡༣ པ།

བོད་དོན་འཐབ་རྩོད་པ་ཤེས་རབ་ཚེ་རྡོར་ལགས་ཀྱིས་རྒྱ་གར་གྱི་རྒྱལ་ས་ལྡི་ལིར་དུས་ཚོད་ངེས་མེད་ཀྱི་ཟས་བཅད་ངོ་རྒོལ་བྱས་ཏེ་ཉིན་ ༡༣ འགྲོ་བཞིན་འདུག

ཟླ་སྔོན་མའི་ཕྱི་ཚེས་ ༢༤ ཉིན་གྱི་སྔ་དྲོར། ལྡི་ལིར་གནས་སྡོད་བོད་དོན་འཐབ་རྩོད་པ་ཤེས་རབ་ཚེ་རྡོར་ལགས་ཀྱིས། སུད་སིའི་གྲོང་ཁྱེར་ཇེ་ནི་ཝའི་ནང་མཉམ་

འབྲེལ་རྒྱལ་ཚོགས་ཀྱི་རྩ་ཁྲིམས་གཏན་འབེབས་ཀྱི་ཉིན་མོ་དང་བསྟུན་ཏེ། རྒྱལ་ཚོགས་གཙོས་རྒྱལ་སྤྱིའི་ཚོགས་སྡེ་ཁག་ནས་བོད་ནང་གི་འགྲོ་བ་མིའི་ཐོབ་ཐང་གི་ཛ་དྲག་གནས་སྟངས་ལ་དངོས་སུ་རྟོག་ཞིབ་ཡོང་རྒྱུར་འབོད་སྐུལ་ཆེད། རྒྱ་གར་གྱི་རྒྱལ་ས་ལྡི་ལི་ཇན་ཏར་མན་ཏར་(Jantar Mantar)ས་གནས་སུ་དུས་ཚོད་ངེས་མེད་ཀྱི་ཟས་བཅད་ངོ་རྒོལ་མགོ་འཛུགས་བྱས་ཏེ། དེ་རིང་བར་ཉིན་ ༡༣ འགྲོ་བཞིན་ཡོད།

འདི་གའི་གསར་འགོད་པས་ཁ་པར་བརྒྱུད་ཁོང་གི་སྐུ་གཟུགས་གནས་སྟངས་དང་། ལས་འགུལ་མཚམས་འཇོག་གནང་འཆར་ཡོད་མེད་དྲིས་པར་ཁོང་གིས། “ད་ལྟའི་ཆར་གོམ་པ་བརྒྱབ་ནས་འགྲོ་ཐུབ་ཀྱི་འདུག ཡིན་ནའང་། ལམ་སང་ཐང་ཆད་པ་དེ་འདྲ་ཡོང་གི་འདུག གང་ལྟར་ང་རང་བོད་མི་ཞིག་ཡིན་པའི་ཆ་ནས་མཉམ་འབྲེལ་རྒྱལ་ཚོགས་ལ་བཏོན་པའི་རེ་སྐུལ་དེ་ཚོ་མ་འགྲུབ་བར་ཟས་བཅད་ངོ་རྒོལ་ལ་འདུག་རྒྱུ་ཡིན།  ང་རང་གི་ངོས་ནས་གཟུགས་པོའི་གནས་སྟངས་ཛ་དྲག་ཆགས་མིན་ལ་བསམ་བློ་གཏོང་གི་མེད། གཙོ་བོ་ང་རང་ཚོའི་དོན་དག་དེ་འགྲུབ་དགོས་པ་རེད། གཞིས་ལུས་བོད་མི་ཚོས་རྒྱ་གཞུང་གི་དྲག་གནོན་འོག་ལུས་སྲོག་བློས་གཏོང་བཞིན་ཡོད་པ་རེད། ང་ཚོ་བཙན་བྱོལ་ལུང་པར་སྡོད་མཁན་ཚོས་འདི་ཙམ་ཞིག་བྱེད་མ་ཐུབ་ན་རྣམ་རྟོག་རེད། ”ཅེས་བརྗོད་བྱུང་།

ད་ལྟའི་བར་རྒྱ་གར་བདེ་སྲུང་ལས་ཁུངས་དང་བོད་མིའི་སྒྲིག་འཛུགས་སོགས་ནས་ལས་འགུལ་མཚམས་འཇོག་དགོས་པའི་རེ་སྐུལ་གནང་ཡོད་མེད་དྲིས་པར། “ཟས་བཅད་ངོ་རྒོལ་གྱི་ཉིན་གཉིས་པ་དེར་རྒྱ་གར་ཉེན་རྟོག་པས་ལས་འགུལ་མཚམས་འཇོག་དགོས་པའི་བཀའ་རྒྱ་བཏང་བ་མ་གཏོགས་ཕྱིས་སུ་བཀག་འགོག་གང་ཡང་བྱུང་མ་སོང་། དེ་བཞིན་བོད་མིའི་སྒྲིག་འཛུགས་ཀྱི་གཞུང་འབྲེལ་མི་སྣ་དང་ཚོགས་པ་ཁག་ནས་ཀྱང་མཚམས་འཇོག་དགོས་པའི་འབོད་སྐུལ་གནང་མ་སོང་། ཡིན་ནའང་། ང་རང་གི་གཉེན་ཉེ་དང་གྲོགས་པོ་གྲོགས་མོ་ཚོས་ཁ་སང་ནས་ལས་འགུལ་མཚམས་འཇོག་གནང་རོགས་ཞེས་འབོད་སྐུལ་གནང་སོང་ཡང་།ང་རང་གིས་ཐག་བཅད་ཚར་བ་ཞིག་ལག་ལེན་བསྟར་ཐུབ་པ་བྱེད་རྒྱུ་ཡིན་པས་མཚམས་འཇོག་རྩ་བ་ནས་བྱེད་རྒྱུ་མིན་ཞེས་ཞུས་ཚར་བ་ཡིན། ”ཞེས་བརྗོད་སོང་།

གསར་འགོད་པ། པདྨ་མཚོ།

དུས་བབ་དྲ་བ་ནས།