མི་ ༥༢༩ ལ་སྲོག་ཁྲིམས།

དེ་རིང་ཨི་ཇིབ་ཁྲིམས་ཁང་ཞིག་གིས་ཕྱིར་འབུད་བཏང་བའི་སྲིད་འཛིན་མོར་སིར་རྒྱབ་སྐྱོར་བྱེད་མཁན་གྱི་མི་ ༥༢༩ ལ་སྲོག་ཁྲིམས་བཅད་ཡོད་འདུག

དེ་རིང་ཕྱི་ཚེས་ ༢༤ ཉིན་གྱི་སྔ་དྲོར་ཨི་ཇིབ་རྒྱལ་ས་ཁེད་རོབ་ཀྱི་ལྷོ་ཕྱོགས་ས་གནས་མེན་ཡྰ་ (Minya) ཁྲིམས་ཁང་གིས་ཕྱིར་འབུད་བཏང་བའི་སྲིད་འཛིན་

མོར་སི་ (Morsi) ལ་རྒྱབ་སྐྱོར་གནང་མཁན་དང་། ཁ་ཆེ་སྤུན་ཟླ་ཚོགས་པའི་ཚོགས་མི་ ༥༢༩ ཡིས་འཇབ་རྒོལ་བྱས་ཏེ་ཉེན་རྟོག་པ་དང་མི་བསད་པ། གཞུང་དངོས་གཏོར་བཤིག མི་མང་ལ་ངན་སྐུལ་བྱས་པའི་ཉེས་མིང་འོག་སྲོག་ཁྲིམས་བཅད་ཡོད་འདུག

ཁྲིམས་རྩོད་པ་ཛ་རེ་ (Mohammed Zarie) ལགས་ཀྱིས་རོའུ་ཊར་གསར་འགོད་པར། ཐེངས་འདིའི་ཁྲིམས་ཁང་གི་ཐག་གཅོད་དེ་སྡུག་རྩུབ་ཅན་ཞིག་ཡིན་པ་དང་ཁས་ལེན་གནང་དཀའ་བས་ཡང་བསྐྱར་མཐོ་རིམ་ཁྲིམས་ཁང་ལ་ཞུ་གཏུགས་བྱ་རྒྱུ་ཡིན་པ་དང་། ལྷག་པར་དུ་ཨི་ཇིབ་ཀྱི་ཁྲིམས་ཁང་སྲིད་གཞུང་གི་ཤ་འཁོན་ལེན་པའི་ལག་ཆ་ཆགས་ཡོད་སྟབས། དེ་རེབ་ཀྱི་ཐག་གཅོད་འདི་ལོ་རྒྱུས་ནང་མིག་དཔེ་ངན་པ་ཞིག་ཆགས་ཡོད་ཅེས་བརྗོད་འདུག

ན་ནིང་ཟླ་ ༧ པའི་ནང་ཨི་ཇིབ་དམག་སྤྱི་སེ་སེ་ (Abdel Fattah al-Sisi ) ལགས་ཀྱིས་སྲིད་འཛིན་མོར་སི་ (Morsi) ཕྱིར་འབུད་བྱས་རྗེས། བར་བརྒལ་སྲིད་གཞུང་གིས་ཁ་ཆེ་སྤུན་ཟླ་ཚོགས་པ་འཇིགས་སྐུལ་རིང་ལུགས་པར་ངོས་འཛིན་བྱས་ཏེ་སྒོ་བརྒྱབ་ཡོད་པ་མ་ཟད། སྲིད་དོན་ཚོགས་པའི་གནད་ཡོད་མི་སྣ་དང་ཚོགས་མི། རྒྱབ་སྐྱོར་བྱེད་མཁན་ཁྱོན་མི་ ༡༢༠༠ ལྷག་ལ་ཉེས་མིང་སྣ་ཚོགས་འོག་འཛིན་བཟུང་ཁྲིམས་ཆད་བཏང་ཡོད་འདུག

གནད་དོན་དབྱེ་ཞིབ་པ་ཚོས། དམག་དཔུང་གི་རྒྱབ་རྟེན་ཡོད་པའི་སྲིད་གཞུང་གིས་ཁ་ཆེ་སྤུན་ཟླ་ཚོགས་པ་རྩ་མེད་བཏང་ནས་ཕྱིར་འབུད་བཙོན་འཇུག་བྱས་པའི་སྲིད་འཛིན་མོར་སི་ལ་དགའ་མོས་ཡོད་མཁན་ཚོར་ཨི་ཇིབ་ཀྱི་སྲིད་དོན་ནང་གོ་སྐབས་མེད་པ་བཟོ་རྒྱུ་ཡིན་པ་བདེན་དཔང་ར་སྤྲོད་བྱས་ཡོད་ཅེས་བརྗོད་འདུག

གསར་འགྱུར་བརྒྱུད་ལམ་ཁག་ནང་སྲིད་གཞུང་གིས་དུས་རྒྱུན་ཁ་ཆེ་སྤུན་ཟླ་ཚོགས་པས་དྲག་སྤྱོད་དང་འཇིགས་སྐུལ་ཚོགས་པ་རྩ་འཛུགས། གཞུང་དངོས་བཙན་འཕྲོག་བྱས་པའི་སྐྱོན་འཛུགས་བྱས་ཀྱང་། ཁ་ཆེ་སྤུན་ཟླ་ཚོགས་པས་དྲག་སྤྱོད་དང་འབྲེལ་བའི་འབར་རྫས་གས་གཏོར་སོགས་ལ་འབྲེལ་བ་གང་མེད་ཅེས་ཁས་ལེན་བྱས་མེད་ཚུལ་སོགས་བཀོད་འདུག

སང་ཉིན་ཡང་བསྐྱར་ཁྲིམས་ཁང་དེའི་ནང་ཁ་ཆེ་སྤུན་ཟླ་ཚོགས་པའི་ཚོགས་གཙོ་སྐུ་ཞབས་བྷེ་ཌེ་ (Mohammed Badie) དང་། ས་གནས་མེན་ཡྰ་ (Minya) ཡི་མགོ་ཁྲིད་མི་སྣ་ཁག་ཅིག་གཙོས་ཁྱོན་མི་ ༧༠༠ ལ་ཁྲིམས་བཤེར་བྱ་རྒྱུ་ཡིན་འདུག

གསར་འགོད་པ། ལྷ་སྐྱབས་རྒྱལ།

དུས་བབ་དྲ་བ་ནས།།