ངལ་རྩོལ་བསྒྱུར་བཀོད་ར་བ་མྱོས་རྫས་ངན་གོམས་སྨན་བཅོས་ཁང་དུ་མིང་བསྒྱུར་འདུག་ཟེར།

ད་ལྟ་རྒྱ་ནག་གི་བཙོན་འོག་ཏུ་བོད་པའི་ཆབ་སྲིད་བཙོན་པ་ ༡༢༠༤ ཙམ་ཡོད་ཅིང་། ཉེ་ལམ་རྒྱ་གཞུང་གིས་ངལ་རྩོལ་བསྒྱུར་བཀོད་ལམ་ལུགས་མེད་པ་བཟོ་རྒྱུ་ཡིན་ཚུལ་བསྒྲགས་པ་དེ་མིང་ཙམ་ལས་དོན་གྱིས་མི་མང་ལ་མནར་གཅོད་རྡུང་རྡེག་གཏོང་བའི་སྲིད་ཇུས་མུ་མཐུད་ལྷག་རྒྱུ་ཡིན་པ་དང་། ཉེ་ལམ་བོད་ནང་གི་ངལ་རྩོལ་བསྒྱུར་བཀོད་ར་བ་ཁ་ཤས་<མིང་བསྒྱུར་བྱས་ཏེ་མྱོས་རྫས་ངན་གོམས་

སྨན་བཅོས་ལྟེ་གནས་སོགས་སུ་བསྒྱུར་ཡོད་འདུག

འདི་གའི་གསར་འགོད་པས་ངྷ་རམ་ས་ལའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་སུ། ད་ལོའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྤྱི་དང་། ལྷག་པར་དུ་བོད་པའི་ཆབ་སྲིད་བཙོན་པའི་སྐོར་ལ་བཅར་འདྲི་ཞུས་པར།ཁོང་མོས་བརྗོད་དོན། ང་ཚོས་ད་ལྟ་བོད་ནང་གི་ཆབ་སྲིད་བཙོན་པའི་སྐོར་ལ་ལོ་འཁོར་སྙན་ཐོ་འདོན་རྒྱུར་གྲ་སྒྲིག་བྱེད་ཀྱིན་ཡོད། ང་ཚོས་ཆབ་སྲིད་བཙོན་པའི་མིང་ཐོ་གཙང་མ་བཟོས་རྗེས་དབྱེ་བ་འགར་གྱི་ཡོད། དཔེར་ན། གྲྭ་བཙུན་ག་ཚོད་ཡོད་མེད་དང་། ཁྲིམས་ཐག་བཅད་ཡོད་མེད་ཀྱི་གྲངས་ཀ སྔོན་མ་ཡིན་ན་དབྱེ་བ་དེ་འདྲ་ཡོད་པ་མ་རེད། མིང་དང་ལོ། སྐྱེས་ཡུལ། ཁྲིམས་བཅད་ལོ་ཚད་སོགས་ལས་ཡོད་པ་མ་རེད། ད་ལོ་ང་ཚོས་ཐོ་གཞུང་ཙམ་མིན་པར་དེའི་རྒྱབ་ལྗོངས་ལོ་རྒྱུས་སོགས་འགོད་ཀྱི་ཡོད། རྒྱ་གཞུང་གིས་བོད་མི་ཚོར་ཉེས་རྡུང་བཏང་སྟེ་དམར་གསོད་བཏང་རིགས་ལོགས་སུ་བཞག་ཡོད། ད་ལོའི་ཕྱི་ཟླ་ ༡༠ བའི་ཟླ་མཇུག་བར་ཆབ་སྲིད་བཙོན་པ་གྲངས་ ༡༢༠༤ ཙམ་འདུག ༢༠༡༣ ལོའི་སྙན་ཐོ་དེ་ ༢༠༡༤ ལོའི་ལོ་མགོ་ཙམ་འདོན་འཆར་ཡོད་སྟབས། ཕྱི་ཟླ་ ༡༡ དང༌། ༡༢ བཅས་སུ་བོད་མི་འཛིན་བཟུང་བྱས་པ་དང་གར་སོང་ཆ་མེད་ཆགས་པ་སོགས་ཀྱང་ཚུད་ཐུབ་པ་བྱ་རྒྱུ་ཡིན། ཞེས་བརྗོད་བྱུང་།

གསར་འགོད་པས་བོད་པའི་ཆབ་སྲིད་བཙོན་པ་དེ་དག་རྒྱ་ནག་གི་བཙོན་ཁང་གང་དག་ནང་ཡོད་པ་དང༌ལྷ་སའི་གྲ་བཞིའི་བཙོན་ཁང་སོགས་སུ་བོད་པའི་ཆབ་སྲིད་བཙོན་པ་ག་ཚོད་ཡོད་མེད་དྲིས་པར། ཁོང་མོས། བོད་ནང་བཙོན་ཁང་ག་ཚོད་ཡོད་མེད་དང༌། བཙོན་ཁང་ཁག་ཏུ་བོད་པའི་ཆབ་སྲིད་བཙོན་པ་ག་ཚོད་ཡོད་མེད་ཤེས་ཐུབ་ཀྱི་མི་འདུག དེ་བཞིན་བོད་ནང་གི་ཆབ་སྲིད་བཙོན་པའི་གྲངས་འབོར་ཡང་ཏག་ཏག་ཅིག་ཤེས་ཐུབ་ཀྱི་ཡོད་པ་མ་རེད། རྒྱ་ནག་གཞུང་ལ་མཚོན་ན་བཙོན་པའི་གྲངས་འབོར་དེ་རྒྱལ་ཁབ་ཀྱི་གསང་བ་རེད། དཔེར་ན། རྒྱ་གཞུང་གིས་ངལ་རྩོལ་བསྒྱུར་བཀོད་ར་བ་མེད་པ་བཟོ་རྒྱུ་ཡིན་ཚུལ་བསྒྲགས་ཡོད་ཀྱང༌། ད་སྔ་དེའི་འོག་མི་ག་ཚོད་ཡོད་མེད་བསྒྲགས་ཡོད་པ་མ་རེད། ང་ཚོས་ཤེས་ཚོད་བྱས་ན། ༢༠༠༨ ལོར་བོད་ནང་ཞི་རྒོལ་བྱུང་པ་ནས་བཟུང་ཨ་མདོ་དང་ཁམས་ཕྱོགས་སུ་ཆབ་སྲིད་བཙོན་པའི་གྲངས་འབོར་མང་པོ་ཆགས་འདུག དེ་དག་མང་ཆེ་བ་ཟི་ཁྲོན་མཱེན་དབྱང་བཙོན་ཁང་དུ་བཅུག་འདུག བཙོན་ཁང་དེ་བཙོན་ཁང་དང་ངལ་རྩོལ་བསྒྱུར་བཀོད་གཉིས་ཀའི་ངོ་བོ་ལྡན་པ་ཞིག་ཡིན་ས་རེད། དེ་བཞིན་ཟི་ལིང་དུ་ངལ་རྩོལ་བསྒྱུར་བཀོད་ར་བ་ཞིག་ཡོད་པ་རེད། རྒྱ་ནག་གཞུང་གིས་བོད་རང་སྐྱོང་ལྗོངས་ནང་ཞི་བདེ་ལྷིང་འཇགས་ཡིན་ཚུལ་ཤོད་ཀྱི་ཡོད་པ་དང༌། རང་སྐྱོང་ལྗོངས་འོག་རང་ལུས་མེར་བསྲེགས་བྱུང་མེད་ལུགས་རྗོད་ཀྱི་ཡོད་ཀྱང༌། ད་ལྟའི་བར་བོད་རང་སྐྱོང་ལྗོངས་ནང་བོད་མི་རང་ལུས་མེར་བསྲེགས་གནང་མཁན་དྲུག་བདུན་ཞིག་བྱུང་ཡོད་པ་རེད། ལྷག་པར་དུ་ད་ལོ་ནག་ཆུ་འབྲི་རུ་རྫོང་དུ་དོན་རྐྱེན་ཆེན་པོ་བྱུང་སྟེ་བོད་མི་མང་པོ་འཛིན་བཟུང་བྱས་པ་རེད། ཅེས་བརྗོད་བྱུང་།

ཟླ་སྔོན་མར་རྒྱ་ནག་གི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་སྟེང་ངལ་རྩོལ་བསྒྱུར་བཀོད་ར་བ་མེད་པ་བཟོ་རྒྱུའི་ཐག་གཅོད་བྱུང་པའི་སྐོར་དྲིས་པར། རྒྱ་ནག་གཞུང་འབྲེལ་ཡིག་ཆའི་ནང་ངལ་རྩོལ་བསྒྱུར་བཀོད་ལམ་ལུགས་མེད་པ་བཟོ་རྒྱུ་ཡིན་ཞེས་བཀོད་འདུག ང་ཚོར་སེམས་འཚབ་ག་རེ་ཡོང་གི་འདུག་ཟེར་ན། རྒྱ་གཞུང་གིས་ལམ་ལུགས་དེར་སྔོན་ཆད་ཐེངས་ཁ་ཤས་ལ་བཅོས་བསྒྱུར་བྱས་པ་རེད། སྔོན་མ་ཉེན་རྟོག་པ་དབང་ཆ་ཆེས་ཤོས་ཡོད་ཀྱང༌། རྗེས་སུ་ཁྲིམས་ཞིབ་ལྷན་ཚོགས་ཀྱི་བློན་ཆེན་ལ་དབང་ཆ་སྤྲད་པ་རེད། ཡིན་ནའང་ཉེས་མེད་མང་ཚོགས་འཛིན་བཟུང་དང་གང་བྱུང་རྡུང་རྡེག་གཏོང་པ་གཅིག་མཚུངས་ཆགས་ཡོད། ཉེ་ཆར་ཡུལ་ཤུལ་དགོན་པའི་གྲྭ་བ་ ༤ ཟི་ལིང་གི་ངལ་རྩོལ་བསྒྱུར་བཀོད་ནས་དུས་ཡུན་མ་རྫོགས་སྔོན་ལ་ཀློད་གྲོལ་བཏང་ཡོད་པ་རེད། གོ་ཐོས་ལྟར་ན། ཟི་ལིང་དུ་ཡོད་པའི་ངལ་རྩོལ་བསྒྱུར་བཀོད་ཀྱི་བཙོན་ཁང་སྒོ་རྒྱག་རྒྱུ་རེད་ཟེར། དེ་བཞིན་རྒྱ་ནག་ནང་ལོགས་ཀྱི་ངལ་རྩོལ་བསྒྱུར་བཀོད་ར་བ་ཁ་ཤས་སྒོ་བརྒྱབ་པའི་གནས་ཚུལ་འདུག འོན་ཀྱང་ང་ཚོས་ཉེ་ཆར་གནས་ཚུལ་གོ་བ་ལྟར་ན། རྒྱ་གཞུང་གིས་ངལ་རྩོལ་བསྒྱུར་བཀོད་ཀྱི་སྒོ་བྱང་དང་མིང་སོགས་ལ་འགྱུར་བ་བཏང་སྟེ། མྱོས་རྫས་ངན་གོམས་ལ་སྨན་བཅོས་བྱེད་པའི་ལྟེ་གནས་སུ་མིང་བསྒྱུར་བྱེད་ཀྱི་ཡོད་ཚུལ་འདུག དེ་བཞིན། རྒྱ་ནག་གཞུང་གིས་ངལ་རྩོལ་བསྒྱུར་བཀོད་ར་བ་ཁག་ཅིག་ངོས་ལེན་བྱེད་ཀྱི་ཡོད་པ་མ་རེད། ང་ཚོར་དོགས་པ་ག་རེ་འདུག་ཟེར་ན། རྒྱ་གཞུང་གིས་ངལ་རྩོལ་བསྒྱུར་བཀོད་ཅེས་པའི་མིང་དེ་མེད་པ་བཟོས་ཀྱང༌། ཁྲིམས་ཡིག་ནང་དུ་མིའི་སྤྱོད་ལམ་ལ་བཅོས་བསྒྱུར་གཏོང་རྒྱུ་ཞིག་བཀོད་ཡོད་པ་དེ་རྩ་མེད་མ་བཟོས་བར་དུ་མི་མང་ལ་མནར་གཅོད་གཏོང་རྒྱུ་མཚམས་ཆད་རྒྱུ་མིན་པ་གསལ་བོ་རེད། སྔོན་མ་རྒྱ་གཞུང་གིས་གསར་བརྗེ་ངོ་ལོག་པ་ཟེར་བའི་ཚིག་རྩ་ཁྲིམས་ནང་བཞག་སྟེ་མི་སྟོང་ཕྲག་མང་པོར་ལོག་སྤྱོད་པའི་ཞྭ་མོ་གཡོགས་ནས་མྱངས་པ་རེད། ༡༩༩༧ ལོར་ཚིག་དེ་མའོ་སྐབས་སུ་བྱུང་པ་རེད་དེ་ཡག་པོ་མི་འདུག་ཟེར་ནས་དེའི་ཚབ་ཏུ་རྒྱལ་ཁབ་ཀྱི་བདེ་འཇགས་བཞག་པ་རེད། དེ་གཉིས་ཀྱི་ནག་ཉེས་དང་ལ་ངོས་འཛིན་དང་ཉེས་ཆད་གཏོང་སྟངས་གཅིག་པ་ཆགས་བསྡད་ཡོད་པ་རེད། ཅེས་བརྗོད་བྱུང་།

མཇུག་ཏུ་ཁོ་མོར། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ངོས་ནས་བོད་ནང་གི་གནས་ཚུལ་སྐོར་ལ་ཉམས་ཞིབ་བྱེད་སྟངས་དང་གནས་ཚུལ་བསྡུ་རུབ་བྱེད་ཕྱོགས་གང་འདྲ་ཡོད་མེད་དྲིས་པར། གནས་ཚུལ་ཁུངས་གནས་གལ་ཆེ་ཤོས་དེ་བོད་ནས་ཚུར་སྐྱབས་བཅོལ་ལ་ཡོང་མཁན་དེ་ཚོ་རེད། དེ་ནས་རྒྱ་ནག་གཞུང་འབྲེལ་དྲ་ཚིགས་ཁག་ནང་བཏོན་པའི་ཁྲིམས་དང་ཡིག་ཆ་དེ་དག་རེད། གསུམ་པ་དེ་ཕྱི་རྒྱལ་ཁག་ནང་ཡོད་པའི་རྒྱ་ནག་ལ་ཉམས་ཞིབ་བྱེད་མཁན་ཚོས་བཏོན་པའི་སྙན་ཐོ་སོགས་རེད། གང་ཡིན་ཟེར་ན། རྒྱ་ནག་གི་སྲིད་ཇུས་དང་ཁྲིམས་སྒྲིག་སྐོར་གྱི་ཡིག་ཆ་དེ་ཚོ་ཀློག་སྐབས་གློ་བུར་དུ་ནང་དོན་གོ་ཁག་པོ་འདུག དེ་དག་གི་གོ་དོན་རྟོགས་པར་རྒྱ་ནག་ལ་ལོ་མང་ཉམས་ཞིབ་གནང་མཁན་མཁས་དབང་ཚོའི་རྩོམ་ཡིག་དང་འགྲེལ་བཤད་སོགས་ལ་གཞི་འཇོག་གི་ཡོད། གཞན། ཕྱི་རྒྱལ་ཡུལ་སྐོར་སྤྲོ་འཆམ་པ་ཚོ་བོད་ནང་བསྐྱོད་པའི་དངོས་མཐོང་གནས་ཚུལ་རེད། དཔེར་ན། ད་ལོ་ཧྥ་རན་སིའི་གསར་འགོད་པ་བོད་ནང་དུ་གསང་འཛུལ་བྱས་ཏེ་དངོས་ཡོད་གནས་ཚུལ་མང་པོ་ཞིག་བརྙན་པར་བརྒྱབ་ཡོད་པ་རེད། དེ་མིན། ཕྱི་རྒྱལ་གྱི་ཚགས་པར་སོགས་ལ་ཁུངས་དེ་ཙམ་བཅོལ་ཐུབ་ཀྱི་མི་འདུག གང་ཡིན་ཞེ་ན། མཚམས་རེར་ཕྱི་རྒྱལ་གྱི་གསར་འགོད་པ་ཁ་ཤས་ཀྱིས་བོད་ནང་གི་དངོས་ཡོད་གནས་ཚུལ་མ་ཤེས་པར་གང་བྱུང་བྲིས་ཡོང་གི་འདུག ཅེས་བརྗོད་བྱུང་།

གསར་འགོད་པ། ལྷ་སྐྱབས་རྒྱལ།

དུས་བབ་དྲ་བ་ནས།