པེ་ཅིན་དུ་ཡོད་པའི་རྒྱ་རིགས་སྣེ་ཤན་པ་ཞིག་གི་མིག་ནང་གི་བོད་རིགས།

ཀུན་དགའ་བཀྲ་ཤིས་ཀྱིས་བོད་བསྒྱུར་བྱས

སྒྱུར་མཁན་གྱི་མཆན།  རྒྱ་ཡིག་དྲྭ་རྒྱ་སྦོ་ཤུན་ཐོག་ཐོན་པའི་རྩོམ་ཡིག་འདི་གུས་པས་བོད་སྒྱུར་བྱེད་པའི་དགོས་དམིགས་གཙོ་བོ་ནི། རྒྱ་རིགས་མི་མང་གིས་བོད་པའི་དངོས་ཡོད་གནས་ཚུལ་ཤེས་རྟོགས་ཐུབ་ཚེ། བོད་པ་ཟེར་མཁན་འདི་རྒྱ་གཞུང་གིས་དྲིལ་བསྒྲགས་བྱས་པ་ནང་བཞིན་འཇིགས་སུ་རུང་བའི་མི་རིགས་ཤིག་མ་ཡིན་པར།  ཡ་རབས་གཤིས་བཟང་ལྡན་པའི་མི་རིགས་ཤིག་ཡིན་པའི་ར་སྤྲོད་གསལ་པོ་ཐུབ་ཀྱི་ཡོད་སྟབས། བོད་པ་མི་རེ་ངོ་རེས་རྒྱ་རིགས་མི་མང་རྣམས་ཁ་གཏད་དུ་མ་འཛིན་པར། རྒྱ་རིགས་དང་མཉམ་དུ་འབྲེལ་ལམ་དམ་ཟབ་བྱས་ཏེ། སྒོ་གང་ས་ནས་བོད་པའི་དངོས་ཡོད་
གནས་སྟངས་འགྲེལ་བརྗོད་བྱེད་ཐུབ་པ་དང་།  ལྷག་པར་དུ་བོད་མི་རིགས་ཀྱི་ཐུན་མོང་མ་ཡིན་པའི་གོམས་གཤིས་བཟང་པོ་རྣམས་སྒོ་གསུམ་གྱི་སྤྱོད་པའི་ཐོག་ནས་རྒྱ་རིགས་མི་མང་ལ་བསྟན་ཐུབ་པ་ཞིག་བྱུང་ན། ཕན་ཐོགས་ཆེན་པོ་ཡོང་གི་ཡོད་པ་སྣེ་ཤན་པ་དེའི་རྩོམ་ཡིག་ནང་གསལ་བ་ལྟར་ལགས་ན། རང་རིགས་ཚང་མས་རྒྱ་རིགས་མི་མང་དང་འབྲེལ་ལམ་འཛུགས་རྒྱུར་ཤུགས་སྣོན་མི་ལྷོད་པ་དགོས་རྒྱུར་དྲན་གསོ་ཡོང་བའི་ཆེད་དུ་ཡིན།

བོད་པའི་དཀའ་ངལ་སེལ་དགོས་ན། རྒྱ་རིགས་མི་མང་དང་གྲོགས་འབྲེལ་བྱས་ནས་སེལ་དགོས་པ་ལས། ཁོང་ཚོ་ཁ་གཏད་དུ་བཟུང་སྟེ་སེལ་ཐུབ་ཐབས་མེད།  རྒྱ་ནག་དམར་པོའི་གཞུང་གིས་འདས་པའི་མི་ལོ་ལྔ་བཅུ་ལྷག་རིང་བོད་མི་རིགས་ལ་བསམ་ཡུལ་ལས་འདས་པའི་དཀའ་སྡུག་སྣ་ཚོགས་བཟོས་རྐྱེན་གྱིས། རྒྱ་རིགས་མི་མང་ལ་འབྲེལ་ལམ་བྱེད་ཟེར་དུས་ལམ་སེང་བློ་ལ་ཤོང་དཀའ་ཙམ་ཡོད་ཀྱང་། ང་ཚོས་བོད་མི་རིགས་ཧྲིལ་པོའི་ཁེ་ཕན་དང་། ཕུགས་རྒྱང་རིང་པོའི་བསམ་བློ་བཏང་ནས་རྒྱ་རིགས་མི་མང་དང་མཉམ་དུ་འབྲེལ་ལམ་ཤུགས་ཆེར་གཏོང་བའི་ལས་དོན་ལ་སྔར་ལས་ཤུགས་སྣོན་རྒྱག་དགོས་པའི་དུས་ལ་སླེབ་ཡོད། ཉིན་ཤས་སོང་རྗེས་ལོ་གསར་པ་ཤར་གྱི་ཡོད་ཅིང་། ལོ་གསར་པ་འདིའི་ནང་ང་རང་ཚོ་ཚང་མས་སེམས་ཚོར་སྟོན་རྒྱུ་གཅིག་པུ་མ་ཡིན་པར། ནུས་ཤུགས་གཅིག་ཏུ་སྤུངས་ཏེ་རྒྱ་རིགས་མི་མང་ལ་འབྲེལ་ལམ་དམ་ཟབ་ཀྱིས་དངོས་ཡོད་གནས་ཚུལ་འགྲེལ་བརྗོད་བྱེད་རྒྱུའི་ལས་དོན་ལ་ཤུགས་རྒྱག་རོགས་གནང་། ཞེས་རེ་སྐུལ་ཞུ་རྒྱུ་ཡིན། 

པེ་ཅིན་དུ་ཡོད་པའི་རྒྱ་རིགས་སྣེ་ཤན་པ་ཞིག་གི་མིག་ནང་གི་བོད་རིགས། 

ང་ནི་པེ་ཅིན་དུ་སྡོད་མཁན་ཡུལ་སྐོར་སྤྲོ་འཆམ་གྱི་སྣེ་ཤན་པ་དཀྱུས་མ་ཞིག་ཡིན། ཉིན་ཤས་སྔོན་ངས་བོད་ནས་ཡིན་པའི་བོད་རིགས་ཁེ་གཙང་གི་ཡུལ་སྐོར་སྤྲོ་འཆམ་ཚོགས་པ་ཞིག་ལ་སྣེ་ཤན་བྱེད་རྒྱུའི་གོ་སྐབས་བྱུང་། པེ་ཅིན་དུ་ཡུལ་སྐོར་སྤྲོ་འཆམ་བྱེད་རིང་ཁོང་ཚོས་ང་ལ་གཡོ་འགུལ་ཐེབས་པའི་བག་ཆགས་ཆེན་པོ་བཞག ངས་ཁོང་ཚོར་སྣེ་ཤན་མ་བྱས་གོང་། བོད་རིགས་མི་དམངས་ལ་མཐོང་ཚུལ་གང་ཡོད་པ་རྣམས་མང་ཆེ་བ་ནི། གློག་བརྙན་དང་། བརྙན་འཕྲིན་ནམ་ཡང་ན་མི་གཞན་གྱིས་ལབ་པའི་གནས་ཚུལ་ཐར་ཐོར་ལས་མཐོང་ཤོས་བྱུང་ཞིང་། ཕྱོགས་ཡོངས་ནས་བཤད་ན། བོད་རིགས་ནི་གཟུགས་པོ་མི་དཀྲུ་མཁན་དང་། ཀླ་ཀློ། རིག་གནས་ཆུ་ཚད་དམའ་བ། དཔལ་ཡོན་སྤྱི་ཚོགས་དང་བྲལ་ནས་སྡོད་མཁན་ཡིན་པ་་་་་་་་་་་་   སོགས་ཀྱི་མི་རིགས་ཤིག་ཏུ་མཐོང་གི་ཡོད། ཡུལ་སྐོར་སྤྲོ་འཆམ་ཚོགས་པ་དེར་སྣེ་ཤན་བྱེད་བཞིན་པའི་སྐབས་སུ་ཡང་། ངའི་སེམས་ནང་། བོད་རིགས་སྐོར་དེ་སྔ་ཐོས་པ་རྣམས་དང་། བརྙན་འཕྲིན་ནང་བསྟན་པ་དེ་ཚོ་དངོས་གནས་བདེན་པ་རེད་འདུག བོད་པའི་བཟོ་ལྟ་ནི། ནག་རིལ་རིལ་དང་། ཕར་བལྟས་ན། མང་ཆེ་བ་རང་གི་ལོ་ཚད་ལས་ཧ་ཅང་གི་རྒས་བཟོ་དོད་པ། གཟུགས་པོ་ཧ་ལམ་འཁྲུ་ཡི་མེད་པ། ཧ་ཅང་ལྕི་ཞིང་སྟབས་བདེ་ཐབས་ཆག་གི་འབོག་སྒྲིལ་འཁུར་མཁན་ལས། ཡུལ་སྐོར་སྤྲོ་འཆམ་ཚོགས་པའི་ཁྲོད་འགྲུལ་བཞུད་སྒམ་དྲག་གྲས་ཤིག་ཀྱང་འཁུར་མཁན་མི་འདུག་བསམ་སྟེ། རང་བསམ་བདེན་རློམ་གྱིས་ཁོང་ཚོ་ནི་དངོས་གནས་དཔལ་ཡོན་སྤྱི་ཚོགས་དང་ཡ་བྲལ་ཕྱིན་པའི་མི་རིགས་ཤིག་བསམ་གྱི་ཡོད།

ཡིན་ན་<ཡང་། ཁོང་ཚོ་དང་རིམ་བཞིན་གཤིབ་པ་བརྒྱུད་ང་རང་རྦད་དེ་ནོར་འཁྲུལ་ཡིན་པ་གཞི་ནས་ཤེས་རྟོགས་བྱུང་བ་མ་ཟད། ཁོང་ཚོའི་གཏམ་དང་སྤྱོད་པས་རྒྱ་རིགས་ཡིན་པའི་ང་རང་ནི་ཧ་ཅང་གི་ངོ་ཚ་པོ་དང་། ཁ་སྐྱེངས་པོ་བྱུང་།  པེ་ཅིན་དུ་འབྱོར་བའི་ཉིན་དང་པོ་དེར་དམིགས་བསལ་མཛད་རིམ་སྒྲིག་མེད་པར་མགྲོན་ཁང་དུ་ངལ་གསོ་རྒྱག་རྒྱུ་བྱས་ཀྱང་། གོ་སྒྲིག་བྱེད་སྟངས་ནོར་བའི་རྐྱེན་གྱིས་སྔོན་དུ་མངགས་ཟིན་པའི་མགྲོན་ཁང་དེར་ཁང་མིག་སྟོང་པ་མེད་སྟབས། སྣེ་ལེན་བྱེད་ཐབས་མི་འདུག་ཅེས་བཤད། དེར་བརྟེན་མགྲོན་ཁང་སྒོ་འགྲམ་དུ་སླེབས་ཟིན་པའི་བོད་པ་ཚོ་རྡོག་ཁྲེས་ཕབ་ཚར་མ་ཚར་དུ་སླར་ཡང་རླངས་འཁོར་ནང་འཛུལ་ནས་མགྲོན་ཁང་གཞན་ཞིག་ནང་ཕྱིན། རླངས་འཁོར་ནས་བབས་རྗེས། ཚང་མ་དབུགས་ཧད་པའི་ངང་འཁུར་པོ་ལྗིད་པོ་འཁྱེར་བཞིན་དུ་ངང་བརྒྱུད་རིང་པོས་ཁང་པའི་སྡེ་མིག་སྒུག་ནས་བསྡད། སྡེ་མིག་ཐོབ་རྗེས་ཐེམ་སྐས་འཛེགས་ཏེ་ཁང་པའི་ནང་འཛུལ་རྗེས། སླར་ཡང་བསམ་ཡུལ་ལས་འདས་པའི་གནས་ཚུལ་བྱུང་། དེ་ནི་སྔོན་དུ་མངགས་ཟིན་པའི་མགྲོན་ཁང་དེས་ཁང་པ་ཐོན་སོང་བས་ཕར་མགྲོན་ཁང་དུ་ཤོག་ཅེས་བརྡ་ལན་བྱས་པ་དང་། ཡུལ་སྐོར་སྤྲོ་འཆམ་ལས་ཁང་གི་འགན་འཛིན་ཡང་ཡོང་ནས་སྔོན་གྱི་མགྲོན་ཁང་དུ་རང་འཇགས་འགྲོ་དགོས་པའི་ཐག་གཅོད་བྱས་པ་དེ་ཡིན།

དེར་བརྟེན་རྡོག་ཁྲེས་ཕབ་ནས་ཅ་དངོས་རྣམས་དབྱེ་སྲེས་ལེགས་སྒྲིག་བྱེད་ལོང་མ་བྱུང་བའི་བོད་པ་རྣམས་སླར་ཡང་ཅ་དངོས་བསྡུ་གསོག་བརྒྱབ་ནས་སྔོན་གྱི་མགྲོན་ཁང་དེར་ལོག སྐབས་དེར་སྣེ་ཤན་པ་ཡིན་པའི་ང་རང་ལ་མཚོན་ན། བོད་པ་དེ་ཚོས་རྙོག་ཁྲ་བཤད་རྒྱུ་རེད་བསམ་ནས་སེམས་ངལ་ཆེན་པོ་བྱུང་། གང་ཡིན་ཟེར་ན། བོད་པ་ནི་བཟང་པོའི་བླང་དོར་མི་ཤེས་པའི་མི་བླུན་རྨོངས་ཡིན་པ་དང་། གཤིས་ཀ་རྩུབ་པོ་ཡོད་ཚུལ་དེ་སྔ་ཐོས་མྱོང་བར་བརྟེན། ཕར་སྤོས་ཚུར་སྤོས་མང་བའི་ཅ་ཟིང་ངལ་བ་ཆེན་པོ་བྱུང་བས། གལ་སྲིད་ཁོང་ཚོས་རྙོག་གྲ་བཤད་ནས་མགྲོན་ཁང་ནང་གཅག་གཏོར་བྱས་པའམ། ཡང་ན་ང་ཚོར་ཉེས་བརྡུང་གཏང་སྲིད་པ་རེད་སྙམ་སེམས་ཁྲལ་ཆེན་པོ་བྱུང་།

འོན་ཀྱང་ཡོངས་སུ་བསམ་ཡུལ་འདས་པ་ཞིག་ལ།  ཁོང་ཚོས་རྙོག་གྲ་བཤད་རྒྱུ་ཕར་ཞོག ཐ་ན་མ་འདོད་པའི་གཏམ་ཅི་ཡང་མ་སྨྲས་ཤིང་། ང་ཚོ་སྣེ་ལེན་བྱེད་མཁན་ཕྱོགས་ནས་དགོངས་དག་ཐུགས་བདེན་ཞུས་པའི་གནས་ཚུལ་འོག ཁོང་ཚོས་འཛུམ་དམུལ་དམུལ་ངང་བྱང་ཆ་དེ་ཙམ་མེད་པའི་རྒྱ་སྐད་ཀྱི་ཐོག་ནས་ཐུགས་རྗེ་ཆེ་ལབ་པར། ང་རང་ཧ་ལས་ཧོན་ཐོར། རྒྱུ་མཚན་གང་ཡིན་ཟེར་ན། ངས་ཡུལ་སྐོར་སྤྲོ་འཆམ་ཚོགས་པ་མང་པོར་སྣེ་ཤན་བྱས་པའི་ལོ་མང་གི་ཉམས་མྱོང་ལ་གཞིགས་ན། གལ་སྲིད་ང་ཚོས་ཐེངས་འདིར་སྣེ་ལེན་བྱེད་ཡུལ་སྤྲོ་འཆམ་སྐོར་ཚོགས་པ་དེ་རྒྱ་རིགས་ཀྱི་ཚོགས་པ་ཞིག་ཡིན་པའི་དབང་དུ་བཏང་ན། ད་གཟོད་ཁ་རྡུང་གཟེད་རྒྱུ་དང་། གུན་གསབ་བྱེད་དགོས་བྱུང་ཡོད་པ་བརྒྱ་ཆ་བརྒྱ་རེད་་་་་་་གལ་སྲིད་གུན་གསབ་སོགས་བྱེད་དགོས་བྱུང་མེད་ཀྱང་། མ་མཐའ་ཡང་སྐར་མ་གསུམ་ལྡན་གྱི་མགྲོན་ཁང་ནས་སྐར་མ་བཞི་ལྡན་གྱི་མགྲོན་ཁང་དུ་སྤོ་དགོས་པ་དང་། ཡུལ་ལྗོངས་ཀྱི་དཔར་བསྟེར་དགོས་པའམ། ཡང་ན་ཁ་ལག་སྣ་ཁ་འཕར་མ་སྣོན་དགོས་པའི་རེ་འདུན་འདོན་ངེས་རེད། འོན་ཀྱང་། བོད་པ་ཚོས་ཁོང་ཁྲོ་ལངས་པའི་རྣམ་འགྱུར་ཙམ་ཡང་མ་བསྟན། ངས། གལ་སྲིད་ང་རང་འགྲུལ་པ་ཡིན་པའི་དབང་དུ་བཏང་ན། གནས་ཚུལ་འདི་འདྲ་འཕྲད་སྐབས། བོད་པ་ནང་བཞིན་གྱི་རྣམ་འགྱུར་འཇམ་པོ་དེ་དྲ་གཏན་ནས་མེད་པ་མ་ཟད། ཁེ་བཟང་ལེན་རྒྱུའི་བསམ་བློ་མ་འཁོར་ཡང་། མི་ལ་ཁ་རྡུང་བཏང་ཡོད་ཀྱི་རེད་བསམ་སྟེ་རང་གིས་རང་ལ་དྲི་བ་བཏང་། ངས། སྣང་བར་ཤར་མི་ཐུབ་པའི་བློ་ཞིག་འཆང་པའི་ངང་ཁོང་ཚོ་ད་གིན་སྔོན་གྱི་མགྲོན་ཁང་དེར་འཁྲིད་ཅིང་། སྐབས་དེ་དུས་དགོང་དྲོའི་ཚོུད་ ༥ པ་ཡོལ་ཙམ་ཡིན་པ་དང་། ཁོང་ཚོ་པེ་ཅིན་དུ་འབྱོར་སྐབས་ཉིན་གུང་ཆུ་ཚོད་ ༡༢ རེད།

བོད་པའི་ཡུལ་སྐོར་སྤྲོ་འཆམ་ཚོགས་པའི་མགོ་བྱེད་ནི་ཕར་བལྟས་ན་ཧ་ཅང་དྲང་མདོག་ཁ་པོའི་སྐྱེས་པ་ཞིག་རེད་འདུག་ཅིང་། ཁོང་ལ། གནས་སྟངས་དང་དཀའ་ངལ་འདི་ལྟ་བུར་གདོང་གཏུག་བྱེད་སྐབས་སེམས་ངལ་ཆེན་པོ་ཡོད་ཀྱང་། ང་ལ་མི་འདོད་པའི་སྐད་ཆ་ཚིག་གཅིག་ཀྱང་མ་བཤད་པར། དེ་ལས་ལྡོག་སྟེ།སྐྱོན་མི་འདུག སྐྱོན་མི་འདུག ངས་ཁོང་ཚོར་འགྲེལ་བཤད་བྱས་ཆོག་ཅེས་བཤད་ནས་ང་ལ་སེམས་གསོ་བྱས། ངས། ང་རང་ཧ་ལས་ཧང་སང་པའི་བསམ་བློ་དེ་གང་འདྲ་བྱས་ནས་བཤད་དགོས་མིན་མ་ཤེས།

གང་ཡིན་ཟེར་ན། ཡུལ་སྐོར་སྤྲོ་འཆམ་ཚོགས་པའི་མགོ་བྱེད་ཧ་ཅང་མང་པོ་མཐོང་མྱོང་། རང་ཉིད་ཀྱི་འགན་འཁྲི་གཙང་མ་བཟོ་ཆེད་དང་། སྤྲོ་འཆམ་པའི་ཁོང་ཁྲོ་དང་མི་འདོད་པ་རྣམས་རང་སྟེང་དུ་མི་ལྷུང་བ་བཟོ་ཆེད། སྤྲོ་འཆམ་པའི་མགོ་བྱེད་དེ་སྣེ་ཤན་པའི་ཕྱོགས་སུ་ལངས་ནས་སྐད་ཆ་བཤད་ཀྱི་འདུག་སྙམ་པའི་མཐོང་ཚུལ་མི་འབྱུང་ཆེད། ག་དུས་ཡིན་རུང་འགྲུལ་པའི་ཕྱོགས་ཞེན་བྱས་ནས་སྣེ་ཤན་པར་ཁ་རྡུང་གཏོང་གི་ཡོད། ཡིན་ནའང་བོད་པའི་ཡུལ་སྐོར་སྤྲོ་འཆམ་ཚོགས་པའི་མགོ་བྱེད་སྐྱེས་པ་དེའི་བྱེད་སྟངས་ཀྱིས། ང་རང་ཧ་ལས། ཧང་སང་ནས་མ་ནེ་ཡང་ས་ལ་ལྷུང་གྲབས་བྱས།

ཉིན་གཉིས་པར་ཕོ་བྲང་རྙིང་པར་ལྟ་སྐོར་ཕྱིན། ཕོ་བྲང་རྒྱལ་སྒོའི་མདུན་གྱི་ལམ་ཆེན་དུ་རླངས་འཁོར་ནས་བབ་སྟེ་ཏོག་ཙམ་ཕྱིན་རྗེས། ཁོང་ཚོར་ཁ་ཡ་མ་བྱས་ན། ཁ་འཐོར་ནས་བརླག་གི་རེད་སྙམ་སྟེ། མར་ཕྱིར་བལྟས་ཤིག་སློག རྣམ་ཀུན་རྒྱ་རིགས་ཀྱི་ཡུལ་སྐོར་སྤྲོ་འཆམ་ཚོགས་པ་འཁྲིད་སྐབས། རླངས་འཁོར་ནས་བབ་མ་ཐག པར་རྒྱག་མཁན་དང་། ཆུ་ཉོ་མཁན་སོགས་རང་རང་སོ་སོ་རྒྱུག་འགྲོ་བའམ། ཡང་ན་ཚོགས་པ་ཆ་ཚང་དྲན་རྟེན་དངོས་པོ་ཉོ་བར་ཚང་ཀ་ཤིག་ཤིག་ངང་རྒྱུག་འགྲོ་བ་སོགས་ནི་རྒྱུན་དུ་མཐོང་རྒྱུ་ཡོད་པ་ཞིག་རེད། འོན་ཀྱང་ངས་མར་ཕྱིར་བལྟས་སློག་སྐབས། སླར་ཡང་ཧང་སང་དགོས་པའི་གནས་ཚུལ་ཞིག་བྱུང་བ་ནི། ཁོང་ཚོ་ཁ་འཐོར་རྒྱུ་ཕར་བཞག མི་གཉིས་རེ་རུ་གྲལ་སྒྲིག་པོས་འཇམ་ཐིང་ངེར་ངའི་རྗེས་སུ་ཡོང་གི་འདུག་པ་དེ་ཡིན།

ངས། གོམ་མཚམས་བཞག་སྐབས་ཁོང་ཚོས་ཀྱང་དེ་མ་ཐག་གོམ་མཚམས་བཞག་ནས་ཞི་འཇམ་འཛུམ་དམུལ་གྱིས་ང་ལ་བལྟས། སྐབས་དེར་ངས། ང་རང་ལ་སྐད་ཆ་ཤོད་མི་ཤེས་པ་ལྟ་བུའི་ཚོར་བ་བྱུང་ནས། རྣམ་ཀུན་ཁ་ནས་ཡང་ཡང་བཤད་དགོས་པའི་སྐད་ཆ་སྟེ། ཁྱེད་ཚོ་ཁ་མ་འཐོར་བ་བྱེད་རོགས། ངའི་རྗེས་སུ་ཤོག མ་བརླགས་པ་བྱེད་རོགས་ཞེས་པའི་སྐད་ཆ་དེ་ཚོ་ཡང་ཁ་ནས་ཐོན་གྱི་མི་འདུག སྐབས་དེ་དུས་ཀྱི་གནས་ཚུལ་ལ་བལྟས་ན། བརླགས་མཁན་དེ་བོད་པ་ཚོ་མ་ཡིན་པར་ང་རང་ཡིན་པ་འདྲ་པོ་འདུག ངས་ཁ་གདངས་ཙམ་གདངས་ཙམ་བྱས་པ་ལས། སྐད་ཆ་བཤད་མེད་པར། ཁོང་ཚོ་ནང་བཞིན་དགོད་ཙམ་བྱས་ནས་མུ་མཐུད་སྤྲོ་འཆམ་ཚོགས་པ་འཁྲིད་དེ་ཡུལ་སྐོར་ལ་ཕྱིན།

གནམ་བདེ་སྒོ་མོའི་ཐང་ཆེན་དུ་འབྱོར་ནས་བདེ་འཇགས་ཞིབ་བཤེར་ཚར་བའི་རྗེས། རྒྱུག་ཕྱིན་ནས་པར་རྒྱག་མཁན་ནམ། ཡང་ན་ས་གནས་གསར་པ་ཞིག་ལ་སླེབས་པའི་ཡ་མཚན་གྱིས། ཞིབ་བཤེར་ཚར་མ་ཐག་གང་སར་རྒྱུག་ནས་འགྲུལ་པ་མ་བརྙེད་པའི་དཀའ་ངལ་ཡང་མ་བྱུང་། སྔོན་དུ་འགྲོ་མཁན་རྣམས་མདུན་དུ་བང་སྒྲིག་ནས་བསྡད་པ་དང་། རྗེས་སུ་འབྱོར་མཁན་རྣམས་སོ་སོའི་བང་རིམ་ལ་བསྡད་པ་མ་གཏོགས། དཀྱིལ་ལ་འཛུལ་ནས་སྔ་ཕྱིའི་བང་རིམ་དཀྲུག་མཁན་སུ་ཡང་མ་བྱུང་། དེ་འདྲའི་རྒྱུ་མཚན་ལ་བརྟེན་ནས་ང་ཚོའི་སྤྲོ་འཆམ་ཚོགས་པ་དེར་མི་གྲངས་ ༤༠ ལྷག་ཙམ་ཡོད་ཀྱང་། བདེ་འཇགས་ཞིབ་བཤེར་ལ་དུས་ཡུན་སྐར་མ་ལྔ་དྲུག་ལས་མ་འགོར་བ་མ་ཟད། ཟང་ཟིང་མེད་པར་རུ་གྲལ་སྒྲིག་པོ་སྒྲིག་ཐུབ་པ་བྱུང་།

གལ་སྲིད་སྤྲོ་འཆམ་ཚོགས་པ་གཞན་ཞིག་ཡིན་ན། བདེ་འཇགས་ཞིབ་བཤེར་མགོ་འཛུགས་མ་བྱས་གོང་། སྔོན་ལ་མི་རུག་རུག་བཟོ་རྒྱུ་གཅིག་པུར་སྐར་མ་ཉི་ཤུ་གསུམ་བཅུ་འགོར་ངེས་ཡིན། ངས། ས་སྟོང་ཞིག་བཙལ་ཏེ། རྒྱབ་ཁུག་ཚང་མ་འདིར་འཇོག་རོགས། ང་ཚོ་ད་ལྟ་བང་སྒྲིག་ནས་མའོ་ཀྲུའུ་ཞི་མཇལ་བར་འགྲོ། དེའི་རྗེས་ཚང་མ་འདིར་འཛོམས་ཀྱི་ཡིན་ཞེས་བཀོད་མངགས་བྱས།  ངས་བཀོད་མངགས་བྱས་པ་ཙམ་ལས། བོད་པ་དེ་དག་ཁྲོད་རྒྱབ་ཁུག་གཡུག་ནས་རྒྱུག་འགྲོ་མཁན་གཅིག་ཀྱང་མེད་པར། ཚང་མས་རྒྱབ་ཁུག་གྲ་སྒྲིག་པོས་གནས་གཅིག་ལ་སྤུངས་ཤིང་། རུ་གྲལ་སྒྲིག་པོའི་ངང་ག་ལེར་ག་ལེར་མདུན་སྐྱོད་བྱེད་པ་མ་གཏོགས། ངའི་རྒྱབ་ཁུག་གཞན་གྱི་རྒྱབ་ཁུག་གི་འོག་ལ་བསྣན་འདུག་ཅེས་མ་དགའ་བ་བྱེད་པའམ། ཡང་ན་སོ་སོའི་རྒྱབ་ཁུག་ཚུར་བཏོན་ནས་གཞན་གྱི་རྒྱབ་ཁུག་གི་སྒང་ལ་འཇོག་པ་སོགས་འདྲ་མི་འདྲ་བྱེད་མཁན་གཅིག་ཀྱང་མ་བྱུང་།

ཁོང་ཚོ་བང་སྒྲིག་པར་འགྲོ་སྐབས། རང་གིས་རང་ལ་དྲི་བ་ཞིག་གཏོང་དགོས་བྱུང་བ་ནི། རང་ཉིད་རྒྱ་རིགས་ཤིག་ཡིན་བསམ་མཁན་དང་། སྤུས་ཚད་ལེགས་པའི་རྒྱ་ནག་སྐམ་སའི་མི་ཡིན་སྙམ་པའི་རློམ་སེམས་ཀྱིས་རང་བསྟོད་བྱེད་མཁན་ཚོས། ཀུན་སྤྱོད་འདི་ལྟར་ལྡན་པའི་བོད་རིགས་མི་མང་དང་མཉམ་གཤིབ་གདོང་གཏུག་བྱེད་སྐབས། རང་ཉིད་ཧ་ཅང་གིས་མི་བདེ་བ་ཞིག་ཡོང་གི་རེད་དམ། ང་རང་ལྟར་ཧ་ཅང་གི་ངོ་ཚ་པོ་དང་། ཁ་སྐྱེངས་པོ་ཡོང་གི་རེད་དམ་སྙམ་པ་དེ་ཡིན།

ཕོ་བྲང་རྙིང་པའི་ནང་མ་འཛུལ་གོང་། ངས་ཁོང་ཚོར་སྒོ་འགྲམ་དུ་སྒུག་རོགས། ང་འཛིན་བྱང་ཉོ་བར་འགྲོ་རྒྱུ་ཡིན་ཞེས་བཤད། འཛིན་བྱང་ཉོས་ཏེ་ཚུར་ལོག་སྐབས། སླར་ཡང་ཧང་སང་དགོས་པའི་གནས་ཚུལ་ཞིག་བྱུང་། གང་ཡིན་ཟེར་ན། རྒྱུན་དུ་དངུལ་སློང་མཁན་སྤྲང་པོ་འདིས་དེ་ཉིན་ཡང་སློང་མོ་རྒྱག་གི་ཡོད་པ་ངས་མཐོང་ཞིང་། སློང་ཡུལ་ནི་ངས་འཁྲིད་བཞིན་པའི་ཡུལ་སྐོར་སྤྲོ་འཆམ་ཚོགས་པ་དེ་རེད། སྐབས་དེར་ཕོ་བྲང་རྙིང་པའི་ཉེ་འཁོར་དུ་ཡོད་པའི་མི་ཚང་མས་རུ་བསྟར་ནང་ཡོད་པའི་བོད་པ་སྤྲོ་འཆམ་པ་རྣམས་ལ་མིག་ཟུར་བལྟས་ཤིང་། ཚང་མའི་ལག་ཏུ་མི་དམངས་ཤོག་སྒོར་རེ་རེ་འཁྱེར་ནས་བསྡད་འདུག ངས། སྤྲང་པོ་དེ་མགོ་སྐོར་གཏོང་མཁན་ཁྲམ་པ་ཞིག་རེད་ཅེས་དྲན་སྐུལ་བྱེད་དགོས་བསམ་ཡང་། རྒྱུ་མཚན་ཅི་ཡིན་མི་ཤེས། ངས་ཅི་ཡང་མ་སྨྲས་གོང་། བོད་པའི་ཡུལ་སྐོར་སྤྲོ་འཆམ་པའི་མགོ་བྱེད་དེས་ངའི་རྣམ་འགྱུར་མཐོང་རྗེས། དགོད་ཙམ་བྱས་ནས་ང་ལ་འགྲེལ་བརྗོད་བྱས་དོན། སློང་མཁན་འདི་ཁྲམ་པ་ཞིག་ཡིན་པའི་དབང་དུ་བཏང་ཡང་། ང་ཚོས་དངུལ་བསྟེར་རྒྱུ་རེད། གང་ཡིན་ཟེར་ན། དངུལ་བསྟེར་བ་ནི་སྦྱིན་པའི་བྱ་བ་ཞིག་ཡིན་པ་དང་། གཞན་ལ་སྦྱིན་པ་གཏོང་བ་ནི་བསོད་ནམས་གསོག་པའི་རྒྱུ་རེད་ཟེར།  

ངས། བོད་པ་ཚོའི་ངོ་གདོང་ནས་རང་བཞིན་བབས་ཆགས་ཀྱི་རྣམ་འགྱུར་དེ་མཐོང་སྐབས། ངའི་སེམས་ནི་འདི་འདྲའི་ངན་པ་ལ་ཨང་། འཚོ་བར་དངོས་སུ་དཀའ་ངལ་འཕྲད་པའི་མི་ཞིག་ལ་ཤོག་སྒོར་གཅིག་བསྟེར་མ་ཐུབ་པ་ག་རེ་ཡོད་དམ། སྤྲང་པོ་དེ་ཁྲམ་པ་ཞིག་ཡིན་པའི་དབང་དུ་བཏང་ཡང་། ཁོ་རང་གི་དབང་པོ་ཐང་པོ་མེད་པ་འདིས་འཚོ་བར་སྟབས་མི་བདེ་བ་ཆེན་པོ་བཟོས་ཡོད་པ་རེད་བསམ་པའི་ཚོར་སྣང་ཞིག་གློ་བུར་དུ་བྱུང་། ངས། སྤྲང་པོ་དེས་ཕྱོགས་གཅིག་ནས་གཞན་གྱིས་བསྟེར་བའི་དངུལ་ལེན་བཞིན་དུ། ཕྱོགས་གཞན་ཞིག་ནས་ཐུགས་རྗེ་ཆེ། ཞེས་ལབ་པའི་རྣམ་པ་དེར་བལྟས་ནས་བསྡད་པ་དང་ཆབས་ཅིག སྤྲང་པོས་ཐུགས་རྗེ་ཆེ་ཞེས་བཤད་པ་འདི་སེམས་གཏིང་ནས་ཐོན་པའི་ཚིག་ཅིག་ཡིན་གྱི་རེད་བསམ།

ཕོ་བྲང་རྙིང་པར་བལྟ་སྐོར་བྱེད་རིང་གོམ་པ་བརྒྱབ་ནས་འགྲོ་ས་རྒྱ་ཆེ་ཞིང་། སྤྲོ་འཆམ་ཚོགས་པའི་ནང་རྐང་ལག་དེ་ཙམ་ཐང་པོ་མེད་པའི་རྒན་རྒོན་ཡང་ཡོད་སྟབས། ཉིན་གུང་ཁ་ལག་ཟ་རྒྱུའི་དུས་ཚོད་འགྱངས་འགྲོ་རྒྱུ་རེད་བསམ་ནས་ང་ལ་སེམས་ཁྲལ་ཡོད་པར་བརྟེན། སྐབས་སྐབས་ལ་ངས། ཚང་མ་མགྱོགས་ཙམ་གནང་རོགས། ངའི་རྗེས་ལ་ཕེབས་ཤོག ཅེས་མ་བཤད་ཀ་མེད་རེད། འོན་ཀྱང་མགྱོགས་པོ་བྱེད་མཁན་གཅིག་ཀྱང་མི་འདུག་པ་དེ་ནི། ཁོང་ཚོས་ངའི་ཁ་ལ་མ་ཉན་པ་མིན་པར། སྤྲོ་འཆམ་ཚོགས་པའི་འགྲུལ་པ་ཡོངས་ཀྱི་གོམ་པ་མགྱོགས་ཚད་དེ། འགྲུལ་པའི་རུ་བསྟར་གྱི་དཀྱིལ་དུ་ཡོད་པའི་རྐང་ལག་ཐང་ཐང་མེད་པའི་བགྲེས་སོང་དེ་ཚོའི་གོམ་པ་མགྱོགས་ལུགས་ལ་རག་ལས་ཤིང་། གལ་སྲིད་ངས། སྔོན་ལ་པར་རྒྱག་པར་རྒྱུགས། ཚར་སོང་ན་མགྱོགས་ཙམ་ལོག་ཤོག་ཅེས་བཤད་ཀྱང་། ཚུར་ཕྱིར་ལོག་ཡོང་སྐབས་བགྲེས་སོང་དེ་ཚོ་མཉམ་དུ་མ་འཁྲིད་རང་འཁྲིད་རེད།

ཕོ་བྲང་རྙིང་པར་བལྟ་སྐོར་ཚར་ནས་རླངས་འཁོར་ནང་འཛེགས་པའི་སྐབས་སུ་ཡང་གོ་རིམ་དང་ལྡན་པ་ལས། རྐུབ་སྟེགས་མ་ཐོབ་པའི་སེམས་ཁྲལ་གྱིས་ཚང་ཀ་རྒྱག་མཁན་མེད་པར། ཚང་མ་ལྷོད་ལྷོད་དང་སྒྲིག་འཛུགས་ལྡན་པའི་སྒོ་ནས་རླངས་འཁོར་ནང་འཛེགས་སྟབས། དུས་ཚོད་འཕྲོ་བརླགས་མ་ཕྱིན་པ་མ་ཟད། ལས་དོན་ཡང་སྟབས་བདེ་བྱུང་ཞིང་། ང་རང་ནི་རྐང་ལག་ཐང་པོ་མེད་པའི་བགྲེས་སོང་དེ་ཚོ་རླངས་འཁོར་ནང་འཛེགས་རྒྱུར་སྐྱོར་ཙམ་བྱེད་རྒྱུ་མ་གཏོགས། ཚང་ཀ་མ་བརྒྱབ། ག་ལེར་བྱེད་སོགས་སྐད་རྒྱག་དགོས་པའི་རིགས་གང་ཡང་མ་བྱུང་། 

ཁོང་ཚོས་ང་ལ་བསྟེར་བ་ནི། ཁོང་ཚོའི་ངོ་གདོང་སྟེང་གི་བཀྲག་མདངས་ཆེ་བའི་འཛུམ་མདངས་དང་། ཧ་ཅང་བདེ་བའི་རྒྱ་སྐད་ཚིག་གཅིག་སྟེ། "ཐུགས་རྗེ་ཆེ།" ཞེས་ལབ་པ་འདི་ཡིན། རྣམ་ཀུན་ངས་འཁྲིད་པའི་སྤྲོ་འཆམ་པ་གཞན་དག་གིས། གལ་སྲིད་ "ཐུགས་རྗེ་ཆེ།"ཞེས་ལབ་མཁན་བྱུང་པའི་དབང་དུ་བཏང་ཡང་། དེ་ནི་འཆར་ཅན་གྱི་ཐུགས་ཆེ་ལབ་པ་ནང་བཞིན་གྱི་རྣམ་འགྱུར་ཙམ་ལས། ཆེད་མངགས་ཚུར་བལྟས་ནས་འཛུམ་མདངས་དང་ལྡན་པའི་ངང་ "ཐུགས་རྗེ་ཆེ།" ཞེས་ལབ་མཁན་ནི་ཧ་ཅང་གི་དཀོན་པོ་རེད།

ཡུལ་དུས་གནས་བབ་གང་འདྲ་ཞིག་ལའང་བོད་པ་དེ་དག་ནི་སེམས་བག་ལྷོད་ལྷོད་དཀའ་ངལ་གང་ཡང་མེད་པ་ལྟ་བུ་དང་། གནས་ཚུལ་བཟང་ངན་གང་འཕྲད་རུང་མི་གཞན་ལ་འཛུམ་མདངས་བསྟན་ཅིང་། རྒྱ་སྐད་ཀྱི་ཐོག་ནས་ཐུགས་རྗེ་ཆེ་ཞེས་བརྗོད་པ། བང་སྒྲིག་པའི་སྐབས་རྒན་རྒོན་རྣམས་ག་དུས་ཡིན་རུང་བང་གི་དཀྱིལ་ལ་བཞག་པ། གང་དུ་ཕྱིན་ཀྱང་ཟང་ཟིང་མེད་པར་རུ་གྲལ་ཡག་པོ་སྒྲིག་པ། དཔར་རྒྱག་སྐབས་ས་ཆ་ཡག་ས་ཁོ་ནར་ཚང་ཀ་རྒྱབ་པའི་གོམས་གཤིས་མེད་པ། རོགས་པ་གཞན་རྣམས་ལ་ཟ་རྒྱུ་མེད་པ་མིན་ཀྱང་། སོ་སོས་ཟས་ཟ་བའི་སྐབས་གཞན་རྣམས་མ་བརྗེད་པར་བགོ་བཤའ་རྒྱབ་པ། རླངས་འཁོར་ནང་འཛེགས་སྐབས་ག་དུས་ཡིན་རུང་ཚང་ཀ་མ་རྒྱབ་པ། སྤྲང་པོ་ག་དུས་མཐོང་ཡང་དངུལ་སྦྱིན་པ། སྐུ་འདྲ་མཇལ་སྐབས་དད་གུས་ཆེན་པོས་ཐལ་སྦྱར་བྱེད་པ། སྒུག་དགོས་པའི་སྐབས་སུ་འཇམ་ཐིང་ངེར་ངང་སྒུག་བྱེད་པ་ལས་ཟང་ཟིང་ཅ་ཅོ་མེད་པ། དགའ་དགོས་པའི་གནས་ཚུལ་འཕྲད་སྐབས་མཛུམ་མདངས་བསྟན་ཞིང་། ཐུགས་རྗེ་ཆེ་ཞེས་བརྗོད་སྐབས།  ག་དུས་ཡིན་རུང་ཐུགས་རྗེ་ཆེ་ཞུ་ཡུལ་གང་ཟག་གི་ངོ་གདོང་ལ་བལྟ་བ་བཅས་ནི། ངས་ཉིན་ཤས་ཁོང་ཚོ་དང་མཉམ་དུ་སྤྲོ་འཆམ་བྱེད་རིང་མཐོང་བའི་བོད་པའི་བྱེད་སྟངས་ཡིན།

ཁོང་ཚོས་བོད་ཡིག་ཤེས་པ་མ་ཟད། རྒྱ་སྐད་བཤད་མི་ཤེས་ཀྱང་སྤྱིར་བཏང་གི་གོ་དོན་རྣམས་རྟོགས་ཀྱི་ཡོད་ཀྱང་། ཧ་ཅང་ཁེངས་སྐྱུང་ཆེན་པོའི་ངང་རང་ཉིད་ལ་ཤེས་ཡོན་མེད་པའི་ངོས་འཛིན་བྱེད་ཀྱི་ཡོད། འོན་ཀྱང་རྒྱ་རིགས་ཡིན་པའི་ང་རང་ལ་ཆ་བཞག་ན། བོད་ཡིག་ཡིག་འབྲུ་གཅིག་ཀྱང་ངོ་ཤེས་ཀྱི་མེད་པས། ཤེས་ཡོན་མེད་པ་དེ་དངོས་གནས་བྱས་ན་ང་རང་ཡིན་ཀྱང་། ངས་ཁེངས་སྐྱུང་དེ་འདྲ་བྱེད་ཐུབ་བམ་ཟེར་ན། བྱེད་མི་ཐུབ། 

ཉིན་ཤས་རིང་མུ་མཐུད་དེ་སྤྲོ་འཆམ་བྱེད་རིང་མཐོང་བའི། ཁོང་ཚོའི་འགྱུར་བ་མེད་པའི་དད་སེམས་དང་། སངས་རྒྱས་ཆོས་ལ་དད་གུས། བཀའ་དྲིན་ལ་དྲིན་ལན་འཇལ་སྟངས། སྤྱི་ཚོཌ་ཀྱི་གནས་ཚུལ་ལ་ལྟ་སྟངས་བཅས་ཀྱིས་ང་ལ་ཤུགས་རྐྱེན་ཐེབས་འགོ་ཚུགས། ཁོང་ཚོའི་ལག་ཏུ་ཅ་དངོས་གཞན་དག་མེད་པའི་སྐབས་ལག་པས་ཕྲེང་བ་བགྲང་ཞིང་། ཁ་ནས་བོད་སྐད་ཀྱི་ཚིག་ཅིག་ཡང་ཡང་བསྐྱར་ཟློས་བྱས། 

པེ་ཅིང་དུ་ཡོད་པའི་ཆིང་གོང་མའི་ཕོ་བྲང་དུ་འགྲོ་སྐབས། ང་དང་བོད་པའི་སྤྲོ་འཆམ་པའི་འགོ་བྱེད་བོད་རིགས་ང་གཉིས་ལམ་བར་ཁ་བརྡ་ཡུན་རིང་བྱས། ངས་ཁོང་ལ། ཁྱེད་ཚོས་ཁ་ནས་ག་རེ་འདོན་གྱི་ཡོད་དམ་ཞེས་དྲིས་པར། མི་ཎི་ཡིག་དྲུག་བགྲང་གི་ཡོད། དེ་ནི་རྒྱ་སྐད་ཐོག་ནས་བཤད་ན། ཕལ་ཆེར་གནམ་འདིའི་འོག་གི་སེམས་ཅན་ཐམས་ཅད་ལ་སྡུག་བསྔལ་མི་ཡོང་བའི་ཆེད་དུ་རེད། ཅེས་ལན་འདེབས་བྱས། ངས་སླར་ཡང་། ཁྱེད་རང་ཚོས་ཉིན་ལྟར་མི་ཎི་ཡིག་དྲུག་གསོག་གི་རེད་དམ། གནམ་འདིའི་འོག་གི་སེམས་ཅན་ཐམས་ཅད་ཟེར་དགོས་དོན་གང་ཡིན་ནམ། ཞེས་དྲིས་པར། ཁོང་གིས། དགོད་ཙམ་བྱས་ནས། ང་ཚོ་བོད་ཀྱི་སངས་རྒྱས་པའི་ཆོས་ཀྱི་སྙིང་པོར། སེམས་ཅན་ཐམས་ཅད་གལ་ཆེན་པོར་བརྩི་གི་རེད། ཅེས་ལན་འདེབས་བྱས་པ་དང་ཆབས་ཅིག ང་ལ། ལས་རྒྱུ་འབྲས་ཀྱི་རྣམ་སྨིན་དང་། འགྲོ་བ་རིགས་དྲུག་གི་འཁོར་བའི་རྩ་བ་འགྲེལ་བརྗོད་བྱས་བྱུང་བ་འདིས། ངས་བོད་པ་ཚོའི་བཟོད་སྒོམ་གུ་ཡངས་དང་། སེམས་བག་ལྷོད་པའི་བློ་འདི། ག་ནས་བྱུང་བ་ཡིན་ཕལ་ཆེར་རོབ་ཙམ་རྟོགས་པ་ལྟ་བུ་བྱུང་། 

ངས། བོད་པ་སྤྲོ་འཆམ་པའི་འགོ་བྱེད་ལ། ཡུལ་སྐོར་སྤྲོ་འཆམ་ཚོགས་པ་ཁོ་ནའི་ཆེད་དུ་མངགས་པའི་ཁ་ལག་ཟ་ས་མང་པོ་ཡོད་པ་དང་། མི་གཅིག་གི་ཁ་ལག་ལ་རིན་གོང་ག་ཚོད་ཡིན་མིན་གྱི་ཚད་གཞི་ཡང་གཏན་འཁེལ་བྱས་ཡོད་པའི་ཟ་ཁང་དེ་ཚོའི་ནང་ཁ་ལག་ཟས་པ་ཡིན་ན། འགྲོ་སོང་ཆུང་ལ་སྟབས་བདེ་ཡོད་པ་རེད། ཁྱེད་རང་ཚོས་ག་རེ་བྱས་ནས་དཀའ་ལས་བརྒྱབ་སྟེ་ཟ་ཁང་གཞན་དག་འཚོལ་གྱི་ཡོད་དམ། ཞེས་དྲིས་པར། 

འགོ་བྱེད་ཀྱིས། ང་ཚོ་ད་ཐེངས་ཡུལ་སྐོར་སྤྲོ་འཆམ་དུ་ཡོང་པའི་གོ་སྐབས་འདི་དཀོན་པོ་ཡིན་པས། གལ་སྲིད་ཁ་ལག་ཞིམ་པོ་མ་རག་ན། སྤྲོ་འཆམ་སྐྱིད་པོ་ཡོང་གི་མ་རེད། སྤྲོ་འཆམ་ཚོགས་པའི་ཁ་ལག་དེ་ཚོ་ཟ་མ་ཐུབ་པ་མེད་ཀྱང་། ཞིམ་པོ་གཏན་ནས་མི་འདུག ཟ་ཁང་ཡག་ཙམ་ཞིག་ནང་རང་འདོད་ཀྱིས་མངགས་ནས་ཟས་པ་ཡིན་ན། ཅ་ཟིང་ཆེ་བ་དང་རིན་གོང་མཐོ་བ་ཡོད་ཀྱང་། ངའི་རོགས་པ་ཚོའི་ཚོར་སྣང་སྐྱིད་པ་ཡོང་རྒྱུ་དང་།

ཕྱི་ལ་འཆམ་འཆམ་དུ་འགྲོ་སྐབས་རོགས་པ་ཚོ་སྐྱིད་པོ་བཟོ་ཐུབ་ན་བསམ་གྱི་ཡོད། ང་ཚོའི་འགྲོ་སོང་ཕྲན་བུ་ཆེ་རུ་འགྲོ་གི་རེད། དངུལ་ཟེར་མཁན་འདི་ག་ཚོད་བསགས་ཀྱང་། འདོད་པ་འཚིམ་རྒྱུ་ཞིག་མེད་སྟབས། འདང་ཙམ་འདང་ཙམ་བྱུང་ན་འགྲིག་གི་རེད། དངུལ་མང་པོ་བསགས་ནས་མི་གཞན་མ་དགའ་བ་བྱུང་ན། རྒྱུ་འབྲས་འཁོར་གྱི་རེད། ཅེས་ལན་འདེབས་བྱས་རྗེས། ངའི་སེམས་ནང་། སྐད་ཆ་དེ་རིགས་རྒྱུན་དུ་མང་པོ་གོ་ཡི་ཡོད་ཀྱང་། དངོས་སུ་ལག་ལེན་དུ་འགེལ་ཐུབ་མཁན་ག་ཚོད་ཙམ་ཡོད་དམ་སྙམ་པའི་བསམ་བློ་འཁོར། 

ཉིན་མཐའ་མའི་ཉིན་སྐྱེལ་མ་བྱེད་སྐབས།  ཁོང་ཚོས་ང་ལ་ཁ་བཏགས་གཡོག་ཞིང་། ལག་ནང་གི་རྡོག་ཁྲེས་ལྕི་པོ་དེ། མར་ཕབ་ནས་རེས་མོས་ཀྱིས་ལག་པ་བཏང་ནས་ཐུགས་རྗེ་ཆེ་ཞེས་བརྗོད་དུས། ངའི་སེམས་གཏིང་དུ་བྲལ་མི་ནུས་པའི་ཚོར་བ་ཞིག་སླེབས། བོད་པའི་ཡུལ་སྐོར་སྤྲོ་འཆམ་ཚོགས་པ་དེ་ནི་འདས་པའི་སྤྲོ་འཆམ་ཚོགས་པ་སུ་ཞིག་དང་མི་འདྲ། རྣམ་ཀུན་ཡུལ་སྐོར་ཚར་ནས་འགྲུལ་པ་སྐྱེལ་མ་བྱེད་སྐབས། མགྱོགས་ཙམ་ཚར་ཆོག་པ་ལ་ཨང་། ཉིན་གྲངས་ཁ་ཤས་རིང་ཕར་བཤད་ཚུར་བཤད་མང་བས་རྦད་དེ་ཐང་ཆད་པའི་སེམས་ཚོར་ཡོང་གི་ཡོད། ཡིན་ན་ཡང་། བོད་པ་ཚོ་སྐྱེལ་མ་བྱེད་སྐབས། སེམས་ནང་གཏན་ནས་བྲལ་མི་ཐུབ་པ་དང་། ཁོང་ཚོས་ཉིན་ཤས་རིང་ང་ལ་སྐྱིད་སྣང་དང་། ལྷོད་ལྷོད་ཀྱི་ཚོར་བ་བསྟེར་བའི་ཉི་མ་དེ་དག་བློས་མ་ཐོང་ལ། ཁོང་ཚོ་དང་མཉམ་དུ་གཤིབ་རིང་གི་བག་ཡངས་སེམས་ཁྲལ་མེད་པའི་ཚོར་སྣང་བྱུང་བ་དག་དེ་བས་བློས་མ་ཐོང་།

ཁོང་ཚོ་དང་མཉམ་དུ་གཤིབ་སྐབས། ཆོས་ཐམས་ཅད་དོན་དངོས་ཐོག་སེམས་འཛིན་བྱེད་རིན་མེད་པ་ཞིག་ཡིན་པ་ཤེས་རྟོགས་བྱུང་། ངས་རྒྱ་ནག་གི་ས་ཆ་གང་སར་མི་ཧ་ཅང་པོ་ཐུག་མྱོང་ཡང་། ང་ལ་དེ་ལྟ་བུའི་ཡིད་ཁུག་པར་བྱེད་པའི་ཚོར་བ་སྤྲོད་མཁན་སུ་ཡང་བྱུང་མ་མྱོང་། 

ཁོང་ཚོ་འབབ་ཚུགས་ནས་མ་ཐོན་གོང་། འགོ་བྱེད་བོད་རིགས་དེ་སླར་ཡང་མར་ཐོན་ནས་ལག་གཡུག་གིས་རྗེས་སུ་མཇལ་ཡོང་ཟེར་བའི་བརྡ་བསྟན། ངས། ང་གཉིས་ངེས་པར་དུ་འཐམ་རེས་ཐེངས་གཅིག་བྱེད་དགོས་ཞེས་བཤད་དེ།  ང་རང་འབབ་ཚུགས་ནང་ཡར་འཛུལ་ནས་ཁོང་ལ་འཐམ་སྟེ། ང་ཚོ་ཁ་གྱེས།

ཡུལ་སྐོར་སྤྲོ་འཆམ་པའི་སྣེ་ཤན་ཞིག་གི་ངོས་ནས་བཤད་ན། ཕྱོགས་བཞི་མཚམས་བརྒྱད་ཀྱི་མི་ཧ་ཅང་མང་པོ་དང་གཤིབ་མྱོང་ཡང་། སེམས་ཐག་ཉེ་པོའི་གྲོགས་པོ་ནི་ཧ་ཅང་གི་དཀོན་ཞིང་། བོད་རིགས་འགོ་བྱེད་ཁོང་ནི་དཀོན་པའི་ནང་གི་གཅིག་ཡིན་པ་ཁོང་གིས་ཤེས་ཀྱི་ཡོད་མེད་ངས་མ་རྟོགས། 

ལོ་མང་སྣེ་ཤན་གྱི་ལས་ཀ་བྱས་ཤིང་། གྲོགས་པོ་འདི་འདྲ་ཞིག་ངོ་ཤེས་པ་ནི་མི་ཚེའི་ནང་གི་བསོད་ནམས་ཡིན། ཁྱེད་ཚོ་ཡང་བསྐྱར་པེ་ཅིང་དུ་ཕེབས་ནས་སླར་ཡང་མཉམ་འཛོམས་ཡོང་རྒྱུར་སེམས་གཏིང་ནས་རེ་བ་བྱེད་ཀྱི་ཡོད། 

 ཨ་རི་སྐུ་ཚབ་དོན་ཁང་གི་དྲུང་འཕར་ཀུན་དགའ་བཀྲ་ཤིས་ཀྱིས་བོད་བསྒྱུར་བྱས།