ཏཱ་ལའི་བླ་མ་དང་བོད་བརྒྱུད་ནང་བསྟན་བར་གྱི་འབྲེལ་བའི་སྐོར་ལྷ་མེད་སྨྲ་བ་ཚོར་བཤད་དབང་མེད།

བཞུགས་སྒར་གཙུག་ལག་ཁང་དུ་༧གོང་ས་མཆོག་ལ་ནོ་བྷེལ་ཞི་བདེ་གཟེངས་རྟགས་འབུལ་བཞེས་ཀྱི་དུས་དྲན་ཐེངས་༢༤ པ་སྲུང་གཙི་དང་འབྲེལ་བཀའ་སྤྱི་གཉིས་ཀྱིས་༧གོང་ས་<མཆོག་ལ་བཀྲ་ཤིས་བདེ་ལེགས་ཀྱི་འཚམས་འདྲི་དང་འབྲེལ་བོད་ནང་གི་གནས་སྟངས་སྐོར་ལ་གསུང་བཤད་གནང་ཡོད།

དེ་རིང་ཞོགས་པའི་ཆུ་ཚོད་ ༩།༠༠ པ་ཙམ་ལ། དྷ་ས་ཐེག་ཆེན་ཆོས་གླིང་གཙུག་

ལག་ཁང་དུ། ༸གོང་ས་མཆོག་ལ་ནོ་བྷེལ་ཞི་བདེའི་གཟེངས་རྟགས་འབུལ་བཞེས་ཀྱི་དུས་དྲན་ཐེངས་ ༢༤ པ་སྲུང་གཙི་གནང་ཡོད་ཅིང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་མཆོག་གིས་དབུས་སྲིད་སྐྱོང་བློ་བཟང་སེང་གེ་མཆོག་དང་།བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག དེ་བཞིན་ལྷན་ཁང་ཁག་གི་དྲུང་ཆེ་རྣམ་པ་དང་། གཞུང་འབྲེལ་མིན་པའི་ཚོཊ་པ་ཁག་གི་ཚོགས་གཙོ་དང་སྐུ་ཚབ། དྷ་ས་ཉེ་འཁོར་སློབ་གྲྭ་ཁག་གི་སློབ་ཕྲུག་དང་དགོན་སྡེ་ཁག་གི་གྲྭ་བཙུན། བཞུགས་སྒར་གྱི་མི་མང་བཅས་འདུ་འཛོམས་བྱུང་སོང་།  

མཛད་སྒོའི་ཐོག་མར་སྲིད་སྐྱོང་མཆོག་གིས་བོད་རྒྱལ་ཁབ་ཆེན་པོའི་རྒྱལ་དར་སྒྲེང་འཛུགས་དང་བོད་བསྟན་སྲིད་ཆེད་འདས་གྲོངས་སུ་ཕྱིན་པའི་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་གུས་འདུད་ཞུས་རྗེས། བོད་ཀྱི་ཟློས་གར་ཚོགས་པས་ནོ་བྷེལ་ཞི་བདེའི་གཟེངས་རྟགས་ཀྱི་ཆེ་བསྟོད་མཉམ་གཞས་ཕུལ་བ་དང་། དེ་ནས་བོད་མིའི་སྒྲིག་འཛུགས་ལས་བྱེད་འདེམས་བསྐོ་ལྷན་ཁང་གིས་ལས་བྱེད་བགྲེས་ཡོལ་ཐོན་པ་ ༤ ལ་སྲིད་སྐྱོང་མཆོག་གིས་གཟེངས་བསྟོད་བྱ་དགའ་དང་ཕྱག་འཁྱེར། ཁྲིམས་ཞིབ་པ་ཆེ་བ་མཆོག་གིས་འཕྲོད་བསྟེན་ལས་ཁུངས་ཀྱི་ལས་བྱེད་ ༤ ལ་ཞབས་ལོ་ཧྲིལ་བོ་ ༢༥ རིང་ཞབས་ཞུ་ཞུས་པར་གཟེངས་བསྟོད་བྱ་དགའ་བཅས་གནང་རྗེས། གོང་ས་མཆོག་གི་གསུང་འབུམ་ཕྱོགས་སྒྲིག་ཁང་གིས་འདོན་སྤེལ་གནང་བའི་དོལ་རྒྱལ་སྐོར་གྱི་བཀའ་སློབ་དང་། ཆོས་ཚོགས་ཁག་གི་ལམ་སྟོན་བཀའ་སློབ། དེ་བཞིན་༼ནང་ཆོས་ངོ་སྤྲོད་སེམས་ཀྱི་དཔལ་ཡོན།༽དང་༼ སྟོང་ལོ་གསར་པའི་བླང་དོར་གྱི་རྣམ་གཞག༽།  ༼གསར་བྱུང་དངོས་ལུགས་དང་འཇིག་རྟེན་ཆགས་རིམ། ༽བཅས་ཕྱག་དེབ་ཁག་ ༦ དང་། བོད་ཀྱི་ཟློས་གར་ཚོགས་པའི་རྐང་བྲོ་གླུ་གཞས་འོད་སྡེར་༼དབྱར་སྐྱིད ༢༠༡༣༽དང་། བུད་མེད་ལྷན་ཚོགས་ཀྱི་དབྱིན་ཡིག་དཔེ་དེབ་༼བོད་ནང་གི་བུད་མེད་ཀྱི་གནས་བབ།༽ཅེས་པ་སོགས་དབུ་འབྱེད་གནང་སོང་།

སྤྱི་འཐུས་ཚོགས་གཞོན་མཆོག་གིས་སྤྱི་འཐུས་ཀྱི་གསུང་བཤད་ཡིག་ཐོག་ནས་སྒྲོག་སྦྱངས་གནང་བའི་ནང་། “ དེ་རིང་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་སྲུང་བརྩི་ཞུ་བའི་དུས་ཚིགས་གལ་ཆེན་ཞིག་ཀྱང་ཆགས་ཡོད། ཉེ་བའི་སྔོན་དུ་ཕྱི་ཟླ་ ༡༠ ཚེས་ ༢༢ ཉིན་སུད་སིའི་གྲོང་ཁྱེར་ཇི་ནི་ཝའི་ནང་ཡོད་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་དུས་བཀག་བསྐྱར་ཞིབ་ཚོགས་ཐེངས་ ༡༧ པ་འཚོགས་སྐབས་མཉམ་འབྲེལ་རྒྱལ་ཚོགས་ཀྱི་ཚོགས་མིའི་རྒྱལ་ཁབ་ཁག་ཅིག་གི་སྐུ་ཚབ་རྣམ་པས་རྒྱ་ནག་གཞུང་ལ་བོད་ནང་གི་འགྲོ་བ་མིའི་ཐོབ་ཐང་གནས་སྟངས་བཟང་དུ་གཏོང་སླད་དོན་དམ་གྱི་ཐམས་ལམ་ཞིག་ལག་བསྟར་དགོས་པའི་འབོད་སྐུལ་གནང་ཡོད་པ་དང་། ལྷག་པར་ཁེ་ཎ་ཌ་དང་། ཅེག་སྤྱི་མཐུན་རྒྱལ་ཁབ། ཧྥ་རན་སི། འཇར་མན། ནེའུ་ཛི་ལན་ཌི། སུད་སི། ཨ་རི། དབྱིན་ཡུལ། ཨ་ཡི་སི་ལེན་ཌི། ཉི་ཧོང་། ཕོ་ལེན་ཌི། ཨོ་སི་ཊོ་ལི་ཡ་བཅས་ཀྱི་སྐུ་ཚབ་འཐུས་མི་རྣམ་པས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པ་དེར་བློ་འཚབ་ཀྱི་རྣམ་པ་ཤུགས་ཆེན་བསྟན་པ་དང་སྦྲགས། རྒྱ་ནག་གཞུང་ནས་བོད་མིའི་ཆོས་དད་དང་རིག་གཞུང་། སྨྲ་བརྗོད་རང་དབང་ཐོབ་ཐང་སོགས་ལ་རྩིས་མེད་རྡོག་རོལ་བཏང་དང་གཏོང་བཞིན་པའི་སྐོར་ནན་པོ་གསུངས་ཡོད་པ་མ་ཟད། རྒྱ་ནག་གཞུང་གིས་བོད་མི་གཙོས་གྲངས་ཉུང་མི་རིགས་ཀྱི་ཐོབ་ཐང་དེ་དག་སྲུང་སྐྱོབ་སླད་ཐབས་ལམ་ངེས་ཅན་ཞིག་ལག་བསྟར་བྱེད་དགོས་པའི་ལམ་སྟོན་གནང་ཡོད། ”ཅེས་བཀོད་འདུག  

བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེའི་གཏམ་བཤད་ཅིག་ལ་ལན་འདེབས་གནང་དོན། “རྒྱ་ནག་གཞུང་གིས་དུས་རྟག་ཏུ་འཆམ་མཐུན་དང་།བརྟན་བརླིང་ཟེར་བ་སོགས་བཤད་དང་ཤོད་བཞིན་ཡོད་རུང་། བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཁྲིན་ཆོན་གོ་ཡིས། ‘རལ་གྲི་གཤོམ་པོའི་སྙིང་སྟོབས་ཀྱི་ཐོག་ནས་བོད་ཀྱི་འདུ་ཤེས་འཛིན་སྟངས་ཁྱབ་ཁོངས་ཀྱི་བདེ་འཇགས་འགན་ལེན་བྱེད་དགོས།’ཞེས་པའི་རྩོམ་ཡིག་དང་གཏམ་བཤད་སྤེལ་བ་ཉེ་སྔོན་ཕྱི་ཟླ་ ༡༡ ཚེས་ ༡ ཉིན་རྒྱ་གཞུང་གིས་གཉེར་བའི་དུས་དེབ་དང་བརྒྱུད་ལམ་ཁག་ཏུ་ཁྱབ་སྤེལ་བྱས་ཡོད་པའི་ནང་། ‘ཏཱ་ལའི་སྐྱེ་ཕྲེང་བཅུ་བཞི་པའི་རུ་ཚོགས་ཀྱི་’དབུ་མའི་ལམ་དང་བོད་ཆེན་པོ། ཚད་མཐོའི་རང་སྐྱོང་བཅས་ཟེར་བའི་ལོག་སྤྱོད་རེ་ངན་ཐེར་འདོན་གཏིང་ཟབ་བྱས་ཏེ་མི་རིགས་ཁག་གི་ལས་བྱེད་པ་དང་མང་ཚོགས་ཚོས། བོད་བརྒྱུད་ནང་བསྟན་དང་ཏཱ་ལའི་སྐྱེ་ཕྲེང་བཅུ་བཞི་པའི་བར་དབྱེ་བ་གསལ་པོ་འབྱེད་དགོས་པ་དང་། ཏཱ་ལའི་སྐྱེ་ཕྲེང་བཅུ་བཞི་པ་དང་ཏཱ་ལའི་ཞེས་པའི་མིང་བར་དབྱེ་བ་གསལ་པོ་འབྱེད་པ། རང་རྟོགས་ངང་ཏཱ་ལའི་སྐྱེ་ཕྲེང་བཅུ་བཞི་པའི་རུ་ཚོགས་དང་དབྱེ་མཚམས་གསལ་པོ་འབྱེད་པ་བཅས་བྱས་ནས། ཆབ་སྲིད་ཀྱི་གནད་དོན་གལ་ཆེན་ཡིན་པའི་ཁ་བྲལ་ལ་ངོ་རྒོལ་བྱེད་པའི་འཐབ་རྩོད་ཐད། དར་ཆ་གསལ་སྟོན་དང་ལངས་ཕྱོགས་བརྟན་པོ་ཡོང་བ་བྱས་ཏེ་ཏང་ཀྲུང་དབྱང་དང་ཚད་མཐོའི་གཅིག་གྱུར་ཡོང་བ་བྱེད་དགོས་ལ། དགྲ་ཡའི་ཕྱོགས་གཏོགས་ཏཱ་ལའི་སྐྱེ་ཕྲེང་བཅུ་བཞི་པའི་རུ་ཚོགས་ཀྱི་སྐད་སྒྲ་དང་གཟུགས་བརྙན་ཐོས་རྒྱུ་མེད་པ་དང་མཐོང་རྒྱུ་མེད་པ་བྱེད་དགོས།’ ཞེས་སོགས་བཤད་ཡོད། འོན་ཀྱང་གོང་གསལ་ཁོ་པའི་རྩོམ་ཡིག་དང་གཏམ་བཤད་དེ་དག་ནང་ལོ་རྒྱུས་དངོས་ཡོད་ཀྱི་ཁུངས་ལུང་སྣེ་གཅིག་མེད་ནའང་། བསྒྲུབ་ཐབས་མེད་པའི་བོད་རྒྱ་ཆེའི་མི་མང་རྣམས་ལམ་ལོག་ཏུ་འཁྲིད་ཐབས་དང་། བོད་རྒྱ་མི་རིགས་གཉིས་ཀྱི་བར་འགལ་ཟླ་དང་འཁོན་འཛིན་ཆེ་རུ་གཏོང་ཐབས་བཅས་ཀྱི་ཆེད་དུ་ཡིན་ཞིང་། བདེན་པས་ཕོངས་པའི་གཏམ་བཤད་དེ་ལྟ་བུར་སུས་ཀྱང་ཡིད་ཆེས་དང་། རྒྱབ་སྐྱོར་བྱེད་མཁན་མེད་པར་བརྟེན། ཚིག་ཟིན་རེ་རེར་གསལ་བཤད་དགོས་དོན་མི་འདུག་ནའང་། ༸གོང་ས་ཏཱ་ལའི་བླ་མ་མཆོག་དང་བོད་བརྒྱུད་ནང་བསྟན་བར་དང་། ཁོང་དང་ཁོང་གི་སྐྱེ་ཕྲེང་བར་གྱི་འབྲེལ་ལམ་སོགས་ལྷ་མེད་སྨྲ་བ་དང་སྐྱེ་བ་སྔ་ཕྱི་ཙམ་ཡང་ཁས་ལེན་མི་བྱེད་མཁན་གྱི་སྲིད་གཞུང་ཞིག་ལ་བརྗོད་དབང་མེད་ལ་བརྗོད་ལུགས་ཀྱང་ཤེས་ཀྱི་མེད། ཁོང་གི་མཛད་འཕྲིན་དང་། ཁོང་དང་བོད་མི་མང་གི་བསམ་བློའི་འབྲེལ་ཐག་ཇི་ལྟར་ཡིན་མིན་འཛམ་གླིང་སྐྱེ་བོ་ཀུན་གྱིས་ཟུར་བལྟས་ལེབ་མཐོང་ཡིན་པས་དམར་ཤོག་དྲུང་ཆེ་ཁྲོན་ཆོན་གོ་ཡིས་དེ་ལྟར་ངལ་བ་བྱས་པ་ནི་དོན་མེད་ཁོ་ན་ཡིན”ཞེས་བཀོད་འདུག

སྲིད་སྐྱོང་མཆོག་གིས་བཀའ་ཤག་གི་གསུང་བཤད་ཡིག་ཐོག་ནས་སྒྲོག་སྦྱངས་གནང་བའི་ནང་། “བོད་མིའི་སྒྲིག་འཛུགས་ཀྱི་ངོས་ནས་བོད་དོན་དཀའ་རྙོག་སེལ་ཐབས་ཀྱི་ཐབས་ལམ་བཟང་ཤོས་གྲོས་མོལ་བརྒྱུད་དབུ་མའི་ལམ་གྱི་སྲིད་བྱུས་གཞིར་བཟུར་གཉིས་མོས་འགྲིག་ཆགས་ཡོང་ཐབས་བྱེད་རྒྱུ་དེ་ཉིད་ཡིན་པའི་ཡིད་ཆེས་བརྟན་པོ་ཞུ་བཞིན་ཡོད། དེ་ཡང་དབུ་མའི་ལམ་གྱི་དོན་སྙིང་ནི། བོད་རིགས་ཡོིངས་ལ་འཛིན་སྐྱོང་གཅིག་ནང་རང་སྐྱོང་གི་གནས་བབ་མིང་དོན་མཚུངས་པ་ཞིག་ལག་བསྟར་ཡོང་ཐབས་བྱེད་རྒྱུ་དེ་ཡིན་སྟབས། དེ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་མི་རིགས་ས་གནས་རང་སྐྱོང་གི་བཅའ་ཁྲིམས་སུ་གསལ་བའི་རང་སྐྱོང་གི་ཆ་རྐྱེན་ཁག་དང་ཡོངས་སུ་མཐུན་པ་ཡིན། ང་ཚོས་བོད་ཁ་བྲལ་རྩོད་ཀྱི་མེད་པ་མ་ཟད། ཚད་མཐོའི་རང་སྐྱོང་སྐོར་ཡང་བཤད་མེད། ང་ཚོའི་དགོས་འདུན་ནི་མིང་དོན་མཚུངས་པའི་རང་སྐྱོང་ཡིན།

དེ་མཚུངས་བོད་ཆེན་པོ་ཞེས་པའི་ཐ་སྙད་ནམ་ཡང་བེད་སྤྱོད་བྱེད་མྱོང་མེད། བོད་ཆོལ་ཁ་གསུམ་ནི་གནའ་སྔ་མོ་ནས་མཐོ་སྒང་བོད་ཀྱི་ས་ཁུལ་སྡེ་ཚན་གཅིག་གི་ངོ་བོར་གནས་ཡོད། སྐད་ཡིག་དང་ཆོས་ལུགས། ཡུལ་གོམས་གཤིས་ལུགས། ས་བབ་ཁོར་ཡུག་བཅས་ཕྱོགས་ཐམས་ཅད་ནས་གཅིག་གྱུར་ཡིན་བཞིན་པ་དེ། ཞིང་ཆེན་ཁག་ནང་དུམ་བུ་མང་པོར་བཏང་བ་ནི་རྩ་ཁྲིམས་དང་བཅའ་ཁྲིམས་སུ་གྲངས་ཉུང་མི་རིགས་ཀྱི་ཐོབ་ཐང་གསལ་བ་དང་ནང་འགལ་ཆགས་ཡོད། རྩ་ཁྲིམས་དོན་ཚན་བཞི་པའི་ནང་‘གྲངས་ཉུང་མི་རིགས་འདུས་སྡོད་བྱེད་པའི་ས་གནས་སོ་སོར་ས་གནས་རང་སྐྱོང་ལག་ལེན་བསྟར་ཏེ་རང་སྐྱོང་ལས་ཁུངས་འཛུགས་རྒྱུ་དང་རང་སྐྱོང་དབང་ཆ་སྤྲོད་རྒྱུ།’ཞེས་གསལ་ཡོད། རྩ་ཁྲིམས་ཀྱི་ཆ་རྐྱེན་དེ་གཞིར་བཟུང་། ཤིན་ཅང་ཡུ་གུར་རང་སྐྱོང་ལྗོངས་ལ་མཚོན་ན་ཡུ་གུར་མི་རིགས་ཀྱི་བརྒྱ་ཆ་ ༩༩ དེའི་ནང་ཚུད་ཡོད་པ་དང་། ཀོང་ཞི་ཀྲོང་རིགས་རང་སྐྱོང་ལྗོངས་ནང་ཀྲོང་རིགས་བརྒྱ་ཆ་ ༩༥ ཚུད་ཡོད། འོན་ཀྱང་བོད་རང་སྐྱོང་ལྗོངས་ནང་བོད་རིགས་བརྒྱ་ཆ་ ༥༠ ལས་ཉུང་བ་མ་གཏོགས་ཚུད་མེད། བོད་རིགས་མི་འབོར་མང་བ་བོད་རིགས་རང་སྐྱོང་ཁུལ་དང་། རང་སྐྱོང་རྫོང་གི་ངོ་བོར་ཉེ་འབྲེལ་ཞིང་ཆེན་གཞན་གྱི་ནང་ཟླ་བསྒྲིལ་བཏང་ཡོད།

བོད་ཆོལ་ཁ་གསུམ་གྱི་ས་ཁུལ་བསྡོམས་པས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བཞི་ཆ་གཅིག་ཟིན་གྱི་ཡོད་པ་ནི། གནའ་སྔ་མོ་ནས་རང་བཞིན་གྱིས་བྱུང་བའི་བོད་མི་རིགས་ཀྱི་ཡུལ་ལུང་ཆགས་སྟངས་ཤིག་ལས་ང་ཚོས་གསར་བཟོ་བྱས་པ་ཞིག་མིན་པ་མ་ཟད། བོད་རིགས་གཅིག་གྱུར་བྱེད་རྒྱུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་ཡོང་མ་སྲིད་པ་དེ་བས་ཀྱང་མིན། དཔེར་ན་ཤིན་ཅང་ཡུ་གུར་རང་སྐྱོང་ལྗོངས་ནི་རྒྱ་ནག་གི་ལྔ་ཆ་གཅིག་ཟིན་གྱི་ཡོད་པ་དང་། ནང་སོག་རང་སྐྱོང་ནི་བརྒྱད་ཆ་གཅིག་ཟིན་གྱི་ཡོད། དེར་བརྟེན་ང་ཚོའི་མིང་དོན་མཚུངས་པའི་རང་སྐྱོང་གི་མངོན་འདོད་དེ་ཁྲིམས་ཀྱི་ཆ་རྐྱེན་ཁག་ཇི་བཞིན་ལག་བསྟར་ཐུབ་ཐབས་དང་། རང་ཁྱིམ་རང་བདག་ཡོང་ཐབས་བྱེད་པའི་འཛིན་སྐྱོང་གི་གནས་སྟངས་ཤིག་ལས་ས་ཁྱོན་དང་འབྲེལ་བ་གང་ཡང་མེད།

ཆོས་དང་སྐད་ཡིག གོམས་གཤིས། དཔལ་འབྱོར། ས་བབ་ཁོར་ཡུག་བཅས་གཅིག་གྱུར་ཡིན་པའི་བོད་རིགས་རྣམས་ད་མུས་བཞིན་དུམ་བུ་མང་པོར་བགོས་པ་ལས་གཅིག་གྱུར་བཟོས་ན་འཛིན་སྐྱོང་གི་ཆ་ནས་སྟབས་བདེ་བ་དང་ཚགས་ཚུད་པ་ཡོང་རྒྱུ་ཡིན་པ་གསལ་པོ་རེད། རྒྱ་ནག་གཞུང་གི་དབང་འཛིན་པ་ཚོས་སྐྱོན་འཛུགས་བྱས་པ་ལྟར་རྒྱ་རིགས་ཡོངས་རྫོགས་ཕྱིར་འབུད་བྱེད་རྒྱུ་ང་ཚོའི་ཀུན་སློང་མིན་པ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ནང་གསལ་པོ་འཁོད་ཡོད། བོད་མི་རིགས་ཀྱི་ཐུན་མོང་མ་ཡིན་པའི་ངོ་བོ་སྲུང་སྐྱོབ་དར་སྤེལ་བྱེད་པར་བོད་ཀྱི་ས་ཁུལ་ནང་བོད་རིགས་གྲངས་ཀ་མང་བ་ཡོད་དགོས་པ་ནི་སྨོས་ཅི་དགོས།

རྒྱལ་སྤྱིའི་དབུ་འཁྲིད་ཁག་དང་གྲོས་ཚོགས་ཀྱི་འཐུས་མི། མཁས་པ། རྩོམ་པ་པོ་སོགས་གནད་ཡོད་མི་སྣ་མང་པོས་གཉིས་སྨན་དབུ་མའི་ལམ་གྱི་སྲིད་བྱུས་ལ་མོས་མཐུན་རྒྱབ་སྐྱོར་བྱས་ཡོད། ཁྱད་པར་རྒྱ་རིགས་མཁས་པ་དང་། རྩོམ་པ་པོ། ཆོས་དད་ཅན་སོགས་རྒྱ་རིགས་མི་མང་ནང་ལོ་རེ་བཞིན་རྒྱབ་སྐྱོར་བྱེད་མཁན་མང་དུ་འགྲོ་བཞིན་ཡོད། ཕྱི་ལོ་ ༢༠༡༡ ནས་ད་བར་རྒྱལ་ཁབ་ཁག་བཅུ་གྲངས་ནང་བོད་དོན་སྐོར་གྲོས་ཆོད་སོགས་འཇོག་ཐུབ་པ་བྱུང་བ་དང་། དབུ་མའི་ལམ་གྱི་སྲིད་བྱུས་གཞིར་<བཟུང་༸གོང་ས་མཆོག་གི་སྐུ་ཚབ་དང་རྒྱ་ནག་གི་མགོ་འཁྲིད་གསར་པའི་སྐུ་ཚབ་བར་འབྲེལ་མོལ་བྱེད་དགོས་པའི་རེ་འདུན་བཏོན་ཡོད། དེ་མཚུངས་རྒྱལ་ཁབ་བཅོ་བརྒྱད་ལྷག་གི་ཕྱི་སྲིད་བློན་ཆེན་ནམ་ཕྱི་སྲིད་ལས་ཁུངས་ཀྱི་མི་སྣ་དང་མགྲིན་ཚབ་པ། གྲོས་ཚོགས་འཐུས་མི་བཅས་ཀྱིས་རྒྱ་ནག་གཞུང་ལ་བོད་དོན་དཀའ་རྙོག་སེལ་ཐབས་དགོས་པའི་སྐུལ་འདེད་བྱས་ཡོད།”ཅེས་བཀོད་འདུག   

༸གོང་ས་སྐྱབས་མགོན་ཆེན་པོ་མཆོག་གིས་ནོ་བྷེལ་ཞི་བདེའི་གཟེངས་རྟགས་དགྱེས་བཞེས་གནང་སྐབས་བཀའ་སློབ་ཕེབས་པའི་ནང་‘གཟེངས་རྟགས་འདིས་ང་ཚོས་དྲང་བདེན་དང་སྙིང་སྟོབས། ཆོད་སེམས་བཅས་ལ་བརྟེན་ནས་བོད་དོན་བདེན་མཐའ་གསལ་རྒྱུའི་ཡིད་ཆེས་བསྐྱར་ནན་བྱེད་བྱུང་’ཞེས་གསུངས་ཡོད། དེ་མཚུངས་ཕྱི་ལོ་ ༢༠༡༣ ཟླ་ ༩ ཚེས་ ༢༢ ཉིན་༸གོང་ས་མཆོག་གིས་མགོན་པོ་གང་ཉིད་གསེར་ཞལ་འཚོ་བཞུགས་རིང་དབུ་མའི་ལམ་གྱི་སྲིད་བྱུས་ལ་བརྟེན་ནས་བོད་དོན་བདེན་མཐའ་གསལ་ངེས་ཡིན་པའི་བཀའ་བཞེས་བཟང་པོ་སྤྱི་བསྩལ་བྱུང་ཡོད།”ཞེས་བཀོད་འདུག

མཇུག་ཏུ་བོད་ཀྱི་ཟློས་གར་ཚོགས་པ་དང་མེས་དབོན་གཙུག་ལག་དཔེ་སྟོན་སློབ་གྲྭ། ཐང་སྟོང་གླུ་གར་ཚོགས་པ་སོགས་གཙོས་སློབ་གྲྭ་ཁག་དང་ཚོགས་པ་སྒྲིག་འཛུགས་ཁག་གིས་གཞས་སྣ་འཁྲབ་སྟོན་གནང་སོང་།  

གསར་འགོད་པ། པདྨ་མཚོ།

དུས་བབ་དྲ་བ་ནས།